लुका 22
22
इसुलाइ पकडाइ दिनाइ यहुदा सहमत भयो
(मत्ति २६:१-५,१४-१६; मर्कुस १४:१-२,१०-११; युहन्ना ११:४५-५३)
1अखमिरि रोटा खान्या चाड नजिकइ आइरइथ्यो। जइलाइ निस्तार चाड भणिन्छ। 2मुख्य पुजारि रे धर्म-गुरुले उनलाइ कसेरि माद्या भनि मउका खोज्जाथ्या, रे मान्सबटहइ तिनुन डराउथ्था।
3तबइ बार सिस्या मध्यको एक जनो यहुदा इइस्करियोतका मनमि सइतान पस्यो। 4तिनुनका हातमि इसुलाइ कसेरि पकडाइ दिन्या भनि मुख्य पुजारिन रे कप्तानसङ गइबर तइले सर-सल्लाहा अर्यो। 5तिनुन खुसि भया, रे तइलाइ रुप्या पइसा दिन्या कबोल अर्यो। 6यहुदा सहमत भयो रे भिड नभया बेलामि इसुलाइ पकडाइ दिन्या मउका खोज्ज लाग्यो।
निस्तार चाडको तयारि
(मत्ति २६:१७-२५; मर्कुस १४:१२-२६; युहन्ना १३:२१-३०)
7अखमिरि रोटा खान्या चाड आयो, जइ दिन निस्तार काजाबारको थुमा बलि चडाउन् पडन्थ्यो। 8इसुले पत्रुस रे युहन्नालाइ यसो भुणिबर पठायो, “गइबर हामरि निउति निस्तार चाडको भोज तयार अर।”
9तिनुनले उनलाइ भुन्यो, “यो भोज काँ तयार अद्दाउ?”
10उनुले तिनुनलाइ भुन्यो, “हेर, तमु सहरमि पस्या पाछा फोलामि पानि बोक्या एक जनो मान्सले तमुलाइ भेट्टया छ। त्यो जइ घरमि पसन्छ ताँ सम्म तइका पाछा लाग, 11रे तमुले तइ घरका मालिकलाइ भुण, ‘गुरुले तमलाइ सोधिराइ छ। मुइले आफना सिस्यानसङ निस्तार चाडको भोज खान्या पाउना कोठा काँ छ?’ 12उनुले तमुलाइ मल्ला तलामि सजिसजाउ भया ठुलो कोठा धेकाउन्या छन्, रे ताँइ भोज तयार अर।”
13तिनुन गया, रे उनुले भुण्या जसेरि पायो, रे तिनुनले निस्तार चाडको भोज तयारि अर्यो।
प्रभु-भोज
(मत्ति २६:२६-३०; मर्कुस १४:२२-२६; १ कोरिन्थि ११:२२-२५)
14आब खान्या बेला भया पाछा, इसु प्रेरितनसित खान बस्या। 15उनुले तनुनलाइ भुन्यो, “मुइले दुःख भोग्दु भन्ना पइलि यो निस्तार चाडको भोज तमुसङ खान्या ठुलो इछ्या अर्या थ्या, 16क्यालाइकि मु तमुलाइ भुन्नउ, परमेस्वरका राज्यमि यो हाम्ले खान्नारया भोजको अर्थ पुरा नहुन्ज्यासम्म मु यो भोज दोसर्या खान्या आथिन्।”
17तइपाछा इसुले बट्क्या समाइबर धन्यबाद चडाया पाछा उनुले भुन्यो, “यो लिय रे तमु एक अर्कामि बाडिबर खाँ। 18क्यालाइकि मु तमुलाइ भुन्नउ, परमेस्वरको राज्य नआउन्ज्यासम्म आब बटहइ मु अंगुरको रस खान्या आथिन्।”
19रे उनुले रोटो समाइबर परमेस्वरलाइ धन्यबाद चणायो, रे रोटो तोडिबर तिनुनलाइ यसो भुन्नाइ दियो, “तमरि निउति दिया यो मेरो सरिल हो। मेरो सम्झनामि यो अद्या अर।” 20तसोइ अरिबर खाइसक्या पाछा उनुले बट्क्या समाइबर भुन्यो, “यो बट्क्या मेरा रगतमि बादिया नयाँ करार हो। यो रगत तमरि निउति बगाइन्या छ।#२२:२० पद १९ मि भया इसुका इन बचन पइलिका पान्डुलिपिमि आथिनन्। “यो मेरो सरिल हो” रे पद २० त आथिन।
21“रे हेर, मुलाइ पकडाइ दिन्या मान्स मुसितइ मेरा टेबुलमि छ। 22क्यालाइकि मान्सका चेलालाइ त परमेस्वरको इछ्या अन्सार मद्इ पड्या छ, रे धिक्कार तइ मान्सलाइ, जइले मान्सका चेलालाइ धोका दिन्छ!”
23“हाममध्ये यसो काम अद्या को होलो?” भनिबर तिनुन एक अर्खामि बहस अदद् लाग्या।
सप्पइ भन्ना ठुलो को हो?
(मत्ति २०:२५-२८; १९:२८; मर्कुस १०:४२-४५)
24तइपाछा सिस्यान सप्पइ भन्ना ठुलो को हो भणि एक आपसमि बादबिबाद अद्द लाग्या। 25इसुले तिनुनलाइ भुन्यो, “सन्सारका राजानले आफना प्रजामि आफु खुसि सासन अद्दाहान्, रे तिनुनमि अधिकार चलाउन्यालाइ भलाइ अद्द्यान भुन्नाहान्।” 26रे तमुमि यसो जनहउ, तमुमध्ये जो ठुलो छ, त्यो नानो बनउ, रे अगुवा हुन चाहान्याले सप्पइको सेबा अरउ। 27क्यालाइकि ठुलो को हो? भोज खान बस्या कि सेबा अद्या? कि भोजन खान बस्या हइन् ब? रे मु तमरा बिचमि एक जनो सेबा अद्या जसोइ छु।
28“तमु मेरा दुःखमि मुलाइ साथ दिन्या हउ। 29जसेरि मेरा बाले मुलाइ एक राज्य अधिकार अद्द दियो, मु लइ तमुलाइ अधिकार दिनउ। 30इसेरि मेरा राज्यमि तमु मेरा टेबुलमि खान्या रे पिउन्या छउ, रे सिंहासनमि बसिबर इज्राएलका बारइ कुलको न्याय अद्या छउ।”
पत्रुसले इसुलाइ इन्कार अद्या बिसयमि भुन्यो
(मत्ति २६:३१-३५; मर्कुस १४:२७-३१; युहन्ना १३:३६-३८)
31इसुले भुन्यो, “सिमोन! ए सिमोन, हेर सइतानले तुलाइ गउँकि जसेरि निफनन्या आग्या माग्या छ। 32रे मुइले तेरो बिस्वास नडमगाउ भनिबर तेरि निउति प्रार्थना अर्या, रे अज तु पस्याताप अरिबर मु तिर फर्कियापाछा, तेरा दाइ भाइलाइ बलियो बना।”
33रे पत्रुसले उनलाइ भुन्यो, “हे प्रभु, मु तम सङ झेलखानामि जान रे मद्दलइ तायर छु।”
34रे इसुले भुन्यो, “पत्रुस मु तु लाइ भुन्नउ, तुइले मुलाइ चिन्नइन भनिबर तिनबर असुइकार नअरन्ज्यासम्म भोल ब्याहान भाल्या बास्या आथिन्।”
35इसुले तिनुनलाइ भुन्यो, “जबइ मुइले तमुलाइ पइसाको थइलो रे झोला रे जुताबिना पठायाथ्या, क्या तमुलाइ केइ कुराको अभाव भयो?”
तिनुनले भुन्यो, “भएन्।”
36उनुले भुन्यो, “रे जइको पइसाको थइलो छ, तइले त्यो बोकउ, तसोइ अरिबर झोला लइ बोकउ, जइसित तरबार आथिन् तइले लत्ता बेचिबर एक तरबार किनउ। 37मु तमुलाइ भुन्नउ, ‘उन अपराधिनसङ गनिया भनि लेखिया कुरा मुमि पुरा हुनइपड्न्छ।’ हो मेरा बारेमि धर्म- सास्त्तरमि लेखिया कुरा पुरा हुन्नाछन्।”#यसइया ५३:१२
38तबइ सिस्यानले भुन्यो, “हे प्रभु हेर, याँ दुइ तरवार छन्।”
इसुले भुन्यो, “तति भया पुग्न्छ।”
जइतुन डाँणामि इसुको प्रार्थना
(मत्ति २६:३६-४७; मर्कुस १४:३२-४२)
39बाइर निक्ल्बर इसु सदाइँकि जसेरि जइतुन डाँणामि गया, रे उनरा सिस्यालइ उनरा पाछापाछा लाग्या। 40तइ ठउँर पुग्या पइतर उनुले तिनुनलाइ भुन्यो, “तमु परिछ्यामि नपडउ भनिबर प्रार्थना अर।”
41उन तिनुन बटहइ लगभग तिस मिटर पल्लतिर गइबर घुडा टेकिबर प्रार्थना अर्यो। 42“हे पिता, तमरो इछ्या भयाले, यो बट्क्या मुबटहइ हटाइदिय। तबलइ मेरो इछ्या हइन्, तमरो इछ्या पुरा हउ।” 43तब स्वर्गबटहइ स्वर्गदुत उनलाइ बल दिनाइलाइ उनरा वाँ धेकिया। 44उनरो ह्रिदया दुःखले भरिबर उन जोरले प्रार्थना अदद् लाग्या, रे उनरो पसिना रगतका ठुला ठुला थोपाजसा जमिनमि झड्या। #२२:४४ कद्बइ पुराना पान्डुलिपिमि पद ४३-४४ आथिनन्
45प्रार्थना अरि सक्या पाछा इसु सिस्यानका वाँ आउन्ज्या उनुले तिनुनलाइ सोकले थकित भइबर सिरया धेक्यो। 46उनुले तिनुनलाइ भुन्यो, “तमु क्याकि सिरइछउ? उठ रे परिछ्यामि नपड्डाइलाइ प्रार्थना अर।”
इसुको पकडाउ
(मत्ति २६:४७-५६; मर्कुस १४:४३-५०; युहन्ना १८:३-११)
47इसुले बोल्ल बोल्लाइ भिड ताँ आयो। बार सिस्यानमध्ये एक जनो यहुदा भन्याले तिनुनको अगुवा भइबर तइ ठउँर लेयो। इसुलाइ भात्ति खानाइलाइ त्यो उनरा नजिक आयो। 48रे इसुले तइलाइ भुन्यो, “यहुदा, कि तु मान्सको चेलोलाइ भात्तिखाइबर बिस्वास घात अद्द चाहान्छइ?”
49तबइ उनरा अगाडि पछाडि हुन्यानले कि हुन्या हो, भनिबर उनलाइ भुन्यो, “प्रभु, कि हाम तरवार चलाउ?” 50तिनुनमध्ये एक जनाले ठुला पुजारिका नउकरलाइ हाण्यो रे तइको दाइनितिरको कान च्वाट काट्दियो।
51रे इसुले भुन्यो, “भयो आब यसो जनअरउ।” रे तइ मान्सको कान छोइबर उनुले तइलाइ निको पाडिदियो।
52रे उनरा बिरुद्मि आया मुख्य पुजारिन, मन्धिरका कप्तान, रे अगुवानलाइ उनुले भुन्यो, “कि तम डाँकुका बिरुद्मि आया जसेरि तरवार रे लठ्ठि लेइबर आया ब? 53मु दिनदिनि त मन्धिरमि तमरासङइ हुन्ज्या तमले मेरो बिरुद्मि हात उठायानु। रे आब तमरो बेला हो, रे अन्धकारको सक्ति यइ हो।”
पत्रुसले इसुलाइ असुइकार अर्यो
(मत्ति २६:५७,६९-७५; मर्कुस १४:५३,५४,६६-७२; युहन्ना १८:१२-१८,२५-२७)
54तिनुनले इसुलाइ पकणिबर लय्या, रे उनलाइ ठुला पुजारिका घरमि लेइबर आया। रे पत्रुस दुरबटहइ उनरा पाछापाछा लाग्या। 55ताँ आँगनका बिचइमि आगो बालिबर मान्सन जमा होइबर बसरइथ्या, पत्रुस लइ तिनसङ बस्या। 56एक जनि नउकरनिले पत्रुसलाइ आगाका उज्यालामि बसिरया धेकिबर एकोरिबर हेर्यो, रे भुन्यो, “यिन मान्स लइ इसुइसङ थ्या।”
57रे पत्रुसले यसो भनिबर असुइकार अर्यो, “ओ बइनि, मु उनलाइ चिनइन्।”
58केइ बेर पाछा अर्खा एक जनाले लइ तिनलाइ धेकिबर भुन्यो, “तम लइ तिनुनइ मध्येमिको एक जनो हउ।”
रे पत्रुसले जवाफ दियो, “ओ हजुर, मु त हइन्।”
59लगभग एक घण्टा बित्या पाछा अर्खा एक जनाले जोड दिबर भुन्यो, “साँच्चि यिन मान्स इसुइसितइ थ्या, क्यालाइकि यिनलइ गालिलि रइछन्।”
60रे पत्रुसले भुन्यो, “ओ हजुर, तम कि भुन्नाछउ, मु जान्नइन्।” तिन बोल्लाबोल्लाइ भाल्या बास्यो।
61रे प्रभुले फर्किबर पत्रुसलाइ हेर्यो। “आज भाल्या बास्साहइ अगाडि तुइले मुलाइ तिनबर असुइकार अद्याछइ” भनिबर भुन्या प्रभुको बचन टलाइ याद आयो। 62रे तिन बाइर निकल्लबर धणधण रोया।
इसुको अपमान
(मत्ति २६:५९-६६; मर्कुस १४:६५)
63तबइ इसुलाइ पकड्या मान्सनले उनलाइ खिसि अद्दाइ हान्यो। 64उनरा आँखा छोपिदियो रे सोद्द लाग्या, “तु अगमबक्ता हइ भन्या तुलाइ कइले हाण्यो लउ भुण।” 65इसेरि तिनुनले उनरो बेइज्जत अद्दाइ फुचेरा फुचेरा गालि दिन्लाग्या।
माहासाभाका अगाडि इसु
(मत्ति २६:५७-६६; मर्कुस १४:५५-६४; युहन्ना १८:१९-२४)
66उज्यालो हुन्ज्याइ यहुदि अगुवान जमा भया। तिन अगुवान मुख्य पुजारिन रे धर्म-गुरुन थ्या। तिनुनले इसुलाइ माहासभामि लेया रे भुन्यो, 67“तु ख्रिस्ट हइ भन्या हामुलाइ भुण।” उनुले तिनुनलाइ भुन्यो, “मुइले बतायालइ तमु पत्याउन्या हइनु। 68मुइले प्रस्न अर्यालइ तम जवाफ दिनानु। 69रे आब मान्सको चेलो सर्बसक्तिमान परमेस्वरका दाइनितिर बस्याछ।”
70तबइ तिनुन सप्पइले भुन्यो, “तसो भया, कि तु परमेस्वरको चेलो हइ?”
इसुले तिनुनलाइ भुन्यो, “तमले भुन्या जसो मु उइ हुँ।”
71तिनुनले भुन्यो, “हामुलाइ आब अउर कि साछिको आवस्यक छ ब? क्यालाइकि हामले तसइका मुखबटहइ सुणिहाल्या।”
Currently Selected:
लुका 22: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
