लुका 23
23
इसुलाइ पिलातसका वाँ लइया
(मत्ति २७:१,२,११-१४; मर्कुस १५:१-५; युहन्ना १८:२८-३८)
1तइपाछा माहासभाका सप्पइ सदस्य उठ्या, रे इसुलाइ रोमि सासक पिलातसका वाँ लेइबर आया। 2तिनुनले उनलाइ यसो भन्या दोस लाउन लाग्या, “यइ मान्सले मु मुक्ति दिन्या राजा ख्रिस्ट हुँ भणन्छ। रे रोमि माहाराजालाइ कर तिद्दुपड्इन् भनिबर हामरा देसका मान्सनलाइ भड्काउन्नारया हामले भेट्या।”
3तिनुनका कुरा सुनिबर पिलातसले उनलाइ सोध्यो, “कि तम यहुदिका राजा हउ?”
इसुले भुन्यो, “त्यो त तम आफुइ भन्नाछउ।”
4तबइ पिलातसले मुख्य पुजारिन रे भिडलाइ भुन्यो, “मु यिन मान्समि केइ दोस पाउनइन्।”
5रे तिनुनले खुब जोड दिबर भुन्यो, “यइले सारा यहुदिया, रे गालिलबटहइ यइ ठउँरसम्म सिछ्या दिनोइ मान्सनलाइ भड्काउन्ना छ।” 6पिलातसले यो सुनिबर, “यो मान्स गालिलको हो?” भनिबर सोध्यो।
इसुलाइ हेरोदका अगाडि लेया
7रे इसु हेरोदले सासन अर्या छेत्रका मान्स रइछन् भन्न्या थाँ पाइबर पिलातसले उनलाइ हेरोदका वाँ पठाइदियो। तइबेला हेरोद आफुइ लइ यरुसलेममि थ्या। 8आब इसुलाइ धेकिबर हेरोद भउत खुसि भयो। क्यालाइकि तिनले उनरा बिसयमि सुन्या हुनाले भउत दिनबटहइ उनलाइ हेद्या इछ्या अर्या थ्यो, रे उनुले केइ अचम्मका काम अर्या हेद्दाइलाइ आसा अर्या थ्यो। 9हेरोदले इसुलाइ भउत प्रस्न अर्यो, रे उनुले तिनलाइ केइ जबाफ दिएन। 10मुख्य पुजारिन रे धर्म-गुरुन खडा होइबर उनलाइ जोडतोडले दोस लाउनलाग्या। 11हेरोदले आफना सिपाइसङ मिलिबर उनलाइ अमान अद्दोइ उनरो खिसि अर्यो। तइपाछा उनलाइ राजाले लाउन्या जसाइ लत्ता लाइबर पिलातसका वाँ पठाइदियो। 12पइलि हेरोद रे पिलातसका बिचमि दुस्मनि थ्यो, तइ दिनबटहइ तिन दुयइ जनाका बिचमि एक आपसमि मेलमिलाप भयो।
इसुलाइ मिरत्युदण्ड दिइयो
(मत्ति २७:१५-२६; मर्कुस १५:६-१५; युहन्ना १८:३९—१९:१६)
13तइपाछा पिलातसले मुख्य पुजारिन, सासक रे मान्सनलाइ जम्मा अर्यो। 14उनुले तिनुनलाइ भुन्यो, “मान्सनलाइ भड्काउन्या भनिबर तमुले यिनलाइ मेरा अगाडि लेया। रे तमराइ आगाडि केरकार अरन्ज्या मुइले यिनमि तमुले लाया दोस पाएन्। 15हेरोद राजाले लइ इसुमि केइ दोस नपायाहुनाले तिनले यिनलाइ हामरा वाँ फर्काइदियो। आब हेर, यिनले मिरत्युदण्ड पाउन्या योग्यको काम केइ लइ अर्या आथिनन्। 16तबइलाइ मु यिनलाइ हाणिबर मात्तरइ छाडिदिन्या छु।” 17[ताँ को चलन अन्सार निस्तार चाडका उपलछ्यमि तिनुनकि निउति पिलातसले एक जनो कइदिलाइ छाडिदिन् पड्न्थ्यो।]#२३:१७ ग्रिक भासाका केइ पाण्डुलिपिमि यो पद पाइनइन्।
18तिनुन सप्पइ एक होइबर यसो भन्नाइ कला हाल्ल लाग्या, “यइ मान्सलाइ माद्दइ पडन्छ! रे हामरि निउति बारब्बालाइ छाडिदिय!” 19(बारब्बा त सहरमि भया बिद्रोह रे हत्याका आरोपमि कारागारमि थुनिरइथ्यो।)
20इसुलाइ छाड्दिन्या इछ्या अरिबर पिलातसले दोसर्यालइ तिनुनलाइ सम्झायो। 21रे तिनुन यसो भुन्नाइ, कला हालिबर भुन्न लाग्या “तइलाइ क्रुसमि टांङ, तइलाइ क्रुसमा टांङ!”
22रे पिलातसले तेसर्या लइ तिनुनलाइ भुन्यो, “क्याइ? यिन मान्सले कि अपराध अर्या छ रे? मुइले त यिनलाइ मिरत्युदण्ड दिन्या केइ कारण पाएन, तबइलाइ मु यिनलाइ हाणाइ दिबर छाड्दिन्या छु।”
23रे तिनुनले ठुला ठुला सोरले कला हाल्लाइ क्रुसमि टाङदइपडन्छ भन्न्या माग अद्द लाग्या। इसेरि मान्सनले कला हालिबर जित्यो। 24रे पिलातसले तिनुनको माग पुरा अरदिन्या फइसला सुनायो। 25तनले बारब्बा भनिन्या मान्सलाइ छाडिदियो, जो बिद्रोह रे हत्याका आरोपमि कारागारमि पड्याथ्यो। तइलाइ छाड्दिय भनिबर तिनुनले माग अर्याथ्यो। रे इसुलाइ तिनराइ इछ्यामि सउपिदियो
इसुलाइ क्रुसमि टाङ्यो
(मत्ति २७:३२-४४; मर्कुस १५:२१-३२; युहन्ना १९:१७-२७)
26तिनुनले इसुलाइ ताँ बटहइ लइजान्ज्या, गाँउबटहइ आउन्नारया सिमोन नाउँको कुरेनि निवासिलाइ समायो, रे इसुको क्रुस बोकिबर उनरा पाछापाछा जान लायो।
27मान्सको ठुलो भिड उनरा पाछा पाछा लाग्याथ्यो। तइ भिडमि स्वानिन लइ थिन्, तिनुन रुनि रे बिलाप अद्दि उनरा पाछा लागेइथिन्। 28रे तिनुनतिर फर्किबर इसुले भुन्यो, “ए यरुसलेमकि चेलिन हो, मेरि निउति जनरोउ रे तमु आफ्नि निउति रे आफना चेला-चेलिनकि निउति रोउ। 29क्यालाइकि तन दिन आउन्नाछन्, जब मान्सनले भन्न्याछन्, ‘बच्चा नहुनेइ स्वनिन् रे दुध ख्वाउन नपड्या स्वानिन् धन्याकि हुन् भन्न्या छन्।’ 30तइबेला मान्सनले पाहाडलाइ ‘हाम्मि झड’ रे डाँणानलाइ ‘हाम्मलाइ पुर’ भन्न्या छन्।#होसे १०:८ 31क्यालाइकि तिनुनले हरिया रुखलाइ त, यसो अद्हान् भन्या सुक्या रुखलाइ कि अरन्ना?”
32तइपाछा तिनुनले दुइ अपराधिनलाइ उनसङ मिरत्युदण्ड दिनाइलाइ लेया। 33जब उनुन खप्पर्या भन्न्या डाँणामि आइपुग्या पाछा तिनुनले इसुलाइ क्रुसमि टाङ्यो, रे तिन अपराधिनमध्ये एक जनालाइ दायातिर रे अर्कालाइ बायातिर क्रुसमि टाङ्यो। 34रे इसुले भुन्यो, “हे पिता, यिनुनलाइ छिमा अर, क्यालाइकि यिनुन कि अद्दाछन् जान्नाइन्।” रे तिनुनले उनरो लत्ता बान्नाइलाइ चिठ्ठा हाल्यो।
35मान्सन कल्लिबर हेरिरइथ्या। सासकनले उनरो गिल्ला अद्दाइ भुन्यो, “यइले अउरलाइ बचायो, रे यो परमेस्वरको ख्रिस्ट या उनरो चुनिया जन हो भन्या, यइले आफुलाइ बाचाउ!”
36सिपाइनले लइ आइबर उनलाइ सिर्का#२३:३६ सिर्का घाममि राखिबर चुकिलो बनाया लिखु, अंगुर रे अनारको रस हो। दिनोइ यसो भनिबर खिसि अर्यो, 37“तु यहुदिनको राजा हइ भण्या आफुलाइ बचा!”
38“यो यहुदिनको राजा हो, भन्या दोस पत्र लइ क्रुसमि उनरा मुन्डाका मल्तिर टाङिदियो।”
39क्रुसमि टाङिया अपराधि मध्ये एक जनाले उनरो अपमान अद्दोइ भुन्यो, “कि तम ख्रिस्ट हउ भुन्या? तम आफुलाइ रे हामुलाइ बचा!”
40रे तइलाइ हकारिबर अर्खाले भुन्यो, “तुलाइ परमेस्वरको डर लाग्दइ, तुइले लइ त उनरोइ जसो दण्ड भोग्दाछइ। 41हामरो दण्ड त उचित छ, क्यालाइकि हामले त आफनो काम अन्सार भोग्दाछु, रे यिन मान्सले त केइ अनुचित काम अर्या आथिनन्।” 42तबइ तइले भुन्यो, “हे इसु, तम आफना राज्यमि आउन्ज्या मुलाइ सम्जिया।”
43इसुले तइलाइ भुन्यो, “साँच्चि मु तमलाइ भन्नउ, आजइ तम मु सित स्वर्गमि हुन्याछउ।”
इसुको मिरत्यु
(मत्ति २७:४५-५६; मर्कुस १५:३३-४१; युहन्ना १९:२८-३०)
44लगभग दिनको बार बज्याथ्यो। तसइबेला बटहइ तिन बजेसम्म सारा देसमि अन्धकारले ढाक्यो। 45सुर्यको तेज कम भयो। रे मन्धिर भित्र टाङ्या पर्दा#२३:४५पर्दाले पबित्तर ठउँर रे महापबित्तर ठउँर छुट्याउथ्यो रे ताँ ठुला पुजारिले मात्तरइ प्रतेक बर्स जान पाउथ्यो (प्रस्थान २६:३१-३३) परमेस्वरले त्यो पर्दा चिरदियो रे सप्पइ उनरा अगाडि सिदाइ जानसक्द्या भया रे ठुला पुजारि मात्तरइ हइन। मल्तिरबटहइ तल्तिरसम्म चिरिबर दुइ भाग भयो। 46रे ठुला सोरले डाको हलिबर इसुले भुन्यो, “हे पिता, मु मेरो आत्मा तमारा हातमि सुम्पनउ।” इति भनिसक्या पाछा उनुले आफनो परान त्याग्यो।#भजनसंग्रह ३१:५
47यो सब घटना धेकिबर कप्तानले यसो भन्नोइ परमेस्वरको महिमा अर्यो, “साँच्चिलइ यिन मान्स धर्मि रइछन्।”
48यिन घटना हेद्दाइ जम्मा भया सप्पइ मान्सनले यिन सब धेक्यो, रे छाति पिट्टाइ रुनाइ आफना घर फर्किया। 49रे उनरा चिन्याजान्या रे गालिल छेत्रबटहइ उनरा पाछापाछा आएइ स्वानिन् दुरहइ कल्लिबर यिन घटना हेरिरइथिन्।#२३:४९ इसुले गालिल छेत्रबटहइ प्रचार अद्द सुरु अर्यो।
इसुलाइ च्याहानमि राख्यो
(मत्ति २७:५७-६१; मर्कुस १५:४२-४७; युहन्ना १९:३८-४२)
50-51तइबेला, यहुदिया छेत्रका अरिमाथिया सहरबटहइ आया एक जनो योसेफ नाउँ अर्या मान्स थ्या। उन माहासभाका सदस्य लइ थ्या। तिन निका रे इमान्दार मान्स थ्या रे तिन परमेस्वरका राज्यलाइ पख्रइथ्या। इसुलाइ माद्दु पडन्छ भन्या माहासभाका मान्सनको सल्ला रे काममि उन सहमत भया थेइनन्। 52उनुले पिलातसका वाँ जाइबर इसुको लास माग्यो। 53उनरो लास तलतिर झाणिबर मलमलका लत्तामि बेडिबर, रे ढुङामि खोपिया एक च्याहानमि राख्यो, जाँ कोइ लइ लास राखिया थेइन्। 54त्यो दिन बिस्राम दिनकि निउति तयारि अद्दुपड्या दिन थ्यो, बिस्राम दिन सुरु हुनइलाथ्यो।
55गालिलबटहइ इसुसित आएइ स्वानिन लइ योसेफका पाछापाछा गइन् रे त्यो च्याहान हेर्यो। इसुको लास च्याहानमि राख्या तिनुनले धेक्यो। 56घर फर्किया पाछा तिनुनले बास आउन्या मलम रे अत्तर तयार अर्यो।
रे ब्यबस्थाको आग्या अन्सार बिस्राम दिनमि तिनुनले बिस्राम अर्यो।
Currently Selected:
लुका 23: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
