SAN JUAN 13

Yachacuccunapac chaquita Jesús jahuashcamanta

1Pascua*f** punzhapac shuc punzha tiyacpiracmi, Jesusca cai pachata saquishpa paipac Taitahuan tandarigrina cashcataca yacharca. Cai pachapica paita c'aticcunataca yallitami Jesusca c'uyarca. Shina cashpami, tucuringacaman ima shina c'uyac cashcataca ricuchisha nirca. 2Jesusca paipac yachacuccunahuan micushpami tiyacurca. Shina cacpica, diabloca ñami Simonpac churi Judas Iscariotepac shungupica yaicushca carca. Chaimantami Judasca Jesusta japichina yuyailla puricurca. 3Jesusca Taita Dios cachashca shamushcatapish, paipacman cutina cashcatapish, shinallatac pi mana ruhuaipaccunata Taita Dios ruhuachun cushcatapish yacharcami. 4Micucushcamanta jatarishpami, Jesusca jahualla churanata anchuchishpa, shuc liensota chumbillishcapi churarca. 5Chashna ruhuashpaca, yacuta batiapi churashpami, yachacuccunapac chaquita jahuai callarirca. Ña jahuashca q'uipaca, chumbillishcapi churashca liensota japishpami, chaquita chaquichirca. 6Simón Pedropac chaquita jahuagricpimi paica:

—Apunchic Jesús, ¿ñuca chaquitachu canca jahuagringui?— nirca.

7Shina nicpi Jesusca:

—Ñuca cashna ruhuacushcataca manarac entendinguichu, ashtahuanpish q'uipamanmi entendingui— nirca.

8Shina nicpi Pedroca:

—¡Ñuca chaquita jahuachunca, jaicapi mana saquishachu!— nirca.

Shina nicpi Jesusca:

—Cambac chaquita ñuca mana jahuacpica, canca mana ñucapacchu cangui— nirca.

9Shina nicpi, Simón Pedroca:

—Shinashpaca Apunchic Jesús, ama chaquillata jahuaichu. Umatapish, maquitapish jahuaiyari— nirca.

10Shina nicpi Jesusca:

—Maijanpish ña armarishca cashpaca, cutinca mana armarinchu, ashtahuanpish chaquillatami jahuana can. Cancunaca ña chuyanllami canguichic. Shina cashpapish, mana tucuichu chuyanlla canguichic— nirca.

11“Mana tucuichu chuyanlla” nishpaca, maijan paita japichigricushcata yachashcamantami chashnaca nirca. 12Chaquita ña jahuashca q'uipaca churanata churarishpami, cutin mizapi tiyarishpa Jesusca cashna nirca:

—¿Cancunaca imamantatac chashna ruhuashcataca entendinguichic? 13Cancuna ñucata ‘Yachachic’ shinallatac ‘Apunchic Jesús’ nishpaca, allitami ninguichic. Chaica chashnatacmi cani. 14Ñucaca cancunata Mandac shinallatac cancunata Yachachic cashpapish, cancunapac chaquitaca jahuashcanimi. Chaimanta cancunapurapish, caishuc chaishuc chaquitaca jahuanacuna canguichic. 15Cancunapish chashnallatac ruhuachunmi, ñucaca chashna jahuashpa ricuchini. 16Amota servicca mana amota yallichu. Shinallatac maijan cashpapish, cachashca shamucca mana cachactaca yallichu. Chaica chashnatacmi can. 17Cancuna cai ñuca nishcacunata chashnatac cashcata yachashpa pactachishpaca, mai cushicuimi canguichic. 18Mana tucui cancunamantachu nicuni. Maijanlla ñuca acllashca cashcataca yachanimi. Dios quillcachishcapi nishcaca pactanatacmi can. Chaipica: ‘Ñucahuan micucucllatacmi ñucataca p'iñai callarirca’ ninmi. 19Caicuna pactacpi, ñuca pi cashcata cancuna crichunmi, utcaman caicunataca huillacuni. 20Maijanpish ñuca cachashcata chasquicca, ñucatami chasquin. Shinallatac ñucata chasquicca, ñucata cachactami chasquin. Chaica chashnatacmi can— nirca.

Judas Iscariote japichina cashcata Jesús huillashcamanta

21Chaita nishca q'uipami, shungupi munai llaquirishpa Jesusca:

—Cancunapuramanta shucmi ñucataca japichigricun. Chaica chashnatacmi can— nirca.

22Chashna nicpimi, yachacuccunaca Jesús maijanta nicushcatapish mana yachashpa, caishuc chaishuc ñahuipura ricunacurca. 23Yachacuccunapuramanta Jesuspac shuc c'uyashca yachacucmi paihuan quimirishpa tiyacurca. 24Paitami Simón Pedroca: “Chashna nishpaca, ¿pimantatac nicun?” nishpa tapuchun señata ruhuarca. 25Chashna señata ruhuacpimi, chai yachacucca Jesuspacman ashtahuan cuchuyashpaca:

—Apunchic Jesús, ¿chai japichicca pitacyari?— nirca.

26Chashna nicpi Jesusca:

—Maijanmanmi tandata jucuchishpa cugrini, chaimi— nirca.

Chaita nishcahuanmi p'itilla tandata jucuchishpa, Simón Iscariotepac churi Judasman curca. 27Judas tandata japincami, Satanasca*f** paipac shungupi yaicurca. Chai q'uipami Jesusca:

—Can imata ruhuagricushcataca utcashpa ruhuailla— nirca.

28Tucui chai mizapi tiyacuccunamantaca, pipish imamanta Jesús chaita nicushcataca mana entendircacunachu. 29Judasca cullquita tandacmi carca. Chaimantami maijancunaca: “Judastami fiestapac imallata randichun nicunga, mana cashpaca, huacchacunaman cullquita cuchunmi nicunga” nishpa yuyarcacuna. 30Judas ña tandata japishpaca, llucshishpa rircami. Chashna llucshicpica, ñami tuta carca.

Jesús mushucta mandashcamanta

31Judas llucshishpa rishca q'uipami, Jesusca cashna nirca:

—Cunanmi Runa Tucungapac shamushca*f** ñucaca sumacyachishca cagrini. Taita Diospish ñucamantami sumacyachishca cagrin. 32Taita Diosca ñucamanta chashna sumacyachishca cashpaca, Runa Tucungapac shamushca ñucallapitacmi sumac cashcata ricuchinga. Chaitaca ñallami ruhuashpa ricuchinga. 33C'uyashca yachacuccuna, cancunahuanca ashacamanllami cagrini. Cancunaca ñucata mashcanguichicmi. Chashna cacpipish mandac israelcunaman*f** ima shinami nircani, shinallatacmi cancunamanca nini: Ñuca maiman rigricushcamanca, mana rinata pudinguichicchu. 34Mushuc mandashcatami cancunamanca saquini: Caishuc chaishuchuan c'uyanacuichic. Ñuca ima shinami cancunata c'uyani, chashnallatacmi cancunapish c'uyanacuna canguichic. 35Cancuna caishuc chaishuchuan c'uyanacucpica, tucui cai pachapi causaccunami ñucapac yachacuccuna cashcataca yachangacuna— nirca.

Jesusca Pedrota “mana ricsinichu ninguimi” nishcamanta

36Jesusman Simón Pedro tapushpaca:

—Apunchic Jesús, ¿maimantac rigringui?— nirca.

Chashna nicpi Jesusca:

—Ñuca maiman rigricushcamanca cancunaca mana c'atinata pudinguichicchu, ashtahuanpish q'uipatami c'atinguichic— nirca.

37Chashna nicpi Pedroca:

—Apunchic Jesús, ¿ima nishpatac cunanca mana c'atinata pudini? Ñucaca canmanta huañuna cacpipish huañushallami— nirca.

38Chashna nicpi Jesusca:

—¿Ima shinatac ñucamanta ‘huañuna cacpipish huañushallami’ ningui? Manarac gallo cantacpimi, quimsa cutin ñucataca ‘mana ricsinichu’ ningui. Chaica chashnatacmi canga— nirca.

Currently Selected:

SAN JUAN 13: QXR96

Highlight

Copy