HECHOS 11
11
Jerusalenpi tandanacushca criccunaman imalla tucushcata
Pedro huillashcamanta
1Diosmanta alli huillaita mana israelcunapish*f** crishcatami, Jesús acllashca huillaccunapish, Judea llactapi causac criccunapish yachac chayarcacuna. 2Chaimanta Jerusalenman Pedro cuticpica, circuncisionta*f** ruhuac criccunaca paita rimarcacuna. 3Paicunaca:
—¿Ima nishpatac canca chai manapish circuncisionta ruhuaccunapac huasiman rishpa, paicunahuan micurcangui?— nishpa rimarcacuna.
4Shina rimacpimi, Pedroca tucui imalla tucushcata callarimanta alli parlashpa:
5—Ñucaca Jope pueblopi Taita Diosman mañacushpami, muscuipi shina ricushpaca, jatun lienso chuscu puntapi huatashca shina, jahua pachamanta shamushpa ñucapacman cuchuyamuctami ricurcani. 6Chaita alli ricushpaca, charina animalcuna, sachapi causac p'iña animalcuna, allpata aisarishpa puric animalcuna, shinallatac alasyuc animalcunapish chaipi cactami ricurcani. 7Chaita ricucucpica: ‘Pedro, jatari. Caicunata huañuchishpa micui’ nishcami uyarirca. 8Shina nicpi ñucaca: ‘Mana, Apunchic Jesús. Israelcuna*f** millashpa, mana micuna cashcataca jaicapi mana micushcanichu’ nircanimi. 9Ñuca chashna nicpi, jahua pachamanta cutin rimashpaca: ‘Dios micunallami nishcataca, mana micunachu nishpaca, ama nichu’ nishcami uyarirca. 10Chai lienso quimsa cutin ricurishpaca, jahua pachallamantac cutin chingarircallami.
11Shina cacpica, Cesarea pueblomanta cachashca quimsa runacuna ñuca maipi cac huasiman mashcashpa chayarcacunallami. 12Chashna paicuna shamucpica, Diospac Espiritumi ñucataca: ‘Ama caita chaita nirishpa, paicunahuan rilla’ nirca. Caipi cac sucta criccunandicmi, chai cachac runapac huasimanca rircani. 13Chai runaca paipac huasipi ángel ricurishpa, cashna nishcatami parlashca carca: ‘Pedro nishca Simonta Jope pueblomanta pushamuchun cachai. 14Canpish, cambac huasi familiacunandic ima shina quishpirina cashcataca paimi huillanga’ nishca carca. 15Ña ñuca paicunaman huillai callaricpica, sarun ñucanchicman shamuc shinallatacmi, Diospac Espirituca paicunamanpish shamurca. 16Chashna shamucpimi: ‘Juanca yacullahuanmi bautizarca. Ashtahuanpish cancunaca asha punzhacuna q'uipaca, Diospac Espirituhuanmi bautizashca canguichic’ nishpa, Apunchic Jesús huillashcataca yuyarircani. 17Apunchic Jesucristota ñucanchic cricpi, Taita Dios paipac Espirituta cushca shinallatacmi, paicunamanpish curca. Taita Dios chashna ruhuacucta jarcangapacca ñucaca, ¿imatac caniyari?— nirca.
18Chashna nicta paicuna uyashpaca, ña mana imata nircacunachu. Ashtahuanpish:
—¡Mana israelcunapish Taita Diosman cutirishpa, huiñai causaita charichunmi saquishca!— nishpami, Taita Diostaca “allimari cangui” nircacuna.
Antioquía pueblopi causac tandanacushca criccunamanta
19Estebanta huañuchishpaca, caishuc criccunatapish llaquichi callaricpimi, maijan criccunaca Fenicia llactamanpish, Chipre llactamanpish, Antioquía pueblomanpish urata janacta miticushpa rircacuna. Paicuna chai llactacunaman rishpaca, quishpirinamanta alli huillaitaca israelcunallamanmi*f** huillarcacuna. 20Chashna cacpipish Chipre llactamanta, Cirene pueblomanta, Antioquía puebloman shamuc maijan criccunaca, mana israelcunamanpish*f** Apunchic Jesusmanta alli huillaitaca huillarcacunallami. 21Taita Dios paicunahuan cacpimi, achcacuna Apunchic Jesusta crishpa, ñaupa mana alli causaita saquircacuna.
22Jerusalenpi tandanacushca criccuna chaita yachashpaca, Bernabetami Antioquía puebloman cacharcacuna. 23Bernabé chaiman chayashpaca, Taita Diosca mai c'uyashpa, quishpichishcata ricushpaca cushicurcami. Paica tucui criccunatami: “Apunchic Jesusllata tucui shunguhuan alli cazunguichic” nishpa cunarca.
24Bernabeca alli runa, alli cric, Diospac Espíritu paipac shungupi junda cacpimi, pai huillacpica achca gentecuna Apunchic Jesusta crircacuna. 25Chashna achcacuna cricpimi, Bernabeca Tarso pueblopi Saulota mashcangapac rirca. Chaipi tupashpaca, Antioquía pueblomanmi pushamurca. 26Chaipica huata jundatami achcacunaman yachachishpa, criccunahuan tandanacushpa causarcacuna. Chai pueblopimi criccunataca: “Cristota c'aticcunami” nishpa, punta c'ayai callarircacuna.
27Chai punzhacunapimi, Diosmanta huillaccunaca Jerusalenmanta Antioquía puebloman shamurcacuna. 28Chai huillaccunapuramantaca Agabo runa shayarishpami, Diospac Espíritu yuyaita cucpi: “Tucui llactacunapi ima mana p'ucucpi yarcaimi tiyanga” nishpa huillarca. Chaica jatun mandac Claudio mandacui punzhacunapimi, chashna tucurca. 29Chashna huillacpimi, Antioquía pueblopi causac criccunaca paicuna imallata cui pudishcataca, Judea llactapi causac criccunaman cuchun cachanata yuyarircacuna. 30Paicuna ña chashna ruhuashpaca, Judea llactapi causac criccunata pushaccunaman cuchunmi, Bernabeman, Sauloman mingashpa cacharcacuna.
Currently Selected:
HECHOS 11: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
