Lukas 11
11
ONTOPORUA 11.
Jesus ta rongo okugarikana.
1Uunarumue Jesus okui ire keshara rimue okugarikana; sho a dimbuka, gumue guo maarongua je te mu indire: Muene, tu ronga okugarikana, ngashi uo Johannes e tsho ongere aarongua je.
2H’ota ti: Nge tamu garikana, popjeni otshongii: Tate, edina rjohe nari japurue, uukuaniirua uohe nau je ku sse.
3Okurja kuetu kuomasiku ageshe tu pa uo nena.
4Tu dimina po eendjo detu, ngashi uo sse hatu dimine po aanandjo na sse ajeshe, ngu’ino tu ecera momamakero.
5Mpa h’ote ja rombuere uo: Tu itareni, gumue po pu ne oku na kuume ke, ta hi ko ku he uusikusiku, nde te mu indire: kuume, kuaca ndje eeshima ndatu,
6Oshoka ondi na kuume kandje omuenda, e ja ku ngaje, nde kandi uete, shi andi mu pe.
7Ndere nguija meni ta jamukura, ta ti: Eca ndje ngaje, otsheero otshe edirua nare, nde naanandje oja koca mu ndi ri, ite vuru okupenduka, ndi je ndi ku pe.
8Ndere ita zi po, ota kara ngaa ta konkora. Andi mu rombuere: ng’ita penduka e mu pe moru uukuume, ndere ta ka penduka morua shi a kara ti indire a hididimika, e mu pe shi a pumbua.
9Tsh’otsho ngaje otii mu rombuere: Indireni, nd’otamu peua, kongeni, nd’otamu mono, konkoreni, nd’otamu egururirua po.
10Oshoka keshe ngu ti indire, ota peua, ngu ta kongo, ota mono, ngu ta konkora, ote egururirua po.
11Ore go opu ne ta peua ando emanja ku she, nge te mu indire oshima, nenge ejoka peshara rjoshi, nge te mu indire oshi?
12Nenge nge ti indire ehi, she ote mu pe ando ondje?
13Otsho ngii ne nando aahineji, ohamu pe ngaa aana jeni omagano omaanaua, unene u cike peni Sho ho meguru te ja pe ombepo ombuanaua, mba taa mu indire.
Aafariseji taa tsheke Jesus.
14He nokua tida mo ombepo ombuineji, ha sit’eui; sho a tida mo ombepo ombuineji, omuntu, ngu a ri a sit’eui, okua popi nduno, jo aantu oja kumua ko.
15Ndere jamue jo mu jo taa ti: Omeenkondo da Belzebub, erenga rjeembepo eembuineji ta tidica mo eembepo eembuineji
16Nde jamue jo mu jo taa mu makere, jo taji indire ku he edidiriko, ndi tari zi keguru.
17Ndere sho a dimburura omadiradiro gauo, h’okua ti ku jo: Keshe tuu otshirongo, shi tshi inene ondumbo tshojene, otatshi shanagurua, negumbo rimue otari guire mekuauo.
18Ano, satana ng’oku nondumbo na he muene, otshirongo tshe otatshi ka kara po ngiini, oshoka ohamu ti: ngaje ote tidica mo eembepo eembuineji meenkondo da Belzebub?
19Nitshee, ng’otandi tidica mo eembepo eembuineji meenkondo da Belzebub, nani omeenkondo da re aana jeni taa di tidica mo? Ojo ano taa ka ninga aapanguri jeni.
20Ndere ng’otandi tidica mo eembepo eembuineji meenkondo domunue gua Karunga, nena otshirongo tsha Karunga otshe ja ku ne.
21Ofuure nge ta rangere egumbo rje niikuti, nena ajishe ja mo oja gamenua.
22Ndere gumue, ngu e mu vure meenkondo te ja, nde te mu sindi, he te mu kuca iikondjico je, mu a hinekera, nde ta topora ajishe mbi a kuata.
23Ngu ke ri puamue na ngaje, oku nondumbo na ngaje, ndere ngu ita gongere puamue na ngaje, ota sharakanica po.
24Ombepo ombuineji, nge ha tidua momuntu, ho otahi endagur’ike meembuga, hi konge eshara rjevururuko, ndere shi itahi ri mono, otahi ti: Onda ara ndi tshune metsari rjandje, mu nda zire.
25Sho tahi ja, otahi ri ada rja kombua, rjo rjo opekua nuurenga.
26Tahi ja tahi hi, h’otahi ke etere ko eembepo uunuaari di iri, di hi vure, do tadi hi mo nokukara mo, nd’iinima joshugunina jomuntu ngu otaji ningi iihineji ji vure mbijaka jotango.
27Mank’e ri te tshi popi, omukiintu, ngu e ri mokati kaantu, ti igida, ta ti: Era, ndi rje ku umbata, ori nerago, nomagundji uo, nga ua jama.
28Nde ta jamukura: Eno tuu, aanerago tshiri oombo, mba haa huvu ohapu ha Karunga, jo taa hi diginine uo.
29Aantu sho ji igongere pu he, h’okua ti ku jo: Orudi nduka oruineji, ruo taru kongo edidiriko, ndere itaru ri ningirua, shira edidiriko ndija rja Jonas omuprofeti.
30Ngashi ngaa Jonas a ningirirue aaninivita edidiriko, otsho tuu Omuna guOmuntu ta ningi edidiriko rjorudi ndu.
31Omukuaniirua omukiintu guo kuumbugantu ota ka cikama mepanguro okupangura aarumentu jorudi nduka, e ja tokorere ondjo, oshoka okua ri a zi keesha duujuni okupuakena uunongo ua Salomon, ndere tara, mpa opena gumue e vure Salomon.
32Aarumentu jo mu Ninive otaa cikama mepanguro norudi nduka, je ru tokorere ondjo, oshoka oja ri ji idirurura keehapu da Jonas, ndere tara, mpa opena gumue e vure Jonas.
33Kakuna ngu ta sameke onjeka, nde te hi fara mekororo nenge mesinguriro, aaue, okombanda hongudi tuu, hi minikire ajeshe, mba taa hi mo.
34Uujerere uorutu ruohe ouo esho rjohe. Esho rjohe ano ng’inari jonua mo, nena orutu ruohe arushe oru nuujerere, ndere esho rjohe nge rja jonua mo, orutu ruohe oru neemurema.
35Ou kotokera ano, uujerere, mbu u ri mu nguee, kau tshituka eemurema.
36Ndere ano orutu ruohe ng’orua jera ciru, kamu neemurema mu ruo, otaru kara rua jera unene, ngashi ngaa ngeno uujerere uoruadi ue ku shandjera.
37Mank’e ri ta popi dika, omufariseji gumue te mu indire, a ka rje omusha na he. H’ota hi mo, nde ta kaatumba potshiriro.
38Omufariseji sho a mono, ngu ini ikosha tango pokurja, okua kumua ko.
39Muene h’ote mu rombuere: Ano nduno, ne aafariseji, ohamu kosho ehoro notshijasha kombanda, ndere meni rjeni omu uda uumbudi nuumpuru.
40Marai ne, nani ngu a ninga shi tsho kombanda, ina ninga uo shi tsho meni?
41Gandjeni ike omagano ga za mu mbi ju upa ko, nd’ajishejishe taji kara ku ne ja jera.
42Ndere ojeeje ku ne, jafariseji, ohamu futica otshitimurongo tshiiganga no tshiimeno jomavinju no tshomboga keshe, ndere otshipango nohore ho ku Karunga hamu togo ouara. Omuntu na ronge tshimue, shijaka ke tshe ece.
43Ojeeje ku ne, jafariseji, mbo mu ore okukaatumba kiipundi jotango meesinagoga nokukundua motshirandero.
44Ojeeje ku ne, mbo mua f’eembira, di kadi monikua, nd’aantu taa hende ouara kombanda hado, jo kaa tshi tshi
45Omurongi gumue guotshipango ta ti: Muongi, ng’oto popi shika, oto tu dini uo sse.
46Nde he ta ti: Ojeeje ku ne, jarongi jotshipango, oshoka ohamu umbatica aantu eemutenge eemudigu, jo itaa vuru okuduumbata, ndere ne ojene kamu njenga eemutenge nand’ononjara himuike.
47Ojeeje ku ne, mbo hamu tungire aaprofeti eembira domamanja, ndere oosho je ja dipaga.
48Tshiri, otsho hamu okorora nokutja mui ininga tshimue niironga joosho, oshoka mbono oje ja dipaga, ndere ne tamu ja tungire eembira.
49Ano uunongo ua Karunga oua popja shii: Ote ka tuma aaprofeti naapostoli ku jo, nde taa ka dipaga jamue jo mu jo nokutidagura aakuauo.
50Opo orudi nduka ru ka purue ombinzi haaprofeti ajeshe, ndji ha tikire okuza ketameko rjuujuni.
51Okuza kombinzi ha Abel sigo okombinzi ha Zakarias, ngu a dipagererue mokati kohaltari nontempeli. Tshiri, andi mu rombuere, ho otahi ka purua korudi nduka.
52Ojeeje ku ne, jarongi jotshipango, oshoka omua kuca oshapi huunongo, ndere ne ojene inamu ha mo, nde tamu kerere uo, mba ja ara okuha mo.
53Sho e tshi popja ku jo, aafariseji naarongi jotshipango oja shimbike okumucemenena, taa jogere neehapu, he ku uvikue ue.
54Ndere ja ara uo okumupundukica, ja kuate ohapu mokana kue, opo ja tshiue okumumonica ondjo.
Currently Selected:
Lukas 11: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
