Luk 3

Jon ɔr minden iyɔr kɔ ijɔr atɔr ihang Jizɔs

(Matiyo 3.1-12; Mak 1.1-8; Jon 1.19-28)

1Ghɛru anyom puwɛ-atan ungwen Tibros Siza aru Unom utaan kɔ Rom Pontus Palɛt aru Unom kɔ inya Judiya. Kpɛ ungumɔ Hɛrɔd aru Unom kɔ Galili, uwanmgban una Filip aru Unom kɔ utar Itura ghɛ Trakonitis, ne Lasanas aru Unom kɔ Abile. 2Ukpɛ ungwen Anas ghɛ Kayifas vɛru Ataanɛv kɔ apɛɛnɛv anav Aonz, Aonz aram ghu Jon uwan una Zakaraya mɔ aru kɔ vɛ tim gha. 3Jon azend kɔ ahiye amban vɛ tim kɔ ghu ukur-uhǝng Jɔdan umem, utsoghun na iyɔr vɛ de akaa abe avo hin aminde avo kɔ ijɔr ɛn Aonz aguwe akaa abe avo. 4Ɛnmɔ vɛ angɛr kɔ ukaa una Ɔr uramen ɛchi Aonz Azaya na,

“Imo ɔr ungwen angwe kɔ vɛ tim gha ingi kongɔn itaan iyɔr na,

‘Tɔrun ihang ina Aonz Uwun,

tɔrun ihang hun hin iru deng.

5Yivin adogh amem,

senden igo ghɛ agɛr amem.

Ahang agbinjen aru deng,

kɔngurun ahang angan anga gutsagutsa. 6Ta iyɔr amem vɛ ɛn Ɔr arǝn una Aonz ungwen atind.’ ”

7Jon akaa ghɛ isum iyɔr amban vɛ vayi kɔ ghu un na aminde avo kɔ ijɔr, ne akaa na, “Un iyo ibe! Kɛ ana atumbwɛ un utogh na uyuzun isima ivihin ina Aonz ingiyen ingi van mɔ? 8Ɛrɛn akaa angan atɛs na ugɛman asɛma uden akaa abe. Ka kaan imɛnɛgh ikonogh na, ‘Umbun myem anav Abɛraham.’ Mkaa un ukɔng, Aonz abe agɛma angon angan ahir myem anav Abɛraham. 9Kas hanagen izemb ingi agbir kɔ itine ikon. Hanamɔ ukon ungun umuwɛ atam asɛ gha vɛ gber inya vɛ teng vɛ tuwa kɔ uzu.”

10Iweng iyɔr ingimɔ ipine una, “Kine ghi ɛr?”

11Jon arumun avo na, “Hanamɔ ɔr ungwen angwe ghɛ arigiya ahar ana ɔr ungwen angwe ghi iye gha, ɔr ungwen angwe ghu ukwagh uyan un kpa abur hin ana ɔr ungwen angwe ghu ukwagh uyan gha.”

12Kas vɛ ɔzunɛv ukpanɛv kpa vɛ va na avo aminde kɔ ijɔr, vɛ ata una, “Ɔr tɛsɛn, Kine ghi ɛr?”

13“A ɔɔr avo na, Ka ɔzun inarigh ukpanɛv inkin ghi kar ina uzɔ gha.”

14Ne uwaiku agenɛv vɛ pine un na, “Ne kine ghi ɛr?”

Arumun na, “Ka ɔzun inarigh kɔ ghi iyɔr ghi ikɔw gha, shigh ka barayi iyɔr akɛra gha inarigh inkin umbu ɔzun ghu utom ghi ikuma un.”

15Iyɔr vɛru ghi ibɛrɛn ase na Ɔr tsɛghan na Aonz angwe ivan, vɛru umburun kɔ asɛma na aragha Jon ne angwe Ɔr tsɛghan una Aonz hun. 16Jon arumun avo na, “Mɛgwe ghi iminden kɔ ijɔr; Kpa ɔr ungwen ahembam angwe ghi ivan, mɛ kpend usaghɛn ikor akɔv ana#3.16 Mɛ kpend usaghɛn ikor akɔv ana Ɔ ɛn ɔr ujin ava kɔ itumbɛ ɔr ujus ukpan una asagh un ikor akɔvɔ, ashigh akire un ikpar avor.; Un ne ava aminde un kɔ ghɛ Ajingɛjing una Aonz ghɛ uzu. 17Akɔr ikagh iperen asang akaa#3.17 Ikagh iperen asang akaa Iteigh kin iki inyɔ kɔ itogh ina ta iki afanz ne amba peren asang akaa. Ta uper atɛng akpɔrakpa ana ta usam uha inya. ghu uvo, un ne atɔr ahiye ungwen vɛ gbire asang akaa hun akura usam hun abɛr kɔ utav. Kpa asong ahur ana kɔ uzu ungun ungu pirin gha.” 18Ghɛ amuu agen kpos-kpos Jon aru iwan avo isima na vɛ de akaa abe ghɛ utsoghun avo urɛhɛ usɛ. 19Kpa mɔ Jon ahure utor Hɛrɔd itiyo ikaa ungwen a ɔz Herodiyas, ukwas uwanmgban una ghɛ akaa abe agen tsɛng angan a ɛr. 20Hɛrɔd asoor kwagh ube ungwen, kɔ akaa abe ana. Mɔ azɛma Jon kɔ ugadi.

Jon aminde Jizɔs kɔ ijɔr

(Matiyo 3.13; Mak 1.9-11)

21Mɔ vɛ aminde kɔ ijɔr iyɔr amem, Jizɔs kpa vɛ aminde kɔ ijɔr, mɔ aru ghi iramen ghu Aonz, ka abugh kɔisa. 22Ajingɛjing una Aonz asen kɔ ana ɛn mkumgum. Imo iva kɔisa ikaa na, “Uwɛ ne ungwe Uwan wam isima-isima ka asham ghu uwɛ tsɛng.”

Atiye utir anav Jizɔs

(Matiyo 1.1-17)

23Jizɔs akpembereyi kɔ anyom iti ghu puwɛ ne ahiye utom Aonz gbɛngang. Jizɔs aru uwan una Josɛf. Josɛf aru uwan una Heli. 24Heli aru uwan una Matat, Matat aru uwan una Lɛvi. Lɛvi aru uwan una Milika. Milika aru uwan una Janayi. Janayi aru uwan una Josɛf. 25Joesf aru uwan una Matatiyas. Matatiyas aru uwan una Emos. Emos aru uwan una Nahum. Nahum aru uwan una Esili. Esili aru uwan una Nagayi. 26Nagayi aru uwan una Mat. Mat aru uwan una Matatiyas. Matatiyas aru uwan una Semen. Semen aru uwan una Josak. Josak aru uwan una Joda. 27Joda aru uwan una Jonan. Jonan aru uwan una Resa. Resa aru uwan una Zerɔbabel. Zerɔbabel aru uwan una Shilitiyel. Shilitiyel aru uwan una Neri. 28Neri aru uwan una Meliki. Meliki aru uwan una Adi. Adi aru uwan una Kosam. Kosam aru uwan una Ɛlimadam. Ɛlimadam aru uwan una Ɛr. 29Ɛr aru uwan una Joshuwa. Joshuwa aru uwan una Eliza. Eliza aru uwan una Jorim. Jorim aru uwan una Matat. Matat aru uwan una Lɛvi. 30Lɛvi aru uwan una Simiyon. Simiyon aru uwan una Juda. Juda aru uwan una Josɛf. Josɛf aru uwan una Jonam. Jonam aru uwan una Eliyakim. 31Eliyakim aru uwan una Meliya. Meliya aru uwan una Mena. Mena aru uwan una Matata. Matata aru uwan una Natan. Natan aru uwan una Dɛvid. 32Dɛvid aru uwan una Obed. Obed aru uwan una Bowas. Bowas aru uwan una Salmon. Salmon aru uwan una Nashon. 33Nashon aru uwan una Aminadab. Aminadab aru uwan una Ram. Ram aru uwan una Hezoron. Hezoron aru uwan una Perez. Perez aru uwan una Juda. 34Juda aru uwan una Jakob. Jakob aru uwan una Azik. Azik aru uwan una Abɛraham. Abɛraham aru uwan una Tera. Tera aru uwan una Nahɔr. 35Nahɔr aru uwan una Serug. Serug aru uwan una Rewu. Rewu aru uwan una Peleg. Peleg aru uwan una Eber. Eber aru uwan una Shela. 36Shela aru uwan una Kenan. Kenan aru uwan una Arfazad. Arfazad aru uwan una Shem. Shem aru uwan una Nuwa. Nuwa aru uwan una Lamek. 37Lamek aru uwan una Metɔsela. Metɔsela aru uwan una Ɛnok. Ɛnok aru uwan una Jared. Jared aru uwan una Mahalalel. Mahalalel aru uwan una Kenan. 38Kenan aru uwan una Ɛnosh. Ɛnosh aru uwan una Set. Set aru uwan una Adam. Adam aru uwan una Aonz.

Currently Selected:

Luk 3: UTA

Highlight

Copy