SAN LUCAS 23

Mandac Pilatopac ñaupaman Jesusta apashcamanta

(Mt 27.1-2,11-14; Mr 15.1-5; Jn 18.28-38)

1Chaimantaca tucui chaipi caccuna huaica jatarishpami, Jesustaca mandac Pilatopacman aparcacuna. 2Paipac ñaupapica Jesustaca juchanchishpami:

—Cai runaca ñucanchic israelcunata*f** mana allita ruhuachicuctami japircanchic. Paica: ‘Jatun Mandac Quishpichic Cristomi cani’ ninmi. Shinallatac jatun mandac Cesarman*f** pagana impuestotapish ama pagachun ninmi— nircacuna.

3Chashna nicpimi Pilatoca:

—¿Canchu israelcunata Jatun Mandac cangui?— nishpa tapurca. Shina nicpimi, Jesusca:

—Ari, ña canllatac ninguimi— nirca.

4Shina nicpi Pilatoca curacunata mandac curacunatapish, chaipi cac tucui gentecunatapish:

—Cai runapica, imapish mana alli ruhuashcataca mana tarinichu— nirca.

5Chashna nicpica, ashtahuanmi juchanchishpa tucui chaipi caccunaca:

—Paica Galilea llactamanta callarishpa, tucui cai Judea llactacunata purishpa, gentecunaman mana allita yachachishpami, p'iñanacuipi churacun— nircacuna.

Mandac Herodespacman Jesusta apashcamanta

6“Galilea” nicta Pilato uyashpaca:

—Shinashpaca cai runaca, ¿Galilea llactamantachu?— nishpami tapurca.

7Chashna tapucpica:

—Ari, Galilea llactamantami— nircacuna.

Shina nicpimi, Jesustaca Galilea llactata mandac Herodespacman cacharca. Chai punzhacunapica, Herodespish Jerusalenllapitacmi carca. 8Herodesca ñaupamanmi: “Jesusca pi mana ruhuaipaccunatami ruhuan” nishcata uyashca carca. Chaimanta ña Jesusta ricushpaca, munai cushicushpa: “Cunanca pi mana ruhuaipacta ruhuacta ricushami” nirca. 9Shina cashcamantami Herodesca caita chaita tapurca. Chashna tapucpipish, Jesusca imata mana nircachu. 10Curacunata mandac curacunapish, mandashcacunata yachachiccunapish chaillapitacmi carcacuna. Paicunaca caita chaita nishpami, Jesustaca munai juchanchircacuna. 11Chai q'uipami Herodespish, paipac soldadocunapish Jesustaca p'iñashpa pucllashpa, jatun mandacman shina alli sumac churanata p'achallichirca. Chashna p'achallichishpaca, cutinllatacmi Pilatopacman cutichishpa cacharca. 12Chai punzhamantami Pilatoca Herodeshuan alli tucurcacuna. Ñaupamanca p'iñanacushcami carcacuna.

Jesusta “huañunami cangui” nishcamanta

(Mt 25.15-26; Mr 15.6-15; Jn 18.39—19.16)

13Shina paipacman cachacpimi, curacunata mandac curacunatapish, llactata mandaccunatapish, tucui chaipi cac gentecunatapish tandachishpa, 14Pilatoca:

—‘Gentecunata mana allita ruhuachicun’ nishpami, cancunaca cai runataca juchanchishpa apamushcanguichic. Shina nicucpipish, cancunapac ñaupapi tapushpaca, cancuna juchanchishca shina ima mana allitaca mana tarinichu. 15Paita huañuchichunca, ima mana allitaca mana ruhuashcachu. Chaimantami Herodespish ima mana alli juchanchipactaca mana tarishpa, ñucanchicpacmanca cutichishpa cachashca. 16Chaimanta paitaca macachishpallami cacharigrini— nirca.

17Pilatoca pascua*f** punzhapica prezucunamanta shucta cachariclla cashcamantami, maijantapish cacharina carca. 18Ashtahuanpish chaipi caccunaca tucuimi:

—¡Jesustaca huañuchilla! ¡Barrabastami cacharichun ninchic!— nishpa caparircacuna.

19Chai Barrabás runataca, chai pueblopura macanacuchingapac jatarichishcamantapish, shinallatac huañuchishcamantapishmi carcelpi churashca carca. 20Pilatoca Jesusta cacharina yuyaihuan cashpami, gentecunamanca cutin tapurca. 21Shina tapucpipish tucuimi:

—¡Chacatailla, chacatailla!— nishpa, ashtahuan caparircacuna.

22Chashna caparicucpipish, Pilatoca caihuanca quimsa cutinmi:

—¿Ima mana allitatac ruhuashcayari? Paita huañuchingapacca, ima mana allita mana tarinichu. Paitaca macachishpallami cacharigrini— nirca.

23Chashna nicpipish:

—¡Chacatashpa huañuchilla!— nishpa, ashtahuan caparicushpallami, paicuna munashcata pactachircacuna.

24Pilatoca paicuna munashcata pactachishpami, Jesustaca: “Huañunami cangui” nishpa, mana cacharirca. 25Chai pueblopura macanacuchingapac jatarichic cashcamantapish, shinallatac huañuchishcamantapish prezu charicushca runatami, paicuna mañashca shinallatac cacharirca, ashtahuanpish Jesustaca paicuna munashca shina chacatachunmi curca.

Jesusta cruzpi chacatashcamanta

(Mt 27.32-44; Mr 15.21-32; Jn 19.17-27)

26Jesusta chacatangapac ña apacushpami, chagramanta shamucuc Cirene pueblomanta Simón runata japircacuna. Paitaca Jesuspac huashata cruzta apachishpami pusharcacuna. 27Chashna pushashpa ricucpica, achcacunami c'aticurcacuna. Achca huarmicunapish Jesusta llaquishcamanta caparishpa, huacashpami c'aticurcacuna. 28Chai huacacuc huarmicunata Jesús tigraricushpa ricushpaca:

—Jerusalenpi causac huarmicunalla, ama ñucamantaca huacaichicchu, ashtahuanpish cancunallamantatac, cancunapac huahuacunamantapish huacaichic. 29‘Huahuata charisha nishpa, mana huahuata charic huarmicunapish, manarac huicsayuc tucuccunapish, shinallatac chuchuchiccunapish cushicuichic’ nina punzhacuna chayamungami. 30Chai punzhacuna chayamucpica, huañusha nishpami gentecunaca urcucunatapish, lomacunatapish: ‘Urmashpa pacaichicyari’ ningacuna. 31Ñuca verde yura shina cacpipish cashna ruhuashpaca, cancuna chaquishca yura shina cactacarin, ¿imatachari ruhuangacuna?— nirca.

32Jesusta chacatashpa huañuchingapacca, ishcai huañuchic millai runacunatapish chacatangapac aparcacunami. 33Ña Uma Tullu nishca urcuman chayashpaca, Jesusta chacatarcacunami. Shinallatac chai ishcai huañuchiccunatapish, shuctaca alli maquiman, shuctaca lluqui maquiman chacatarcacunami. 34Chashna chacatacpipish Jesusca:

—Ñuca Taitalla, perdonai. Cai gentecunaca ima ruhuacushcata mana yachancunachu— nirca.

Cutin soldadocunaca Jesuspac churanacunata japinacungapacca, suertetami ruhuarcacuna. 35Tucui chaipi cac gentecunami Jesustaca chaparacurcacuna. Mandaccunapish burlashpami:

—Paica shuccunata quishpichic cashca jahuachu, paillatacca mana quishpirin. Taita Dios cachashca Quishpichic Cristo cashpaca, paillatac quishpirinmanmi— nircacuna.

36Soldadocunapish Jesustaca: “Mandacmi cangui” nic tucushpami, jayac vinota ubiachishun nircacuna. 37Chashna ruhuashpaca:

—¡Canca israelcunata*f** Jatun Mandac cashpaca, canllatac quishpiriyari!— nircacuna.

38Jesusta chacatashca uma jahua caspipica, griego*f** rimaipi, latín*f** rimaipi, hebreo*f** rimaipi: “Caica Israelcunata Jatun Mandacmi” nishpa, quillcashca tiyacurca.

39Shuc huañuchic runaca chacatashca cashpapish Jesustaca:

—¡Can Quishpichic Cristo cashpaca, canllatac quishpirishpa, ñucanchictapish quishpichiyari!— nishpami rimarca.

40Shina nicpica, caishuc huañuchic runaca:

—Canpish pai shinallatac llaquita apacushpapish, ¿manachu Diostaca manchangui? 41Ñucanchicca millaita ruhuashcamanta llaquita apana cashcamantami, cashna llaquita apacunchic, ashtahuanpish cai runaca ima millaita mana ruhuashcachu— nirca.

42Shina nishpami chai runaca:

—Can mandangapac shamushpaca, ñucataca yuyaringuiyari— nirca.

43Chashna nicpimi Jesusca:

—Cunanllatacmi jahua pacha sumac llactapica ñucahuan cagringui. Chaica chashnatacmi canga— nirca.

Jesús huañushcamanta

(Mt 27.45-56; Mr 15.33-41; Jn 19.28-30)

44Ña chaupi punzhamanta quimsa horas chishicamanmi, tucui cai pachaca amsayarca. 45Intipish mana achicyachircachu. Diosman mañana huasi ucupi cac jarcachishca jatun liensopish, jahuamanta uraiman chaupitami lliquirirca. 46Chashna tucushca q'uipami, Jesusca sinchita caparishpa:

—Taitalla, cambac maquipimi ñuca espirituta mingani— nirca. Shina nishpaca huañurcallami.

47Mandac soldado chai tucuita ricushpaca, Taita Diosta “allimari cangui” nishpami:

—Cai runaca allita ruhuactacmi cashca— nirca.

48Tucui chaipi cac gentecunapish chai tucuita ricushpaca, manchaihuan shungupi huactarishpami, chaimantaca cutircacuna. 49Jesuspac tucui ricsishcacunapish, Galilea llactamanta Jesushuan shamuc huarmicunapish carullapi shayashpami, chai tucuitaca ricucurcacuna.

Jesusta enterrashcamanta

(Mt 27.57-61; Mr 15.42-47; Jn 19.38-42)

50Chai punzhacunallapitacmi Judea llactapi tiyac Arimatea pueblomanta, Taita Diosta alli cazuc, shinallatac gentecunapacpish alli nishca José runa causarca. Paica israelcunata*f** mandaccunapuralla tandanacushcapuramantami carca. 51Mandaccunapura cashpapish, paicunapura yuyarinacushpa Jesusta japichishcaca mana allichu nishpami yuyacurca. Paica Taita Dios mandacucta ricusha nishpami shuyacurca. 52Chai Josemi Pilatopacman rishpa, Jesuspac cuerpota enterrangapac mañagrirca. 53Chaimantaca Jesuspac cuerpota cruzmanta uricuchishpa liensohuan pillushpami, shuc jatun rumi quinraipi jutcushca sepulturapi churarca. Chaipica pitapish manarac enterrashcami carca. 54Chashna ruhuacucpica, samana punzhapac*f** allichirina punzhaca ñami chishiyacurca.

55Galilea llactamanta Jesushuan shamushca huarmicunapish Joseta c'atishpa rishpami, Jesuspac cuerpota ima shina sepulturapi churacta ricucurcacuna. 56Chai huarmicunaca ña huasiman cutimushpaca, sumac mishquilla ashnacuccunata Jesuspac cuerpopi churangapacmi allichircacuna. Samana punzha ña chayamucpica, mandashcapi nishca shinami samarircacuna.

Currently Selected:

SAN LUCAS 23: QXR96

Highlight

Copy