Yohaannisi 17

Qinseeta Yesuusi

1Yesuusi ete sede haasawade kammaayye, opeela kide ka moontandela tooyyade ka kide, “Aappo! tin, saatetase ikayteey, innaatti akka ke ulfeessane'e, innaatti ulfeesse. 2Wa malla isha ulfeessita nefo, orra a' ishi' daasse piisa'e, akka caatta parapara' daasho'e, qoota orra piisa qara'e hupna ukkumeeta ishi' daasse malla. 3Caattose a parapara nefo, ke se xawwaati Waaqa dukaat kodde isho Yesuusi Kiristoosise a erkite upnaatta. 4Anti kodase a ana' daasse in dikkishe ka piita qara' ke ulfeesse. 5Aappo, a piita in uumammin turan, ulfeenase an ke kapa qaponne, isikapa ana ulfeesse.

6Orrase a' piitoppa ana' daasse'e, ayno akkima' koddite in ishootta' la'ayshe. Ishootta turan xaayti, atti ka ishootta ana' daasse. Ishootta nefo ka qaaletaayti tooytaden. 7Wa ana' daasse piisa akkima ke kapa de'en, ishootta amma i'upnaaden. 8Qaaleta a atti ana' daasse in ishootta' daashe. Ishootta' nefo ka teyyaden. Ka akkan ke kapaayye sooke ka de'e, dukaatan i'upnaaden. Ka akka atti ana erkite nefo amanen.

9Anti ishootta'en qinsanni; sene a atti ana' daasse, qoota xaayti kodden malla, ishootta'en qinsanni; piita an qinsanni an co. 10Wa a xayyo kodde piisa, xaayti; a xaayti kodde kan xayyoow. Anti ishoottannen ulfeessammi. 11Anti arepa desa piita qara'e an kallaado; ishootta' xoori piita qara caan, anti ke kapopan deeni. Aappo Qulqullitto, sene a ana' daasse akkima xanno mina takka koddane'e #17:11 mataaffasene ollopa marramma ademo ikiini “isaasene ana daasse piisa maxxaaytin in ishootta tooyte” maxxase' xaayti a ana' daassen ishootta tooyte. 12Anti an ishootta olli cooyye, maxxase' xaayti a ana' daassennen ishootta tooyte. #17:12 mataaffasene ollopa marramma ademo ikiini “isaasene ana daasse piisa maxxaaytin in ishootta tooyte” Anti in ishootta tooyte; semalla akka qaaleta mataafa qulqulloota dikkatto'e, innoosen a pateetta maliiyyi ishootta oppa nama takka' nefo in panne. #mas 41:9; Yoha 13:18 13Amma anti ke kapopan deeni. An piita qara cooyyeew, waan malla sede haasawanna, ishootta akka isi kapaayye xasoottiyyo immakkoota qapnaadan malla. 14Anti qaaletaaytin ishootta' daashe. Akkiman anti piita quda an koddinin mina'e, ishootta nefo asseew piita qudan; piita ka semmalla ishootta needdatte. 15Akka isase neeqa kela ishootta tooytito diisheey, akka' piitoppa alle ishootta sookisso malla an qinsanni an co. 16Akkiman anti piita quda an koddinin mina'e, ishootta nefo assew piita qudan. 17Dukaataaytin ishootta qulqullayshe; qaaletaayti dukaataay. 18Akkima atti piita qaropa ana erkite mina'ewwen, anti piitoppopa ishootta erkeew. 19Ishootta akka dukaatan qulqullowwa koddane'e, anti ishootta mallan isi qulqullaysha.

20“Qaaletaaysho qudanne, isasene ana amanna kuli'in qinsanni; ishootta patta malla an qinsani an co. 21Waan malla qinsanna' nefo, ishootta' piisanti akka takka koddan; akkimoose mina'ew Aappo, akka atti anan kitto, anti ka ken co mina'e, akka ishootta inon caadan ka akka atti ana erkite piita ka amanto mallan ke qinsanni. 22Ino akkiman takka koddine mina'e, ishootta akka takka koddane'e ulfeenase a ana' daasse in ishootta' daashe. 23Anti waan qinsanna, akkiman anti, ishootta karan co, atti ka ana karan kitto mina'e, ishootta akka immakkoota koddan malla, akkimoose mina'ew, akka ana erkite ka a ana jaalatte, mina'e, akka ishootta jaalatte, piita akka upnaatto malla.

24“Aappo, a piita in uumammin turanne, qoota ana jaalate malla, ulfeenase a ana' daasse, akka akkane'e, sene a ana' daasse akka pora an anti oppa co oppa ana olli kallaadane'en jaalanni. 25Aappo hanqeellayto, piita ke in upnaanne, ma anti in ke upa; sene are ca nefo ka akka atti ana erkite upnaaden. 26Jaalaloosen a atti anan jaalatte, akka ishootta qara kinnaadan, anti ka ishootta kara kinnaado'e, ishootta akka ke upnaadane'e in kode. Ka akka ke upnaadane' koda.”

Currently Selected:

Yohaannisi 17: MaQu

Highlight

Copy