प्रेरित 8
8
साउलले बिस्वासिनलाइ सतावट दियो
1मान्सनले स्तिफनसलाइ इस्या ढुङाले हानिबर मारन्ज्या साउल लइ सहमत थ्या।
तसइ दिन यरुसलेममि भया मण्डलिका बिरुद्मि ठुलो सतावट सुरु भयो। रे प्रेरितन बाहेक अउर बिस्वासिन सप्पइ यहुदिया रे सामरियाका इलाकातिर छरबट्ट भया। 2प्रभुको भक्तिअद्या मान्सनले स्तिफनसलाइ लइजाइबर खड्यायो, रे तिनरि निउति सोक अर्यो।
3तर साउलले बिस्वासिनलाइ नास अद्दाइलाइ घर घरमि पसिबर बिस्वास अद्द्या स्वानि रे बइकान मान्सनलाइ घसाणि लइजाइबर झेलखानामि हालिदिन्थ्या।
सामरियामि फिलिपले प्रचार अर्यो
4आब तिन छर्बट्ट भया बिस्वासिन जाँइताँइ गइबर असल रइबार सुनाउन लाग्या। 5फिलिप भन्न्या एक जना मान्स सामरियाका कसइ सहरमि गइबर मान्सनलाइ ख्रिस्टका बारेमि प्रचार अर्यो। 6फिलिपले अर्या प्रचार सुनिबर रे तनले अर्या चिन्ह धेकिबर, मान्सन एक मनका होइ तनरा कुरा ध्यान दिबर सुन्यो। 7क्यालाइकि भउत मान्सबटहइ फुचेरा आत्मा डाको हाल्लाइ निकल्ल लाग्या, रे झाड्डु पड्या रे लुला लङडा मान्सन निका पाणिया। 8इस्या तइ सामरिया सहरका मान्सन भउत खुसि भया।
सिमोन जादुगरले इसुमि बिस्वास अर्यो
9तइ सहरमि सिमोन नाउँ भया एक जनो मान्स थ्यो। तइले अगाडिबटहइ तइ सहरमि जादुगरि अरिबर सामरियाका मान्सनलाइ आफना जादुगरिमि दङ्ङ पाड्डोइ आया थ्यो, रे आफुइलाइ मइ हुँ भनिबर ठानन्थ्यो। 10तइ मान्सलाइ नानाबटहइ ठुलासम्म सप्पइले यसो भनिबर माणन्थ्या, “यो मान्स परमेस्वरको त्यो सक्ति हो, जइलाइ महासक्ति भुणिन्छ।” 11तिनुनले तइलाइ माणन्थ्या, क्यालाइकि भउत समयबटहइ तइले आफना जादुगरिले मान्सनलाइ अचम्ममि पाडिराइथ्यो। 12तर फिलिपले परमेस्वरको राज्यका रे इसु ख्रिस्टका नाउँमि असल रइबार सुणायो। तबइ भउत मान्सनले फिलिपका कुरामि बिस्वास अरिबर बप्तिस्मा लियो। 13सिमोनले लइ बिस्वास अर्यो रे बप्तिस्मा लियो। तइपाछा उ फिलिपसंङइ हिट्ट लाग्यो। फिलिपले अर्या चिन्हन रे ठुला ठुला अचम्मका काम अर्याधेकिबर तइलाइ अचम्म लाग्यो।
14सामरिया सहरका मान्सनले परमेस्वरको बचन ग्रहण अर्यो भन्न्या सुनिबर यरुसलेममि हुन्या प्रेरितनले पत्रुस रे युहन्नालाइ तिनुनका वाँ पठायो। 15उनुन ताँ आइबर बिस्वासिनले पबित्तर आत्मा पाउन् भनिबर तिनुनकि निउति प्रार्थना अर्यो। 16क्यालाइकि तन्ज्यासम्म तिनुनमध्ये कसइमि लइ पबित्तर आत्मा आया थेएन। तनले खालि प्रभु इसुको नाउँमि बप्तिस्मा पाया थ्यो। 17तबइ पत्रुस रे युहन्नाले आफना हात तन बिस्वासिमि राख्यो, रे तिनुनले पबित्तर आत्मा पायो।
18आब प्रेरितनले हात राखन्ज्या पबित्तर आत्मा पाइन्यारइछ भन्या धेकिबर सिमोनले यसो भुन्नोइ तिनुनलाइ पइसा दिन लाग्यो, 19“मुइले हात राखन्ज्या जइ मान्सले लइ पबित्तर आत्मा पाउन्या यो सक्ति मुलाइ लइ दिय।”
20तर पत्रुसले तइलाइ भुन्यो, “तेरो पइसा तुसितइ नस्ट होइजाउ, क्यालाइकि तुइले त परमेस्वरको बर्दान लइ पइसाले किन्न सकिन्छ भन्न्या सोचि। 21यइ बिसयमि न तेरो भाग छ न तरो हिस्सा छ, क्यालाइकि परमेस्वरका अगाडि तेरो ह्रिदय ठिक नरइछ।#भजनसंग्रह ७८:३७ 22तबइलाइ तेरो आफनो यो दुस्टबिचार छाड, रे परमेस्वरमि प्रार्थना अर, सायद परमेस्वरले तेरो यसो बिचार छिमा अरन्ना। 23रे पापले तुलाइ अधिनमि राख्या छ।”#ब्यबस्था २९:१८; विलाप ३:१५ 24यो सुनिबर सिमोनले पत्रुस रे युहन्नालाइ भुन्यो, “तमले भुन्या यिन सप्पइ कुरा मुमि जनआउ भुनिबर दया अरि तमइले मेरि निउति प्रभुसित प्रार्थना अरिदिय।”
25तइपाछा पत्रुस रे युहन्नाले प्रभुका बिसयमि प्रचार अरिसक्यापाछा यरुसलेम फर्किबर आउनज्या तिनुनले सामरियाका भउत गाउँ गाउँमि जाइबर असल रइबार सुणायो।
इथियोपियाका नपुंसकले इसुमि बिस्वास अर्यो
26तइपाछा प्रभुका एक स्वर्गदुतले फिलिपलाइ भुन्यो, “उठ रे दछिणतिर यरुसलेमबटहइ गाजा भन्न्या ठउँरतिर जान्या बाटामि जा। ताँ उजाड ठउँरको बाटो छ।” 27तबइ फिलिप उठ्या रे गया। तइबेला इथियोपिया देसका एक #८:२७ आफुइ होइबर हइन तर मान्सले बनाइदिया नपुंसक हो।नपुंसक तसइ बाटाबटहइ भइबर जान्ना थ्या। उन इथियोपिया देसकि महारानि कन्दाकिका ठुला अधिकारि रे जम्माइ सम्पतिका कोसाधछ्य थ्या। उन यरुसलेममि आराधना अरिबर घर फर्किन्नाथ्या। 28रे आफना रथमि बसिबर यसइया अगमबक्ताले लेख्या किताब पड्डाथ्या। 29तबइ पबित्तर आत्माले फिलिपलाइ भुन्यो, “जा रे तइ रथका पाछा पाछा लाग।” 30तबइ फिलिप दउडिबर रथका नजिक पुग्या रे तन मान्सले यसइया अगमबक्ताले लेख्या किताब पड्डारया सुन्यो। फिलिपले उनलाइ सोध्यो, “हजुरले पड्डारया कुरा बुज्जाछउ ब?”
31तबइ नपुंसकले भुन्यो, “कसइले नबताइदियइ मुइले कस्या बुज्ज्या?” रे तिनले फिलिपलाइ रथमि चडिबर आफुसितइ बस्या अनुरोध अर्यो। 32तन नपुंसक धर्म- सास्त्तरको यो खण्ड पड्डाथ्या,
“जसेरि भेडो काटिनाइलाइ लइजाइन्छ,
उन काटन्ज्या चुप रन्या भेडाकि जसेरि
उनुले आफना मुखबटहइ केइ सब्द निकालेन।
33उनरो इतिसम्म अमान भयो कि उनुले ठिकसित न्याय लइ पाएन।
उनरा पुस्ताको बयान कइले अद्द्या?
क्यालाइकि उनरो जिबन धर्तिबटहइ मेटियो।”#यसइया ५३:७-८
34तिन नपुंसकले फिलिपलाइ सोध्यो, “दया अरि मुलाइ बताइदिय, यो कुरडि अगमबक्ताले कइका बिसयमि भुण्या हुन? आफना या अउर कसइका बारेमि?” 35तबइ फिलिपले तनलाइ धर्म- सास्त्तरको इसइ खण्डबटहइ इसुका बारेमि असल रइबार सुणायो। 36रे उनुन बाटामि जानाजानाइ केइ पानि भया ठउँरखि आइपुग्या। तिन नपुंसकले फिलिपलाइ भुन्यो, “हेर, याँ थोक्काइ पानि रइछ। मुलाइ बप्तिस्मा लिनाइलाइ आब क्याले रोद्द सकन्छ?” 37#८:३७ यो पद कसइ कसइ बाइबलमि पाइनइन्। [फिलिपले तनलाइ भुन्यो, “सारा ह्रिदयबटहइ बिस्वास अरन्छउ भन्या तमले बप्तिस्मा लिन सकन्छउ।” तनले भुन्यो, “इसु ख्रिस्टइ परमेस्वरका चेला हुन भुणिबर मु बिस्वास अद्दउ।]”
38तनले रथ रोक्द्या आग्या दियो। तइपाछा फिलिप रे नपुंसक दुएइ ओरलिबर पानिन गया, रे फिलिपले तिनलाइ बप्तिस्मा दियो। 39तर जबइ उनुन पानिनुहइ बाइर निकल्बर आया, तबइ प्रभुका आत्माले फिलिपलाइ समाइबर लइया। तन नपुंसकले फिलिपलाइ दोसर्या धेकेन। रे तन रमाउनाइ आफना बाटा लाग्या।#१ राजा १८:१२; २ राजा २:१६; इजकिएल ३:१४; ८:३ 40तर फिलिपले आफुलाइ अस्दोद सहरमि पुग्या थाँ पायो, रे कइसरिया सहर नपुगन्ज्यासम्म सप्पइ सहरनमि असल रइबार प्रचार अद्दाइ गया।
Currently Selected:
प्रेरित 8: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
