Luk 4
4
Ijɔv inɔng utsun Jizɔs na agba ukwagh ube
(Matiyo 4.1-11; Mak 1.12-13)
1Jizɔs, aru ayiv ghɛ Ajingɛjing una Aonz, ahire kɔ uhǝng Jodan Ajingɛjing Aonz ayov ghu un kɔ ahiye ungwen vɛ tim gha. 2Ne Aru ken ahɔr iti-ahar Ijɔv inɔng utsun un. Ahɔ angumɔ aru ghi ihɔrun ukwagh uyan, ahɔ iti-ahar abɛɛn mɔ ijon ikɔr un shisha.
3Ijɔv ikaa ghu un na, “Uru Uwan una Aonz, Kaa igon igin hin ihir ukwagh uyan.”
4Jizɔs akaa ghu un na, “Vɛ angɛr kɔ ukaa Aonz; ‘Ɔr abe awar kɔ ukwagh uyan tas gha.’ ”
5Ijɔv indiye ghu un kɔisa Kɛsmɛ itɛs un utorov itar imem. 6Ijɔv ikaa ghu un na, “Mɛnaw iyan ghɛ utorov itar ingin imem. Ku mwe ne vɛ wam ghu uvo, unan hanamɔ ɔr ungwen mɛ ker. 7Ɔ ɛn utughum, itar ingin imem ihir iyow.”
8Jizɔs arumun na, “Vɛ angɛr kɔ ukaa Aonz na; tugh Aonz Uwun uwow shigh ɛr utom una tas.”
9Ijɔv iza ghu un kɔ Jerusalɛm, itɛng un indiye ghu un kɔisa gbish kɔ itumbɛ Aonz. Ijɔv ikaa ghu un na, “Uru Uwan una Aonz, tsuwɛ han hin gba kɔ inya. 10Ɛn mɔ vɛ angɛr kɔ ukaa Aonz na,
“ ‘Aonz ana uzɔ kɔ vudugɛr anav Aonz
hin vɛ kɛgh uwɛ.
11Vɛ kɔru kɔisa ɛn,
udɛ ghi vihin uvorogh ghi igon.’ ”
12Jizɔs arumun na, “Ukaa Aonz ukaa na, ‘Ka akarayi Aonz Uwun uwow gha.’ ”
13Mɔ Ijɔv ibɛɛn, ghi karen un mɔ ivond un iyov ukɛghɛn kpɛ ugen.
Iyɔr vɛ venda Jizɔs kɔ utar Nazaret
(Matiyo 4.12-17; Mak 1.14-15)
14Jizɔs ahire kɔ Galili kɔ ghi ikɔw una Ajingɛjing Aonz, Iyɔr vɛ mgba urɛ una kɔ ahiye ungumɔ umuwem. 15Atɛsɛyi urɛhɛ una Aonz kɔ Itumbɛ izwangnɛn Ujus, iyɔr amem vɛ sigha un.
16Aza kɔ Nazaret kɔ ahiye ungwen aves, ne ihɔ imɛmɛn Ujus aza kɔ itumbɛ izwangnɛn Ujus, mɔ a ɛrɛyi kpem-kpem. Amɔisa ungwen a ɔɔr ukaa, 17vɛ na un ukaa una Ɔr uramen ɛchi Aonz Azaya. Abugh ahiye ungwen vɛ angɛr na.
18“Ajingɛjing una Aonz Uwun angwe kan ghɛ amwe,
Atsɛgham na
mɛ tsogh urɛhɛ usɛ kɔ amban vɛ amba ghi ichan.
Atindim na
mɛ tsogh arǝn kɔ amban vɛ zima avo kɔ ugadi
ghɛ utsoghun kɔ amban vɛ pir ase ɛna ase avo abugh. Atindim na mɛ
arǝn amban vɛ nighe avo.
19Atindim na mɛ tsogh na, inyom ingiyen isegh inagh Aonz Uwun ghi iva ghi iyɔr anav.”
20Akusur ukaa hun, ana ɔr tom hen ahire atɛma ghi inya. Ase amem amban vɛru kɔ itumbɛ izwangnɛn Ujus ɛru ana. 21Ne akɔr ghi ɔɔrun ghɛ avo na, “Nyan akaa angan vɛ angɛr kɔ ukaa Aonz ne ugban kɔ atogh awon ɛnmɔ aka hanagen man.”
22Amem vɛ ram akaa asɛ ghɛ ana, ka akond avo iyɔr ghɛ aram asɛ angan aram ghɛ avo. Vɛ pine arend, “Ku uwan una Josɛf nan gha?”
23Jizɔs akaa ghɛ avo na, “Mɛ fɔ na utuwan ikan ingin: ‘Ɔr-ukoson, kose imɛnɛgh ikow.’ Ɛr ukaan na, ‘Ɛr han ghɛ ihiye uwow akaa angan ghi mgba na ɔ ɛr kɔ ahiye Kapanum.’ ”
24Ne akaa ghɛ avo na, “Ukɔng, ɔr uramen ɛchi Aonz arun ghɛ itughun hɔ ahiye una gha.
25“Mɛ kaa ghu un ukɔng akasɛv ichɔrguruv vɛru kɔ utar una Izrɛl tsɛng ukpɛ Ɔr uramen ɛchi Aonz, Ɛlaja ungwen uvǝra unayi gha anyom atar ghɛ iwɔɔr itsindar ungwen ijon iru shisha kɔ utar Izrɛl. 26Kpa Aonz atind Ɛlaja kɔ ghu umɔ uvo gha, atind un kɔ ukwas ichɔrgur ungwen aru kɔ ghɛ ihiye ungwen vɛ tayi na Zarefat ungwen kɔ utar Sidon iyɔr amban amba Izrɛl gha. 27Iyɔr tsɛng vɛru ghi iwen imand kɔ utar Izrɛl ukpɛ Ɛlasha Ɔr uramen ɛchi Aonz, kpa Aonz akos umɔ uvo gha kɛ Naaman tas ɔr kɔ utar ghu Siriya ungwen aru ɔr Izrɛl gha ne akos un.”
28Iyɔr amem amban vɛru kɔ itumbɛ izwangnɛn Ujus asima avihi avo ken shisha mɔ vɛ amgban ukwagh ɔɔrun una. 29Vɛ mugh isa, vɛ zenda un vɛ duwe ghu un hɔ iyɔr itim mɔ, vɛ yov ghu un kɔ uhaar ungwen vɛ mgbɛgha un kɔ ghi inya. 30Kpa akar hɔ ateh uvo ayov.
Jizɔs azɛnda ajingɛjing ube kɔ ɔr
(Mak 1.21-28)
31Mɔ Asen aza kɔ Kapanum, ahiye ungwen kɔ utar Galili, Ihɔ imɛmɛn Ujus atɛs iyɔr urɛhɛ Aonz. 32Ka akondo avo iyɔr ghi itɛsɛn ina, Ɛchi amu ana aru ghi ikɔw.
33Kɔ itumbɛ izwangnɛn Ujus hun ɔr ugen aru ghi ijɔv kɔ ghɛ ana, ajingɛjing ube hun ivang ghɛ imo igbong na, 34“Yov han! Kine uker na ɔ ɛr ghu ɔs, Jizɔs ɔr Nazaret, uva na utim ɔso? Mɛ fɔ utu ɔr ungwen ungwe Ɔr tsangna una Aonz!”
35Jizɔs akaa ijɔv hun na, “De ayɔz duwe kɔ ghɛ ana!” Mɔ iyɔr amem vɛru ghi ɛnɛn, ajingɛjing ube hun aduwe ayov kpa ɔr hun avihi iyɔr gha.
36Iyɔr amem ka kond avo iyɔr ungwen vɛ pine arend, “Kine amu nan angan anga ghi iyan ghɛ ikɔw ungwen akaa ajɔv na aduwe kɔ ɔr ungumɔ ta aduwe man!” 37Iyɔr vɛ amgba urɛh una kɔ vɛ ihiye ambumɔ.
Jizɔs akos iyɔr tsɛng
(Matiyo 8.14-17; Mak 1.29-34)
38Jizɔs aduwen kɔ itumbɛ izwangnɛn Ujus aduwe aza kɔ itumbɛ ina Samon. Ungɔ ukwas una Samon agbayi imas, vɛ kaa Jizɔs na akos un. 39Atire kpembere hɔ inanghɛ ikin aru ayav mɔ ahure imas hun, iyov. Amɔisa ajir ukwagh uyan ana avo.
40Ighang ibɛɛn mɔ iyɔr vɛ va ghɛ awanɛv kpos kpos kɔ ghɛ Jizɔs, aper avo ana ghɛ hanamɔ ɔr, vɛ shiya.
41Ne, ajingɛjing abev aduweyi kɔ iyɔr tsɛng, ikongnun, “Ungwe Uwan una Aonz!” Kpa ahure avo arumun avo na vɛ ram gha, itiyo ikaa vɛ fɔ na angwe Ɔr tsɛghan una Aonz.
42Usov ghɛ usov, Jizɔs aduwe aza kɔ ahiye ungwen ɔr aru gha. Iyɔr vɛ nɔr ikeren un mɔ vɛ ɛnɛn ghɛ ana, vɛ akɔr uzɔ na aka vondoyi avo gha. 43Kpa akaa ghɛ avo na, “Aka ken-ken na mɛ tsogh urɛhɛ usɛ, ghu utorov unav Aonz kɔ ahiye agenɛv kpa, itiyo ikaa kɛ utom ungun atindim nɔ.” 44Aza ishi ghɛ urɛhɛ utsoghun kɔ itumbɛ izwangnɛn Ujus ingin kɔ Judiya.
Currently Selected:
Luk 4: UTA
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
