प्रेरित 12
12
पत्रुस झेलखानामि
1तइ बेला हेरोद#१२:१ हेरोद राजा अग्रिपास पइला हुन्। राजाले मण्डलिका कति जनामि कठोर अत्याचार अद्द लाग्या। 2तनले युहन्नाका दाइ याकुबलाइ तरबारले माद्द लायो। 3यइ कामले यहुदिन खुसि भया धेकिबर पत्रुसलाइ लइ पकड्या तरखर अर्यो। यो घटना अखमिरि रोटाका चाडका समयमि भयाथ्यो। 4हेरोदले पत्रुसलाइ पकणिबर झेलखानामि हालिदियो, रे निस्तार चाडपाछा तनलाइ मान्सनका अगाडि लेउन्या बिचार अरिबर तनरो पहरा अद्दाइलाइ सोल जना सिपाइनलाइ चार चार जनाको टोलि बनाइबर पहरा दिनाइलाइ राख्यो। 5इसेरि पत्रुस झेलखानामि राखिया, तर तनरि निउति मण्डलिका बिस्वासिनले परमेस्वरसित लगातार प्रार्थना अद्दाथ्या।
झेलखानाबटहइ पत्रुसको छुट्कारा
6आब हेरोदले पत्रुसलाइ मान्सनका अगाडि ल्याउन्या दिनका अगाडिका रात पत्रुस दुइ जना सिपाइनका बिचमि सिरइथ्या। उनलाइ दुइ साङलाले बाँध्याथ्यो रे देलिमि सिपाइनले पहरा दिराइथ्यो। 7तबइ अचानक प्रभुका एक स्वर्गदुत ताँ धेकापण्या, रे झेलखानाका कोठामि ज्योति चम्क्यो। स्वर्गदुतले पत्रुसलाइ कोखिमि हाण्यो रे “छिटाइ उठ,” भुनिबर तनलाइ उठायो, तसइबेला पत्रुसका हात बाधिया साङलान चुडिबर झड्या। 8स्वर्गदुतले तनलाइ भुन्यो, “पटुको बाद, रे जुत्ता लगा!” तबइ तनले तसोइ अर्यो। उनुले तनलाइ भुन्यो, “खास्टो ओडिबर मेरा पाछापाछा लाग।” 9रे पत्रुस निकलिबर उनरा पाछापाछा लाग्या। स्वर्गदुतबटहइ अरिया कुरा साँच्चि हो भुन्न्या तिनलाइ थाइ भएन्। तर दर्सन धेक्दाछु भुणि तिनले सोच्यो। 10जबइ तिनुन सिपाइनले पहरा दिन्नारया दुइ ठउँरबटहइ भइबर सहरमि पस्या फलाम्या देलिमि तिनुन पुग्या। तबइ त्यो देलो आफइ तिनुनकि निउति उघण्यो। रे तिनुन बाइर निकलबर एक गल्लिका बाटा भइबर गया, रे तन्जेइ स्वर्गदुतले तनलाइ छाडिबर गया।
11तइबेला पत्रुसको होस खुल्यो रे तनले भुन्यो, “आब मुलाइ साँच्चि लइ था भयो! कि प्रभुले आफना दुत पठाइबर हेरोद राजाका हातबटहइ रे यहुदिनले जि अद्द चाहान्थ्या तिन सप्पइबटहइ मुलाइ छुट्कारा दियो।”
12त्यो कुरा तनलाइ था भयापाछा, तन मर्कुस भुनिन्या युहन्नाकि इजा मरियमका घरमि गया। ताँ भउत जना जम्मा होइबर प्रार्थना अद्दाथ्या। 13पत्रुसले देलो घचघचाउन्ज्या रोदा नाउँ भएइ नउकर्नि देलो खोल्ल आइ। 14पत्रुसको सोर सुन्यापाछा त्यो खुसि होइबर देलो नखोलि भितर दगुणिबर गइ “पत्रुस देलामि कल्लिरइछन्” भुणि रइबार दिइ। 15तर तिनुनले तइलाइ भुन्यो, “तेरो होस ठिक छ?” तर तइले भुन्या कुरा साँच्चि हो भुणि तइले जिद्दि अर्यो। तबइ तिनुनले भुन्यो, “त्यो उनरो स्वर्गदुत होलो।”
16तर पत्रुसले भुन्या देलो घचघचाइरया, देलो खोलन्ज्या तनलाइ धेकिबर तिनुन अचम्म पण्या। 17पत्रुसले तिनुनलाइ “चुप लाग” भनिबर हातका इसारा अर्यो, रे प्रभुले कसेरि आफुलाइ झेलखानाबटहइ बाइर निकाल्यो त्यो तिनुनलाइ बतायो। यइ कुराको रइबार #१२:१७ यिन याकुब इसुका भाइ थ्या, जो तइबेला यरुसलेम मण्डलिका प्रमुख अगुवाका रुपमि थ्या। याकुब रे अउर भाइनलाइ दिया भनिबर तन बिदा भइबर अर्काइ ठउँर गइया।
18उज्यालो भयापाछा पत्रुसलाइ कि भयो भुणि सिपाइनका बिचमि ठुलो हलचल भयो। 19हेरोदले पत्रुसलाइ खोज्ज लायो। रे तिनुनले पत्रुसलाइ काँइ लइ फेला पाड्ड सकेनन्। तसो भयाहुनतक हेरोदले पहरा दिन्या सिपाइनको जाँच अर्यो रे जबाफ नपायाहुनाले तिनुनलाइ मिरत्युदण्ड दियो।
तइपाछा हेरोद यरुसलेम छाडिबर कइसरिया सहरमि गया रे ताँइ बस्या।
हेरोद राजाको मिरत्यु
20हेरोद राजा टुरोस रे सिदोन सहरका मान्सनसित भउत रिसाया थ्या। तनुन एक दल होइबर उनरा वा आया, रे राजाका भितरका कर्मचारि बलस्तससित खुसामद अरिबर मिलापकि निउति बिन्ति अर्यो। क्यालाइकि तइ सहरका मान्सन अन्नकि निउति हेरोद राजाका देसमि भर पडन्थ्या।
21रे तोकिया दिनमि राजकिय लत्ता लाइबर हेरोद उनरा सिंहासनमि बस्या, रे तिनुनलाइ उनुले भासण दियो। 22मान्सनले “यो त इस्वरको बोलि हो, मान्सको हइन!” भनिबर कला हाल्ल लाग्या। 23तर परमेस्वरलाइ महिमा नदिया हुनाले तन्जेइ प्रभुका एक स्वर्गदुतले उनलाइ प्रहार अर्यो, रे स्याउँ-स्याउँ किडा पडिबर उन मर्या।
24तर प्रभुको बचन बड्डोइ रे फइलिनोइ गयो।
25बारनाबास रे साउल आफनो सेबा पुरा अरिबर यरुसलेमबटहइ फर्किया। तइबेला उनुनसित मर्कुस भुनिन्या युहन्नालाइ लइ लेया।
Currently Selected:
प्रेरित 12: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
