लुका 24
24
मर्याबटहइ इसु जिउना भया
(मत्ति २८:१-१०; मर्कुस १६:१-८; युहन्ना २०:१-१०)
1हप्ताका पइला दिनमि ब्याहानइ तन स्वानिनले तयार अर्या बास आउन्या मलम लेइबर तिनुन इसुका च्याहानमि आया। 2तिनुनले च्याहानबटहइ ढुङो हटाया पायो। 3रे भित्र पसन्ज्या तिनुनले प्रभु इसुको सरिल पाएन्। 4जबइ तिनुन यइ बिसयमि अलमल पणिरइथ्या, अचानक चम्किला लत्ता लाया दुइ मान्स तिनुनका अगाडि कल्लिया। 5तिन स्वानिन डराइन रे तल्तिर मुन्डो झुकायो। रे तन दुइ मान्सनले भुन्यो, “तमु जिउना मान्सलाइ मर्याका बिचमि क्याकि खोजन्छउ? 6उन याँ आथिनन्, रे जिउना भइबर उठ्याछन्। गालिलमि हुन्ज्या उनुले तमलाइ कि भुण्या थ्यो याद अर। 7उनुले भुण्याथ्यो, मान्सको चेलो पापिनका हातमि सुम्पिन्या छ रे क्रुसमि टाङिन्या छ रे तेसरा दिनमि जिउनो होइबर उठ्ठु आवस्यक छ।”
8तिनुनले उनरा बचन समझ्या। 9रे च्याहानबटहइ फर्किबर तिनुनले यिन सप्पइ कुरा एघारइ सिस्यान रे अउर सप्पइलाइ बातायो। 10तन स्वानि मरियम मग्दलिनि, योअन्ना, रे याकुबकि इजा मरियम थ्या। तिनुनसङ रया अउर स्वानिनले लइ यिन कुरा प्रेरितनलाइ भुन्यो। 11प्रेरितनले यिन कुरा बिस्वास अरेन् रे भुन्यो यो त नभयाकुरा मात्तरइ हो। 12रे पत्रुस उठिबर च्याहानमि दगुडिबर गया, रे घोप्टिबर हेरन्ज्या कात्रो मात्तरइ धेक्यो। त्यो घटना धेकिबर अचम्म मानि उन निय्या।
इसु इम्माउसका बाटामि
(मर्कुस १६:१२,१३)
13तसइ दिन इसुका सिस्यान मध्ये दुइ जना यरुसलेमबटहइ लगभग एघार किलोमिटरका दुरिमि इम्माउस भणिन्या गाँउतिर जान्नाथ्या। 14आज भोलइ घट्या सप्पइ घटनाका बारेमि तिनुन आपसमि कुराकानि अद्दाथ्या। 15तिनुन आपसमि कुराकानि अद्दाइ रे बहस अद्दारया बेलामि इसु आफुइ तिनुनका नजिक आइबर सङइ हिट्ट लाग्या। 16तिनुनले इसुलाइ धेक्यालइ चिन्न सकेन्। 17उनुले तिनुनलाइ सोध्यो, “तमु हिट्टाइ आपसमि क्याका बिसयमि कुरा अद्दा छउ?”
18तिन दुइमध्ये क्लेओपास भन्याले उनलाइ भन्यो, “यरुसलेम घुमफिर अरिबर आउन्या भइबरलइ आजभोल याँ कि घटना घट्या छ, तमलाइ थाँ आथिन्?”
19इसुले तिनुनलाइ सोध्यो, “कि कुरा?” तिनुनले भन्यो, “इसु नासरिका बारेमि, उन एकजना अगमबक्ता थ्या। उन परमेस्वर रे मान्सका अगाडि सक्तिसालि काम अरन्थ्या रे गहकिला सिछ्या दिन्थ्या।
20“रे मुख्य पुजारिन रे हामारा सासकनले उनलाइ मिरत्युदण्डकि निउति सउपिदियो, रे उनलाइ क्रुसमि टाङयो। 21इज्राएलको उद्दार अद्या उनइहुन् भन्न्या हामले आसा अर्याथ्या। रे यो घटना घट्या आज तेसरो दिन हो। 22यिन बाहेक हाम मध्येका कसइ कसइ स्वानिनले हामुलाइ अचम्ममि पाड्यो। तिनुन आज ब्याहानइ च्याहानमि गइन्, 23रे तिनुनले इसुको सरिल पाएन्। तिन स्वानिन फर्कि आइबर तिनुनले स्वर्गदुतलाइ धेक्यो रे तन स्वर्गदुतनले ‘इसु जिउना भया छन्’ भन्या कुरा हाम्लाइ सुणायो। 24हाम्मध्येका कोइ कोइ च्याहानमि गया, रे तिन स्वानिनले जि भुन्याथ्यो, तसोइ तिनुनले भया धेक्यो, रे इसुलाइ धेकेन्।”
25इसुले तिनुनलाइ भुन्यो, “ए अबुज, मान्सन हउ तमरो ह्रिदय इति सुस्त होइरछ, कि अगमबक्ताले भुन्या कुरा तमु बिस्वास अद्दानु! 26कि ख्रिस्टले यिन कस्ट भोग्दु रे आफना महिमामि प्रवेस अद्दु आवस्यक थेइन् ब?” 27इसुले मोसाबटहइ लिबर सप्पइ अगम्वक्तानले धर्म- सास्त्तरमि उनरा बिसमि लेखिया कुराको अर्थ तिनुनलाइ खोल्दियो।
28तिनुन जइ गाँउमि गइरइथ्या तइका नजिकइ पुग्या। इसुले अज पल्तिर सम्म जान चाहान्या जसो अर्यो। 29रे तिन दुयेइ जनाले उनलाइ यसो भनिबर कर लायो, “हामसङइ बस्, क्यालाइकि रात पड्डा छ, दिन भउत ढल्लिकिसक्या छ।” रे उन तिनुनसङ बास बस्साइलाइ गया। 30इसु तिनुनसङ खानइ बसन्ज्या उनुले रोटो समाइबर धन्यबाद दियो, रे तोडिबर तिनुनलाइ दियो। 31तबइ तिनरा आँखा खुल्या, रे तिनुनले उनलाइ चिन्यो। रे उन तिनरा अगाडि बटहइ अद्रिस्य भया। 32तिनुनले आपसमि भुन्यो, “उनुले हामसित बाटामि कुरडि अरन्ज्या रे हामुलाइ धर्म- सास्त्तर बटहइ अर्थ खोल्दिन्ज्या कि हामरो ह्रिदय आनन्न भया थेइन् ब?”
33तिनुन तन्जेइ उठिबर यरुसलेममि फर्किया। एघारइ सिस्यान रे तिनुनसित जम्मा भयाले 34यसो भन्नारया भेट्यो, “प्रभु साँच्चिलइ जिउना भइबर उठ्या छन् रे सिमोनका वाँ धेकिया रइछन्!”
35तिन दुयेइ जनाले बाटामि भया कुरा रे रोटो तोडन्ज्या कसेरि तिनुनले उनलाइ चिन्यो, सप्पइ तिनुनलाइ बताइदियो।
इसु सिस्यानका वाँ धेकिया
(मत्ति २८:१६-२०; मर्कुस १६:१४-१८; युहन्ना २०:१९-२३; प्रेरित १:६-८)
36तिनुनले यिन कुरा अद्दाअद्दाइ इसु तिनरा बिचमि खडा भया, रे भुन्यो, “तमुलाइ सान्ति हउ।”
37भुत धेक्दाछु भनि ठानिबर तिनुन डरले तरासिबर आत्तिया। 38रे उनुले तिनुनलाइ भुन्यो, “तमु क्याकि डराउछउ, रे तमरा ह्रिदयमि क्याकि संका उतपन्न हुन्छ? 39मेरा हात रे मेरा खुट्टा हेर, मुइ हु। मुलाइ छोइबर हेर। क्यालाइकि भुतको त मासु रे हाड हुनइन्, रे तमु धेकन्छउ, मेरा त छन्।”#२४:३९ इसुले त्यो भन्या ताकि आफना हात रे खुट्टामि किला ठोकिया दाग तिनुनलाइ धेकाउन सकुन रे आफु इसु भया धेकाउ सकुन।
40यसो भुन्या पाछा उनुले तिनुनलाइ आफना हात रे खुट्टा धेकायो। 41रे खुसिले पत्याउन नसकिबर तिनुन अचम्ममि पडन्ज्या उनुले तिनुनलाइ भुन्यो, “तमुसित याँ केइ खान्या कुरा छ?” 42तिनुनले पकाया माछाको एक टुक्रो उनलाइ दियो। 43तइपाछा उनुले त्यो समाइबर तिनराइ अगाडि खायो।
44उनुले तिनुनलाइ भुन्यो, “तमुसित हुन्ज्या मुइले बोल्या बचन यिनइ हुन, कि मोसाका ब्यबस्थामि, अगमबक्ता रे भजनका किताबमि मेरा बिसयमि लेखिया सप्पइ कुरा पुरा हुनपडन्छ।”
45तइपाछा धर्म- सास्त्तरमि लेखिया कुरा बुज्जाइलाइ इसुले तिनुनको समज खोलदियो। 46उनुले तिनुनलाइ भुन्यो, “धर्म- सास्त्तरमि यसो लेखिया छ, कि ख्रिस्टले दुःख भोग्द् रे तेसरा दिनमि मर्याबटहइ जिउनो हुनपडन्छ, 47रे यरुसलेमबटहइ सुरु अरिबर सप्पइ जातिनलाइ उनरा नाउँमि पस्याताप रे पाप छिमाको प्रचार हुनपड्न्छ। 48तमु यिनइ कुराका साछि हउ। 49हेर, मु मेरा पिताले अर्या प्रतिग्या तमरा वाँ पठाउन्या छु। रे स्वर्गबटहइ सक्ति नपाउन्ज्यासम्म तमु इसइ सहरमि बसिराख।”
इसुको स्वर्गारोहण भयो
(मर्कुस १६:१९-२०; प्रेरित १:९-११)
50तइपाछा उनुले तिनुनलाइ बेथानिया गाउँसम्म लइजाबर गया, रे आफना हात उठाइबर तिनुनलाइ आर्सिबाद दियो। 51उनुले तिनुनलाइ आर्सिबाद दिनादिनाइ, उन तिनुन बटहइ छुट्टिया रे स्वर्गमि लइया। 52तिनुनले उनलाइ दण्डवत अर्यो रे खुब आनन्न सित यरुसलेममि फर्किया। 53तिनुन दिन दिनइ मन्धिरमि भेला हुनथ्या रे परमेस्वरलाइ स्तुति चडाउनथ्या।
Currently Selected:
लुका 24: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
