HECHOS 14
14
Pabloca Bernabendic Iconio pueblopi huillashcamanta
1Iconio pueblopipish Pabloca Bernabendicmi israelcuna*f** tandanacuna huasiman yaicushpaca, Diosmanta alli huillaita huillarcacuna. Chashna huillacpimi, israelcunapish, mana israelcunapish*f** achcacuna Jesusta crircacuna. 2Ashtahuanpish Jesusta mana cric israelcunaca criccunahuan ama apanacuchunmi, mana israelcunaman panda yuyaita curcacuna. 3Chashna cacpipish, Pabloca Bernabendic Jesús paicunahuan cashcata yachashpa, chai pueblopi unaicaman saquirishpami: “Taita Diosca mai c'uyacmi” nishpa, mana manchashpa huillarcacuna. Apunchic Jesús paicunahuan cacpimi, pi mana ruhuaipaccunatapish, pi mana ricushcacunatapish ruhuarcacuna. 4Chashna cacpimi, chai pueblopi causaccunaca maijancunaca israelcunapura, maijancunaca Jesús acllashca huillaccunapura tucushpa chaupirircacuna. 5Chashna tucushpaca israelcunapish, mana israelcunapish mandaccunahuan tandanacushpami: “Paicunataca c'amishpa, rumicunahuan shitashun” ninacurcacuna. 6Ashtahuanpish chaita yachashpami, Pabloca Bernabendic miticushpa, Licaonia llactapi cac Listra pueblomanpish, Derbe pueblomanpish, shinallatac chai pueblocuna cuchulla llactacunamanpish rircacuna. 7Chaicunapipish alli huillaitaca huillarcacunami.
Listra pueblopi Pablota rumihuan shitashcamanta
8Listra pueblopica, huacharishcamanta pacha mana puric runami causarca. Chai runaca chaqui tandarishca cashcamantami, mana puric carca. 9Paica Pablo tucui imalla huillashcataca allimi uyacurca. Chashna uyashpa, pai alliyana cashcata cricucta Pablo ricushpaca, 10sinchihuan rimashpami:
—¡Jatarishpa shayari!— nirca.
Shina nicpi, chai runaca jatarishcahuan puri callarircallami. 11Tucui chaipi caccunaca Pablo chashna ruhuacta ricushpami, Licaonia rimaipi rimashpa:
—¡Dioscunami gentecuna shina tucushpa, ñucanchicpacman jahua pachamanta shamushca!— nishpa caparircacuna.
12Bernabetaca “Júpiter diosmi” shinallatac Pablotaca huillac cashcamanta “Mercurio diosmi” nircacuna. 13Chai puebloman yaicuna pungupica, Júpiter diosta adorana huasimi tiyarca. Chai huasipi cac curami tucui chaipi caccunandic huagracunatapish, sisacunatapish punguman aparcacuna. Chashna apamushpaca, diosman cuc shinami, Pablopac Bernabepac ñaupapi huagracunata huañuchishpa, rupachinata yuyarcacuna. 14Chashna ruhuagricucta ricushpaca, Pablopish, Bernabepish llaquirishcata ricuchingapacca churanacunata lliquirishpa, chaipi caccunapac chaupiman yaicushpami:
15—¡Uyaichic! ¿Imapactac chashna ruhuashun ninguichic? Ñucanchicca cancuna shina runacunallami canchic. Cancuna cashna yangalla ruhuanata saquishpa, causac Taita Diosman cutirichunmi, alli huillaita huillangapac shamurcanchic. Paica jahua pachatapish, cai pachatapish, mama cuchatapish, tucui ima tiyactapish ruhuacmi. 16Taita Diosca ñaupamanca tucui gentecuna paicuna munashca shina causachun saquircallami. 17Chashna causacucpipish, Taita Diosca tamiahuan granocunata p'ucuchishpa, mana nicta carashpami ñucanchictaca cushichicun. Chashna allita ruhuashpami, pai ima shina cashcataca ricuchin— nircacuna.
18Chashna rimashcallahuan mana jarcaipac shina cacpipish, diosman cuc shina paicunapac ñaupapi huagrata huañuchishpa rupachichunca, mana saquircacunachu.
19Antioquía pueblomantapish, Iconio pueblomantapish maijan israelcuna*f** shamushpaca, gentecunata jatarichishpami, Pablotaca rumicunahuan shitashpa, huañunalla tucungacaman macarcacuna. Chaimantaca: “Ñami huañun” nishpa, siricta aisashpa, chai pueblomanta llucchircacuna. 20Chashna ruhuacpipish, criccuna Pablopacman cuchuyashpa, paipac muyundicta shayaricpica, Pabloca jatarishpa, cutinmi chai pueblollamantac yaicurca. Cayandic punzhaca Bernabehuanmi, Pabloca Derbe puebloman rirca.
21Chai Derbe pueblopipish alli huillaita huillacpica, achcacunami crircacuna. Chai q'uipaca, cutinllatacmi Listra puebloman, Iconio puebloman, shinallatac Antioquía puebloman cutircacuna. 22Chai pueblocunaman chayashpa, chaipi causac criccunataca: “Jesusta crishcata mana saquishpa, alli c'atichic” nircacunami. Shinallatac: “Tucui laya llaquicunata apashpami, Taita Dios mandacucmanca yaicuna canchic” nircacuna. 23Shinallatac tandanacushca criccunapurapica, maipipish pushac runacunataca acllarcacunami. Chashna acllashpaca, ayunashpa Taita Diosman mañashpami, paicuna crishca Apunchic Jesusman mingarcacuna.
Pabloca Bernabendic, Siria llactapi cac
Antioquía puebloman cutishcamanta
24Pabloca Bernabendic Pisidia llactata rishpaca, Panfilia llactamanmi chayarcacuna. 25Chai llactapi cac Perge pueblopi Diosmanta alli huillaita huillashpaca, Atalia pueblomanmi rircacuna. 26Chai Atalia pueblomantaca barcopi tiyarishpami, Pabloca Bernabendic Antioquía puebloman cutircacuna. Chai pueblomantami, criccunaca paicunata Taita Dios huacaichichun nishpa mingashca, llucshirishca carcacuna. 27Antioquía puebloman chayashpaca, chaipi causac tucui criccunatami tandachircacuna. Chashna tandachishpami, Taita Dios paicunahuan cacpi ima allicunata ruhuashcatapish, shinallatac mana israelcunacaman*f** quishpirichun Taita Dios saquishcatapish parlarcacuna. 28Pabloca Bernabendicmi chai criccunahuanca unaicaman carcacuna.
Currently Selected:
HECHOS 14: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
