मर्कुस 13
13
यरुसलेम मन्दिरक् बिनास
(मत्ति २४:१-२; लुका २१:५-६)
1येसु मन्दिरक्भटे निस्कबा ठाल्लटाकै एकजेना चेलाहिके यन्हिं बोल्लोकुन्, “गुरु, यि मन्दिरक् बारा-बारा दरबारलक् दिठाउ ता, कट्का बारा-बारा दोंखोइ बन्ल रहेला!”
2येसुइ ओक्रानि यन्हिं बोल्लोकुन्, “तुँइ अख्नि यि दरबारलक् देख्तिहि रहस्ला! यछि रैल्ह दरबारलकक् एक्टा दोंखोक् उप्रक् ओर्को दोंखोउ बाँकि नाँबसेक्, उ सेब्भ्रोउ भत्किहिन् जायला।”
अन्तिम दिनक् सङ्केतलक्
(मत्ति २४:३-१४; लुका २१:७-१९)
3ओक्राक्पाछु येसुइ मन्दिरक् ओसाकपारै जैतुन बाज्ल डाँराइ बसिहिन् रैल्हटाकै पत्रुस, याकुब, यहुन्ना आउँ अन्द्रियासे सुटुक्क आइबानाइ येसुलाइ सोर्ल्हिहिंक्, 4“गुरु, हाम्रालाइ जानाउ ना, आगारि बाज्ल यि जम्मा घट्नालक् कख्नि भेला? आउँ यि जम्मा घट्नालक् पुरा भेला बाजिहिन् हामि कहने थाहा पाबा ते?”
5तसौ येसुइ उखर्ह्वानि बोल्लाहा, “होस्यार भेहिन् बसह! कुन्हुँहि तोहोरानि झुँक्याबा बुन् पारुस्। 6किसाबुने थुप्रोय मानुसलक् मोरा नाउँ लेहिन् ‘मुक्ति देलाहार मुँहि हो’ बाज्ते आट्थ्ला आउँ थुप्रोय मानुसलकलाइ झुँक्यायट्थ्ला। 7जख्नि तोहोराखर्ह्वाइ लाराइ भेल आउँ लाराइलकक् हल्ला सुनहला, उटाकै तोहोराखर्ह्वा बुन् डराहो। यरङ् घट्नालक् ता भेबाय पोर्लाहार रहेला, तर उहेबेलाइ सेहे सन्सारक् अन्त नाभेक्। 8किसाबुने जात-जातक् माझै लाराइ पोरेट्थ्ला, आउँ एक्टा राज्जेक् उप्रै ओर्को राज्जेइ लाराइ करट्थ्ला। ठाउँ-ठाँओइ बारा-बारा भुँइच्याललक्, आउँ अलिकालक् भेला। यि कहिनसेहे एक्टा अइमाइलाइ सुत्केरि बेथा लाग्लक् परौ पिराक् सुरु माटेन् हो।
9“भेटौ तोहोराखर्ह्वा आफ्निक् लागि होस्यार भेहिन् बसह। किसाबुने मानुसलके तोहोरानि अदालतै गर्थिबानाइ लेगाहेर्ला। सभाघरलकै तोहोरानि पिटेहेर्ला। मोरा नाँओक् खातिरमा बारा-हाकिम आउँ राजालकक् आगारि ठड्ध्याबा लागाहिन् मोरा साछि देबा पोरेहेर्ला। 10आउँ अन्तिम दिन आबाक् आगारि सेब्भ्रोउ जातक् मानुसलकक् माझै खुसिक् खभर सुनाहिन् सिधाल भेबा पोर्लाहार। 11जख्नि उखर्ह्वाइ तोहोराखर्ह्वानि गर्थिबानाइ लेगिहिन् मुद्दा चालाइदेहेर्ला, उटाकै किस्ग्वा बाज्बा भेका बाजिहिन् आगारिय चिन्ता बुन् करह। तर उहेटाकै तोहोराखर्ह्वालाइ जेहे बाज्बाक् आहेर्ला उहे बाजह, किसाबुने सारालाहार तोहोलेक बोइने, तर पबित्र आत्मा तोहोराभटे साराइस्। 12उहेबेलाइ मानुसलके आफ्निक् दाजुभाइलकलाइ मार्बाक् लागि सोंपेट्थ्ला आउँ महँटार-बाप्पोइ आको आफ्निक् छाउरा-पुटालाइ उहेरङे करेट्थ्ला। यरङ् करिहिन् छाउरा-पुटाइ आको महँटार-बाप्पोक् बिरोधै उठ्ट्थ्ला। आउँ उखर्ह्वालाइ मार्बाक् लागि सोंपेट्थ्ला। 13तोहोराखर्ह्वा मोरा पाछु लाग्लसिहिरे जम्मा मानुसलके तोहोरानि घिन करेहेर्ला। भेटौ जुन्सेहे अन्तिमसम्मय नहिंडगिहिने बसैस्, ओहिं मुक्ति पाइस्।#मत्ति १०:२२
माहा-सङ्कटक् समइ
(मत्ति २४:१५-२८; लुका २१:२०-२४)
14“जख्नि तोहोराखर्ह्वाइ नहिंभेबा पोर्लाहार ठाँओइ बिनास कर्लाहार घिनलाक्टो थोकलाइ#१३:१४ बिनास कर्लाहार घिनलाक्टो थोकलाइ: पुरानो नियमै अगमबक्ता दानिएलक् उल्लेख कर्ल घिनलाक्टो थोकक् बिसइमा येसुइ यछि बाज्तिहि रहैस्। अगमबक्ता दानिएले यरुसलेमक् मन्दिरै १६८ बिसिमा बानाल मुर्तिलाइ अगमबानि कर्तिहि रैल्हक्। येसुइ अगमबक्ता दानिएले बाज्ल कहिन् लेइबानाइ चेताउनि देइतिहि रहैस् कि फेरि आको अपबित्र थोक् मन्दिरै आयला बाज्बाक् कहिन् बाज्तिहि रहैस्। थुप्रोय बिद्वानलके रोमि सेनाइ ७० एडिमा यरुसलेम सहर बिनास करिहिन् उ अगमबानि पुरा भेल रैल्हकुन् बाजिहिन् सोंचोट्थ्ला। ठड्ध्याल देखहला। (पर्ल्हाहारे बुझुस्), उ बेलाइ यहुदिया इलाकाइ रैल्हाहारलक् डाँराक्पटि पाराहिन् जाउस्।#दानिएल ९:२७; ११:३१; १२:११#१३:१४ यि कहिन् दानिएल अगमबक्ताइ बाज्ल हो (दानिएल ९:२७; ११:३१; १२:११)। 15घरक् छतै भेलाहार टर नाभिबानाइ कुन्हुँ मानुस किच्छु थोक् झिंबाक्नि घर भिट्र बुन् पोसुस्।#लुका १७:३१ 16आउँ कुन्हुँ मानुस आफ्निक् खेतबारिमा रैल्ह भेनेमा ओहिं आफ्निक् लुगा लेबाक्नि घर बुन् जाउस्। 17उ बेलाइ दुइजिवा अइमाइ आउँ दुर्ह् खुवालाहार महँटारलकलाइ ता कट्का बिजोक भेट्थ्ला। 18यरङ् दिनलक् जारक् समइमा बुन् आउस् बाजिहिन् परमेस्वरक्सङ्हिं पाराथ्ना करह। 19किसाबुने उ दिनलकै यरङ् माहा-सङ्कट आइपोरेला कि, परमेस्वरे यि सन्सारक् सिरिस्टि कर्लइसौ अख्निसम्म ना ता यरङ् भेल रहेला, ना यरङ् कख्नुहुँ भेबा आयला।#दानिएल १२:१; प्रकास ७:१४ 20खास करिहिन् परमेस्वरे उ दुक्खक् समइ नहिं घटालसन्टेक् ता, कुन्हुँय मानुस बाँच्बा नहिंपार्टुहुन्बे। भेटौ ओहिं चुन्ल मानुसलकक् खातिरमा उ दुक्खक् समइ घटाल धरैस्।
21“उ समइमा कुन्हुँ-कुन्हुँइ तोहोराखर्ह्वालाइ यन्हिं बोलेहेर्ला, ‘दिठाहो, मुक्ति देलाहार खिरिस्ट ता यछि रहैस्,’ अथबा ‘ओछि रहैस्,’ भेटौ तोहोराखर्ह्वाइ उ कहिनै बिस्वास बुन् कर्बा। 22किसाबुने झुठा खिरिस्टलक् आउँ झुठा अगमबक्तालक् देख्वार पोरोट्थ्ला। उखर्ह्वाइ बारा-बारा सङ्केतलक् आउँ अचम्मक् कामलक् करिबानाइ सकेसम्म परमेस्वरे चुन्ल मानुसलकलाइ आको झुँक्यायट्थ्ला। 23उहेसैर्हे तोहोराखर्ह्वा होस्यार भेहिन् बसह। मुँइ तोहोराखर्ह्वालाइ यि सेब्भ्रोउ कहिनलक् आगारिय जानाल धर्मेहेंर्ला।”
मुँइ मानुसक् बेटायक फेरि आबाक् सङ्केतलक्
(मत्ति २४:२९-३१; लुका २१:२५-२८)
24“उ दिनलकै माहा-सङ्कट पोरिहिन् पाछु सुर्जइ उँजत नहिंदेहिन् आँधार भेला, आउँ चान्दाइ उँजत नाँदेक्,#यसैया १३:१०; इजकिएल ३२:७; योएल २:१०; २:३१; ३:१५ 25आकासक् तारालक् खसेला, आउँ आकासै रैल्ह सेब्भ्रोउ सक्तिलक् हल्लबकुन्बे।#यसैया ३४:४; योएल २:२०; प्रकास ६:१३ 26तसौ मानुसलके मुँइ मानुसक् बेटाहिकलाइ बर्के सक्ति आउँ महिमाइ बादरै आइतिहि कर्ल देखट्थ्ला।#दानिएल ७:१३; प्रकास १:७ 27तसौ मुँइ स्वर्गोदुतलकलाइ पिर्थिबि आउँ आकासक् चारौ कोनाइ पाठामखान्ला, आउँ परमेस्वरे चुन्ल जट्का मानुसलकलाइ जउर कारामखान्ला।”
नेभाराक् गाछक्भटे सिच्छा
(मत्ति २४:३२-३५; लुका २१:२९-३३)
28तसौ येसुइ यन्हिं बोल्लाहा, “नेभाराक् गाछक्भटे एक्टा कहिन् सिखह। जख्नि यक्राक् हाँङालक् कमलो भेहिन् लौओ टुसा पल्ह्वायला, असौ ता गरम समइ लज्जिकै आइपुग्ल रहेला बाजिहिन् तोहोराखर्ह्वाइ थाहा पाहोला। 29यहेरङ् करिहिन् जख्नि मुँइ बाज्ल यि कहिनलक् भेबाठाल्ल देखहला, तसौ मुँइ आबाक् समइ लज्जिके रहेला बाजिहिन् तोहोराखर्ह्वाइ जानह। 30साँच्चिय मुँइ तोहोरानि बोल्मेहेंर्ला, यि सेब्भ्रोउ कहिनलक् नहिंभेबासम्म यि पुस्ताक् मानुसलक् बितिहिन् नाँजायक्। 31आकास आउँ पिर्थिबि बितिहिन् जायला, तर मुँइ बाज्ल बचनलक् कख्नुहुँ बितिहिन् नाँजायक्।
अन्तिम दिनक् लागि चनाखो भेहिन् बस्बा
(मत्ति २४:३६-४४; लुका १२:३८; १२:४०)
32“अन्तिम दिन आउँ समइ कख्नि आयला बाजिहिन् परमेस्वर पितालाइ बाहेक कुन्हुँहिलाइ थाहा बोइनें। ना ता स्वर्गोइ रैल्ह स्वर्गोदुतलकलाइ ना ता बेटाहिकलाइ थाहा रहेक्ला। 33उहेसिहिरे चनाखो भेइबानाइ पाराथ्ना करिहिन् बसह, किसाबुने उ समइ कख्नि आयला, उ तोहोराखर्ह्वाइ नाजानह। 34मुँइ मानुसक् बेटायक आबाक् दिन ता एकजेना मानुस परदेस जाइलक् परौ हो। आउँ जाबाक्भन्दा आगारि ओहिं आफ्निक् चाकरलकलाइ घरक् सेब्भ्रोउ कामलक् जिम्मा देइबानाइ आउँ पाल्यालाइ चनाखो भेहिन् बस्बा बाजिहिन् आग्या देलाहा।#लुका १२:३६-३८ 35उहेसिहिरे तोहोलेक चनाखो भेहिन् बसह। किसाबुने घरक् उ मालिक कख्नि फर्किबानाइ आइस्, बाजिहिन् तोहोराखर्ह्वालाइ थाहा नाँभेहार। उ ता बियार पखै, आधारातै, भाल्या डक्रबाक्टाकै अथबा बिहानिहि झिसमिस्याइ, जख्नुहुँ भेटौ आबा पारैस्। 36आउँ घरक् मालिक अपरझट आइपुग्लटाकै ओहिं तोहोराखर्ह्वालाइ सुतिहिन् रैल्ह बुन् भेंटाउस्। 37जेहे मुँइ तोहोराखर्ह्वालाइ बोल्लो धर्मेहेंर्ला, उ मुँइ जम्माहिंलाइ बोलोम्ना, चनाखो भेहिन् बसह!”
Currently Selected:
मर्कुस 13: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
