लुका 19
19
तिरो उठाउन्या जखायस
1इसु यरिहो सहरमै पसिकन जाँदैछिया। 2ताँइ जखायस नाउँ भया एक जुन स्हाउ मान्ठ छिया। तिँ तिरो उठाउन्याहरुका हाकिम छिया। 3जखायसले इसु को रैछुन भुनि हेन्या मुन गर्या छिया, तर पुड्को भया हुनाले मान्ठहरुको भिडले गद्दा तिनुले देख्न स्हक्यानुन्। 4तेइबिअ इसुकन हेर्न अग्यार अग्यार दगुडि एक नेभाराको रुखमै गया क्यानभुन्या इसु तेइ बाटो भइ आउँदैछिया। 5जब इसु तेइ ठौरमै पुग्या तब उबो हेरि तेइकन भुन्या, “ए जखायस स्हाँटै तल आ, क्यानभुन्या आज मुकन तेरा घरमै बैनुपड्न्या छ।”
6तिँ तुरुन्तै ओल्लि आया अनि खुसि हुँदै इसुकन आम्नो घरमै स्हुम्मान गर्या। 7जब मान्ठहरुले यइ देख्यार, तिनुहरु स्हबै यस्तो भुनि गुनगुन गन्न लाग्या, “इसु पापिका घरमै पाउना बस्न गया।”
8जखायस उठ्यार भुन्या, “प्रभु हेर, मु आम्नो स्हुम्पतिको आदाभाग नागाहरुकन बाँडि दिन्छु, अनि कोइबाट अन्या गरि केइ ल्याया छु भुन्या, मु तेइको चौबर फित्ता गरिदिन्या छु।”
9तब इसुले तिनुकन भुन्या, “आज यइ घरका मान्ठहरुले मुक्ति पायाछुन्, क्यानकि जखायस पुनि अब्राहामका स्हुन्तान हुन्। 10क्यानभुन्या मान्ठको छोरो हरायाहरुकन खोइन र बचाउन आया हो।”
सुनका दस रुडाको उखान
(मत्ति २५:१४-३०)
11मान्ठहरुले यि कुडा स्हुनिरया बेला इसुले तिनुहरुकन एक उखान भुन्न लाग्या, क्यानभुन्या तिँ यरुसलेमति छिया। अनि मान्ठले परमेसोरको राज्य स्हाँटै आउँदैछ भुन्न्या स्हुच्या छिया। 12इसुले भुन्या, “कोइ एकजुन हुन्याखान्या घरा मान्ठले मस्तै टाडा देसमै गइ आम्नो देसको राजा भइकन आउन्या मुन गर्यो। 13तेइले आपु जानुभुन्दा अग्यर आम्ना कमाराहरुमद्दि दस जुना कमाराहरुकन डाक्यार तिनुहरुकन एक एक सुनका रुडा#१९:१३ एक सुनका रुडा एक सुनको रुडो एकजुन मान्ठा लेखि १०० दिनको ज्याला बराबर हुन्छियो। दिइ भुन्यो, ‘जैबेला स्हुम्म मु फर्कि आउँदैन यइबाट बेपार गर।’ 14तर तेइका आम्ना मान्ठहरुले तेइकन खुसि मान्दैनछिया, तेइबिअ तिनुहरुले तेइका पछाडि यस्तो भुन्न रैबार्याहरुकन पठाया, ‘तेइले हामि माथि सासन गर्या हामि भलो मान्दैनौ।’
15“तब तेइ मान्ठ राजा भइ फर्क्यापछि आपुले रुडा दिया कमाराहरुकन डाक्न्या हुकुम दियो। अनि बेपार गरिकन तिनुहरुले कति कुमाया भुनि स्होद्यो। 16तब पैलो कमाराले आइकन यस्तो भुन्यो, ‘मालिक, तुमिले दिया रुडाले अजै दस रुडा कुमायाछु।’ 17मालिकले तेइकन भुन्या, ‘स्याबास राम्मो कमारा! तो नानो कुडामै बिसासिलो भइस, तेइबिअ तोइले दस सहरको हक पाउन्याछै।’ 18अनि दोस्रो कमारो आइकन यस्तो भुन्यो, ‘मालिक, तुमिले दिया रुडाले अरु पाँच कुमायाछु।’ 19मालिकले तेइकन भुन्या, ‘स्याबास! तोइले पाँच सहरको हक पाउन्याछै।’ 20अक्को कमारो आयर भुन्यो, ‘मालिक हेर, तुमिले दिया रुडा नेइ छ। यइ मोइले टालामै बानि जगाइ राख्या छिया। 21मुकन तुम्मो भेइ लाग्यो, क्यानभुन्या तुमि कठ्ठर मान्ठ हौ। ज्या तुम्मो होइन तेइ तुमि ल्हिन्छौ र ज्या तुमिले बोयानौ तेइ काट्टाछौ।’ 22मालिकले तेइकन भुन्या, ‘ए अराम्मा कमारा! तोइले बोल्या कुडाबाट मु तोकन निसाप गन्याछु। ज्या नराख्या तेइ ल्हिन्या र ज्या नबोया तेइ काट्न्या मु कठ्ठर मान्ठ हुँ भुनि जान्याकै छिस्। 23तेस्हो भया मेरो रुडा ब्याङ्कमै क्यान राखिनै त? मु फर्कि आउँदा मेरा रुडाको ब्याज त पाउन्या छिया।’ 24तब ताँइ ढुक्याहरुकन मालिकले भुन्या, ‘तेइस्हात भया रुडा उच्याडेर दस रुडा हुन्याकन देउ।’ 25तर तिनुहरुले भुन्या, ‘मालिक, तेइस्हात त दस रुडा छुदैछुन।’
26“‘मु तुमिहरुकन भुन्दोछु, जो स्हात छ तेइकन अझ भौति दिइन्याछ, तर जो स्हात नाइ, तेइस्हात भया पुनि तेइबाट उच्यडिन्या छ। 27तर मु तिनुहरुको राजा भया भलो नमान्न्या ति मेरा स्हत्तुरकन नेइ ल्याउ, र तिनुहरुकन मेरै अगेडि मार।’”
इसु यरुलेममै पस्या
(मत्ति २१:१-११; मर्कुस ११:१-११; युहन्ना १२:१२-१९)
28इसुले यइथो भुनि स्हक्यापछि चेलाहरुको अगेडि अगेडि यरुसलेमतिर गया। 29अनि इसु बेथफागे र बेथानियाको नजिकै जैतुन डाँडामै पुग्यापछि इसुले आम्ना चेलाहरु मद्दि दुइ जुनकन यइथो भुनि पठाया, 30“अगेडिको गाउँमै जाउ र गाउँ पसि स्हक्या तुमिले कोइ मान्ठले नचड्या गदाको बछेरोकन बानि राख्या फेला पाड्न्याछौ। तेइकन फुकाइ नेइ ल्याउ। 31यति कोइले तेइकन क्यान फुकाउँदा छौ भुन्यो भुन्या, तुमिले यस्तो भुन्नु, ‘प्रभुकन यइको खाँचो छ।’”
32अनि तिँ दुइ गया, र इसुले तिनुहरुकन जस्तो भुन्याछिया तेस्तै भेटाया। 33चेलाहरुले बछेरो फुकाउन लाग्दा मालिकले स्होद्यो, “तुमिहरु यइ बछेरोकन क्यान फुकाउँछौ?”
34तब चेलाहरुले भुन्या, “प्रभुकन यइको खाँचो छ।” 35अनि चेलाहरुले गदाका बछेरोकन इसुति ल्याया र आम्ना बर्खोहरु बछेरामै राख्या र इसुकन ताँइमै चडाया। 36इसु जाँदैछिया, मान्ठहरुले आम्ना बर्खो बाटामै ओछ्याया।#१९:३६ माननिय/बरिस्ठ मान्ठहरु आम्ना सहरमै आयाभुन्या यहुदिहरुले यइथै गद्दा छिया।
37अनि इसु जैतुन डाँडाको उदालो लाग्न्या बाटोमै पुग्या। चेलाहरुको भिडले रडगद्दै ठुलै डाको गरि परमेसोरको गुनगान गन्न लाग्या क्यानकि इसुका स्हबै सक्तिसालि कामहरु तिनुहरुले आपै देख्याछिया। 38“परमप्रभुको नाउँमै आउन्या राजा धन्या हुन्! सोर्गमै सान्ति परमेसोरको महिमा।”#भजनसंग्रह ११८:२६
39अनि भिडमै भया कोइ कोइ फरिसिहरुले इसुकन भुन्या, “हे गुरु, तुम्मा चेलाहरुकन हप्काउ र छुबुक्क होउभुन।”
40तर इसुले भुन्या, “मु तुमिहरुकन भुन्दछु, तिनुहरु छुबुक्क लाग्या भुन्या, ढुङगाहरु नै कोक्काउन्या छुन।”
इसु यरुसलेमका बिअ रोया
41इसु यरुसलेम सहरति पुग्या र सहरकन देख्यार तेइका बिअ रोया। 42अनि इसुले भुन्या, “तोइले सान्ति क्या कुडाले आउँदोछ भुन्यार आज पुनि जान्या भया हुन्याछियो! तर अब तेरो हेराइबाट तेइ लुक्याछ। 43अनि तो माथि यइथा दिन आउन्याछुन् जब तेरो स्हत्तुरहरुले तेरा वरिपोरि बार बान्याछुन्, स्हबै तिरबाट घेरा हाल्न्याछुन र चारैतिरबाट तोकन थुन्न्याछुन। 44तिनुहरुले तोकन र ताँइ बस्न्या तेरा स्हुन्तानकन मार्न्या छुन। एक ढुंगामै अक्को ढुंगा पुनि बाँकि रन्यानाँइ, क्यानकि परमेसोरले तोकन बचाउन आया सुमय तोइले राउँन स्हकिनै।”
इसु मुन्दिरमै गया
(मत्ति २१:१२-१७; मर्कुस ११:१५-१९; युहन्ना २:१३-२२)
45अनि इसु मुन्दिरभित्त गया ताँइ ब्यापार गर्नेहरुकन धपाया। 46इसुले तिनुहरुकन भुन्या, “धर्मसास्त्रमै लेख्याछ,#यसैया ५६:७; यर्मिया ७:११ ‘मेरो घर प्रार्थनाको घर हुनुपड्न्या।’ तर तुमिहरुले त यइकन डाँकाहरु बैन्या घर बुनाया छौ।”
47इसुले दिनदिनै मुन्दिरमै सिच्छ्या दिदाछिया। तर मुख्य पुजारिहरु, धर्मगुरुहरु र जन्ताका ठुला मान्ठहरुले इसुकन मार्न खोज्या। 48तर तिनुहरुले इसुकन मार्न्या केइ उपाय भेटायानुन्, क्यानभुन्या स्हबै मान्ठहरु उनुको कुडा स्हुन्न्या इच्छा गद्दा छिया।
Currently Selected:
लुका 19: JUML
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.