लुका 14
14
इसुले बिस्रराम दिनमि एक जनो मान्सलाइ निको पाड्यो
1कसइ एक बिस्राम दिनमि उन फरिसिनमिको कसइ एक जनो सासकका घरमि खाना खान गया। फरिसिन उनरा दोबा लागिरइथ्या। 2हातखुट्टा ओसाउन्या रोगले पिडित एकजनो मान्स उनरा आगाडिथ्यो। 3इसुले परमेस्वरका निएम सिकाउन्यान रे फरिसिनलाइ सोध्यो, “बिस्राम दिनमि निको पाड्डु उचित छ, कि छइन्?” 4रे तिनुनले केइ भणेनन्, तइपाछा उनुले तइ रोगिलाइ छोइबर निको पाण्यो रे तइलाइ पठायो।
5तइपाछा उनुले तिनुनलाइ भुन्यो, “तममिको कसइले आफना चेला-चेलि या गोरुबाखरा बिस्राम दिनमि नोलामि झड्याले तइलाइ छिट्टाइ निकाल्लाइन ब?” 6तिनुनले इन कुराको जवाफ दिनइ सकेन।
इसुले नम्रताका बिसयमि सिकायो
7भोजमि आया पाउनाले आदरको ठउँर छान्या धेकिबर उनुले तिनुनलाइ एक उखान भुन्यो, 8“ब्याका भोजमि तमले कसइको निउतो पाया भन्या आदरका ठउँरमि जनबस्या। तम हइ बर्ता आदरका मान्सले लइ ताँ निउतो पाया हुन्ना। 9तमलाइ रे तिनलाइ निउतो दिन्याले आइबर तमलाइ भन्या छन्, ‘इनलाइ बस्या ठउँर दिय’ रे तम सर्ममि पडिबर सप्पइ भन्ना तल्ला ठउँरमि बस्स पड्या छ। 10रे जब तमले निउतो पाउन्याछउ, गइबर तल्ला ठउँरमि बस, रे निउतो दिन्याले आइबर तमलाइ भन्या छ, ए सङि, मथिमि गइबर बस। तइबेला तमसङ खान बस्यानका आगाडि तमरो इज्जत हुन्या छ। 11क्यालाइकि हरेक जइले आफुलाइ ठुलो बनाउन्छ, त्यो नानो हुन्या छ। रे आफुलाइ नानो बनाउन्या ठुलो हुन्या छ।”
12रे उनलाइ निउतो दिन्यालाइ लइ उनुले भुन्यो, “तमले ब्याहान रे बासाइतिकको भोज लाउनज्या, आफना सङिनलाइ, आफना दाइ भाइलाइ रे तमरा आफना, धनि पडउसिनलाइ निउतो जनदिय, नति त तिनले लइ तमलाइ निउतो दिबर तमरो पालो फर्काउन्या छन्। 13रे तमले भोज लाउन्ज्या, गरिब, लुला, लङणा, आँखा नधेक्द्यालाइ बोला, 14रे तमले आसिस पाउन्याछउ, क्यालाइकि तिनुनले तमरो पालोबदेलो फर्काउन सक्दाइन्। रे मर्याबटहइ धर्मिनको बउरि उठाइ हुनज्या तमले यइको प्रतिफल पाउन्याछउ।”
ठुलो भोजको उखान
(मत्ति २२:१-१०)
15इसुसङ खानाइ खान बस्या मध्ये एक जनाले इन कुरा सुनिबर उनलाइ भुन्यो, “परमेस्वरका राज्यमि भोज खानपाउन्या कति धन्यका हुन्।”
16रे उनुले तइलाइ भुन्यो, “कसइ एक जनो मान्सले बसाइतिकको एक ठुलो भोज तयार अर्यो रे कतिबइलाइ निउतो दियो। 17उइले आफना नउकरलाइ भोज खान्याबेलामि निउतेरानलाइ यसो भन्न पठायो, ‘आस, आब सप्पइ थोक तयार छ।’ 18रे तिनुन सप्पइले एक एक बाहाना बनाउन लाग्या। पल्लिकाले तइलाइ भुन्यो, ‘मुइले एक खेत किन्याछु, मुइले त्यो हेद्दाइ जानपणन्छ। मु बिन्ति अद्दउ, मुलाइ माफि हउ।’ 19रे अर्खाले भुन्यो, ‘मुइले पाँच हल गोरु किनिराइछु, मुइले तिनुनलाइ जोतिबर हेद्द पडन्छ। मु बिन्ति अद्दउ, मुलाइ माफि हउ।’ 20अर्खाले भुन्यो, ‘मुइले ब्या अर्या छु तबइलाइ मु आउन सक्दइन्।’ 21तबइ नउकरले आइबर आफना मालिकलाइ यो कुरा भुनिदियो। रे घरका मालिकले रिसाइबर आफना नउकरलाइ भुन्यो, ‘सहरका सडक रे गल्लिनमि झट्ट जा, रे गरिबन, लुला, आँखा नदेख्या, डुणानलाइ याँ भित्र ल्यास्।’ 22यो काम अर्या पइतर नउकरले भुन्यो, ‘हजुरले आग्या अर्या अन्सार काम होइरइ छ, रे अज ठउँर खालि छ।’ 23तबइ मालिकले नउकरलाइ भुन्यो, ‘मुल रोड रे गल्लिनमि जाइबर मान्सनलाइ भित्र आउनकि कर लगा, रे मेरो घर भरियोउ। 24क्यालाइकि मु तमखि भन्नउ, निउतेरान मध्ये कसइले लइ मेरा भोजको स्वाद चाख्द पाउन्या आथिन्।’”
ख्रिस्टका सिस्यानले अद्दु पड्या त्याग
(मत्ति १०:३७-३८)
25एक दिन मान्सनको ठुलो भिड उनरा सङ जान्नाथ्यो, रे उनुले फर्किबर तिनुनलाइ भुन्यो, 26“कोइ मेरा पाछा आउन्छ, भन्या आफना बा, इजा, स्वानि, चेला-चेलिन, दाइ भाइ, दिदिबइनिलाइ रे आफना जिबनलाइ समेत मुलाइ भन्ना बर्ता माया अरन्छ भन्या, त्यो मेरो सिस्य हुन् सक्दइन। 27जो मान्स आफनो क्रुस बोकिबर मेरा पाछा लाग्दइन, त्यो मेरो सिस्य हुन सक्दइन्।#१४:२७ क्रुस बोक्द भन्या ख्रिस्टकि निउति सताइनु रे मद्द लइ तयार हुन् हो।
28“तममि हइ कसइले एक धरहारा बनाउन्या इछ्या अरन्छ भन्या, त्यो धरहारा बनाइ सक्द्या खर्च आफुसित छ कि छइन भनि कि तइले पइलि बसिबर हिसाब अद्इन ब? 29नति भन्या तइले जग बसालिसक्यापाछा पुरा अद्द सकेइन भनिबर, धेक्द्या सप्पइले यसो भणिबर तइको खिसि अद्या छन्, 30‘यइ मान्सले बनाउन त सुरु अर्यो रे पुरा अद्द सकेइन्।’ 31को राजा होलो जइले अर्खा राजासङ लडाइ अद्द जानज्या आफना सङ भया दस हजारले तइको बिरुद्मि आउन्या बिस हजारसङ लडाइ अदद् सक्दउ कि सक्दइन भनिबर पइलि बसिबर सल्ला अद्दाइन? 32तिनले नसक्द्या हुन भन्या, त्यो अर्खा राजा दुर हुनज्या मिलापको सर्त सोद्या राजदुत पठाउन्या छन्। 33तबइलाइ तमुमध्ये जइले आफुसित भया सप्पइ थोक छाड्डइन, त्यो मेरो सिस्य हुन सक्दइन।
अलिउनो नुन
(मत्ति ५:१३; मर्कुस ९:५०)
34“नुन निको हो, रे नुनको स्वाद गयो भन्या त्यो क्याले नुनिलो हुन्या? 35त्यो न त धर्तिकि निउति न पर्सोकि निउति काम लाग्द्या हुन्छ। मान्सले तइलाइ खित्दिनाहान। जइको सुन्या कान छ, तइले सुनउ।”
Currently Selected:
लुका 14: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
