लुका 13
13
पछ्ताप या बिनास
1तेइबेला ताँइ नाप्नापा मान्ठहरु खेडिया छिया, जोले तिँ गालिलिहरुका बारेमै इसुकन भुन्या, जैकन पिलातसले हत्या गरि तिनुहरुको रगत बलि भया पसुको रगत स्हात मिसाइदिया। 2तब इसुले तिनुहरुकन भुन्या, “तिनुहरुले यस्हरि दुख पाया भुन्दैमै क्या तुमिहरुले यिँ गालिलिहरु अरु स्हबै भुन्दा भौति पापि छन भुनि ठराउँदाछौ? 3मु तुमिहरुकन भुन्दछु, तेसो होइन, तर तुमिहरुले पछ्ताप गर्यानौ भुन्या तुमिहरु स्हबै तेइथै गरि नै नास हुन्याछौ। 4अनि क्या तुमिहरु तिँ अठार जुन तेइ सिलोआमको धररा ओद्दिकन मर्या छिया कि तिनुहरु स्हबै यरुसलेममै बइन्या मद्दि भौति अपरादि छिया भुनि ठान्छौ? 5तेसो होइन तर मु तुमिहरुकन भुन्छु, तुमिहरुले पुनि पछ्ताप गर्यानौ भुन्या, तुमिहरु स्हबै तेइथै गरि नै नास हुन्याछौ।”
फलै नफल्या रुख
6तेइपछि इसुले एक उखान भुन्या, “एक मान्ठले आम्ना अंगुर बाडिमै एक नेभाराको बुटो लायाछियो। तेइ बुटामै फल फल्योकि भुनि हेन्न आयो। 7तेइले कामदारकन भुन्यो, ‘तिन बर्स्हदेखि मुइले नेभाराको रुखमै फल फल्छकि भुनि हेर्याँ, तर फलै फल्योन। यइकन ढालिदे क्यानभुन्या यइले मथ्थै ठाउँ स्हाँगुडो गर्याछ।’ 8तर कमाराले भुन्यो, ‘मालिक यइकन अँजै एक बर्स्ह रनदेउ, मु यइको वरिपोरि खुनि पर्स्हो हालुला, 9र तेइपछि फल फल्यो भुन्या ठिकै छ, नतर तेइकन तुमिले ढालिदिया।’”
पट्याइ मान्या दिनमै इसुले भलो गर्या
10एक पट्याइ मान्या दिन इसुले सबाघरमै सिच्छ्या दिइ रयाछिया। 11ताँइ एक स्हैनि छि तेइकन अठार बर्स्हदेखि भुतआत्मा लागेर कुम्र्या भयाइछि, र स्होज्जै हुन स्हक्तिछिन। 12इसुले तेइकन देख्यापछि डाक्यार भुन्या, “यइ स्हैनि, अब तुमि आम्ना कैठबाट भलो भयौ।” 13अनि इसुले तेइमाथि आम्ना हात राख्या, तेइ एक्कासि उठि र परमेसोरकन गुनगान गन्न्न लागि।
14तेइ देख्यार सबाघरका सासन गन्न्या जात्तिगरि झोकाया, क्यानकि इसुले पट्याइ मान्या दिनमै निको पाड्या छिया, र तिनुले मान्ठहरुकन भुन्या, “काम गन्न्या छ दिन छुदैछुन, यइबिअ यिँ छ दिन भित्तै भलो हुन आउ, तर पट्याइ मान्या दिनमै हैन।”#प्रस्थान २०:९-१०; बेबस्था ५:१३-१४
15तर इसु प्रभुले तिनुकन भुन्या, “ए कुइपाजिहरु हो! तुमिहरु मद्दि कोइले पट्याइ मान्या दिनमै गोठबाट गाइ गोरु र गदा मुल्केर पानि प्याउन ल्हिदैन? 16यइ अब्राहामका बुङ्सकि छोरि अठार बर्स्ह स्हुम्म सैतानको कब्जामै छि, पट्याइका दिनमै यइ कब्जाबाट छुट्करा हुनुपड्न्या हैन र?” 17इसुले यिँ कुडा भुनि स्हक्यापछि उनुका बिरोदिहरु लाजमै पड्या, तर उनुका स्हबै कामहरुमै मान्ठहरु खुसि भया।
रायोको बिउ र खमिरको उखान
(मत्ति १३:३१-३३; मर्कुस ४:३०-३२)
18अनि इसुले भुन्या, “परमेसोरको राज्य क्या जैथो छ? तेइकन मु क्या स्हात तौलु? 19तेइ त रायोको बिउ जैथो हो, तेइ एक जुन मान्ठले आम्ना बाँडिमै छड्यो, र उम्र्योर बड्डै नान्नानो रुख जैथैभयो अनि सर्गका चडाचुडिहरुले हाँगामै खोल्लेस लाया।”
20इसुले फेरि भुन्या, “परमेसोरको राज्यकन मु क्या स्हात तौलु? 21तेइ त खमिर जैथै हो, जो एक स्हैनिले तिन डालो धुलामै मिसाइ र स्हबै धुलो बड्यो।”
स्हाँगुरो धेलो
(मत्ति ७:१३-१४)
22इसु सहर र गाउँ गाउँमै पसि मान्ठहरुकन सिच्छ्या दिदै यरुसलेमतिर गया। 23तेइबेला एकजुना मान्ठले इसुकन स्होद्यो, “प्रभु क्या नापाले मुक्ति पाउन्या छुन्?”
24तर इसुले तिनुहरुकन भुन्या, “परमेसोरको राज्यामै जान्या बाटो स्हाँगुरो धेलो जैथै हो र तेइ धेलाबाट पैन कोसित गर। क्यानकि मु तुमिहरुकन भुन्दछु, मथ्थै जुन स्हाँगुरो धेलाबाट पैन खोइदाछुन्, तर स्हकन्यानाइ। 25अनि घरका मालिकले उठिकन तेइ धेलो अड्याइ स्हक्यापछि, तुमिहरुले बाइरबाट ढुकि यइथो भुन्दै धेलो ढक्ढुक्याउदै भुन्न्याछौ ‘प्रभु, हाम्मा निम्ति धेलो उगाडिदेउ।’
“अनि तिनुले भुन्न्याछुन्, ‘तुमिहरु को हौ र काँबाट आयौँ मु रौँदैन।’
26“अनि तुमिहरुले फेरि भुन्न्याछौ, ‘हामिले तुमि स्हात बसिकन खायौ र पियौ, अनि हाम्मा गल्लिहरुमै तुमिले सिच्छ्या सिकाउँदा छियौ।’
27“तिनुले भुन्न्याछुन्, ‘मु तुमिहरुकन भुन्दछु, तुमिहरु काँबाट आयौ मु रौँदैन। खराब काम गन्न्यौ मुबाट जाउपुडा।’#भजनसंग्रह ६:८
28“तेइबेला तुमिहरुले अब्राहाम, इसहाक, याकुब र स्हबै परमेसोरका रैबार्याकन उनुका राज्यामै देख्न्याछौ, तर तुमिहरु आपै बाइर फालिदा, तुमिहरु रुन्याछौ र दारा किट्न्याछौ। 29मान्ठहरु पुर्ब, पच्छिम, उत्तर र दख्खिन स्हबै तिरबाट आइकन परमेसोरको राज्यामै खान बैन्याछुन्।#मत्ति ८:११-१२ 30तर अइले पछाडि हुन्या अगेडि हुन्याछुन्, र अगेडि भया पछाडि हुन्याछुन्।”
इसुले यरुसलेमकन स्हुम्जि दुखि भया
(मत्ति २३:३७-३९)
31तेइबेला कोइ कोइ फरिसिहरुले आइकन भुन्या, “ताँइबाट निस्केर जाउपुडा, क्यानभुन्या हेरोदले तुमिकन मान्न खोज्याछ।”
32इसुले तिनुहरुकन भुन्या, “छट्टु हेरोदति गइकन भुन, ‘हेर, आज र भोलि मु भुतहरु धपायर भलो गन्न्या काम गर्छु, अनि पर्सि स्हुम्म मेरो काम स्हकिन्याछ।’ 33तर पुनि आज, भोलि र पर्सि मु हुडिरनु पड्छ, क्यानभुन्या यरुसलेम बाइर अरु कोइ ठौरमै परमेसोरका रैबार्याकन माद्दैनुन्।
34“यरुसलेम ए यरुसलेम! तो परमेसोरका रैबार्याकन माद्दोछै, र तोइति पठायाहरुकन ढुंगाले हान्दोछै! ज्यारि माउले चल्लाहरुकन पाखले ढाक्छ, तेइथै गरि नै मथ्थै चोटि तेरा छोरा छोरिकन खेड्न्या इच्छ्या गर्या तर तोइले मानिनै। 35मु तोकन भुन्दोछु, हेर तेरो घर#१३:३५ तेरो घर यइ भुन्नाले यरुसलेम मुन्दिर, या स्हक्लै सहर। सत्यानास भयाछ। जैबेला स्हुम्म तेइले ‘परमप्रभुको नाउमै आउन्या धन्याका’#भजनसंग्रह ११८:२६ हुन् भुन्दैनै तेइबेला स्हम्म मुकन देख्न्या नाइ।”
Currently Selected:
लुका 13: JUML
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.