San Lucas 3
3
Káꞌan ndoso ra Juan, ra síkuchi naꞌa xiꞌin na ivi
(Mt. 3:1-12; Mr. 1:1-8; Jn. 1:19-28)
1Ndi̱xinu xaꞌun kuiya kúu mií ra rey Tiberio chiñu nuu ndiꞌi na ñuu ya ndíkun ndaa ñuu Roma. Ta xa̱ꞌnda chiñu ra nuu ndiꞌi nda gobernador ikán, ra Poncio Pilato ku ra xa̱ꞌnda chiñu nuu na ñuu ya ñúꞌu Judea, ta ra Herodes ku̱u gobernador nuu na ñuu ya ñúꞌu Galilea. Inka ra Felipe, ñani ra Herodes, ku̱u gobernador nuu na ñuu ya ñúꞌu Iturea xiꞌin na ñuu ya ñúꞌu Traconite. Ta inka ra náni Lisanias ku̱u gobernador nuu na ñuu ya ñúꞌu Abilinia. 2Ta ra Anás xiꞌin ra Caifás ku nda ndi̱xiyo sutu nda naꞌnu nuu ndiꞌi sutu ñuu Israel. Suvi tiempo nuu ku̱u ndiꞌi nda ikán chiñu kua ndi̱kaꞌan Ndioxi xiꞌin ra Juan, seꞌe ra Zacarías iku yuyu. 3Ñaa xa̱á ra káꞌan ndoso ra tuꞌun Ndioxi yuꞌu ita Jordán, káꞌan ra xiꞌin na ya ná ndiko koo ini naꞌa xaꞌa kuachi na ta saa sikuchi ra na ya xaa kaꞌnu ini Ndioxi xaꞌa na.
4Yóꞌó kúu nuu ndi̱xinu ya ta̱a ra Isaías, ra ndi̱kaꞌan ndoso tuꞌun yuꞌu Ndioxi xinaꞌa xaꞌa ra Juan. Chi ya ta̱a ra káchi ya saa:
Tiꞌvi i iin taa iku yuyu, ta ndee ni ndaniꞌi ra tachi ra, kachi ra saa:
“Xaa vií ndo ichí nuu Iva yo Ndioxi,
xaa vií ndo ini ndo, ná nduu ndáku ya.
Saa chi tá íyo ichí, saa íyo ini yo.
5Ndiꞌi nuu yavi ta ndikutu ñuꞌú nuu ya,
ndiꞌi xiki tin iku ta nduu ndaa ya.
Tá íyo ichí yakua, ta ndundáku ya.
Tá íyo ichí yu̱ú ni ta ndaꞌa ya nduvaꞌa ya.
6Ta saa kuni ndiꞌi na ñuu ivi unkua kuu sikaku Ndioxi na”, káchi ya ta̱a ra Isaías.
7Saa ndi̱xaa naꞌa, kuaꞌa ni ku na ndi̱xaa nuu íin ra Juan kúni na sikuchi ñaꞌa ra. Ta ñaa ndi̱kaꞌan ra xiꞌin na, káchi ra saa:
―¡Ndóꞌo̱ nǎꞌa ku ndo, tá íin seꞌe kiti ko̱ó saa íin ndo! ¿Unku ndi̱kaꞌan xiꞌin ndo kuchi ndo ta xaꞌa ya íkan ndo saa ta sikaku Ndioxi ndóꞌo̱ nuu ya vaxi tixuꞌvi ndo, káꞌán ndo? 8Xiꞌna ndiko koo ini ndo xaꞌa ndiꞌi kuachi ndo, ta ikan ndo ya vaꞌa xiꞌin ya ndaa, saa kixi ndo kuchi ndo, saa chi saa sinaꞌa ndo mií ndo ya ndixa kua ndi̱ko koo ini ndo kuaꞌan ndo ichí Ndioxi. Ta käꞌan tai ndo kúu ndo seꞌe sikua ra Abraham, ta kaꞌan ndo: “Xaa kaꞌnu ini Ndioxi xaꞌa kuachi nde”, kachi ndo. Saa chi Ndioxi kúu mií ra ndee ya kuchiñu ra ndisama ra yu̱ú yóꞌó nduu ya naꞌa, ta seꞌe sikua ra Abraham nduu na. 9Ta ná kundaa ini ndo, chi Ndioxi ta xa íyo ndúvi ra xiꞌin yacha ya kaꞌnda ra nda tioꞌo itun köo kúun kuiꞌi vaꞌa ndaꞌa, ta kee nu koko nu nuu ñu̱ꞌu̱ ―káchi ra Juan xiꞌin na.
10Ta saa ndi̱kaꞌan na xiꞌin ra, káchi na saa:
―¿Unkua xíniñuꞌu nde ikan nde ya ná kündoꞌo nde saa? ―káchi na xiꞌin ra.
11Saa ndi̱kuiin ra, káchi ra saa:
―Tá íyo iin taa kúu mií uvi tikoto, ta íyo inka ra köo nda iin tikoto ra, ta ra kúu mií uvi tikoto xíniñuꞌu ra taxi ra iin ya ndaꞌa ra köo nda iin tikoto. Saa tu iin ra íyo ñaꞌa xíxi nuu, saa xíniñuꞌu tu ra ikán va xaa súvi ra ―káchi ra Juan xiꞌin na.
12Ta saa ndi̱xaa tu sava nda ndíkaya xuꞌun nuu gobierno ñuu Roma va, kúni nda sikuchi ñaꞌa ra, saa ndi̱kaꞌan nda xiꞌin ra, káchi nda saa:
―Maestro, ¿ta ndeꞌe, unkua xíniñuꞌu nde ikan nde? ―káchi nda xiꞌin ra.
13Ñaa ndi̱kuiin ra, káchi ra saa:
―Sïndaꞌvi ndo naꞌa. Kïꞌin siki ndo xuꞌun ndaꞌa na. Ndisaa tá íyo ya káꞌan gobierno xiꞌin ndo saa koo ya kiꞌin ndo ndaꞌa na ―káchi ra xiꞌin nda.
14Ta saa ndi̱xaa tu sava nda lapa va, ndi̱ndakan tuꞌun ñaꞌa nda, káchi nda saa:
―¿Ta ndeꞌe, unkua xíniñuꞌu nde ikan nde? ―káchi nda xiꞌin ra.
Saa ndi̱kuiin ra, káchi ra saa:
―Sïkuiꞌna ndo ñaꞌa na, ni sïꞌvi ndo na, täxi ndo kuachi siki xaꞌa na, kindoo ini ndo xiꞌin yaꞌvi ndo ―káchi ra xiꞌin nda.
15Saa ndóo ndiꞌi na ndátun xaa ra ndi̱kaxin Ndioxi, sikaku ra na. Tá xíni soꞌo na ikán ya káꞌan ra Juan. Ñaa xa̱á na ndíkani ini na, káchi na saa:
―¿Án süvi mií ra Juan ku ra sikaku yoo? ―káchi na.
16Ta saa ndi̱kaꞌan ra xiꞌin na, káchi ra saa:
―Süvi yeꞌe ku i. Ya ndaa kua síkuchi i ndóꞌo̱ xiꞌin tikuii, sundi süvi yeꞌe ku i sikaku ndóꞌo̱. Vaxi iin ra, ta ra ikán ku ra chee ni nuu i, ta nda sata nduxa ra küvi kuyati i ndaxin i chi yáꞌa ni chee ra nuu i. Ra ikán ku ra sikuchi ndóꞌo̱ xiꞌin Tachi I̱í Ndioxi xiꞌin ñu̱ꞌu̱ xíxi. 17Ta xa íyo ndúvi ra xiꞌin ñaꞌa ya nditivi ra trigo ra chivaꞌa ra ya nuu ndúvaꞌa ñaꞌa ra, ta taan ra xeꞌe ya kee ya koko ya nuu ndee ni xíxi ñu̱ꞌu̱ nduvi niuun, ta ni köo ndáꞌva ya ―káchi ra Juan xiꞌin na.
18Xiꞌin tuꞌun yóꞌó tin inka ka nuu tuꞌun ndi̱kaꞌan ra xiꞌin na ñuu, kuaꞌa ni ya ndi̱kaꞌan ra xiꞌin na ndíkani ra tuꞌun vaꞌa nuu na, ya ná ndiko koo na ichí Ndioxi. 19Ta ndi̱kaꞌan tu ra xiꞌin ra gobernador Herodes va xaꞌa ya ti̱ndaꞌa ra xiꞌin yá Herodías, yá síꞌi ñani ra, ra Felipe tin xaꞌa inka ka ñaꞌa ya väꞌa íkan ra. 20Vani ndi̱kaꞌan ra Juan xiꞌin ra Herodes ta köo ndi̱xini soꞌo ra ya ndi̱kaꞌan ra xiꞌin ra chi i̱kan tuku ra inka ya väꞌa, chi̱kaa ra ra Juan veꞌe kàà.
Ya ku̱u nuu si̱kuchi ra Juan Jesús
(Mt. 3:13-17; Mr. 1:9-11)
21Ta yachi tá täꞌan kuꞌun ra Juan veꞌe kàà, kuaꞌa ni naꞌa si̱kuchi ra, saa si̱kuchi tu ra Jesús va. Tá chíchi Jesús, ta xa̱á ra káꞌan ra xiꞌin Ndioxi, ñaa ndi̱xuna nuu ndivi. 22Saa nu̱u Tachi I̱í Ndioxi, tá káa kiti sata, saa káa ya nu̱u xíka nuu ya xiní ra. Ta saa xi̱ni soꞌo na ndóo ikán ndi̱kaꞌan Ndioxi xiꞌin Jesús, káchi ra saa:
―Yóꞌo̱ ku seꞌe mani i, ta íyo vaꞌa ni ini i xíni i yóꞌo̱ ―káchi ra.
Xii sikua Jesús
(Mt. 1:1-17)
23Saa tá ndi̱xinu Jesús oko uxi kuiya ra ta saa xa̱á ra sínaꞌa ra na ivi. Ta xíka ini na seꞌe ra José ku Jesús, káchi na.
Ta ra José ku seꞌe ra Elí.
24Ta ra Elí ku seꞌe ra Matat.
Ta ra Matat ku seꞌe ra Leví.
Ta ra Leví ku seꞌe ra Melqui.
Ta ra Melqui ku seꞌe ra Jana.
Ta ra Jana ku seꞌe ra José.
25Ta ra José ku seꞌe ra Matatías.
Ta ra Matatías ku seꞌe ra Amós.
Ta ra Amós ku seꞌe ra Nahum.
Ta ra Nahum ku seꞌe ra Esli.
Ta ra Esli ku seꞌe ra Nagai.
26Ta ra Nagai ku seꞌe ra Maat.
Ta ra Maat ku seꞌe ra Matatías.
Ta ra Matatías ku seꞌe ra Semei.
Ta ra Semei ku seꞌe ra José.
Ta ra José kú seꞌe ra Judá.
27Ta ra Judá ku seꞌe ra Joana.
Ta ra Joana ku seꞌe ra Resa.
Ta ra Resa ku seꞌe ra Zorobabel.
Ta ra Zorobabel ku seꞌe ra Salatiel.
Ta ra Salatiel ku seꞌe ra Neri.
28Ta ra Neri ku seꞌe ra Melqui.
Ta ra Melqui ku seꞌe ra Adi.
Ta ra Adi ku seꞌe ra Cosam.
Ta ra Cosam ku seꞌe ra Elmodam.
Ta ra Elmodam ku seꞌe ra Er.
29Ta ra Er ku seꞌe ra Josué.
Ta ra Josué ku seꞌe ra Eliezer.
Ta ra Eliezer ku seꞌe ra Jorim.
Ta ra Jorim ku seꞌe ra Matat.
Ta ra Matat ku seꞌe ra Leví.
30Ta ra Leví ku seꞌe ra Simeón.
Ta ra Simeón ku seꞌe ra Judá.
Ta ra Judá ku seꞌe ra José.
Ta ra José ku seꞌe ra Jonán.
Ta ra Jonán ku seꞌe ra Eliaquim.
31Ta ra Eliaquim ku seꞌe ra Melea.
Ta ra Melea ku seꞌe ra Mainán.
Ta ra Mainán ku seꞌe ra Matata.
Ta ra Matata ku seꞌe ra Natán.
32Ta ra Natán ku seꞌe ra David.
Ta ra David ku seꞌe ra Isaí.
Ta ra Isaí ku seꞌe ra Obed.
Ta ra Obed ku seꞌe ra Booz.
Ta ra Booz ku seꞌe ra Salmón.
Ta ra Salmón ku seꞌe ra Naasón.
33Ta ra Naasón ku seꞌe ra Aminadab.
Ta ra Aminadab ku seꞌe ra Aram.
Ta ra Aram ku seꞌe ra Esrom.
Ta ra Esrom ku seꞌe ra Fares.
Ta ra Fares ku seꞌe ra Judá.
34Ta ra Judá ku seꞌe ra Jacob.
Ta ra Jacob ku seꞌe ra Isaac.
Ta ra Isaac ku seꞌe ra Abraham.
Ta ra Abraham ku seꞌe ra Taré.
Ta ra Taré ku seꞌe ra Nacor.
35Ta ra Nacor ku seꞌe ra Serug.
Ta ra Serug ku seꞌe ra Ragau.
Ta ra Ragau ku seꞌe ra Peleg.
Ta ra Peleg ku seꞌe ra Heber.
Ta ra Heber ku seꞌe ra Sala.
36Ta ra Sala ku seꞌe ra Cainán.
Ta ra Cainán ku seꞌe ra Arfaxad.
Ta ra Arfaxad ku seꞌe ra Sem.
Ta ra Sem ku seꞌe ra Noé.
Ta ra Noé ku seꞌe ra Lamec.
37Ta ra Lamec ku seꞌe ra Matusalén.
Ta ra Matusalén ku seꞌe ra Enoc.
Ta ra Enoc ku seꞌe ra Jared.
Ta ra Jared ku seꞌe ra Mahalaleel.
Ta ra Mahalaleel ku seꞌe ra Cainán.
38Ta ra Cainán ku seꞌe ra Enós.
Ta ra Enós ku seꞌe ra Set.
Ta ra Set ku seꞌe ra Adán.
Ta ra Adán ku seꞌe Ndioxi.
Currently Selected:
San Lucas 3: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
