SAN JUAN 16

1Cancuna ñucata crinata ama saquichunmi, caicunataca huillacuni. 2Cancunataca tandanacuna huasicunamanta llucchishpa cachangacunami. Shinallatac cancunata huañuchishpaca, Taita Diosmanmi alli ruhuanchic nina punzhaca chayamungami. 3Ñucatapish, ñuca Taitatapish mana ricsishcamantami chai shinaca ruhuangacuna. 4Chai punzhacunapi ñuca ña utcaman nishcata yuyarichunmi, cashnaca nicuni.

Diospac Espíritu imata ruhuac cashcamanta

Ñuca cancunahuan cashcamantami, callaripica caicunataca manarac huillarcani. 5Cunanca ñucata cachac Taitahuan cangapacmi rigrini. Shina cacpipish, ñuca maiman rinataca maijanllapish mana tapunguichicchu. 6Ashtahuanpish caicunata nishcamantami, cancunaca munai llaquiricunguichic. 7Shina cacpipish, ñuca rinami cancunamanca ashtahuan alli canga. Chashna ñuca mana ricpica, cancunata Cushichicca mana cancunahuan cangapac shamungachu. Ñuca rishpami, paitaca cachasha. Chaica chashnatacmi canga. 8Pai shamushpami, cai pachapi causaccunamanca imami jucha cashcatapish, mana jucha cashcatapish, shinallatac Dios ima shina taripana cashcatapish ricuchinga. 9Paicuna ñucata mana cricpimi, imami jucha cashcataca ricuchinga. 10Ñuca Taitapacman rishpa, cancunaman ña mana ricuricpimi, imami mana jucha cashcataca ricuchinga. 11Shinallatac cai pachata mandacta Taita Dios ña juchanchishca cashcamantami, ima shina taripana cashcataca ricuchinga.

12Cancunaman imata ninataca chariniracmi. Shina cacpipish cancunaman yalli achca cacpimi, cunanca mana tucui huillani. 13Cashcata nic Diospac Espíritu shamushpami, cancunamanca imapish cashcata yachachinga. Paica mana paipac munaillamantachu rimanga, ashtahuanpish ima uyashcallatami huillanga. Shinallatac tucui imalla tucugricushcatapish yachachingami. 14Paica ñucamanta chasquishpa cancunaman yachachicushcamantaca, paimi ñuca sumaimana cashcataca ricuchinga. 15Ñuca Taita tucui imalla charishcacunaca ñucapacmi. Chaimantami ‘Diospac Espirituca ñucamanta chasquishpa, cancunamanca yachachinga’ nircani. 16Asha q'uipallaca ñucataca ña mana ricunguichicchu. Shina cacpipish cutin asha q'uipallamanca ricunguichicmi— nirca.

Llaquica cushiman tigrana cashcamanta

17Chaimanta Jesuspac yachacuccunapuramanta maijancuna caishuc chaishuc tapunacushpaca:

—‘Ñuca Taitapacmanmi rigrini, chaimanta asha q'uipallaca mana ricunguichicchu, shinallatac asha q'uipallami cutin ricunguichic’ nishpaca, ¿imatatac nisha nin? 18Pai ‘asha q'uipalla’ nishpaca, ¿imatatac nisha nin? Chaitaca mana entendinchicchu— ninacurcacuna.

19Paicuna tapunata munacucta yachashpami, Jesusca cashna nirca:

—‘¿Ñucata asha q'uipallaca ña mana ricunguichicchu, cutin asha q'uipallatacmi ricunguichic’ nishcata yachanata munashpachu tapunacucunguichic? 20Cancuna llaquilla cacpipish, huacailla cacpipish, cai pachapaclla causaccunaca cushicungami. Shina cancuna llaquilla cacpipish, llaquica cushiman tigrangami. 21Shuc huicsa junda huarmica sajuarina punzha chayacpica, nanaihuan llaquirinmi. Shina cacpipish ña huahuata charishca q'uipaca, shuc huahua cai pachaman shamushcamantaca, tucui nanaicunata cungarishpami cushicun. 22Chai shinami cancunapish llaquiringuichic. Shina cashpapish ñuca cutin ricuricpica, cancunapac shunguca mai cushicungami. Chai cushicuitaca pi mana quichungachu.

23Chai punzhacunapica ña mana ashtahuan imata ñucamanca tapunguichicchu. Ñuca Taitallami tucui imatapish ñuca shutipi cancuna mañashcataca cunga. Chaica chashnatacmi canga. 24Cunancamanca, ñuca shutipica imata cancunaca mana mañashcanguichicchu. Cancunapac shungupi yallita cushicui tiyachunca mañaichic, chasquinguichicmi.

Jesús cai pachapi tiyac mana allicunata mishashcamanta

25Tucui caicunataca chimbapurashpallami parlarcani. Shina cacpipish, ña mana ashtahuan chimbapurashca parlohuan parlana punzha chayamucpica, ñuca Taita ima shina cashcatatacmi cancunamanca huillasha. 26Chai punzhacunapica cancunaca ñuca shutipimi mañanguichic. Shina cacpipish, mana ñucachu ñuca Taitamanca cancunamantaca mañasha, 27ashtahuanpish ñuca Taitallatacmi cancunataca c'uyan. Cancuna ñucata c'uyashcamantapish, ñuca Diosmanta shamushca cashcata crishcamantapish cancunataca c'uyanmi. 28Cai pachaman shamungapacmi ñuca Taitapacmanta llucshircani. Cunanca cai pachata saquishpami, ñuca Taitapacman cutigrini— nirca.

29Shina nicpi yachacuccunaca:

—Cunanmi ña mana chimbapurashca parlocunahuan parlashpa, entendinallatac huillacungui. 30Cunanmi can tucui imatapish yachac cashcataca yachanchic. Pipish manarac tapucpimi, canca yachangui. Chaimantami cantaca Diosmanta shamushca cashcata crinchic— nircacuna.

31Shina nicpi Jesusca:

—¿Shinashpaca cringuichicchu? 32Cunanca ñami chai punzhaca chayamun. Cunanllatacmi cancunaca ñucallata saquishpa, caita chaita ringuichic. Shina cacpipish mana ñucallachu cani, ashtahuanpish ñuca Taitaca ñucahuanmi. 33Tucui caicunataca cancuna ñucahuan shuc shinalla cashcata yachashpa, shungupi yallita cushicuita charichunmi nini. Cai pachapica cancunaca llaquita apanguichicmi. Shina cacpipish, cai pacha mana allicunata ñuca mishashcata yuyarishpa, ama manchashpa cushicuichiclla— nirca.

Currently Selected:

SAN JUAN 16: QXR96

Highlight

Copy