मर्कुस 14
14
येसुलाइ मार्बाक् मौका खोज्लो
(मत्ति २६:१-५; लुका २२:१-२; यहुन्ना ११:४५-५३)
1असौ छुट्काराक् पाबन आउँ खमिर नहिंमिसाल पिठा खाबाक् पाबन आबाक् दुइ दिन माटेन् बाँकि रैल्हकुन्। उहेटाकै बर्के-पुझरिलक् आउँ धर्म-गुरुलके येसुलाइ कहने छल करिहिन् पक्रिबानाइ मार्बा पारेला बाजिहिन् मौका खोज्तिहि रैल्हुहुन्।#प्रस्थान १२:१-२७ 2तर उखर्ह्वाइ बाज्लुहुन्, “यि काम पाबनक् बेलाइ सेहे कर्बाक् राम्रो नाँभेक्, किसाबुने मानुसलकक् माझै बर्के हुल-दङ्का भेबा पारेला।”
येसुक् कापारै अइमाय अत्तर खन्याल
(मत्ति २६:६-१३; यहुन्ना १२:१-८)
3एक्दिन येसु बेथानिया बाज्ल गाँओइ सिमोन नाउँ भेल एकजेना माहारोग लाग्ल मानुसक् घरै जाइलक्। ओछि ओहिं खाबा ठाल्लटाकै एकजेना अइमाइ सिङ्गमरमरक् बोतोलभोरि एकदमे महँङो जटामसिक् मघ्मघ् बास्ना आइलाहार अत्तरक् तेल लेइबानाइ आइलक्। आउँ ओहिं उ बोतोल फुटाइबानाइ उ मघ्मघ् बास्ना आइलाहार अत्तरक् तेल येसुक् कापारै खन्याइ देलकुन्।#लुका ७:३७-३८ 4तर ओछि रैल्ह कुन्हुँ-कुन्हुँ मानुसलक् रिसाइबानाइ एक्टाइ-ओर्कोक्सङ्हिं यन्हिं बाज्बा ठाल्लुहुन्, “यट्का महँङोक् अत्तरक् तेल किसा ओन्हिं खेरो काराल? 5बरुस यट्का महँङोक् अत्तरक् तेल चाँरिक् तिनसइसौ बर्ता डब्बल पैसाइसौ बेंचिबानाइ आइल पैसा गरिपलकलाइ बाँटिदेल सन्तेक् कट्का राम्रो भेइटकुन्!” आउँ उखर्ह्वाइ उ अइमाइलाइ झापार्लिहिंक्।
6तर येसुइ बोल्लाहा, “यक्रानि छारहँक्, किसा तोहोलेक यक्रानि साताहोला? यहिं ता मोरा लागि एक्टा राम्रो काम कर्ल धरैस्। 7किसाबुने गरिप मानुसलक् ता तोहोरासङ्हिं सटौघरि भेट्थ्ला, आउँ मन लाग्लटाकै कुन्हुँ समइमा भेटौ तोहोलेक उखर्ह्वालाइ मदप कर्बा पारहला। तर मुँइ ता तोहोराखर्ह्वाक्सङ्हिं सटौघरि नाँभेम्।#ब्यबस्था १५:११ 8यि अइमाय मोरा लागि जे कर्बा पार्लाहार रैल्हक्, उहे कर्ल धरैस्। यहिं मोरा देहिलाइ मुँइ मोर्बाइसौ आगारिय यि मघ्मघ् बास्ना आइलाहार अत्तरक् तेल लागाहिन् गार्बाक् लागि तियार पार्ल धरैस्। 9साँच्चिय मुँइ तोहोराखर्ह्वालाइ बोल्मेहेंर्ला, सेब्भ्रोउ सन्सारभोरि जछि-जछि यि खुसिक् खभर पर्चार भेला, ओछि-ओछि यि अइमाय कर्ल उ कामक् चर्चा करिहिने ओक्राक् सम्झना करिजायक्ला।”
यहुदाइ येसुलाइ धोखा देहिन् पक्राबाक् तियार भेल
(मत्ति २६:१४-१६; लुका २२:३-६)
10तसौ बार्हजेना चेलालकक्मध्ये एकजेना यहुदा इस्करियोते येसुलाइ धोखा देहिन् पक्राबाक् लागि बर्के-पुझरिलकक्ठालाइ जाइलक्। 11यहुदाक् यि कहिन् सुनिहिन् उखर्ह्वा एकदमे खुसि भेलुहुन्, आउँ ओक्रानि पैसा देबाक् कबुल कर्लुहुन्। उहेसिहिरे यहुदाइ उहे बेलाहिंसौ येसुलाइ धोखा देहिन् पक्राबाक् दाउ खोज्बा ठाल्लक्।
छुट्काराक् पाबन मानाबाक् तियार कर्ल
(मत्ति २६:१७-२५; लुका २२:७-१४; २२:२१-२३; यहुन्ना १३:२१-३०)
12खमिर नहिंमिसाल पिठा खाबाक् छुट्काराक् पाबनक् सुरुक् दिन आइल रैल्हकुन्। उहे दिनै इस्राएलि मानुसलके भेंराक् बोका बलि चार्हाबा पोर्लाहार चलन रैल्हाहा। येसुक् चेलालके ओक्रालाइ यन्हिं बाजिहिन् सोर्ल्हिहिंक्, “हामि कछि जाइबानाइ तोरा लागि छुट्काराक् पाबनक् भोज तियार कर्ल चाहास्ला?”
13तसौ येसुइ आफ्निक् दुइजेना चेलालकलाइ यन्हिं बाजिहिन् पाठालाहा, “तोहोलेक यरुसलेम सहरै जाहा, आउँ ओछि तोहोलेके गाग्रिसौ पानि बोकिहिन् जाइतिहि कर्ल एकजेना मानुसलाइ भेंटाहोला। आउँ तोहोलेक आको ओक्रिहिंक् पाछु-पाछु जाबेहेरा। 14उ मानुस जुन् घरै पोसोइस्, उ घरक् मालिकलाइ यन्हिं बोल्बेहेका, ‘हाम्रानि गुरुइ तोराठालाइ यन्हिं बाजिहिन् सोर्भा पाठाल धरैस्, मोरा चेलालकक्सङ्हिं मुँइ छुट्काराक् पाबनक् भोज खाबाक् पहुना कोठा कछि रहेला?’ 15तसौ ओहिं तोहोरानि उप्रक् तालाइ एकदमे राम्रोइसम् साजाल एक्टा बर्के कोठा देखाहेर्ला। आउँ ओच्छिहि तोहोलेके हाम्रा लागि भोज तियार काराहा।”
16ओक्राक्पाछु चेलालक् जाइलुहुन्, आउँ सहरै पोस्लुहुन्, तसौ येसुइ उखर्ह्वानि बोल्लोहिंक् परौ भेंटालुहुन्, आउँ उखर्ह्वाइ छुट्काराक् पाबनक् लागि भोज तियार कारालुहुन्।
17बियार पोर्नेसौ येसु आफ्निक् बार्हजेना चेलालकक्सङ्हिं उहे घरै आइलक्। 18आउँ उखर्ह्वा बसिहिन् भोज खाइतिहि कर्लटाकै येसुइ यन्हिं बोल्लाहा, “साँच्चिय मुँइ तोहोराखर्ह्वानि बोल्मेहेंर्ला, तोहोराखर्ह्वामध्ये मोरासङ्हिं खाइलाहार एकजेनाइ मोरानि धोखा देहिन् पक्राइदेइस्।”#भजनसङ्ग्रह ४१:९
19यि सुनिहिन् चेलालकक् मन एकदमे दुक्खलाहा, आउँ पालोइसम् करिहिन् उखर्ह्वाइ येसुलाइ सोर्ल्हिहिंक्, “तुँइ बाज्ल मानुस किस् मुँइ हो?”
20येसुइ उखर्ह्वानि बोल्लाहा, “तोहोलेक बार्हजेनामध्ये एकजेनाइ, जैहिं मोरासङ्हिं अख्नि थारिमा पिठा चोप्तिहि रहैस्। ओहिं मोरानि धोखा देइस्। 21किसाबुने मुँइ मानुसक् बेटायक ता धर्मसास्ट्रै लेख्लय अनुसार मोर्बा पोर्लाहार, तर धिक्कार भेक् उ मानुसलाइ, जैहिं मुँइ मानुसक् बेटाहिकलाइ धोखा देहिन् पक्राइस्। बरुस उ मानुस ता जर्मबाय नहिंजर्मल सन्तेक् राम्रो भेइटकुन्।”
पर्भु-भोज
(मत्ति २६:२६-३०; लुका २२:१५-२०; १ कोरिन्थि ११:२३-२५)
22उखर्ह्वाइ खाइतिहि कर्लटाकै येसुइ पिठा लेलक्, आउँ परमेस्वरलाइ धन्यबाट देलक्। तसौ पिठा टुक्रा पारिहिन् चेलालकलाइ यन्हिं बाजिहिन् देलाहा, “लेहो, यि मोरा देहि हो।”
23ओक्राक्पाछु येसुइ कचौरा लेइबानाइ परमेस्वरलाइ धन्यबाट देनेसौ चेलालकलाइ देलाहा, आउँ उखर्ह्वा जम्माहिं उहे कचौराक्भटे पिलुहुन्। 24आउँ येसुइ उखर्ह्वालाइ यन्हिं बोल्लाहा, “यि परमेस्वरक्सङ्हिं कर्ल लौओ करारक् पक्का कर्बाक् लागि कर्ल मोरा रकट हो, यि थुप्रोय मानुसलकक् पाप धोबाक् लागि बागाइजायला।#प्रस्थान २४:८; यर्मिया ३१:३१-३४ 25साँच्चिय मुँइ तोहोराखर्ह्वालाइ बोल्मेहेंर्ला, जख्निसम्म परमेस्वरक् राज्जेइ लौओ अङ्गुरक् मद्ध नहिंपिबासम्म फेरि मुँइ अङ्गुरक् मद्ध नाँपिम्।”
26तसौ उखर्ह्वाइ एक्टा भजन गित्काइबानाइ जैतुन डाँराक्पटि जाइलुहुन्।
पत्रुसे येसुलाइ इन्कार कर्बाक् बिसइमा
(मत्ति २६:३१-३५; लुका २२:३१-३४; यहुन्ना १३:३६-३८)
27तसौ येसुइ चेलालकलाइ यन्हिं बोल्लाहा, “तोहोलेक जम्माहिं मोरानि छारिहिन् पाराहोला, किसाबुने धर्मसास्ट्रै यरङ् लेख्ल रहेला, ‘मुँइ चह्र्वालकलाइ मार्मिखान्ला, आउँ भेंरालक् तितर-बितर भेहिन् पाराट्थ्ला।’#जकरिया १३:७ 28तर मुँइ मोर्लोक्भटे जिउँटो भेहिन् उठ्नेसौ मुँइ तोहोराखर्ह्वाइसौ आगारिय गालिल इलाकाइ जाम्ना।”#मत्ति २८:१६
29यरङ् बाज्ल सुनिबानाइ पत्रुसे येसुलाइ बोल्लोकुन्, “जम्मा जेनाइ तोरालाइ छारिहिन् पारायटौ सुधा मुँइसेहे कख्नुहुँ नाछार्मेर्।”
30तसौ येसुइ पत्रुसलाइ यन्हिं बोल्लोकुन्, “साँच्चिय मुँइ तोरानि बोल्मेर्ला, आजु राति दुइरावा भाल्या डक्रबाक्भन्दा आगारि तुँइ मोरानि चिन्भाय नाँचिन्हम् बाजिहिन् तिन बाजिसम्म इन्कार करस्ला।”
31तर पत्रुसे अज्झौ जोर देइबानाइ यन्हिं बाज्लक्, “तोरासङ्हिं मुँइ मोर्बा पोरेटौ सुधा मुँइ तोरालाइ कख्नुहुँ इन्कार नाँकर्मेर्।”
तसौ ओर्को जम्मा चेलालकुहु उहेरङे बाज्लुहुन्।
गेतसमनिक् बगैंचाइ येसु
(मत्ति २६:३६-४६; लुका २२:३९-४६)
32ओक्राक्पाछु येसु आफ्निक् चेलालकक्सङ्हिं गेतसमनि बाज्ल बगैंचाइ जाइलक्, आउँ ओहिं आफ्निक् चेलालकलाइ यन्हिं बोल्लाहा, “मुँइ पाराथ्ना कर्बासम्म तोहोलेक यच्छिहि बसिहिन् रहँ।” 33तसौ येसुइ पत्रुस, याकुब आउँ यहुन्नालाइ सेहे आफ्निक्सङ्हिं लेगालाहा, आउँ ओक्राक् मन एकदमे दुक्खित भेहिन् पिराइ पोर्लोक्। 34तसौ येसुइ चेलालकलाइ यन्हिं बोल्लाहा, “मोरा मन दुक्खित भेइबानाइ मोर्बाक् सनक् परौ भेल रहैस्। तोहोराखर्ह्वा यछि जग्वार भेहिन् बसह।”
35तसौ येसुसेहे चुटेक् आगार्के जाहिन् भिंसओइ घोप्टो पोरिहिन् यन्हिं बाजिहिन् पाराथ्ना कर्बा ठाल्लक्, “भेबा पारेला भेनें मोरा उप्रै आबा लाग्ल दुक्खक् समइ मोराभटे हटिहिन् जाउस्।” 36ओहिं यन्हिं बाज्लक्, “हे अब्बा#१४:३६ अब्बा: अब्बालाइ आरमाइक भासाइ आफ्निक् बाप्पोलाइ सम्बोधन कर्टे पर्योग कर्ल सब्द हो।, पिता, तोरा आगारि सेब्थोक् सम्भब रहेला। यि आइलाहार दुक्खक् अनुभब कर्बा बुन् पोरुस्। तर मोरा इच्छा बोइनें कि तोरे इच्छा पुरा भेउस्।”
37तसौ येसु उठिहिन् तिनजेना चेलालक् रैल्ह ठाँओइ फर्किहिन् आइलटाकै उखर्ह्वालाइ सुतिहिन् रैल्ह भेंटालाहा। ओहिं पत्रुसलाइ यन्हिं बोल्लोकुन्, “सिमोन, तुँइ सुट्ल ना किस् हाँ? तुँइ एक घन्टाउ जागिहिन् बस्बा नापारस्? 38तोहोलेक पापै फसाबाक् परिछ्याइ जुन् पोरुस् बाजिहिन् जग्वार भेहिन् पाराथ्ना करह। आत्मा ता साँच्चिय तियार रहेर्ला, तर देहि कमजोर रहेर्ला।”
39येसु फेरि जाइबानाइ पैल्हाकिहिंक् परौ पाराथ्ना कर्लक्। 40तसौ येसु फेरि चेलालक् रैल्ह ठाँओइ फर्किहिन् आइलटाकै ओहिं उखर्ह्वालाइ सुतिहिन् रैल्ह भेंटालाहा। किसाबुने उखर्ह्वाक् आँख निरे अन्धोल भेल रैल्हाहा। आउँ उखर्ह्वाइ येसुलाइ किस् बाजिहिन् जुबाप देबा किच्छुय नहिं जान्लुहुन्।
41येसु तिन फेरा चेलालक् भेल ठाँओइ फर्किबानाइ आइलक्, आउँ उखर्ह्वालाइ बोल्लाहा, “किस् तोहोराखर्ह्वा अज्झौ सुतिहिन् आराम कर्तिहि रहला? असौ सुतिहिन् बस्बाक् समइ जाहिन् सक्ल रहेला। दिठाहो, मुँइ मानुसक् बेटायक पापि मानुसलकक् हाथै सोंपिजाबाक् बेला आहिन् सक्ल रहेला। 42तोहोलेक उठ्ह, आउँ जाहुँक्! दिठाहो, मोरालाइ धोखा देहिन् पक्रालाहार मानुस लज्जिकिहिमा आहिन् सक्ल रहैस्।”
येसुलाइ धोखा देहिन् पक्रल
(मत्ति २६:४७-५६; लुका २२:४७-५३; यहुन्ना १८:३-११)
43येसुइ कहिन् कर्तिहि-कर्तिहि बार्ह जेना चेलालकक्मध्ये एकजेना चेला यहुदासेहे तुरुन्ते ओछि आइलक्। आउँ बर्के-पुझरिलक्, धर्म-गुरुलक् आउँ अगुवालके पाठाल एक दप्फा तलवार आउँ ठेङ्हाँ लेइबानाइ ओक्राक्सङ्हिं ओछि आइलुहुन् 44येसुलाइ धोखा देहिन् पक्रालाहार यहुदाइ उखर्ह्वालाइ यरङ् एक्टा इसारा देल धर्लाहा, “जक्रानि मुँइ चुम्मा खाम्ना उहेय येसु हो। ओक्रिहिलाइ पक्रहँक् आउँ राम्रोइसम् सुरछ्या देइबानाइ लेगाबेहेरा।”
45यहुदा पुगेहेबिट्के येसुक्ठालाइ जाहिन् “गुरु” बाजिहिन् ओक्राक् गालै चुम्मा खाइलकुन्। 46तसौ उखर्ह्वाइ येसुलाइ पक्रलिहिंक्। 47उहेटाकै ओछि येसुक् लज्जिकै ठड्ध्यालाहारमध्ये एकजेना चेलाइ स्वात्त तलवार निस्काइबानाइ माहा-पुझरिक् चाक्रिहिंकक्लाइ बाज्राइदेलकुन्, आउँ ओक्राक् कान छ्वाट्टय काटिदेलकुन्। 48तसौ येसुइ उखर्ह्वालाइ यन्हिं बोल्लाहा, “किस् तोहोलेके मुँइ डाँकु हो बाजिहिन् तलवार आउँ ठेङ्हाँ लेइबानाइ मोरानि पक्रबा आइल रहला? 49दिनहुँपट मन्दिरै सिखातिहि कर्लटाकै मुँइ तोहोराखर्ह्वाक्सङ्हिं रैल्हम्, भेटौसुधा तोहोलेके मोरानि पक्रबाक् आँट नहिं कर्लेहें! तर धर्मसास्ट्रै लेख्ल कहिनलक् पुरा भेबाय पोर्लाहार!”#लुका १९:४७; २१:३७
50ओक्राक्पाछु जम्माय चेलालके येसुलाइ छारिहिन् पारालुहुन्।
51उहेबेलाइ ओछि एकजेना ठिठा मानुस येसुक् पाछु-पाछु जाइतिहि रैल्हक्। ओहिं आफ्निक् जिओइ एक्टा सुतिक् लुगा माटेन् सेर्पल धर्लक्। उखर्ह्वाइ ओक्रानि आको गर्थबाक् खोज्लिहिंक्। 52तर ओहिं आफ्निक् लुगाय छारिबानाइ नाङ्टे पारालक्।
येसु माहासभाक् आगारि
(मत्ति २६:५७-६८; लुका २२:६६-७१; यहुन्ना १८:१२-१३; १८:१९-२४)
53तसौ उखर्ह्वाइ येसुलाइ माहा-पुझरिक्ठालाइ लेगालिहिंक्, आउँ ओछि जम्मा बर्के-पुझरिलक्, धर्म-गुरुलक् आउँ अगुवालक् आको जउर भेल रैल्हुहुन्। 54पत्रुससेहे चुटेक् टार्होहिंक्भटे येसुलाइ पछ्याटे माहा-पुझरिक् घरक् अङ्नाइ जाइलक्। तसौ ओछि उ पाल्यालकक्सङ्हिं आगि तापिहिन् बस्बा ठाल्लक्। 55तसौ बर्के-पुझरिलक् आउँ माहासभाक् जम्माय सदस्यालके सेहे येसुलाइ मार्बाक् लागि ओक्राक् बिरोधै पर्मान खोज्बा ठाल्लुहुन्। तर उखर्ह्वाइ किच्छुय पर्मान नहिं पाइलुहुन्। 56किसाबुने येसुक् बिरोधै थुप्रोय जेनाइ झुठा साछि देलुहुन्, तर कुन्हुँहिंक् कहिन् आको नहिं मिल्लाहा।
57ओक्राक्पाछु कुन्हुँ-कुन्हुँ मानुसलक् उठिहिन् येसुक् बिरोधै यन्हिं बाज्तिहि झुठा साछि देलुहुन्, 58“हामि ता यहिं यन्हिं बाज्ल सुन्लुहुँक्, ‘मानुसक् हाथे बानाल यि मन्दिरलाइ भत्काइबानाइ मानुसक् हाथे नहिंबानाल ओर्को मन्दिर मुँइ तिन दिनै बानाम्ना।’”#यहुन्ना २:१९ 59भेटौसुधा उखर्ह्वाइ बाज्ल साछि किच्छुय नहिं मिल्लाहा।
60तसौ माहा-पुझरिय जम्माहिंक् आगारि ठड्ध्याइबानाइ येसुलाइ यन्हिं बाजिहिन् सोर्ल्होकुन्, “किसा जुबाप नाँदेस्? यि मानुसलके तोरा बिरोधै देल साछिक् बिसइमा बाज्बा पोर्लाहार किच्छु कहिन् रहेस्ला ना?”
61तर येसु चुप्चाप बसिहिन् रैल्हक्, आउँ किच्छुय जुबाप नहिंदेलक्। तसौ फेरि माहा-पुझरिय येसुलाइ यन्हिं बाजिहिन् सोर्ल्होकुन्, “किस् तुँइ पबित्र परमेस्वरक् बेटायक खिरिस्टय हो ते?”
62तसौ येसुइ उखर्ह्वालाइ बोल्लाहा, “हो, मुँहि हो, आउँ एक्दिन तोहोलेके मुँइ मानुसक् बेटाहिंक्लाइ सेब्भुइसौ सक्तिसालि परमेस्वरक् दैन्हँक्पाखा बस्ल आउँ स्वर्गोक्भटे बादरक्सङ्हिं आइतिहि कर्ल देखहला!”#दानिएल ७:१३
63तसौ यि कहिन् सुनिबानाइ माहा-पुझरिय आफ्निक् लुगा चिरिबानाइ यन्हिं बाज्लक्, “असौ हाम्रालाइ ओर्को किस् साछिलक् चाइल्ह ते? 64तोहोलेके यहिं कर्ल परमेस्वरक् निन्दा ता सुनिहालेहे। तोहोराखर्ह्वाक् बिचार किवा रहेर्ला?”
तसौ उखर्ह्वा जम्माहिं “यि अपरारि हो, यक्रानि मार्बाक् साजाइ देबाय पोर्लाहार!” बाज्लुहुन्।#लेबि २४:१६
65तसौ ओछि रैल्ह कुन्हुँ-कुन्हुँइसेहे येसुलाइ थुक्लिहिंक्, आउँ ओक्राक् आँख झाँकाइबानाइ पित्तिहि बोल्लिहिंक्, “लु बाज्ता, तुँइ अगमबक्ता भेइबुने तोरानि कुनेग्वाइ पित्वास्?” ओक्राक्पाछु पाल्यालके आको ओक्रालाइ पिट्टे लेगालिहिंक्।
पत्रुसे येसुलाइ इन्कार कर्ल
(मत्ति २६:६९-७५; लुका २२:५६-६२; यहुन्ना १८:१५-१८; १८:२५-२७)
66उहेबेलाइ पत्रुस टर अङ्नाइ बस्ल रैल्हक्। आउँ माहा-पुझरिक् एकजेना चाकर्नि ओछि आइलक्। 67आउँ पत्रुसलाइ आगि तापिहिन् बस्ल देखिहिन् ओक्रानि एकेहोरि दिठाहिन् यन्हिं बोल्लोकुन्, “तुँइ आको नासरतक् येसुक् सङ्हिंय रौंहोइ बोइने ते?”
68तर पत्रुसे यन्हिं बाज्तिहि इन्कार कर्लक्, “बोइने, तुँइ यि कनङ् कहिन् करस्ला, मुँइ ता किच्छु आको थाहा नापाम् आउँ नाबुझम् आको।” ओक्राक्पाछु पत्रुस अङ्नाक्भटे मुल दिहाँरक्पाखा जाइलक्, आउँ उहेबेलाइ भाल्या डँक्रलक्।
69उ चाकर्निय पत्रुसलाइ दिहाँरक् लज्जिकै बस्ल देखिबानाइ ओछि रैल्ह मानुसलकलाइ फेरि बोल्बा ठाल्लाहा, “यि मानुस आको ता येसुहिंक् चेलालकक्मध्ये एकजेना हो!” 70पत्रुसे फेरि इन्कार कर्लक्।
तसौ किच्छु समयपाछु ओछि ठड्ध्यालाहार मानुसलके पत्रुसलाइ बोल्लिहिंक्, “साँच्चिय तुँइ उखर्ह्वाक्मध्ये एकजेना चेला हो बाजिहिन् चिन्हुहुँक्ला। किसाबुने तुँइ आको गालिलक् मानुसे रहस्ला।”
71तर पत्रुसे आफ्निलाइ साराप्तिहि कसम खाइतिहि यन्हिं बाज्लक्, “मुँइ ढाठ्ल भेइबुने परमेस्वरक् साजाइ मोरा उप्रै पोरुस्, आउँ तोहोलेके बाज्ल मानुसलाइ ता मुँइ चिन्भाय नाँचिन्मिक्।”
72तसौ पत्रुसे ओरोङ् बाजेहेबिट्के दोस्रो फेरा भाल्या डँक्रलक्, आउँ येसुइ पत्रुसलाइ यन्हिं बोल्लो कहिन् सम्झलक्, “भाल्या दुइरावा डँक्रबाक् आगारिय तुँइ मोरानि तिनफेरा इन्कार करस्ला।” तसौ उ कहिनलाइ सम्झिहिन् पत्रुस धर्धरि काँर्बा ठाल्लक्।
Currently Selected:
मर्कुस 14: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
