Kodampaya 8

Sawuli akka orra amanno kamma daane

1Sawuli ishshama Istifaanosi oppa'e sale. Kuyyaata a oppa Istifaanoosi to'eyye tika kiristaana a Yursaalami kara kitto qara'e pora daanama a kutta xa'e. Erkamampaya maliiyyi orra amanno piisa ka piita Yihuta isho a Samaariya opa pase. 2Orra amanteetan japaanno demo ka Istifaanosi hawle; ka a kuttati isha pooye.

3Sawuuli xoori tika Kiristaana patissa'e xa'e ka tikka kara kullini ka diira isho iskatta a amanno tinni ka sookinni ka tika hida karopa ishootta kalinni. #koda 22:4-5; 26:9-11

Otoota fayya akka piita Samaariya kara torraamte

4Orrase amanno pase, pora oppopa aanen pisa oppa'e qaaleta Waaqa kollinni. 5Filippoosi ka katama Samaariya opa aane ka qoota Kiristoosi desa ishootta kollishe. 6Orrase, ete qaaletase a Filippoosi dakaye ka kodaddaasene orra qawwanna a isha koona akkeeyye, takka'e isha kela napahata kate ka wa isha kiina dakkaysade. 7Hapurra nenneeqa ka nessa kuttan ullupni ka orra lekayta kara sookni; totoonnaya isho a hekkella lekaya ka dinni. 8Se minan katamoosen kara xasa kutta ka dakaade.

9Katamoosen kara, nama takka Simooni kidammo ka ca. Ka katamoosen kara suuma sooni ka orra Samaariya qawwanni. Ka kiini, “Anti in kutti kutta.” 10A kutta ka a shakka piisa ka ishi kiini, “Ha namoose hupnase a Waaqa kiinaane ikutti.” Ka qanqannissa ishopa dakkaysanni. 11Wa malla qanqannissa ishopa dakkaysannaane nefo, qoota etaa a sekati paayyatte suuman ishootta qawwanno malla. 12Ma xoori ete otootase a fayya a Filippoosi qoota mankisteeta Waaqa isho qoota Yesuusi Kiristoosi desa haasawade dakayeneeyye diira isho iskattanne amanen ka jaqqamen. 13Simooni nefo ka mattaadi amane ka jaqqame ka Filippoosi qudaaw kodde ka kodaddasene kukutta isho daxxowwasene orra qawwanna akke ka oppa qawwaawe.

14Erkamampayasene Yursaalami kara ca, akkima orra Samaariya qaaleta Waaqa teyyade ete dakayeneeyye Peetiroosi isho Yohaannisi ishootta erken. 15Peetiroosi isho Yohaannisi ka aanen ka akka orra Samaariya Hapura Qulqulloota teyyado'e, ishootta Waaqa qinsaden. 16Maana malla orra samaariya maxxa Poqalla Yesuusinni jaqqame diisheey, Hapura Qulqulloota ishootta oppa nama takka nefo qara in lekkanneey. 17Ete Peetiroosi isho Yohaannisi ishootta qara harkaasso qapadeneeyye; Hapura Qulqulloota'e teyyaden.

18Simooni, ete erkamampayasene harkaasso orra qara qapaden, orra ka Hapura Qulqulloota teyyade ikka akkeeyye, kaajaanne ishootta de'e ka kide, 19“Nama an anti qara harkaayyo qapado akka Hapura Qulqulloota teyyado'e, hupnose a ukkumeeta ana daasha.”

20Peetiroosi xoori i'ishi kide, “Qoota daassata Waaqa kaajan akkatta dikatte malla, ke isho kaajaatti ollin pata! 21Karittaayti qoota fuula Waaqa turaayye, taanteta qara in kinnin malla, atti seppaayye qoottota taaki qoyritta a' qapto. 22Semmalla neequmtose xaaytippa mararfado ka oppaayye oore ka akka takka punu Waaqa dikattoose a karittaayti neeqa ke diisho'e isha qinsado. 23Anti akkima atti yoota a haddaawnitton immakaatte ka juppootan hidamte in akkiniiy.”

24Simooni ka ishootta kide, “Wessen a amma haasawattene oppa akkima we takkan nefo ana qare in kaynini'i, ishina'ew ana Poqalla qinsada.”

25Peetiroosi isho Yohaannisi ete maakkumen ka qaaleta Poqalla haasawaden kammaayye, palewwa a samaariya lekaya oppa otootase a fayya torreetanne Yursaalamipa tiitaawen.

Filippoosi aappa takka a Toobbiya jaqqe

26Erkampattoota Waaqa ka Filippoosi kiite, “xa'e ka porase Yursaalami xata kaasaapa annonne qinda tupatta opa aane. Porose nefo pora koommayta;” 27Isha ka xa'e ka aane. Tin kunayta takka a toobbiya ka Waaqa sakatatta, Yursaalamipa aane; namoose nefo, nuqusitteeta takka a Toobba Hindaakke kidammitto'e, Mukissampayta atikaadi a kutta ka kaajaadi piisa qaraayye saara. 28Isha ete piitaadipa kallooyye, sarkeella qara'e kute'e ka mataafa a xuumampaytase a Issayyaasi nappapni. 29Sitiiyyi Hapura Qulqulloota ka Filippoosi kide, “Aane ka sarakellosen kapopa dehaado ka namoose oli akka.” 30Filippoosi ka eyyepa keerittan aane ka a Toobbittase mataafa a xuumampaytase a Issayyaasi nappapno dakaye ka ishi kide, “Hela wa a nappapnitta ike kalli?” 31Toobbittase ka kide, “A nama olkela ana la'aysho in kinnaado maliiyyi atta ana kaleeta ettanissa?” Ka Filippoosi kide, “Sarakeella qaropa fayyado ka ana kapa kuti'e.” 32Isha nefo mataafose a qulqulloota karaayye, pora a nappapno ikiini,

“Isha kaharta a qalama qulammitto mina,

ka akka haaritta laha otoo quda nyirfa mujnaane jaw kiino mina'e

afaadi nefo in paqqinnin mina. #Issa 53:7-8

33Isha ijeere; umma firteeta dukaata opa ishi in daanne;

caattaadi piita qara alle'e pashsheneey,

qoota sanynyeetaaditi desa ayno haasawatta ettansha?”

34Kunaytase ka Filippoosi kide, “Ata xuumampaytose qoota ayno desa sede haasawade, hela qoota mattaadi mallam moon qoota nama pila malla? Atara ana' lele.” 35Filippoosi ka porose a mataafa qulqulloota qara paayye ka qoota Yesuusi desa otootase a fayya ishi torre.

36Ete annaaneeyye, ikka pora oppa pisha caan kayen. Kunaytase ka kide, “Tin, pisha areeyye caay, akkan an jaqqammini'i maana ana dawra?” 37Filippoosi ka ishi kide'e, “Oton karittaayti piisanne amanteeyye, jaqqama i'ettanissa.” Kunaytase ka kide'e, “Yesuusi Kiristoosi akkima inna Waaqa kodde in amanni.” #8:37 mataaffasene ollopa marramma demo dikoota kunnda sessa tappa padewni. mataffa ollopa marramma axatta xoori padawwnincan

38Kunaytase ka akka sarakella qa'adane ajaje. Ka lamatti ollinni pishasene oppopa lekkaden, Filippoosi ka kunaytase jaqqe. 39Ete pishaappa sookeneeyye, Hapura Poqalla ka Filippoosi qeede; umma kunaytase sekkammaayye isha in akkine; a koddito ma xasanne poraadi qapade ka kalta qaraaw caade. 40Filippoosi xoori, piita a Astoosi kara'e teyade ka haka piita Qesaariya kayno'e katamadda pisa oppopa anni ka otootase a fayya torrini.

Currently Selected:

Kodampaya 8: MaQu

Highlight

Copy