HECHOS 12
12
Jacobota huañuchishcamanta,
shinallatac Pedrota carcelpi churashcamanta
1Chai punzhacunallatacmi jatun mandac Herodesca tandanacushca criccunata mana ricunachishpa, llaquichingapac maijancunataca japichi callarirca. 2Chashna japichishpaca, Juanpac huauqui Jacobotami espadahuan huañuchichun mandarca. 3Chashna ruhuacta ricushpa, Jesusta mana cric israelcuna*f** allimi nicpica, Pedrotapish japichircami. Chai punzhacunaca, levadura illaclla tandata micuna punzhacunami carca. 4Herodesca Pedrota japichishpaca, carcelpimi churachirca. Shinallatac chunga sucta soldadocunataca, chuscu chuscu chullayanacushpa cuidachunmi churarca. Pedrotaca gentecuna huañuchilla nichunmi, pascua*f** punzhacuna q'uipaca tucuipac ñaupaman llucchinata yuyarca. 5Chaimantami Pedrotaca carcelpi alli cuidaracurcacuna. Chashna cuidacucpipish, criccunaca Taita Diosman Pedromanta mañanataca manatac saquircacunachu.
Carcelmanta Pedrota ángel llucchishcamanta
6Mandac Herodesca: “Cayami llucchishpa, gentecunapac ñaupapi ricuchigrisha” nicui tutami, Pedroca ishcai cadenacunahuan huatashca, ishcai soldadocunapac chaupipi suiñucurca. Caishuc soldadocunaca cárcel pungupimi cuidacurcacuna. 7Chashna cuidacucpipish, Mandac Dios cachashca ángel shamucpica, cungailla chai ucuca achiclla tucurcallami. Chai angelca: “¡Utca jatari!” nishpami, Pedrotaca cuyuchishpa ricchachirca. Chashna nicpica, huatashca cadenacunaca Pedropac maquicunamanta cacharirishpa urmarcallami. 8Chai angelca: “Chumbilliri, cambac ushutatapish churari” nircami. Pedro chashna ruhuacpica, cutin chai angelca: “Jahualla churanatapish churarishpa, ñucata c'ati” nirca.
9Chashna nicpi, Pedroca chai angelta c'atishpami llucshirca. Paica ángel chashna llucchicushcataca mana yuyarcachu, ashtahuanpish “muscuillapimi ricucuni” yuyarcami. 10Paicuna llucshishpa, punta cuidacuc soldadocunatapish, q'uipata cuidacuc soldadocunatapish pasashpa, canzhaman llucshina jatun fierro punguman ña chayacucpica, chai punguca paillatac pascarircallami. Paicuna ñanman llucshishpa ashata ricucpica, chai angelca chingarircallami. 11Chaimantami Pedro ña yuyaita japishpaca: “Ñucata huañuchingapac chapacuc israelcunapac*f** maquimantapish, Herodespac maquimantapish quishpichichunmi, Mandac Diosca paipac angelta cachashca” nirca.
12Pedro chashna yuyaita japishca q'uipaca, Marcos nishca Juanpac mama Mariapac huasimanmi rirca. Chai huasipica achca criccunami tandanacushpa, Taita Diosman mañacushca carca. 13Ñan pungupi Pedro huactacpica, Rode huarmi huambrami pi c'ayacushcata ricungapac rirca. 14Chai huambraca Pedropac rimaita ricsishpami, cushicushpa punguta manarac pascashpa:
—¡Pedromi cashca!— nishpa, huillangapac callparca.
15Chashna huillacpica:
—Musparingui shinami— nicpi, chai huambraca:
—¡Mana, paitacmi!— nirca.
Chashna nicpipish paicunaca:
—Mana paichu canga. Paihuan puric angelmi canga— nircacuna.
16Chaicamanca Pedroca pungupi huactacurcallami. Paicuna punguta pascashpa Pedrota ricushpaca, mancharircacunami. 17Paica maquillahuan “upalla caichic” nishpami, Mandac Dios ima shina paita carcelmanta llucchishpa cachashcata paicunaman parlarca. Chashna parlashpaca:
—Caitaca Jacobomanpish, caishuc criccunamanpish parlanguichic— nishpaca, chaimanta llucshishpa, shuc llactaman rircallami.
18Ña pacaricpi chai cuidac soldadocunaca:
—Pedroca, ¿imashi tucushca canga?— nishpami, caishuc chaishuc mancharinacushpa tapunacurcacuna.
19Herodesca Pedrota mashcachishpa, mana tarishpami, cuidac soldadocunaman alli tapurca. Chashna tapushpa, paicunata ña huañuchichishca q'uipami, Judea llactamanta llucshishpa, Cesarea pueblopi causagrirca.
Herodes huañushcamanta
20Mandac Herodesca Tiro pueblopi, Sidón pueblopi causaccunahuanmi munai p'iñarirca. Chashna p'iñarishpami, chai llactapi causaccunamanca paicuna imalla randina cashcataca ña mana c'atuchirca. Chaimantami paicunaca Herodes mandachun churashca Blasto runahuan shuc yuyailla tucushpa, sumacta causanata Herodesmanca mañagrircacuna. 21Chashna mañacpica, shuc punzhapacmi c'ayarca. Chai punzhapimi Herodesca mandangapac churarinata churarishca, jatun tiyarinapi tiyarishpa, paicunataca sumacta rimarca. 22Chashna rimacta tucui chaipi caccuna uyashpaca: “¡Canca Dios shinami rimangui, mana runa shinachu rimangui!” nishpa, munai caparircacuna. 23Chashna nicta uyashpa, paica ashtahuan “Dios shinami cani” nirishcamantaca, Mandac Dios cachashca ángel ung:uita churacpi, Herodesca c'urucuna micushcami huañurca.
24Ashtahuanpish Diosmanta alli huillaita tucui llactacunapi huillacpica, achcacunami crishpa c'atircacuna.
25Bernabepish, Saulopish paicunaman mingashpa cachashcata cushpaca, Jerusalenmanta Marcos nishca Juantapish pushashpami, cutinllatac Antioquía puebloman cutircacuna.
Currently Selected:
HECHOS 12: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
