HECHOS 13
13
Bernabepish, Saulopish shuctac llactacunapi huillagrishcamanta
1Antioquía pueblopi causac tandanacushca criccunapurapica, Diosmanta huillaccunapish, yachachiccunapish tiyarcami. Paicunapurapica Bernabepish, Niger nishca Simonpish, Cirene pueblomanta Luciopish, Galilea llactata mandac Herodeshuan huiñac Manaenpish, Saulopish carcami. 2Shuc punzha paicuna ayunashpa, Taita Diosman mañashpa tiyacucpimi, Diospac Espirituca: “Bernabetapish, Saulotapish ñuca ruhuai nishcata ruhuachun cachaichic. Paicunataca ñami acllarcani” nirca.
3Ña ayunashpa mañashca q'uipaca, Bernabepac, Saulopac uma jahuapi maquita churashpami: “Allilla ringuichic” nishpa cacharcacuna.
Chipre llactapi alli huillaita huillashcamanta
4Chashna Diospac Espíritu paicunata cachacpica, Bernabeca Saulondicmi Seleucia puebloman chayarcacuna. Seleuciamantami, barcopi tiyarishpa Chipre llactaman rircacuna. 5Chai llactapi cac Salamina puebloman chayashpaca, israelcuna*f** tandanacuna huasicunapimi Diosmanta alli huillaita huillarcacuna. Marcos nishca Juanpish, paicunata ayudashpami purirca. 6Tucui chai Chipre llactapi huillashpa puricushpaca, Pafos pueblomanmi chayarcacuna. Chaiman chayashpaca, israelcunapuramanta Barjesús brujo runahuanmi tuparcacuna. Paica: “Diosmantami huillacuni” nishpa, llullac runallami carca. 7Chai brujoca Chipre llactata mandac Sergio Paulo runahuanmi apanacuc carca. Chai mandacca alli yachac cashpami, Bernabetaca Saulondic shamushpa Diosmanta huillachun c'ayac cacharca. 8Paicuna ña huillangapac shamucpica, chai brujoca ama crichunmi chai mandactaca jarcarca. Chai brujollatacmi griego*f** rimaipica Elimas shutipish carca. 9Saulopish Pablo shutimi carca. Paipac shungupi Diospac Espíritu junda cacpimi, chai brujota ricurashpaca:
10—Canca diablopac huahua cashpami, tucui mana allillata ruhuashpa allitaca p'iñashpa, llullashpalla causangui. Mandac Dios munashca shina alli causasha nicuccunataca, ¿maicamantac pandachicungui? 11Cunanca Mandac Dios canta llaquichicpimi, canca imata mana ricungui. Tauca punzhacunacamanmi, inti achicyachishcatapish mana ricungui— nirca.
Chashna nincami, brujopac ñahui amsayacpi, imata mana ricui pudishpa, maquimanta maijan aisac shamuchun mañacurca. 12Mandac Sergioca Apunchic Jesusmanta yachachishcata uyashpa, shinallatac chashna tucushcata ricushpacarin, mana amirishpami crirca.
Pabloca Bernabendic, Pisidia llactapi cac
Antioquía pueblopi huillashcamanta
13Pabloca paihuan puriccunandic barcopi huichicushpa, Pafos pueblomanta ricpica, Marcos nishca Juanca Jerusalenmanmi cutirca. Paicunaca Panfilia llactapi cac Perge pueblomanmi chayarcacuna. 14Pabloca Bernabendic Pergemanta llucshishpaca, Pisidia llactapi cac Antioquía pueblomanmi rircacuna. Chaiman chayashpaca, samana punzha*f** cacpimi, israelcuna*f** tandanacuna huasiman yaicushpa tiyarircacuna. 15Chaipi cacpimi, mandashcacunata Dios quillcachishcatapish, ñaupa huillaccunaman Dios quillcachishcatapish uyashca q'uipaca, chai tandanacuna huasipi mandaccunaca:
—Huauquicuna. Imata cunashun nishpaca, cunaichiclla— nichun cacharcacuna.
16Shina nicpi Pabloca jatarishpa, maquihuan “upalla caichic” nishpami, paicunataca:
—Tucui caipi cac Israel huauquicunalla, Taita Diosta manchac caishuccunapish, ñuca ima nishcata uyaichic. 17Ñucanchic israelcunataca Taita Diosmi ñucanchic ñaupa taitacunamanta pacha ñaupaman acllarca. Egipto llactaman rishpa causacucpipish, pai acllashcacunataca mana saquishpami, ashtahuan mirachirca. Chai q'uipami, tucui imatapish ruhuaclla Taita Diosca paicunataca chai llactamanta llucchirca. 18Chashna llucchishpaca, shitashca pambapi chuscu chunga huatata paicuna mana allicunata ruhuacpipish, Taita Diosca mana saquircachu. 19Chaipimi Taita Diosca Canaán nishca canchis llactacunapi causaccunata huañuchichishpa, ñucanchic ñaupa taitacunamanca chai allpataca curca. 20Chai q'uipaca, chuscu pasac pichca chunga huata shinatami, alli mandaccuna mandashca causachun ñaupa huillac Samuel mandana punzhacunacaman churarca. 21Samuel mandacui punzhacunapimi, israelcunaca: ‘Shuc jatun mandactami ninchic’ nishpa mañarcacuna. Chashna mañacpimi, Taita Diosca Cis runapac churi Saulta chuscu chunga huatata mandachun curca. Chai Saulca Benjamín aillumantami carca. 22Chai q'uipami Saulta llucchishpa, paipac randica Davidta jatun mandac cachun churarca. Taita Diosca Davidmanta nishpaca: ‘Isaipac churi Davidllami ñuca tucui ima nishcata ruhuashpa, ñuca munashca shina mandanga’ nirca. 23Israelcunata quishpichichunca, Davidpac huahua huahuacunapuramantami Taita Dios cusha nishca shinallatac, Jesustaca curca. 24Jesús manarac shamucpimi, Juanca israelcunaman huillashpaca: ‘Juchayuc cashcamanta llaquirishpa, Taita Diosman cutirishpa bautizarichic’ nirca. 25Juan ña pai huillana cashcata pactachicushpaca: ‘Cancunaca ñucataca, ¿pi cashcatatac yuyanguichic? Ñucaca mana cancuna shuyacushcachu cani. Shucmi ñucapac q'uipa shamunga. Ñucaca paipac ushuta huatashcallatapish mana pascaipacmi cani’ nishpami huillarca.
26Ñucanchic taita Abrahammanta mirarishca huauquicunalla, shinallatac Taita Diosta manchac caishuccunapish, cai quishpirinamanta huillashcaca cancunamanmi. 27Jerusalenpi causaccunapish, paicunata mandaccunapish, Jesús pi cashcataca mana yacharcacunachu. Diosmanta ñaupa huillaccuna huillashcata samana punzhacunapi rizashcata uyashpapish, mana entendishpami Jesusta huañuchishpaca, paicunallatac chai huillaccuna huillashcataca pactachircacuna. 28Paicunaca Jesusta imamanta mana huañuchi pudishpaca, mandac Pilato huañuchichichunmi mañarcacuna. 29Jesusmanta Dios quillcachishcapi tucui nishcacunata pactachishca q'uipaca, chacatashcamanta uricuchishpami enterrarcacuna. 30Paicuna chashna ruhuacpipish, Taita Diosca huañushcacunapuramantami causachirca. 31Chashna causachicpica, utcapi Galilea llactamanta Jerusalenman paihuan puriccunallamanmi, tauca punzhacunacaman ricurirca. Cunanca chaita ricuccunami, tucui ñucanchic israelcunamanca paimanta huillacun.
32Ñucanchic ñaupa taitacunamanmi: ‘Cancunapac huahua huahuacunaman Quishpichicta cushami’ Taita Dios nishca carca. Chai Quishpichicmantami cunanca cancunaman huillacunchic. 33Jesusta causachishpa ñucanchicman cushpami, Taita Dios chai cusha nishcataca pactachishca. Chaimantami Taita Diosca q'uipa Salmopica: ‘Canca ñuca Churimi cangui. Cunanca ñuca Huahuatacmi cangui’ nin. 34Shinallatac Taita Diosca: ‘Davidta llaquishpa, allicunata cusha’ nishcamantami, Jesusta huañushcacunapuramanta causachishpaca, ña mana cutin huañushpa ismuchun paipac cuerpotaca mana saquircachu. 35Davidpish shuc Salmopica: ‘Cambaclla causactaca, cuerpo ismuchunpish mana saquinguichu’ ninmi. 36Davidca pai causai punzhacunapi causaccunataca, Dios munashca shinami servirca. Chashna cashpapish paica huañurcami. Chashna huañucpica, paipac ñaupa taitacuna enterrashcapimi enterrarcacuna. Paipac cuerpopish ismurcami. 37Ashtahuanpish Taita Dios causachishca Jesuspac cuerpoca, manatac cutin huañushpa ismurcachu. 38Caipi tandanacushca tucui huauquicunalla, cai ñuca huillashcata alli yachaichic: Cancuna Jesusta cricpimi, Taita Diosca cancunapac juchacunata perdonanga. 39Moisés mandashcacunata pactachishpaca, Taita Dioshuanca mana alli tucui pudishcanguichicchu, ashtahuanpish Jesusta cricpimi, Taita Diosca paihuan alli tucuchun pitapish chasquin. 40Chaimanta alli yuyarichic. Ñaupa huillaccunaman Taita Dios ima shina huillachishcaca, pacta cancuna chashna tucunguichicman. Paica cashnami nishca:
41‘Uyaichic, ñuca ima nishcata
mana cazushpa burlaccuna.
Mancharishpa, maipi miticuichic.
Cancuna causacuc punzhacunapica,
mancharinacunatami ruhuasha.
Chaita pi huillacpipish,
mana cringuichicchu’ nishcami— nirca.
42Chashna yachachishpa Pablo, paihuan caccunandic tandanacuna huasimanta llucshicucpica, mana israelcunaca:*f**
—Cunan shina samana punzhapish, caillamantatac yachachic shamunguichicyari— nircacuna.
43Ña tucui chaipi caccuna llucshicpica, tauca israelcunapish, israelcuna yachachishcata alli c'aticcunapish Pablota, Bernabetami c'aticurcacuna. Chai c'aticcunataca:
—Taita Diosta tucui shunguhuan alli c'atinguichic. Taita Dios mai c'uyacushcatapish ama cungaringuichicchu— nishpami, cunashpa saquircacuna.
44Chai q'uipa, samana punzha chayamucpica, chai pueblopi causaccunaca maijancunalla saquirishpami, achcacuna Diosmanta alli huillaita uyangapacca tandanacurcacuna. 45Chashna mana israelcunapish achcacuna tandanacushcata israelcuna ricushpami, p'iñarishpa: “Pablo yachachishcaca yangallami” nishpa c'amircacuna.
46Chashna rimacucpipish, Pabloca Bernabendic mana manchashpami, cashna nishpa huillarcacuna:
—Cancuna israelcunamanracmi, Diosmanta alli huillaita huillana carcanchic. Cai huillashcata cancuna mana uyashun nishpa, huiñai causaita mana chasquishun nircanguichicchu. Chaimanta cunanllatacmi, mana israelcunaman huillangapac rigrinchic. 47Mandac Diosca ñucanchicta mandashpaca:
‘Mana israelcunaman
luz shina achicyachichunmi,
cantaca churarcani.
Tucui cai pachapi causaccunapish
can huillashcamanta quishpirichunmi,
chashna churarcani’ nishcami— nircacuna.
48Chashna nicta mana israelcuna uyashpaca: “¡Diosmanta alli huillaica sumacmari!” nishpami, munai cushicurcacuna. Huiñai causaita charichun Taita Dios acllashcacunaca, tucuimi crircacuna. 49Chashnami, Diosmanta alli huillaitaca tucui chai llactapi huillarcacuna. 50Ashtahuanpish: “Chai runacunata c'atishpa cachashunchic” nishpami, israelcunaca gentecunapac alli nishca, Diosta yuyaric huarmicunatapish, shinallatac chai pueblota mandaccunatapish cunarcacuna. Chaimantaca Pablotapish, Bernabetapish llaquichishpami, chai llactamantaca llucchishpa cacharcacuna. 51Chashna ruhuacpica, mana chasquishun nishcata ricuchingapacmi, chaquipi c'atirishca allpatapish chaspishpa shitashpa, Iconio puebloman rircacuna. 52Chai pueblopi causac criccunaca Diospac Espíritu shungupi junda cacpimi, munai cushicurcacuna.
Currently Selected:
HECHOS 13: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
