Lukas 9
9
ONTOPORUA 9.
Etumo rjaapostoli.
1H’okua gongere aapostoli omurongo na jaari, te ja pe eenkondo nepangero okutida mo eembepo eembuineji adishe nokuerukica aavu.
2Te ja tumu uo okuuvica otshirongo tsha Karunga nokupanga aavu.
3He ta ti ku jo: Inamu ha na tsha mondjira, nand’onodimbo nenge nompunda nenge noshima nenge niimariua, itshee inamu kara mu neenguuo mbaari.
4Mpo tamu hi megumbo, kareni mo, ne itamu zi po mpoka.
5Ndere ng’inaa mu tuumba, po, zeni po ike pomukunda ngoka, ne tamu ipupura ontsi keempadi deni; shi tatshi ningi ehokororo ku jo.
6Jo ja hi ano, taa hendahenda meemukunda, taa huvica evangelium, jo taa panga ajeshe.
7Herodes, erenga rjotshitine tshotshirongo, h’otu uvu ajishe, mbi ja ningua, he ti irumata, oshoka jamue oja ti:
8Johannes okua jumuka kuusi, jamue: Elias okuo oroka, jamue ji iri: Gumue guo maaprofeti jonare okua jumuka.
9Nde Herodes ta ti: Johannes onde mu kekere omutse, ano ore ngono, ngu ndi uvite, ta rongo iironga ji cike mpo? A hara unene e mu tare nomesho.
10Aapostoli oja garuka, nde taa hepururire Jesus atshishe shi ja ronga. H’ote ja njangura po, nde ta hi na jo konima ku iri, ro ku Betania.
Jesus ta kutica omajovi gatano.
11Aantu sho je tshu uvu, na jo taa mu randura, he te ja kundu, te jo okororere otshirongo tsha Karunga, nde te erukica uo ajeshe, mba ja pumbua ekuaco.
12Onguroshi sho he ke ja, omurongo na jaari taa hengene ko, taa ti: Rareka aantu, ja he meemukunda no miihende, ja ka kongo eemuraro nuurarero, oshoka mpoka otu ri ouara mombuga.
13He ta ti ku jo: ja peni okurja! Nde taa ti: Otu n’ike eemboroto ntano neeshi mbaari, shira otatu hi, tu ka randere aantu mba ajeshe iiKurja.
14Aantu oja ri po aarumentu omajovi gatano. Ta rombuere aarongua: Ja kaatumbikeni, eengundu neengundu, keshe himue hi cike peemurongo ntano.
15Otsho ja ningi, taa kaatumbike ajeshe.
16Nde Jesus ta kuca eemboroto ntano neeshi mbaari, ta rigamene keguru, te di jambeke, te di pambura, he te di gandja kaarongua, je di toporere aantu.
17Ajeshe taa ri, taa kuta, nde pua torua di du upa ko, iimbare omurongo niijari ju uda uupambu.
Ehokororo rja Petrus.
18Esiku rimue Jesus sho i ikarere a garikane, aarongua taa gongara uo pu he, he te ja pura: Aantu otaa ti ngiini, ongaje re?
19Jo taa jamukura: Jamue taa ti, onguee Johannes omutshatshi, jamue Elias, jamue ji iri: gumue guo maaprofeti jonare a jumuka.
20Nde he ta ti ku jo: Ne nduno otamu ti ndje, ongaje re? Simon Petrus ta jamukura: Onguee Kristus ka Karunga.
21H’ote ja kumagida nokuri, te ja rombuere tshiri kaa tsho okororere nand’omuntu.
22Oshoka Omuna gu Omuntu oku nokuepekua unene, ta ke ekeruashi kaakuruntu no kaapristeri aakuruntu no kaanongo jomambo, ta dipagua, nde ta jumuka konima homasiku gatatu.
23Nde ku ajeshe ta ti: Omuntu, ngu a hara a randure ndje, ni idimbike muene, he ni itsike omutshigakano gue keshe esiku, tsh’otsho ta randura ndje.
24Oshoka ngu a hara okuupica omuenjo gue, ote ke gu kanica po, nde ngu ta kanica omuenjo gue morua ndje, ohe te ke gu upica.
25Oshoka otatshi kuaca tshike omuntu, nge ta jugu uujuni aushe, nde nani ti ikanica muene, he ta mono iishuna mu he muene.
26Ngu ta si ndje oshoni neehapu dandje, nOmuna guOmuntu ote ke mu s’oshoni uo, nge te ja mehadimo rje no mehadimo rja She no rjaajengeli aajapuki.
27Tshiri, andi mu rombuere, jamue ja mbo ja cikama mpano, itaa ka makera okusa sigo otaa ka mona otshirongo tsha Karunga.
Jesus kondundu Tabor.
28Omasiku uunutatu oga piti po, sho a popi eehapu dika, okua kuca Petrus na Jakobus na Johannes, nde ta rondo na jo kondundu a garikane.
29Manka ta garikana, orupe ruotshipara tshe orua tshituka, nd’eenguuo de adi toka, do tadi adima.
30Nde tara, aarumentu jaari taa kundacana na he: Moses na Elias.
31Jo oroka mehadimo, jo taa kundacana okuza kue, te ke ku shurica mu Jerusalem.
32Ndere Petrus nojakuauo taa huvu eemposi eedigu; sho ja penduka, jo ja mono ehadimo rje naarumentu mbeja jaari, ja cikama pu he.
33Sho ja ara je mu rareke, Petrus ta ti ku Jesus: Muongi, mpaka op’uuhanaua mpa, tu tungeni eendunda ndatu, himue hohe, himue ha Moses, onkuauo ha Elias. Ndere he ke tshi shi ta popi.
34Manka a ri te tshi popi shii, po opue ja otshikogo, nde tatshi ja ningire omuzire. Jo ja tira, mbeja sho ja siikirua kotshikogo.
35Nde motshikogo tamu zi eui, tari ti: Nguka omumuandje omuorike, mu uveni.
36Eui sho tari uvika, Jesus okua ri ko oh’ike; jo ja muena, momasiku ngeja inaa popja nand’okomuntu, shi ja monene mpa.
Ondemoni tahi tidua mo momumati.
37Mesiku rjaangura, sho ja rondoroka ko kondundu, aantu ojendji oje ja tsakaneke.
38Nde tara, omurumentu ta zi mongundu, ti igida muure, ta ti: Muongi, otii ku indire: tara omunona ngu, oh’ike omumuandje.
39Ondemoni h’otahi mu kuata, h’opo tuu mpoka ta riri unene; tahi mu shata po, tahi mu shiragura, he ta zi etutu, ho itahi mu eca ue, nde tahi mu foragura esiku rimue.
40Ondi indirire aarongua johe, je hi tide mo, ndere oja njengua.
41Jesus ta jamukura, ta ti: Rudi nguee karu nehiteero, ruo rua pirarara, sig’unake te kara pu ne, ndi mu tar’onteni? Eta omumuohe hu ku ngaje.
42Manka te ja po, ombepo ombuineji otahi mu shata po, ho tahi mu tanene.
43Nde Jesus ta ganda ombepo ombuineji, h’ote erukica omumati, nde te mu pe she.
44Ajeshe oja kumua ko keenkondo eenene di da Karunga. Ndere Jesus sho a mono, nokutja oja kumua ko ku mbi ajishe a rongo, he ota ti kaarongua je; Eehapu di di diradireni naua meemutima deni. Omuna guOmuntu ota ka gandjua miikasha jaantu.
45Ndere kaa huvite ko nandenande ohapu ndjika, ohe jo orekerua, jo inaa hi nongera, ndere oja tira uo okumupura eendunge dohapu ndji.
Aaronga taa patacana.
46Jo taa shimbike okuipura: Ore ta ningi omunene e vure mukuauo?
47Nde Jesus sho a dimburura omadiradiro go keemuenjo dauo, ta kuca okanona, te ka cikameke ponto he, nde ta ti ku jo:
48Ngu ta jakura okanona ke cike pu hano medina rjandje, ongaje ta jakura. Ngu ta jakura ndje, ota jakura ngu a tuma ndje; oshoka ngu ti iningi omutshona ku amushe, ota ningi omunene gueni amushe.
49Nde Johannes ta shimbike, ta ti: Muongi, otua mona omuntu, ta tida mo eembepo eembuineji medina rjohe, ndere sse tue mu kerera, oshoka ine ku randura na sse.
50Nde Jesus ti i mo: Inamu mu kerera, oshoka ngu ke nondumbo na ne, oku ri na ne.
Aasamarita taa kerere Jesus.
51Tsha ningi, erara rjokuha keguru rje ke ja, ri guanicue po, h’okua tara a cindike ku Jerusalem.
52Ta tumu aantu, je mu tetekerere. Jo ja hi, nde taa ke ja momukunda guaasamarita, ja rongikidire ajishe jokuja kue.
53Ndere inaa mu tuumba, oshoka okua ri ta ara okuuka ku Jerusalem.#9:53 Aasa marita oja tonda unene aajuda. Jo haa ti: Karunga na simaneku’ike mondundu Garizim, motshirongo tshauo, ha mu Jerusalem. Nde sho taa huvu, Jesus a hara a he kotshituci tshaajuda ku Jerusalem, oja tinda okumutuumba motshirongo tshauo.
54Aarongua je, Johannes na Jakobus, sho je tshu uvu, oja ti: Muene, oua ara tu icane omuriro gu ze keguru, go gu ja rungunice po?
55He ta piramene ko, te ja ganda, ta ti: Kamu itshi nani, nokutja ne ojombepo hiini?
56Omuna guOmuntu ine ja okuekerashi eemuenjo, aaue, okuduupica tuu. Otsho taa hende ondjira hi iri.
57Manka taa hende nondjira, gumue ta ti ku he: Onda ara ndi ku randure hoo to hi.
58Nde Jesus ta ti: Uuandje ou nomakuena needira do meguru iihadira, ndere Omuna guOmuntu ke na’ shara, mpa te egeke omutse gue.
59Ku gumue a hiri ta ti: Randura ndje! Nde ngu ta ti: Muene, rareka ndje, ndi he tango ndi ka fumbike tate.
60He Jesus ti i mo: Eca aasi ja fumbike aasi jauo, nde ngueje inda u ku uvice otshirongo tsha Karunga.
61Itshee gumue ta ti: Muene, otii ke ku randura ngaa, ndere pitika, ndi he tango, ndi ka rareke ajeshe jo maandjetu.
62Nde Jesus ta ti: Kakuna ngu ha kuata otshipururo neke rje, nde ta tara ruanima, ta ko operera ngeno otshirongo tsha Karunga.
Currently Selected:
Lukas 9: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
