Lukas 16
16
ONTOPORUA 16.
Ejere rjomupangeri ombudi.
1Kaarongua okua popi ejere ndika: Opua ri omuntu omujamba, ngu a ri e nomupangeri guiinima je, ndere nguka a popiua, anuua ta shanagura po iinima je
2H’ote mu icana nduno, nde ta ti ku he: Ondi ku uvitire tshike? Jarura iinima jo mepangero rjohe, ito vuru ue okukara omupangeri guandje.
3H’omupangeri ti ipopire: Andi ningi tshike, muene guandje nge ta kuca ndje mepangero? Kandi neenkondo ue dokupapura, ko okuehera nda s’oshoni.
4Ondi tshi shi te ningi, aantu ja jakure ndje momagumbo gauo, ng’onda tidua mo mepangero.
5H’oti icana nduno aanankuma ajeshe ja muene gue ko ogumuegumue, je je ku he, nde ta rombuere ku ngu guotango: Eenkuma dohe ku muene odi cike peni?
6Nguka ta ti: Omagadi iijuma ecere rimue. Ngui ta ti: Kuca ombapira hohe, kaatumba, nguee to tshanga po nzija eemurongo ntano.
7Ku mukuauo ta ti: Eenkuma dohe odi cike peni? Ta ti: Iirja eempunda ecere rimue. He nguija te mu rombuere: Kuca ombapira hohe u tshange po nzija eemurongo uunutatu.
8Muene h’okua amberere omupangeri nguka omukotokeri, anuua okua ronga neendunge, oshoka ojana juujuni mokuendacana kuauo oje neendunge je vure aana juujerere.
9Ngaje andi mu rombuere: Iningeni ookuume neriko rjomakoto, opo, nge tamu shurica eendjenda, je mu tuumbe momagumbo garushe.
10Ngu omudiginini miinima iitshonatshona, omudiginini uo miinima iinene. Ngu omueci miinima iitshonatshona, omueci uo miinima iinene.
11Ng’inamu kara aadiginini merero rjeriko rjiirombo, ore te mu pe, mu rere eriko rjotshiri.
12Ng’inamu kara aadiginini miinima jaantu kaje shi aakueni, ore te mu pe mbi jeni ojene?
13Kakuna mupika ta vuru okukarera aarenga jaari, oshoka ota ka tonda po gumue, he e hore mukuauo, nenge ota ki igameka ku gumue po, he ta dini mukuauo. Itamu vuru okukarera Karunga nuujamba.
Ehuko rjiirombo rjaafariseji.
14Ajishe mbika aafariseji je ju uvu, mba ja ri ja arukire iimariua, nde taa mu tsheke.
15Nde he ta ti ku jo: Ohamu iningi mu uka momesho gaantu, ndere Karunga oku tshi eemuenjo deni, oshoka shi tsha simana paantu, osho tshi tondiue ku Karunga.
16Ompango naaprofeti oja shurire mu Johannes, ndere okuza mpoka omurombo guenjanju guotshiirongo tsha perunga tagu uvicua, nde ajeshe taa ka kembadara je tshi peue.
17Eguru nevi okushura po otshipu tshi vure okadidiriko kamuike ka ze ko kompango.
18Keshe ngu ta rareke omukiintu gue, nde to okana gumue a hiri, oto ondere, na ngu to okana gumue, ngu a rarekerue komurumentu gue, itshee oto ondere.
Omuntu omujamba na Lazarus.
19Opua ri omuntu omujamba, a zarere eenguuo eentirigane do opara unene, di nondiro, nde keshe siku okua ha kara niituci iinene.
20Opua ri itshee uo omucigona gumue, e nedina Lazarus, a ri a hingonjena potsheero tshomujamba, a tsa ko ngaa iiraro juutsika.
21Okua arere a hikutice nuupambu, mbu au gu kotshiriro tshomujamba, nde kapuna ngu e u mu pere. Eembua ike di ire, nde tadi raca iiraro je.
22Esiku rimue omucigona ta si, nde ta farua kaajengeli mekoro rja Abraham. Nde omujamba uo ta si, ta fumbikua moheri.
23Sho a rigamenica omeho ge mehepeko enene moka, okua monene kokure Abraham, e ri na Lazarus mekoro rje.
24H’oti igida, ta garikana: Tate Abraham, sira ndje oshenda, nde to tumu Lazarus, a tse ondungu homunue gue momeja, e je a tarareke eraka rjandje, oshoka ote mono uudigu uunene momuriro mu.
25Nde Abraham ta ti ku he: Mumuandje, dimburukua nokutja oua ri omurinaua kuunamuenjo ngashi ngaa Lazarus a monene uukuanaruepo. Ngashiingino nguka ote ekerericua, nde ngueje oto epekua.
26Nd’itshee pokati ketu na ne opua zikua ombogo, opo ajeshe, nand’oja ara, kaa tshiue okuha ku ne ne kamu tshiue kuja ku jo.
27Nguija ta ti: Andi ku indire nduno, tate, mu tuma kaandja tate.
28Oshoka ondi naamuameme jatano, na he ku jo, e ke ja kumagide, kaa kar’itshee uo, je je motshirongo tshehepeko shi.
29Abraham ta jamukura mo: Oje na Moses naaprofeti, ojo naa huve.
30Nde he ta ti: Thivarerue, tate Abraham; ng’okua tapu zi gumue paasi a he ko, ando taji igarura.
31Abraham ti i mo, ta ti: Ng’itaa huvu Moses naaprofeti, itaji iteere itshee ngaa uo, nand’omusi gumue po na jumuke.
Currently Selected:
Lukas 16: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
