Luk 9
9
Jisɔs tomo Akpɛlɛ ɛnye ɛwobo anɛ abal
(Matiyu 10.5-15; Mak 6.7-13)
1Ɛfong abɔng Jisɔs lɔngɔ akpɛlɛ ɛnye ɛwobo anɛ abal bɔm ɛji ajing ka bɔ ɛkɔ ji bɔ le kam abi atɔgɔ fɛrɛ lim anɛ ba ayam nɔb. 2Ɔwɔ a tomo bɔ rɛ bɔ shɔng bung alom lagɛ Ɛtol Ɛshɔwɔ fɛrɛ lim anɛ ba ayam nɔb.
3A tɔngɔ bɔ rɛ, “Kǝ tab wan ɛjom ajingajingɛ gɔ ɛbjɛn niya: jɔlɔ ɛte bitamɛ, jɔlɔ ɛbam, jɔlɔ nshɔl alɛgɛ, jɔlɔ akpɔgɔ, jɔlɔ ɛlamɛ ɛbal. 4Ɛtak ajingajingɛ ji bɔ gbera nɔ, ji ɔ tɛtɛ a mɛlɛ ɛjabɛ jiɔ sha. 5Ɛjabɛ ajingajingɛ ji anɛ kiya gberɛ, amakim tam, kom ɛbɔgɔbu gɔ ga ata nɔngɔ ka bɔ ɛbrɛkgɛ.”
6Ɔwɔ akpɛlɛ ɛnye tamɛ ɛbjɛn gɔ ɛbjabɛ ɛbjabɛ, jɔ bung atinge alom Ɛshɔwɔ fɛrɛ jɔ lim anɛ ba ayam nɔb gɔ ɛji ajingajingɛ.
Ntola Ɛrɔd wogo lagɛ Jisɔs
(Matiyu 14.1-12; Mak 6.14-29)
7Ɔji Ɛrɔd Antipas, ntoboɛshi a Galili, wogo lagɛ kpɛk kpɛ nshɔl nyi Jisɔs jɔ lim, ajɔb. Teb anɛ bandige jɔ tɔngɛ rɛ Jɔn wonga anɛ alab nɔ kpɔnɔ wɔ mifɛrɛ nyamɛ.
8Anɛ bandige rɛ Ɛlayija wɔ mifɛrɛ. Bandige rɛ ntinge ateb Ɛshɔwɔ awɔng nɔ manɛmanɛ wɔ mifɛrɛ nyamɛ.
9Ɛrɔd rɛ, “Nkem Jɔn ɛshi. Nyenɛ wɔ ɔ, nɔ nkpagɛle wogo nshɔl nyaa lagɛ?” A jɔ shɛb rɛ anyɛnɛ.
Jisɔs lɛɛ anɛ Ɛgɔr ɛlon
(Matiyu 14.13-21; Mak 6.30-44; Jɔn 6.1-14)
10Ɔji akpɛlɛ ɛnye fɛrɛ nɔ, bɔ tɔrɔ tɔng Jisɔs ji bɔ milim. Ɔwɔ a rɔdɔ akpɛlɛ ɛnye tam na ba nyi Bɛtsayida.
11Na ɛblɔng anɛ gbɛrɛ nɔ lagɛ ɛjiji afinɔ bɔ tɔnɛ. A gberɛ bɔ tɔng bɔ lagɛ Ɛtol Ɛshɔwɔ, alem anɛ ba ayam nɔb.
12Ɔji ɛgɔn mikim gbɔ akpɛlɛ ɛnye ba bǝkperɛ tɔngɛ rɛ, “Tom ɛblɔng anɛ niya bɔ jɛ gɔ ɛbjabɛ bi le kpedekpede na ɛbgbɛ shɔng shɛb ɛjom alɛgɛ na ɛji kang, teb a ɛle gɔ ɛkɔlɔgbɛ.”
13Jisɔs kim fangɛ rɛ, “Wan ka bɔ ɛjom alɛgɛ bɔ li.”
Bɔ rɛ, “War kpe ngba ɛbrɛd ɛlon na abɔn nsharɛ abal. Akpe shɛbɛ rɛ war shɔng gono ɛjom alɛgɛ bǝka ɛblɔng anɛ niya?” 14Bɔ ringe abonloma ɛbtal ɛgɔr ɛlon ba jɔlɔ ɔ. Jisɔs kim tɔngɔ batɔtɔnɔ ɛbɛ rɛ, “Tɔng bɔ ji anɛ atal abal anɛ awobo gɔ nji anying gɔ ajingkajingka.” 15Bɔ lim na ji atɔngɔ bɔ, nɛ awɔngawɔngɔ jina. 16Jisɔs tarɛ ngba ɛbrɛd ɛlon na abɔn nsharɛ abal abɔngɔ gɔ rɔ ɛbung, a kag Ɛshɔwɔ sham bakgɛ. A fagɛ ka batɔtɔnɔ ɛbɛ rɛ bɔ bangɛ ka anɛ. 17Bɔ anɛ kpɛk kpɛ li wungɔ, batɔtɔnɔ ɛbɛ kpo abak nya sha nɔ gɔ akambɔng ɛwobo ɛbal.
Pita lingɛ nɛ nɔ Jisɔs linɔ
(Matiyu 16.13-19; Mak 8.27-29)
18Ɛfong abɔng Jisɔs jɔlɔ gɔ mbɛlɛ ɛji jɔ kagɛ ɛrɔ, batɔtɔnɔ ɛbɛ jɔlɔ ɔ nanɛ, akim babɛ bɔ rɛ, “Ɛblɔng anɛ niya tire rɛ mɛ ɛkine nɛ awɔ?”
19Bɔ fangɛ rɛ, “Ɛgɔm jindige rɛ wɔ wɔ le Jɔn nwɔngɔ anɛ alab; bandige rɛ wɔ wɔ le Ɛlayija; bagɔgɔ rɛ, wɔ wɔ le ntinge ateb Ɛshɔwɔ wɔng nɔ manɛmanɛ nɔ mifɛrɛ ba gɔ ɛbkpen.”
20A kim babɛ bɔ rɛ, “Wan fufɔ mɛ? Ntire rɛ mɛ nyenɛ wɔ?”
Pita kim fangɛ rɛ, “Wɔ wɔ le Krayis nɔ Ɛshɔwɔ tomo nɔ.”
Jisɔs bungɔ lagɛ ɛrɛmɛ ɛbɛ na ɛbku nɛ
(Matiyu 16.20-28; Mak 8.30—9.1)
21Jisɔs ka bɔ ɛbrɛgɛ rɛ bɔ kǝ tɔng nɛ awɔngawɔngɔ ɛbɛmɛ nɛ nɔ yɛ linɔ. 22Jisɔs bungɔ tɔng bɔ rɛ, “Mɔna Nlolom kpe nyenɛ ɛrɛm gbalɛgbalɛ abokol, atoboɛshi a bajɔmanjɔm Ɛshɔwɔ na batetebe ajang Aju kpɛ tɛnɛ. Bɔ kpɛ wolo, gɔ nfong ɛra a fɛrɛ nyamɛ.”
23Ɔwɔ Jisɔs tɔngɔ bɔ anɛ kpɛk kpɛ rɛ: “Nɛ awɔngawɔngɔ nɔ kpeshɛbɛ rɛ atɔnim akpe yine lagɛ ɛnɛ nfɔnɔ ashɔl ɛjangɛ ɛte ji bɔ shege na ntɛm #9.23 Ɛjangɛ ɛte ji bɔ shege na ntɛm ji bɔ komo mɔn a Ɛshɔwɔ ft ɛfong abɔngabɔngɔ tɔnim. 24Nɛ awɔngawɔngɔ nɔ kpeshɛbɛ rɛ atarɛ ɛbkpen ɛnɛ akpe tanɛ, wɔ nɛ awɔngawɔngɔ nɔ tanɛ ɛbkpen ɛnɛ gɔ gamɛshi akpe tarɛna. 25Ɛjomaji le jɔl nshingɛ ɛnya arɛ bɛl ɛying kpɛk kpɛ tanɛ ɛbkpen ɛna? 26Nɛ awɔngawɔngɔ nɔ libɛ ndɔn teb mɛ na alom ɛnyamɛ, Mɔna Nlolom kpe tɔb bɛ ndɔn na anɛ, gɔ garɛ nyi arɛ fɛrɛ gɔ ɛblobo nɛ na ɛblobo ni Ndɛ na ni balɔgɔ ɛbtom Ɛshɔwɔ.
27“Ɛlɔgɔlɔgɔ ɛbungɔ, anɛ bandige ba yim aa bɔnim kpɔ tɛtɛ bɔ nyen Ɛtol Ɛshɔwɔ.”
Ngɔbjing a Jisɔs ɛyangɛ
(Matiyu 17.1-8; Mak 9.2-8)
28Gɔ nfong ɛnigeni ɔji Jisɔs bungɔ nshɔl nyaa, A tabɛ Pita, Jɔn na Jɛmshi tam na ba gɔ ɛwɔng shɔng kagɛ ɛrɔ. 29Na Jisɔs jɔ kagɛ ɛrɔ, ɛshimar ɛbɛ yangɛ abɔmɔ ɛnye yangɛ abarɛ jɔ ya. 30Gɔ ndoando nyiɔ abolom abal, Mosis na Ɛlayija, lɔng bǝkperɛ.
31Bɔ bǝkperɛ gɔ ɛblobo ni Ɛshɔwɔ jɔ bung nanɛ. Bɔ jɔ bungɔ lagɛ ɛtamɛnɛ sha ɛying, na ji kpogolo ɛlime gɔ Jɛrushɛlɛm.
32Pita na anɛ ba bɔ jɛnɛ nɔ jɔ lilal, ɔji bɔ nyamɛ nɔ, bɔ nyenɛ gɔ ɛblobo ɛnɛ na abolom abal ba yim nanɛ.
33Na Mosis na Ɛlayija yagɛ tam Jisɔs sha, Pita tɔngɛ rɛ, “Nshɔ, ɛnɔb ɔji war le aa. Nɔngɔ war shi ɛbrɔ ɛra ajing ji ja, ajing ji Mosis ajing ji Ɛlayija.” (A gbɛrɛm ji ajɔ bung.)
34Na ajɔ bung, ɛbɔkɔk na bobolo bɔ, ɛfalfal bɔb batɔtɔnɔ ɛbɛ na bɔ yɛlɛ gɔ ɛbɔkɔk.
35Ɛblom lɔng gɔ ɛbɔkɔk, rɛ, “Mɔnɔwamɛ wɔ aa, nɔ mijag; wogɛ wan.”
36Ɔji ɛblom ragɛ bungɔ, bɔ nyenɛ Jisɔs yim ntang. Batɔtɔnɔ ɛbɛ bolanyɔ bɔ tɔngim nɛ awɔngawɔngɔ gɔ ngarɛ nyiɔ ji bɔ nyenɛ nɔ.
Jisɔs lime mɔn nɔ ɛbitɔgɔ jɔlɛ gɔ ngɔbjing nɔb
(Matiyu 17.14-18; Mak 9.14-27)
37Gɔ ɛtɔnɔ ɛfong, Jisɔs na batɔtɔnɔ ɛbɛ badɛ gɔ ɛwɔng, ɛblɔng anɛ ba bǝkpere bɔ.
38Nlolom awɔng gɔ ɛblɔng nyiɔ binge rɛ, “Ntetebe, magbɔngɔ bɔngɔ mɔnɔwamɛ nɔ nlom, yɛ ntangtang wɔ le mɔn nɔ nkpenɔ. 39Ɛbi ɛtɔgɔ ɛmɛ kɔ ɛkɔ kpejɔ lime akimatang. Ɛmɛka ngbɔbɔngɔ nyi kpejɔ lime agbɔ jɔ yɛge afal gɔ nyɔ. Nɔwɔ akpe ringe shɔngɔ teb kpejɔ fige ayɔ mɛnim jɔ ka ɛyagɛ. 40Ngbɔngɔ batɔtɔnɔ ɛba rɛ bɔ kam ɛbi ɛtɔgɔ jiɔ yege gɔ gɛya ngɔbjing, wɔ bɔ malim.”
41Jisɔs kimawɛ fangɛ rɛ, “Wan anɛ ba ɛying ji anu ɛbtamɛ mkpem abang ɛnyanɛ lim gbol! Rɛnan wɔ nle jɔl na nanɛ fɛrɛ kang nanɛ? Kɔ mɔnɔwa ba awɔ aa.”
42Na mɔnɔnu jɔ ba, ɛbi ɛtɔgɔ yegɛ tob gɔ ndi ngbɔgbɔngɔ bɔbɛ. Jisɔs kim nyam ɛbi ɛtɔgɔ jiɔ rɛ lɔng gɔ ngɔbjing amɔnɔa, alemɛ a nɔb, fagɛ ka ndɛ. 43Bɔ anɛ kpɛk kpɛ lamɛ bɔ anyar teb njɛn ɛkɔ nyi Ɛshɔwɔ.
Jisɔs kpɛ bung lagɛ ɛbku nɛ
(Matiyu 17.22-23; Mak 9.30-32)
Jɔlɔ ɛlama anyar ɛjom ka anɛ kpɛk kpɛ gɔ nshɔl nyi Jisɔs jɔ lim, ɔwɔ abungɔ nɔ tɔng batɔtɔnɔ ɛbɛ rɛ, 44“Wongo wan atong nɔbɔnɔbɔ gɔ ɛjom ji nyagɛ tɔngɔ wan: Mɔna Nlolom bɔ kpɛ fagɛ ka anɛ ba ɛjangɛ ɛbɛ.”
45Wɔ ji ajɔ bung lingim bɔ. Teb bɔ bǝrɛ na nɔngɔ bɔ kǝgbɛrɛ, ɔwɔ wangɛ bɔ ki gbɛrɛ ji ajɔ bung, ɛfalfal bɔb bɔ, bɔ shabim babɛ lagɛ ji ajɔ bung.
Nyenɛ wɔ lijɔl ntoboɛshi?
(Matiyu 18.1-5; Mak 9.33-37)
46Batɔtɔnɔ Jisɔs bɛlɛ nfab na atɛm lagɛ nɛ nɔ le jɔl na nɛ nɔ ga gbal gɔ ɛblɔngɔ bɔ.
47Jisɔs, gbɛgbɛrɛ ji bɔ jɔ tir gɔ nteme bɔ, ɔwɔ akim tabɛ mɔnshɛ yimi tɔbɛ.
48Akim tɔngɔ bɔ rɛ, “Nɛ awɔngawɔngɔ nɔ gbere mɔnɔa gɔ gama mbing gbere mɛ; wɔ nɛ awɔngawɔngɔ nɔ gberim nɔ gbere yɛ nɔ tomom nɔ. Wɔ nɛ awɔngawɔngɔ nɔ ga rɛdɛ gɔ ɛblɔng ɛnanɛ yɛ wɔ ga gbal.”
Nɛ awɔngawɔngɔ nɔ kikpe ɛjang na na ale ntowa
(Mak 9.38-40)
49Jɔn tɔngɔ jisɔs rɛ, “Ndɛnjo,” “War nyenɛ nɛ kpe kamɛ abi atɔgɔ gɔ ga mbing ɛjɔlawɛ shadɛ, teb anim jɔ tɔnɔ war.”
50Jisɔs kim fangɛ rɛ, “kɛ shadɛ wan,” “Teb nɛ awɔngawɔngɔ nɔ kile nɛ ɛjang ɛwa ale ntowa.”
Anɛ gɔ ɛjabɛ ajing ji Samariya tɛnɛ Jisɔs
51Na afong jɔ kabɛ bagɛ bi Ɛshɔwɔ kpe tabɛ Jisɔs tam ɛjabɛ ɛtol, Jisɔs lime ntir nyi afe gɔ Jɛrushɛlɛm.
52A kim tomo balɔgɔ ɛbtom ɛbɛ tu gɔ ɛjabɛ ajing ji Samarita bɔ gbɔmbang, shɔng tongo aji bɔmɛ.
53Wɔ anɛ ba Samarita mɛgberim, teb a jɔ tamɛnyi Jɛrushɛlɛm.
54Ɔji batɔtɔnɔ ɛbɛ Jɛmshi na Jɔn nyenɛ jiya, bɔ babɛ rɛ, “Nshɔ, war ɛlɔng agon gɔ ɛjabɛ Ɛtol Ɛshɔwɔ biwol bɔ a?”
55Jisɔs kɛbɛ bɔngɔ bɔ nyam bɔ.
56Yɛ na batɔtɔnɔ ɛbɛ tam gɔ ɛjabɛ jindige.
Le kɔya jɛn rɛ wɔ tɔnɔ Jisɔs
(Matiyu 8.19-22)
57Na bɔ jɔ jɛn shɔngɔ gɔ mbang, nlolom awɔng kim bungɔ tɔng Jisɔs rɛ, “Nkpa tɔnɔ ɛji ajingajingɛ ji afenɔ.”
58Jisɔs kim fangɛ rɛ, “mbar kpe mbing nrok kpe ntak, wɔ mɛ Mɔna Nlolom ɛji ɛbkang nkpem.”
59Jisɔs tɔngɔ Nlolom nɔndige rɛ, “Tɔnim.” Wɔ nlolom nɔnu kim fangɛ Jisɔs rɛ, “Nshɔ, nɔngɔ mɛ ntɔgɔ shɔng ram nshɔjamɛ.”
60Jisɔs kimawɛ tɔng rɛ, “Nɔngɔ akunɛ ram akunɛ bɔ, wɔ shɔng shɔ bung alom Ɛtol Ɛshɔwɔ.”
61Nɛ nɔndige kim tɔb bung fufɔ rɛ, “Nshɔ; mɛ nkpa tɔnɔ, wɔ nɔngɔ mɛ tɔgɔ bɛ fɛrɛ shɔng tɔng anɛbamɛ rɛ mɛ nfe.”
62Jisɔs fangɛ rɛ, “Nɛ awɔngawɔngɔ nɔ fele ɛlo ɛbamɛgbɛ gɔ ɛbɔ kpelime ɛbtom jɔ kɛbɛ gɔ njam, nimmal lim ɛbtom gɔ ji Ɛtol Ɛshɔwɔ.”
Currently Selected:
Luk 9: NBP
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
