SAN JUAN 15

“Ñucaca uvas yura shinami cani” nishpa, Jesús huillashcamanta

1Jesusca cashna nishpami c'atirca:

—Ñucaca allita p'ucuc uvas yura shinami cani. Ñuca Taitaca uvas chagrata cuidacmi. 2Ñucapi cac ramacuna mana p'ucucpica, tucui p'itishpami shitanga. Cutin alli p'ucuctaca ashtahuan alli p'ucuchunmi, mana allicunata anchuchishpa saquinga. 3Shinallatac cancunaca ñuca yachachishcata uyashcamantaca, ñami chuyayashca canguichic. 4Yurapi rama cac shinami, cancunaca ñucahuanca cana canguichic. Shina cacpimi, ñucapish cancunahuanca casha. Ramaca yurapi mana cashpaca, paillatacca mana p'ucunchu. Chashnallatacmi cancunapish ñucahuan mana cashpaca, mana p'ucuc rama shina tucunguichic.

5Ñucaca uvas yura shinami cani. Cancunaca ramacuna shinami canguichic. Maijanpish ñucahuan cacpica, ñucapish paihuanmi cani. Chashna cacpimi, paica allita p'ucunga. Ñucahuan mana cashpaca, imatapish mana ruhuai pudinguichicchu. 6Maijanpish ñucahuan mana cactaca, chagrata cuidacca mana p'ucuc ramata shinami p'itinga. Chashna p'itishca chaquicpica, tandachishpa ninapi shitashpa rupachingami.

7Cancuna ñucahuan cashpa, shinallatac ñuca yachachishcacunata cazushpa c'atirashpaca, imatapish mañaichiclla, ñuca Taitaca cungallami. 8Chashna alli p'ucuc ramacuna shina cacpimi, ñuca Taitaca sumac alli nishca canga. Shina cashpami, ñuca yachacuccunapish tucunguichic. 9Ñucaca ñuca Taita ñucata c'uyac shinallatacmi, cancunataca c'uyani. Cancunaca chashna c'uyanacushpa c'atichiclla. 10Ima shinami ñuca Taitapac mandashcacunata pactachishpa, paipac c'uyashca cani, chai shinallatacmi cancunapish ñuca mandashcacunata pactachishpa, ñuca c'uyashca canguichic. 11Ima shinami ñuca cushicuni, chai shinallatac cancunapish cushicushpa yallita cushicuita charichunmi, tucui caicunataca nini. 12Cancunapish ñuca cancunata c'uyashca shinallatac, caishuc chaishuchuan c'uyanacuichic. Caimi ñuca mandashcaca. 13Maijanpish paihuan apanacucmanta huañucmi, yallita c'uyashcataca ricuchin. 14Ñuca mandashcacunata pactachishpaca, ñucahuan apanacuccunami cancunaca canguichic. 15Amopacta ruhuacca amo imata ruhuacushcata mana yachanchu. Chaimantami serviccunalla nishpaca, mana cancunataca c'ayani. Ñuca Taita tucui ima nishcacunata ñuca cancunaman huillashcamantami, ñucahuan apanacuccuna nishpa cancunataca c'ayani. 16Cancunallatacca ñucataca mana acllarcanguichicchu, ashtahuanpish ñucami cancunataca acllarcani. Cancuna rishpaca, alli granota p'ucuc yura shina causaita ricuchichunpish, chai p'ucushcacuna ama chingarichunpish minganimi. Shina ruhuashpa, cancuna ñuca shutipi imata mañacpica, ñuca Taitaca cungallami. 17Caishuc chaishuchuan c'uyanacuichic nishpami, caicunataca mandani.

Cai pachapaclla causaccunaca Jesustapish,

paita c'aticcunatapish p'iñashcamanta

18Cai pachapaclla causaccuna cancunata p'iñacpica, ñucatarac p'iñashcata yuyanguichic. 19Cancuna cai pachapaclla causaccuna shina causacpica, cai pachapaclla causaccunaca paicuna c'uyanacuc shinami c'uyanmancuna. Shina cacpipish cancunataca paicunapuramantami ñucaca acllarcani. Ña mana cai pachapaclla causaccuna shina cashcamantami, cancunataca p'iñancuna. 20‘Maijan servicpish amotaca mana yallichu’ nishpa, ñacaman huillashcataca yuyarichic. Ñucatapish mana ricunachishpa llaquichircacunami. Shinallatacmi cancunatapish llaquichingacuna. Ñuca ima nishcata cazushca cashpaca, cancuna nishcatapish cazungacunami. 21Ñucata Cachacta mana ricsishcamantami, ñucata c'aticushcamanta cancunataca llaquichingacuna.

22Ñuca caicunata mana imata rimangapac shamushca cacpica, paicunaca mana juchanchishcachu canman carcacuna. Ashtahuanpish ‘cunanca mana juchayucchu cani’ ninataca mana pudincunachu. 23Maijanpish ñucata p'iñaccunaca, ñuca Taitatapish p'iñanmi. 24Pi mana ruhuaipaccunata paicunapac ñaupapi ñuca mana ruhuashca cacpica, paicunaca mana juchanchishcachu canman carcacuna. Ashtahuanpish caicunataca ña ricurcacunami. Chashna cashca jahuami ñucatapish, ñuca Taitatapish p'iñancuna. 25Caica paicunaman mandashcapi quillcashca pactachunmi, chashnaca tucurca. Chaipica: ‘Manapish juchayuc cacpi, ñucataca p'iñarcacuna’ ninmi.

26Ashtahuanpish Taitamanta ñuca cachashca Cushichic Diospac Espíritu shamushpami, ñuca ima shina cashcataca huillanga. Paica cashcata nicmi. 27Cancunaca callarimanta pacha ñucahuan cashcamantami, cancunapish ñucamanta huillaccuna canguichic.

Currently Selected:

SAN JUAN 15: QXR96

Highlight

Copy