लुका 15
15
हराया भेडाको उखान
(मत्ति १८:१२-१४)
1एक दिन कर उठाउन्या रे पापिन इसुका सिछ्या सुन्नाइलाइ उनरा नजिकइ आइरइथ्या। 2“यइ मान्सले त पापिनलाइ स्वागत अरन्छ, रे खानपिन अरन्छ” भनिबर फरिसिन रे धर्म-गुरु गनगन अद्द लाग्या।#१५:२ इसुसित खान्नारया मान्सलाइ यहुदि धर्मका अगुवानले असुद् माणन्थ्या रे इसेरि इसासित खान्यानलाइ लइ तसाइ हुन् भनिबर मानन्थ्या 3तबइ उनुले तिनुनलाइ यो उखान भुन्यो, 4“तमुमि को मान्स होलो, जइका एक सय भेडामध्ये एक उनान्सयलाइ चराउन्या ठउँरमि छाडिबर हराया भेडो नपाउनज्यासम्म तइको खोजि अद्दइन ब? 5हराया तइ भेडालाइ पाया पाछा रमाउनोइ तइलाइ आफना कानिमि राखन्छ, 6रे घरमि आइबर उइले आफना सङिनलाइ रे पडउसिनलाइ बोलाउछ, रे तिनुनलाइ भुणन्छ, ‘मु सित रमा क्यालाइकि मुइले आफनो हराया भेडो पाया छु।’ 7मु तमुखि भुन्नउ, इसेरि पस्याताप अद्दु नपड्या उनान्सय धार्मिक जनकि निउति भन्ना पस्याताप अद्या एक जना पापिकि निउति स्वर्गमि अज बर्ता आनन्न हुन्या छ।
हराया सिक्का उखान
8“को स्वानि होलि जइका दस चाँदिका सिक्का मध्ये एक हरायो भन्या बत्ति बालिबर उइले त्यो नपाउन्ज्या सम्म घर झाडिबर मिहिनतसित खोज्जिन्? 9हराया चाँदिका सिक्का उइले पायापाछा आफना सङिन रे पडउसिनलाइ बोलाइबर भुणन्छे, ‘मुसित रमा, क्यालाइकि मुइले मेरा हराया सिक्का पाइराइछु।’ 10मु तमुखि भुन्नउ, इसेरि पस्याताप अद्या एक जनो पापिखिलाइ परमेस्वरका स्वर्गदुतनका आगाडि आनन्न हुन्छ।”
हराया चेलाको उखान
11इसुले भुन्यो, “कसइ मान्सका दुइ चेला थ्या। 12कान्साले आफनो बालाइ भुन्यो, ‘बा, मेरा भागमि पड्या धनसम्तिको हिस्सा मुलाइ दिय।’ तबइ तिनले धनसम्तिको हिस्सा तिनुनलाइ बाडिदियो। 13केइ दिन बित्या पाछा सप्पइ धनसम्पति बटुलिबर कान्सो चेलो दुर देसमि गयो, रे मोजमज्जा अरिबर धनसम्पति उडायो। 14तइले सप्पइ धनसम्पत्ति खर्च अरि सक्याथ्यो। तसइबेला तइ देसमि ठुला रुडा पड्या, रे तइले केइ खान् पाएन्। 15तइपाछा त्यो तइ देसका एक जना मान्सका वाँ काम माग्द् गयो। तइ मान्सले तइलाइ आफना खेतमि सुङुर चराउन्या काम दियो।#१५:१५ सुङुर असुद्द जनावर हो भन्या यहुदिनका ब्यबस्थाले धेकाया छन्। तबइलाइ यहुदिनले सुङुरको मासु खान्थेनन्। (लेबि ११:७) लाइ हेर। तबइलाइ यहुदि मान्सनले सुङुर रे सुङुरको मासु खान्या लाइ घ्रिणा मान्नाहान्। 16सुङुरले खान्या चाराले तइले आफनो पेट भद् चाहान्थ्यो, रे कसइले तइलाइ केइ दिन्थेइन्। 17जब तइको होस खुल्यो, तइले भुन्यो, ‘मेरा बाका कद्बइ नउकरचाकरले पेटभरि खाइबर उबरन्थ्यो, रे मु याँ भोकले मद्दाछु। 18आब मु आफना बाका वाँ जान्याछु, रे उनलाइ भुन्या छु, “बा, मुइले परमेस्वरका बिरुद्मि रे तमरा बिरुद्मि पाप अरराइछु। 19आबबटहइ मु तमरो चेलो भनिन्या लाइको आथिन्। मुलाइ तमरो नउकरचाकर मध्येको एक जनो बनाइबर राख।”’ 20तबइ त्यो उठिबर आफना बा का वाँ गयो। रे त्यो भउत दुर हुन्ज्याइ तइका बाले तइलाइ धेक्यो, रे तिन दयाले भरिया, रे दगुडिबर गया खुसि होइबर चेलालाइ अङाल हालिबर तइलाइ भात्ति खायो। 21चेलाले तिनलाइ भुन्यो, ‘बा, मुइले परमेस्वरका बिरुद्मि रे तमरा नजरमि पाप अर्या छु। मु अज तमरो चेलो भनिन्या लाइको आथिन्।’ 22रे बाले आफना नउकरनलाइ भुन्यो, ‘छिट्टाइ सप्पइ हइ निका लत्ता लेइबर यइलाइ लगाइदिय। यइका हातमि अङउठि, रे खुट्टामि जुता लगाइदिय, 23रे मोटाइ राख्या पसु काट, रे हाम खाइबर आनन्न मनाउनउ। 24क्यालाइकि यो मेरो चेलो मर्या थ्यो, अज जिउनो भया छ, हराया थ्यो, रे पाइया छ।’ तबइ तिनुन आनन्न मनाउन लाग्या।
25“तसइबेला तिनरो जेठो चेलो खेतमि थ्यो, रे त्यो घरका नजिकइ आयापइतर तइले नाचगानको आबाज सुन्यो। 26तइले नउकरमिको एक जनोलाइ आफना वाँ बोलाइबर ‘यो कि भइरइ छ?’ भनिबर सोध्यो। 27तइ नउकरले उइलाइ भुन्यो, ‘तमरो भाइ फर्किबर आया छन्, रे तमरा बाले पालिराख्या मोटो पसु काट्यो। क्यालाइकि उनुले तिनलाइ निकेरि फर्किबर आया भेट्यो।’ 28त्यो रिसायो, रे भित्र जान माणेइन। तइका बा आइबर तइलाइ मनाउन लाग्या। 29तइले बालाइ भुन्यो, ‘हेर, इतिका बर्स मुइले तमरो सेबा अरराइछु, रे तमरो भन्या कभइ नमाण्या आथिन्, तबइलइ मुइले आफना सङिनसित आनन्न मनाउनाइ लाइ तमले मुलाइ कभइ लइ एक पाठो दियानु। 30रे तमरो सम्पति ब्यबिचार अद्देइ स्वाइनिसित उणाउन्या यो तमरो चेलो आउन्ज्या तमले पालिराख्या मोटो पसु तइकि निउति भोज लाउनाइलाइ काट्या।’ 31तबइ बाले तइलाइ भुन्यो, ‘चेलो, तु त मुसित सदाइँखिलाइ छइ, रे मेरो सप्पइ सम्पति तेरोइ हो। 32रे हामले आनन्न मनाउनु रे खुसि हुन्पडन्छ, क्यालाइकि यो तेरो भाइ मर्या थ्यो, अज जिउनो भया छ, हराया थ्यो, रे पाइया छ।’”
Currently Selected:
लुका 15: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
