प्रेरित 9
9
इसुले साउललाइ परिबर्तन अर्यो
(प्रेरित २२:६-१६; २६:१२-१८)
1साउल प्रभु इसुका सिस्यानलाइ माद्दया धम्कि दिनाइ ठुला पुजारिका वाँ गया, 2रे तनले प्रभुका बाटामि हिट्टया बइकान मान्स हउ या स्वानि मान्स हउ, जइलाइ लइ फेला पाण्यो तिनुनलाइ बादिबर यरुसलेममि ल्याउन् पाउँ भनिबर दमस्कसको यहुदि सभाघरनका सासकनलाइ चिठ्टि लेखि दिय भनि तनले भुन्यो।
3जबइ तन जानाजानाइ दमस्कस सहर नजिकइ पुगन्ज्या अचानक अग्गासबटहइ एक ज्योति तिनरा वरिपरि चम्कियो। 4तन भुइयइन लोट्या, रे यसो भुन्न्या सोर सुण्यो, “साउल, ए साउल! तु क्याकि मुलाइ सताउन्ना छइ?”
5साउलले सोध्यो, “प्रभु, तम को हउ?”
रे उनुले भुन्यो, “मु इसु हुँ, जइलाइ तु सताउन्ना छइ। 6तर उठिबर सहरमि जा, रे तुइले जि अद्दुपणन्छ त्यो कुरा तुलाइ बताइन्याछ।”
7तिनरा सङमि जान्या मान्सनले सोर सुण्यो, तर कसइलाइ नधेकन्ज्या अचम्म पडिबर कलिरया। 8तबइ साउल भुयइनहइ उठ्या रे आँखा खोलन्ज्या तनले केइ लइ धेकेन, तबइलाइ तिनसङइ गया मान्सनले तनरो हात समाइबर दमस्कसमि लेया। 9तर तिन दिनसम्म तन आँखा नधेक्द्या भया, खानाइ रे पानि लइ खाएन।
10दमस्कसमि हननिया नाउँ भया एक जना सिस्या थ्या। तनलाइ प्रभुले दर्सनमि भुन्यो, “ए हननिया।”
तनले भुन्यो, “प्रभु, हाजिर छु।”
11तबइ प्रभुले तनलाइ भुन्यो, “उठ् रे सिधा नामक गल्लिमि जा, रे ताँ यहुदाका घरमि टार्सस सहरबटहइ आया साउल नाँउ भया मान्सलाइ खोज, क्यालाइकि तन प्रार्थना अद्दा छन्। 12साउलले दर्सनमि एक जना हननिया नाँउ भया मान्स भितर आइबर अज आखाँ धेक्द्या होइजा भनिबर आफुमि उनरो हात राख्या धेक्यो।”
13तर हननियाले भुन्यो, “हे प्रभु, तन मान्सले यरुसलेममि भया तमरा पबित्तर जननलाइ कति खराबि अरिराइछ, त्यो मुइले भउत जनाबटहइ सुणिराइछु। 14तमरो नाउँ लिन्या सप्पइलाइ पक्रडाइदिन्या अधिकार मुख्य पुजारिनबटहइ पाइबर तन याँ आयाछन्।”
15तर प्रभुले तनलाइ भुन्यो, “जा, क्यालाइकि अउरजातिन, राजान रे इज्राएलिनका सन्तानका अगाडि मेरो नाउँ प्रचार अद्द्या मान्स हुनाइलाइ मुइले तनलाइ चुन्या छु। 16तर मेरा नाउँका खतिर तनले कति कस्ट भोग्दु पडन्छ, त्यो मु तनलाइ धेकाउन्या छु।”
17तबइ हननिया गइबर तइ घरभितर पस्या, रे तनमि आफना हात राखिबर भुन्यो, “भाइ साउल, जो प्रभु इसु तम आउन्नारया बाटामि तमरा वा धेकापण्या थ्या। तमले अज धेक्द सक रे पबित्तर आत्माले भरपुर हउ भनिबर उनुले मुलाइ पठाया हो।” 18तुरुन्तइ तनरा आँखाबटहइ पापडाजसा केइ झड्या। रे तन अज धेक्द्या भया रे तनले उठिबर बप्तिस्मा लियो। 19रे खानाइ खायापाछा तनले बल पायो।
साउल दमस्कस रे यरुसलेममि
साउल भउत दिनसम्म दमस्कसमि भया सिस्यानसितइ बस्या।
20रे साउल तुरुन्तइ सभाघरनमि पसिबर प्रभु इसु परमेस्वरका चेला हुन भुनिबर प्रचार अद्द लाग्या।
21तबइ सुन्न्याजति सप्पइले अचम्म मानिबर भन्न लाग्या, “क्या यरुसलेममि इसुमि बिस्वास अद्द्या जतिलाइ खतम अद्द खोज्या मान्स यइ हइन ब? याँ लइ इसुका सिस्यानलाइ पकणिबर मुख्य पुजारिनका वाँ लइजान्या नियतले आया यइ हइन ब?”
22तर साउल अज बर्ता सक्तिसालि हुनाइ गया, रे इसुइ ख्रिस्ट हुन् भनिबर तिनले यसो पक्का प्रमाण दियो कि दमस्कसका यहुदिनले केइ लइ जबाफ दिन सकेनन्।
23तर भउत समय बित्यापाछा यहुदिन जम्मा होइबर साउललाइ माद्या मत अर्यो। 24तर आफुलाइ माद्द खोज्या कुरा साउलले था पायो। यहुदिन तनलाइ माद्दाइ रातदिन दमस्कसका देलामि ढुकिबर बसन्थ्या। 25तर तनरा सिस्यानले तनलाइ एक रात सहरका वालबटहइ डोकाइन हालिबर तल्तिर ओरालिदियो।
साउल यरुसलेम सहरमि
26साउल यरुसलेममि आयापाछा सिस्यानसित मिल्न खोज्यो। तर तिनुनलाइ साउल इसुका सिस्य हुन् भन्न्या पत्यार नभयाहुनाले सप्पइ तनसित डराया। 27तर बारनाबासले तनलाइ सङइ लेइयबर प्रेरितनका वाँ गया। रे साउलले प्रभुलाइ बाटामि धेक्या रे प्रभु तनसित बोल्या कुरा तनले दमस्कसमि साहाससित इसुका नाउँमि प्रचार अर्या कुरा तिनुनलाइ बताइदियो। 28साउल यरुसलेममि तिनुन सङसङइ खुल्मखुल्ला हिट्ट लाग्या रे साहससित प्रभु इसुका नाउँमि प्रचार अद्द लाग्या। 29तन ग्रिक भासा बोल्या यहुदिनसित बाद-बिबाद अरन्थ्या, तर उनुनले साउललाइ माद्द खोजन्थ्या। 30तर यो था पाइबर बिस्वासि दाइभाइनले साउललाइ कइसरियामि लेया रे ताँबटहइ तनलाइ टार्सस सहरमि पठाइदियो।
31इसेरि सारा यहुदिया, गालिल रे सामरियाभरि मण्डलिमि सान्ति भयो रे मण्डलि बलियो हुनोइ गयो। बिस्वासिन प्रभुका डरमि हिट्टाइ रे पबित्तर आत्माको सान्तोना पाइबर मान्सनको सङख्या लइ बड्डइ गया।
पत्रुस लुड्डा रे योप्पा सहरमि
32पत्रुस इथउथ सप्पइ ठउँरमि यात्रा अद्दाइ लुड्डामि भया प्रभुमि बिस्वास अद्द्या मान्सनका वा आइपुग्या। 33पत्रुसले ताँ एनियास नाँउको कोइ एक जनो मान्सनलाइ भिट्यो, जो आठ बर्सबटहइ झाड्डु पड्या रोगले अरन्ज्या बिस्तरामि पडिरइथ्यो। 34पत्रुसले तइलाइ भुन्यो, “ए एनियास, इसु ख्रिस्टले तुलाइ निको पाड्याछन्। उठ, रे तेरो बिस्तरा मिला।” रे त्यो तुरुन्तइ उठ्यो। 35लुड्डा रे सारोन सहरमि बस्या जति भउत जनाले तइलाइ धेकिबर प्रभु इसुमि बिस्वास अर्यो।
36योप्पा सहरमि तबिता भन्नेइ एक जनि प्रभुमि बिस्वास अद्देइ स्वानि थिन्। ग्रिक भासामि तनलाइ डोरकास भणिन्थ्यो। तइको अर्थ हरिणि हो। तन जन्ज्यालइ अउरको भलाइ अरन्थिन् रे गरिबनलाइ साहेता अरन्थिन्। 37पत्रुस लुड्डा सहरमि हुन्ज्या तन बिमारि भइबर मरिन् रे मान्सनले तिनरा लासलाइ धोइधाइ पाडिबर घरका मल्ला तलाको एक कोठामि राख्यो। 38लुड्डा सहर योप्पा सहरका नजिकइ भया हुनाले, सिस्यानले पत्रुस ताँ छन् भन्न्या सुनिबर तनरा वा दुइ जना मान्सनलाइ यसो बिन्ति अद्द पठायो, “हामरा वा ढिला नअरि छिटाइ आस।” 39तबइ पत्रुस उठिबर तिनुनसित गया। पत्रुस योप्पामि पुग्यापाछा तिनुनले पत्रुसलाइ मल्ला तलाको कोठामि लइया। बिधुवान सप्पइ तिनरा नजिक कलिबर रुन लागिन्, रे डोरकास तिनुनसित हुन्ज्या तनले बनाइराख्या लत्ता रे अउर लत्तानलइ धेकायो। 40तर पत्रुसले तिनुन सप्पइलाइ कोठाबटहइ बाइर पठाइबर घुडा टेकि प्रार्थना अर्यो। रे तइ लासतिर फर्किबर भुन्यो, “ए तबिता, उठ!” तनले आँखा उघाण्यो, रे पत्रुसलाइ धेकि उठिबर बसिन्। 41पत्रुसले तनलाइ आफना हातले समाइबर जुणुक्क उठायो, रे उनुले प्रभुका पबित्तर जन रे बिधुवानलाइ बोलाइबर तबितालाइ जिउनि भयइ धेकायो। 42आब यो कुरडि सारा योप्पा सहरभरि फिजियो रे भउतले प्रभुमि बिस्वास अर्यो। 43तइपाछा पत्रुस केइ दिनसम्म छालाका काम अद्द्या सिमोनसित योप्पामि बस्या।
Currently Selected:
प्रेरित 9: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
