Luk 10
10
Jisɔs tomo anɛ atal ara anɛ awobo anɛ abal
1Na jiya shinge nɔ Nshɔ jagɛ anɛ atalara anɛ awobo anɛ abal tom bɔ gɔ anɛ abal abal tu gɔ ɛbjabɛ ɛbjabɛ bi yɛ jɔlɔ jɛgɛ rɛ bɔ gbɔmbang. 2Akim tɔngɔ bɔ rɛ, “Nkpagɛ ɛgbɛ kpe gbalɛ wɔ ba leme ntom le tilim, Kag ɛrɔ ka nfɔnɔ ɛgbɛ, nɔngɔ atom ba leme ntom tu gɔ gɛ ɛgbɛ. 3Shɔng wan! Nkpe tomo wan na ɛjɔrɔ gɔ ɛblɔngɔ ɛbua. 4Kǝ tab wan akpɔgɔ, kǝ tab wan ɛbam, kǝ tab wan akpagɛta, kǝ kag wan nɛ awɔngawɔngɔ nyɔ gɔ mbang. 5Ngara anyinganyingɛ nyi a yɛlɛ gɔ nlatak a nɛ, gbɔmbang kag bɔ nyɔ rɛ, ‘Ɛbgɔmɔ jɔl gɔ nlatak nyaa,’ 6Rɛjɔlarɛ nɛ le ɔ, nɔ ɛbgɔmɔ kpe kɔrɔ, nɔngɔ nyɔ ɛma jɔl na a nɛ; tɔgɔ jɔl nɔ, nyɔ ɛma fɛrɛ na na. 7Jɔl gɔ ɛtak nyiɔ, wɔ li fɛrɛ wɔɔ ajingajingɛ ji bɔ ka nɔ, teb ba aleme ntom kpejɔ bɛl ntoro. Kǝ bɛmɛ gɔ ntak ga ntak. 8Ngara anyinganyingɛ nyi a yɛlɛ gɔ ɛjabɛ ji bɔ gbɛra nɔ, li ajingajingɛ ji bɔ ka nɔ. 9Lim anɛ ba ayam gɔ ɛjabɛ jiɔ nɔb, wɔ tɔng bɔ rɛ, ‘Ɛtol Ɛshɔwɔ ɛba kabɛ wan.’ 10Wɔ ngara anyinganyingɛ nyi a yɛlɛ gɔ ɛjabɛ wɔ bɔ kiya gberɛ, shɔng gɔ ɛlitak gor ɛjabɛ jiɔ wɔ bung rɛ, 11‘Rɛjɔlarɛ ɛbɔgɔbu janɛ ji bolo war gɔ ata ji ɛkpe komo wong wan. Wɔ bomo wan rɛ Ɛtol Ɛshɔwɔ le kpedekpede.’ 12Nɔngɔ mɛ tɔng wan rɛ, ɛfong ɛlam Ɛshɔwɔ anɛ ba Sodɔm kpe file ndɔn gbalɛgbalɛ shingɛ ɛjabɛ jiɔ.
Ɛjabɛ ji ki kpe ɛbtamɛ
(Matiyu 11.20-24)
13“Ɛyee na nanɛ, Kɔrasin! Ɛyee na nanɛ fufɔ, Bɛtsayida! Ajɛnɛ nshɔl nya milim gɔ ganɛ ɛbjabɛ, Le nyi nlime gɔ Tyre na Sidɔn, nu anɛ ba jɔlɔ yangɛ mbang alab, fɛrɛ tama atɔng kag ajaga abɔmɔ, nɔngɔ teb rɛ bɔ gbɔ ndɔn gɔ abi afɛm ɛbɔ. 14Ɛshɔwɔ anɛ ba Tyre na Sidɔn le filɛ ndɔn gɔ ɛfong ɛlam shingɛ wan. 15Wan anɛ ba Kapanum, ntire rɛ Ɛshɔwɔ kpe tabɛ wan war gɔ ɛjabɛ ɛtol a? Ee, akpe rɔgɔ wan kag gɔ ɛlolagon.”
16Jisɔs bungɔ tɔng batɔtɔnɔ ɛbɛ rɛ, “Nɛ awɔngawɔngɔ nɔ wongo atong ka wan wongo ka mɛ; Nɛ awɔngawɔngɔ nɔ tɛnɛ wan tɛnɛ mɛ; Wɔ nɛ awɔngawɔngɔ nɔ tɛnim nɔ tɔb tɛnɛ yɛ nɔ tomom nɔ.”
Anɛ atala ara anɛ awobo anɛ abal ɛfɛrɛ krɛ
17Anɛ atala ara anɛ awobo anɛ abal ba Jisɔs tomo bɔ fɛrɛ krɛ na njijɔg ɛyɛbɛbtem. Bɔ rɛ, “Nshɔ, abi atɔgɔ jɔ kpono war ɛrɛ lɔng mbing ɛnya.”
18Jisɔs kim fangɛ bɔ rɛ, “Nyenɛ Nshɛtan kpegbɔgɔ gɔ rɔ na ɛmangɛdo. 19Nka wan ɛkɔ ji gbalɛ shingɛ ɛkɔ ji anɛ ba ɛjang ɛbanɛ, ɛkɔ ji akpe kadɛ alɛgɛlɛgɛ na anang ɛjomjom manim lim. 20Kǝ ga gɛrɛ wan teb rɛ abi atɔgɔ tamɛ tu wan, ga gɛrɛ wan teb rɛ bɔ yɛlɛ abing ɛnyanɛ gɔ ɛjabɛ ɛtol Ɛshɔwɔ.”
21Gɔ ngarɛ nyiɔ Ɛtinge Ɛtɔgɔ ka Jisɔs njijɔgɔ ɛyɛbɛbtem akim bungɔ rɛ, “Ma kag sham, Nshɔ, Ntol ɛbung na Ndi, teb wɔ brɛ nshɔl nyaa kpɛk kpɛ gɔ ji anɛ ba awag na anɛ ba tire rɛ bɔ kpe ngbɛrɛ, a shɔng lingɛ ka nkrɛkrɛ abɔnshɛ. Nɔwɔ, Nshɔ, na wɔ kɔra rɛ jɔl.
22“Nshɔjamɛ ɛmim ka kpɛk kpɛ nshɔl. Nɛnɛ nyim Mɔn shingim Ndɛ. Nɛnɛ nyim Ndɛ shingim Mɔn na anɛ ba Mɔn mijag teb bɔ Ndɛ.”
23Jisɔs kpede tɔng batɔtɔnɔ ɛbɛ gɔ awuwa rɛ, “Ɛbfolo jɔl ka amar nyaa nyenɛ ji anyɛn nɔ. 24Nɔngɔ mɛ tɔnga rɛ atinge ateb gbalɛgbalɛ na atol jɔ shɛbɛ rɛ bɔ nyen ji anyɛn nɔ wɔ bɔ malim nyen, fɛrɛ nɔg rɛ bɔ wog ji awogo nɔ wɔ bɔ tirim wog.”
Ɛbganɛ ni le lagɛ ɛtinge nɛ a Samariya
25Ɛfong abɔng ntetebe ajang a Mosis awɔng mɛlɛ yimi bab Jisɔs mbabɛ rɛ agarɛ. “Ntetebe, Nlilim rɛnan nkim bɛlɛ ɛbkpene nkalkal?”
26Jisɔs fangɛ rɛ, “Jɛn ji njang a Mosis bungɔ nɔ? Wɔ lɔngɔ rɛnan?”
27Akim fangɛ rɛ, “Nshɔ Ɛshɔwɔ kɔra na ɛbtem ɛna kpɛk kpɛ na ɛtɔgɔ ɛja kpɛk kpɛ na ɛkɔ ɛja kpɛk kpɛ na ɛkɛkɛrɛ ɛja kpɛk kpɛ. Nɛbjing ɛwa kɔra na wɔ nfɔnɔ akpe kɔrɔ ɛna.”
28Jisɔs rɛ, “A fangɛ nɔbɔnɔbɔ; Lim nshɔl nyaa wɔ bɛl ɛbkpen.”
29Teb ajɔ shɛbɛ rɛ akǝli ɛbe, ɔwɔ ababbɛ Jisɔs rɛ, “Nyenɛ wɔ le nɛbjing ɛwa?”
30Jisɔs kimawɛ fangɛ rɛ: “Bɛlɛ nlolom awɔng nɔ lɔngɔ nyi Jɛrushɛlɛm fe nyi Jɛriko, akim shɔng kpere awaju gɔ mbang. Bɔ bɔbɛ fangɛ abɔmɔ duɛ kɔshɔng akpɔ, tamɛ sha tam ji bɔ. 31A nɔb fomo njɔmanjɔm Ɛshɔwɔ jɔ tɔb shingɛ gɔ mbang nyiɔ, ɔji anyɛnɛ nlolom nɔnu nɔng nɔ, ashingɛ gɔ ɛjangɛ mbang jigɔ tam ɛjɛ. 32Nɛ nɔ kpejɔ lim ɛbtom gɔ ji njɔm Ɛshɔwɔ nɔ bɔ lɔngɛ rɛ Lifite tɔb shingɛ gɔ mbang nyiɔ fufɔ, ɔji aringɛ gɔ ji nlolom nɔnu nɔng nɔ, atɔb shingɛ gɔ ɛjangɛ mbang jigɔ tam. 33Ɔwɔ nlolom awɔng nɔ lɔng Samariya#10.33 Samariya anɛ ba Aju kɔ bɔ na anɛ ba abi afɛm nɔ shingɛ gɔ mbang nyiɔ fufɔ, ɔji aringɛ gɔ ji nlolom nɔnu nɔng nɔ, afilɛ ndɔn. 34A jɛn shɔng kperɛ gbayɛ njaga bɔmɔ gɔ alɔng wɔngɛ aking na amam gɔ aji nya alɔng jɔ lɔng. Akimawɛ rɔd kono gɔ ɛnyinya ɛjɛ, tamanɛ shɔng bɔmɛ gɔ njobkang ajɛnɛ kporɛ nɔbɔnɔbɔ. 35Gɔ ɛtɔnɔ ɛfong ayegɛ ɛkpɔgɔ ɛbal ka nɛ nɔ kpejɔ lime ɛbtom gɔ njobkang ajɛnɛ. Akimawɛ tɔng rɛ, ‘Kpor nlolom nɔa, ajingajingɛ ji akpe fad nrɛfɛrɛ ba nkpe tɔgɔ ka.’ ”
36Ɔwɔ Jisɔs kim babɛ bɔ rɛ, “Nyenɛ wɔ gɔ ɛblɔng anɛ ara ba, ba wan tire nɔ rɛ yɛ wɔ ga le nɛbjing a nlolom nɔ awaju du nɔ gɔ mbang?”
37Ntetebe ajang a Mosis awɔng kim fangɛ rɛ, “Nɛ nɔ bɛlɛ ndɔn ka nɛ nɔ awaju du nɔ.”
Jisɔs kimawɛ fangɛ rɛ, “Shɔng wɔ shɔng lim na nɛ a Samariya lime nɔ.”
Jisɔs jɛ ɛbɔng gɔ ji Mata na Mɛri
38Na Jisɔs na atɔtɔnɔ ɛbɛ jɔ tamɛ nyi Jɛrushɛlɛm, bɔ ringe gɔ ɛjabɛ ajing ji nlikal awɔng nɔ bɔ jɔ lɔngɛ rɛ Mata gberɛ nɔ kag gɔ gɛ ɛtak.
39Mata bɛlɛ minyen nɔ bɔ jɔ lɔngɛ rɛ Mɛri, nɔ ji kabɛ Jisɔs gɔ ata, jɔ wongo atong kayɛ gɔ nshɔl nyi a jɔ bung.
40Mata bɛlɛ ɛfigayɔ gɔ nshɔl nyi ajɔ lim rɛ aka ajɛnɛ, ɔwɔ akim jɛgɛ shɔng bab Jisɔs rɛ, “Nshɔ, manim fanaah ɔji minɛya mi yaga abɔ gɔ ɛbtom niya kpɛk kpɛ ka mɛ ntangtang a? Tɔngɛ a ba bǝtɔbim!”
41Jisɔs kimawɛ fangɛ rɛ, “Mata, Mata! Akpe kagɛ ɛna ɛfigayɔ gɔ nshɔl gbalɛgbalɛ shing. 42Ɛjom ajing ji ɛkpe shɛbɛ. Wɔ Mɛri ɛbjag ɛtinge, nɛ lim nɔ le tarɛ.”
Currently Selected:
Luk 10: NBP
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
