Luk 10
10
Jisɔs afong bɔ erɛm bera nsɛm ɔfɔ yi bafai
1Yi bifa behɔ king Minfɔni asang bantad erɛm bera nsɛm ɔfɔ yi bafai afong bɔ bafai bafai arɔ bɔ ara we nnen achag kpeicha mpam yi wa ekpen yi we ka anɔngɔ olo. 2We asidi bɔ arɔ, “Efuang eti, ka balemag ba erom ayia atin. Beb Minfɔni wu efuang afong balemag ba erom alang wa efuang yi ekwɔ eyi. 3Chog! Me nli fongang nyɔ efi ala mbɔn ba bawɔng erɔng yi besɔb. 4Kan kun anyɔng ni ebam yi alangag bakpoga, kpe ebam yi etɔ, kpe nggom bi bako, kan kob mine kpe wud wa nnen.
5“Ebu nyɔ ɔlawei nju, ranen chɔd arɔ, ‘Ekunakuna ekɛmi nju yufa.’ 6Ebu mine wu ekunakuna ale afa, ekunakuna eyina eting ekɛmi yi bɔ, ka ebu chang, etɛmag nsɛm owuna. 7Kɛmi wa nju ayua, yag ɔyɔg kpeye yi bɔ aken nyɔ, wantagi balemag ba erom ekɔning akpe bɔ wa erom yi bɔ aleming. Ka kan wei anyɔng bojuboju.
8“Ebu nyɔ ɔwei wa mpam ka bɔ arami nyɔ, li beliang bi akerag nyɔ. 9Gban bɔ bayɔgɔyɔ ba ale afa erɔng sidi bɔ ɔrɔ, ‘Bɔlen bu Ɔsɔwɔ bole kped yi nyɔ.’ 10Ka ebu nyɔ ɔwen wa mpam ka bɔ araming nyɔ, ken anyɔng wa bɔlen bu mpam ayua ka nyɔ chɔd arɔ, 11‘Kpe bebubi bi mpam oyuna bi befon sɔ bako sɔ ebog bi bekɛmi lesigi eke nyɔ. Ka mai anyɔng yifa nyɔ ɔrɔ: Bɔlen bu Ɔsɔwɔ bole kped!’ 12Me sidi nyɔ, wa epo yi mpem erebang Ɔsɔwɔ ting afɔn nsɔn yi bane ba Sodom aking mpam ayua.
13“Ebeb yi nyɔ, bane ba Korasin! Ebeb yi nyɔ erɔng bane ba Betsaida! Wa oye ebu nggom bi ɔkwɔg beke bi aleming ake nyɔ aleming bi la wa bɔmpam bu Taya yi Sidɔn, bɔ ka agɔn bobe olem eken erab, alangag mfɔ yi ekud akɛmag wa ndɔi 14Ka baseni ma Taya yi Sidɔn wa epo yi mpem erebag yi Ɔsɔwɔ ahɔ ti ala yi nyɔ bane ba Korasin yi Betsaida. 15Ka nyɔ, Kapanɔm, ating atam nyɔ ɔchag mpam yu esɔ a? Ee-ee, nyɔ ɔchag eboi wa mpam yu bakoko.”
16Jisɔs atɔ ba ali nyedag we arɔ, “We wu awoging nyɔ awog me. Ka we wu akebing nyɔ akeb me, ka we wu akebing me akebing ala we wu afonging me.”
Erɛm bera nsɛm ɔfɔ yi bafai atisɛm
17Bɔ erɛm bera nsɛm ɔfɔ yi bafai abug yi bochoba bu nted arɔ, “Minfɔni, kpe bebe bi bɔnyɔganyɔ bewog sɔ wa mpi ɔya!”
18Jisɔs abɔri bɔ arɔ, “Me ndɔn Setan nkeri arɔn mpam esɔ achɔ ala nwanwang. 19Me nke nyɔ ɔsa ndɔ nyɔ ɔchem bɔnyɔ yi bɔnang nyɔ ɔga basa feb ma mine ojing: nyum chang yi ekerag nyɔ bɔsang. 20Ka kan chob anyɔng nted wantagi bɔnyɔganyɔ bewoging nyɔ, ekinging chob anyɔng boted ɔrɔ bopi obuna aseng alang mpam esɔ.”
21Wa nten ayua Jisɔs, yi bochoba bu nted bu boson we bu borun wa Nyɔganyɔ yu Ɔsɔwɔ. Nyining we arɔ, “Nsi, Minfɔni wu esɔ yi nsisi, me nkag we, wantagi we owobing nggom bifa ɔrɔ bamag ba nggom yi bɔ ba amarɔ oyen botiti gbɔg akan mai, ka we ɔrɛbi bi ɔtɔngi nkekedi mbɔn. Ee-ee, Nsi, yifa ele bochoba bu nted ɔgwa nkeri ɔken ɔrɔ olem.
22“Nsi ema ajog feb nggom ake me. Kpe wud wu aji Mmɔn chang wu ekinging Nsi, ka kpe wud wu aji Nsi wu akinging Mmɔn chang yi bɔ ba Mmɔn asanging arɛbi we atɔngi bɔ.”
23We akpedi amɔn ba anyedag we achɔd eju arɔ, “Erienɔ ele yi mmɛd ma arɔ yi nyɔ ɔrɔ. 24Me nsidi nyɔ ndɔ barɔag ba eyammɛd yi Ɔsɔwɔ jugijugi yi balen akeng arɔ yi nyɔ ɔrɔ ka bɔ arɔn yi. Bɔ aken arɔ awog yi nyɔ owoging, ka bɔ awoging yi.”
Mine wu Nnɔ wu Sameria
25Epo yid minkɔag eben alo belag akan Jisɔs. We abeb arɔ, “Minkɔkɔi, ye yi me nlemag nfɔn ekwen yibanya yibanya?”
26We abɔri arɔ, “Ye yi asenging wa eben? Lan we oyening yi?”
27We abɔri arɔ, “ ‘Fɔn enun yi Minfɔni Ɔsɔwɔ ɔwa, yi feb nted ɔya, yi feb nyɔganyɔ ɔya, yi feb ɔsa ɔwa, yi feb mmɛd ma nted ɔya,’ ka ‘Nungi nnum mine anun we ala nkeri beke egwa benuning we.’ ”
28Jisɔs abɔri we arɔ, “We ɔbɔri nkeri. Lem yifa ka we ting okwen.”
29Ka we aken atɔngi arɔ we ale mine wu nnɔ, ka we abeb Jisɔs arɔ, “Nene ale nnum mine wu ale abɔgag me?”
30Wa ebɔrang Jisɔs arɔ, “Minine wud achan Jerusalim aloag Jeriko, we aka wei babɔ ma bajijib. Bɔ anɔd we nfɔ wa beke, akwud we alo achai we ekoko. 31Minsingag besingi bi Ɔsɔwɔ erɔng ali chag nnen ayua, yi we arɔn minine awun, we apengi nnen. 32Erɔng, mine wu arun enudi nju yi Lifai, yi we aban asi ekpen ayia arɔ we, aking nkpɔgi ebad yintad aloag. 33Ka mine wu arun Sameria, nkeri alon eken, aba ekpen yi minine awun ale. Yi we arɔn we, nsɔn akɔ we yi we. 34We aka kpɔgi we akun bakwu yi barog apog wa belem abin ka abɔb bi yi efɔ. We atam minine awun achori wa ngwɔnkang oyu, akun we achag nju yu bakenken aweaglɔ we amɔn we. 35Nsɛm epo we akun dinari efai ake mimmɔnag nju yu bakenken. We atɔ mimmɔnag nju yu bakenken arɔ, ‘Mmɔn mine wufa wu me mban yi we, ebu nla tisɛm, me ting njog we kpeye yi we obebing.’
36“Wun wa erɔng eyibɔ bara wu we ɔkering ɔrɔ ale nnum wu abɔging mine wufa wu awen babɔ ma bajijib?”
37Minkɔag eben abɔri arɔ, “Wu minine awun akɔn we nsɔn.”
Jisɔs atɔ we arɔ, “Chog ɔka lem alafa.”
Jisɔs wa nju ba Mata yi Meri
38Nkeri Jisɔs yi ba anyedag we ale wa nnen, we aba wa eri mpam yi minkani wu ayenag we arɔ Mata we arami Jisɔs wa nju oyu. 39We afɔning ninyen wu minkani wu ayenag we arɔ Meri, wu akɛming bako ma Minfɔni awogag yi we ali kɔag. 40Ka Mata ali gbigag lɔ yi beke bi elonang arami Jisɔs. We aba ɔmɔ Jisɔs aba beb we arɔ, “Minfɔni, enɔbɔnɔb a yi ninyen ama wu minkani acha me bibi nlem erom a? Tɔ we aba tɔb me!”
41Minfɔni abɔri we arɔ, “Mata, Mata, we okerag lɔ efegayɔ abangang nggom jugijugi, 42ka nyum yid kpɔd ele yi akeng. Meri alɔb yi enɔ, ka mine kpewud ahɔman arami yi wa babɔ ami.”
Currently Selected:
Luk 10: NBB
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
