Lukas 10
10
ONTOPORUA 10.
Etumo rjaarongua 72.
1Mpa Muene h’oto ogorora mo aarongua eemurongo uunuari na jaari ji iri, mba te ja tumu kojaarijaari miirongo no meemukunda adishe, hu a ri a hara okuha muene.
2He ta ti ku jo: Etejo enene, ndere aarongi aatshona. Indireni ano Muene guetejo, a tume aarongi mepja rje.
3Indeni! Tareni, andi mu tumu mua f’eenzigona mokati komambungu.
4Inamu umbata ompunda nenge ondjepera nenge eengaku; inamu kunda aantu meendjira.
5Ng’omua ka ha megumbo rimue, omu popica mo otshiingii: Ombiri nahi kare megumbo ndika!
6Nge tamu ada mo omunona guombiri, ombiri heni otahi ri nambere ngaa. Ndere nge kamu na, ho tahi tshuna ngaa ku ne.
7Ndere kareni megumbo ndio, mu rje, ne mu nue, shi je na, oshoka omurongi okuo oparera ondjambi he. Inamu ondjereka kumue omagumbo.
8Mpo tamu hi momukunda, nd’aantu taa mu tuumba, rjeni shi taa mu pe.
9Erukiceni aavu ja mo, ne mu tje ku jo: Otshirongo tsha Karunga otshe mu ada.
10Nde nge mua ka ha momukunda gumue, nd’aantu taa mu tuumba, zii mo moka, mu he mompora, mu tje.
11Ontsirera, ndji hi ikuatera keempadi detu momukunda gueni, otatu hi itshiki keempadi detu, ne mu tshiue, nokutja, otshirongo tsha Karunga otshe mu ada.
12Otii mu rombuere: Sodoma otatshi kara shuepo mesiku ndijaka tshi vure omukunda nguka.
13Ojeeje ku nguee, Korozain, jeeje ku nguee Bethsaida, ngeno kua iirongankondo ja ningirua Tirus na Sidon, mbi mua ningirua, ando ji idirurura nare nokukaatumba meeshako no momutoko.
14Tshiri, Tirus na Sidon otaji ka mona egeero kari shi edigu nga ndika rjeni mepanguro.
15Ndere nguee, Kafarnaum, ngu ua jerucua sigo okeguru, sigo omuii moheri to ku undurirua mo.
16Ngu te mu uvu, otu uvu ndje, ngu te mu dini, ota lini ndje uo; ndere ngu ta dini ndje, ota dini uo ngu, ngu a uma ndje.
17Esiku rimue, mbejaka eemurongo uunuaari na jaari ja garuka nenjanju, jo taa ti: Muene, neembepo eembuieji otadi vurika ku sse medina rjohe.
18He ta ti: Onda mona satana, ta gu meguru ong’ruadi.
19Tareni, onde mu pe eenkondo dokurata omajoka eendje nokupangera eenkondo adishe domutondi, kapena hi tatshi mu ningi otshiponga.
20Ndere inamu njanjukirua shoka eembepo tadi vuria ku ne, aaue, njanjukirueni shii, oshoka omadina geni taga kara ga tshangua meguru.
21Petango ndika Jesus okua njanjukua pombanda nOmbepo Ondjapuki, ta ti: Tate, Muene gueguru nevi, otii u amberere, oshoka aanongo neenkurungu oue tshi jo orea, ndere ue tsho ororera mba aashupi. Eno, Tate, otsho opaa pu nguee.
22Ajishe onde ji peua ku Tate, kapuna ngu e tshi, mona nokutja ore, oTate ike tuu, po kapuna ngu e tshi, ate nokutja ore, Omona ike, na ngu Omona a hara nduno tshi mu okororere.
23H’ota taarere itshee kaarongua je, ta ti: Omesho ge nerago, nga ge uete shi mu uete.
24Oshoka otii mu rombuere: Aaprofeti ojendji naakuairua oja jeerukirire okumona shi mua mona, ndere inaa hi mona, nokuuva shi mu uva, ndere inaa tshu uva.
Omusamarita omunesiroshenda.
25Nde tara, omurongi guotshipango te engene ku he, mu makere, ta ti: Muongi, nandi ninge tshee, ndi ciguruomuenjo guarushe.
26Jesus h’ote mu pura: Mompango okua tshangua ngiioto resha ngiini?
27Nde ta jamukura: Ora Karunga kohe, mu ora nomutima agushe neenkondo adishe nomadiradiro ageshe, na mukueni ngashi ui ihore muene.
28Ta ti ku he: Oua popja tshu uka, otsho tuu ninga, nde to ka kara nomuenjo.
29He nguija ta ara okuinoma i iuete nduno anuua a huka, h’ota tsikire, ta pura Jesus: Mukuetu ore?
30Jesus ta jamukura: Omuntu guontumba okua zire ku Jerusalem, ta hi ku Jeriko, nde ti itsu miimpuru. Jo taji mu naka atshishe, taa mu panda eembore, nde taa hi, je mu ciga e nokamuenjo okatshona.
31Ano tshe ki ihada, omupristeri gumue a hire nondjira oho ndji, te mu mono, nde te mu pitirire.
32Konima tapu ke ja omulevita, te mu mono, nde na he uo ta pitirire po.
33Tapu ke ja omuenda omusamarita, te mu mono, nde te mu jeerere.#10:33 Okutuurukira uure nuunene uotshipango tshohore, Jesus ote endica nondjira ndjika tango aajudarera jaari, nd’omusamarita ta randura ko, ngu a tonda aajuda moru ehiteero rjauo (tara Luk 9:53 nefatururo rjado), ndere nediginino ta kuacere omujuda miishuna je, manka aajudarera taa mu pitirire ouara, ja fa kaa na na he.
34H’oti i po, ta tira omagadi nomavinju miiraro je, he te ji manga. H’ote mu tura kokanamakutsi ke, te mu fara kondunda haahenda, nde te mu jakura.
35Ngaangura h’ota kuca mo eendenari mbaari, te di gandja ku muene guondunda, nde ta ti: Mu jakura manka, shi to manene mu he, otii ja ndi tshi fute, nge nda garuka.
36Ano oto ti ngiini: Oguni po pu jatatu mbano, ohe mukuauo gua nguija, ngu a ri a hitsa miimpuru?
37He nguija ti i mo, ta ti: Mukuauo ohe nguija, ngu a ri e nesiroshenda na he. He Jesus ta ti: Inda, nde to ningi nga tshikuauo.
Jesus pu Marta na Maria;
38Tsha ningi, sho ja hi, h’okue ja mokakunda kamue. Omukiintu, edina rje Marta, te mu tuumba megumbo rje.
39H’oku na uo omumuahina, edina rje Maria. Ngu a kaatumba peempadi da Muene, he ta puakene eehapu de.
40Ndere Marta okua pja kiidirua nokuri okumujakura, te engene ko, ta ti: Muene, ito pukurura ko nandoodiro, mumuameme te ecere ndje iironga jejakuro, ongaj’ike ngaa? Mu rombuera nduno a kuacere ndje.
41Nde Jesus ta jamukura mo: Marta, Marta, ou notshisho miinima ojindjijindji.
42Ndere tshimuike tsha pumbua po. Maria okui ihogororera po ombinga ombuanauarera, ndji ite hi kucua nande.
Currently Selected:
Lukas 10: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
