Mateus 24
24
ONTOPORUA 24.
Eshanagura rja Jerusalem no rjuujuni
1Jesus ta zi mo montempeli, nde ta hi. Aarongua je oje engene ku he, je mu urukire eenguru adishe dontempeli.
2He te ja jamukura: Omu uete ajishe mbino? Tshiri, otii mu rombuere, muka itamu cigua emanja ri ri kombanda hekuauo, ndi itari kumunua po.
3Sho a kaatumba mondundu heemono, aarongua oje ja ku he, ojo ike, nde taa mu pura: Tu rombuera ano, mbika ajishe onaji ningua unake, notshidimburukico tshokuja kohe no tsheshuriro rjuujuni otshiini?
4Jesus te ja jamukura: Tareni, inamu pukicua nand’ okomuntu.
5Oshoka ojendji otaa ke ja medina rjandje, nde taa ti: Onga’Kristus, nde taa ka pukica ojendji.
6Otamu ku uva iita neemurombo diita, nde tareni, kamu mbandare, oshoka ajishe onaji ningua, ndere natango eshuriro inari cika.
7Oshoka otshiguana otatshi ka cikama tshi kondjice otshiguana, notshirongo notshirongo otsho tuu, eemukici eemudigu nondjara nomakekamo gevi otage ke ja, okeemukunda no keemukunda.
8Ajishe mbiono etameko ouara rjuuhehame.
9Jo otaa ke mu gandja miishuna, jo taa ke mu dipaga, ne tamu ka tondikua komarudi ageshe moru edina rjandje.
10Nojendji otaa ka rimbirirua, taa ka popacana, jo taa ka tondacana.
11Otaku ja aaprofeti jiirombo ojendji, jo taa ka pukica uo ojendji.
12Na shoka uurunde tau ku udirira, ohore hojendji otahi ka shushua.
13Ndere ngu ti ididimike sigo eshuriro, ota ku upicua.
14Evangelium ndika rjotshirongo otari ku uvicirua uujuni aushe, ri tshiuicire aantu ajeshe; eshuriro rjo otari ja nduno.
15Nge tamu mono iishuna jeshanaguropo rjotshirongo otshijapuki, mbi ja shunganekerue komuprofeti Daniel-ngu ta resha, he na kotoke —
16Indeni ondapo nduno; ngu e ri mu Judea, ta hi m’eendundu.
17Ngu e ri pombanda hondunda, ina rondoroka po, a ke ete tsha maandje.
18Ngu e ri mepja ina garuka, a ke ete onguuo he.
19Ojeeje nahi kare po kaamuaari naasimba momasiku ngo.
20Ndere garikaneni, okuha kueni kaku ningue pokufu nenge mesiku rjesabata.
21Oshoka onapu kara uudigu uunene ngashi inau kara po nare ketameko rjuujuni sigo onena, uo itau ja ko ue.
22Ngeno kua omasiku itaga shupiparekua, ando kape nomuntu tu upicua, ndere omasiku otaga shupiparekua moru aahogororua.
23Ng’omuntu te mu rombuere, ta ti: Tareni, Kristus oongu nenge oonguii, inamu tshi iteera.
24Oshoka ookristus jiirombo naaprofeti jiirombo onaa ja, jo taa ka ronga omadidiriko niirongankondo, opo aahogororua uo ja pukicue, mpa tatshi pondokere.
25Tareni, onde tshi mu rombuera.
26Ano, nge taa mu rombuere: Tareni, oku ri mombuga, inamu ha ko, tareni, oku ri momagumbo, inamu tshi iteera.
27Oshoka ngashi oruadi taru zi kuuziro, ruo taru adima sigo okuuninginino, otsho ngaa ngii okuja kOmuna guOmuntu naku oroka.
28Mpa pu na omudimba, opo tapu gongara uo eentsa.
29Uudigu mbuka uomasiku ngano nge ua piti, nopo etango onari ruuda nomuedi onagu kara itagu jere ue, n’eenjoci onadi gu ko keguru neenkondo deguru onadi kekamicua.
30Nena otshidimburukico tshOmuna guOmuntu otatsho oroka nduno keguru. Omazimo ageshe guujuni onaga riragana, go taga ka mona Omuna guOmuntu te ja e ri m’iikogo jeguru neenkondo nehadimo.
31Ona tumu ko aajengeli je, ja tje eembendo, nde taa ka gongorora ko aahogororua je keembinga iine okuza koshuro heguru sigo okonkuauo.
32Ihongereni omeere komukuju: Iitaji jago nge taji rouo, nuufo nge tau ja ko, otamu dimburura, nokutja okuenje oku ri popepi nokupita.
33Tsh’otsho uo ne, nge mu uete ajishe mbijaka ja ningua, tshiueni, nokutja eshuriro ori ri popepi.
34Tshiri, andi mu rombuere: Ezimo ndika itari shuru po, manka ajishe inaji ningua.
35Eguru nevi otari shuru po, ndere eehapu dandje kadi shura po.
36Ndere esiku necimbo ndija kape nomuntu e ri tshi, naajengeli uo, Tate ohike tuu.
37Ngashi tsha ningirue muujuni ua Noa, otsho uo okuja kuOmuna guOmuntu.
38Ngashi petango rjejeru, manka inari cika, aantu ja ri taa ri, taa nu, taa hokana, taa hokanua sigo okesiku ndija Noa sho a hire metembameja.
39Ndere inaa dimburura tsha, sigo ejeru rje ja, rjo tari kuca po ajeshe; otsho tatshi ningua pokuja kuOmuna guOmuntu.
40Onaku adika jaari mepja: gumue ota jakurua, mukuauo ta cigua po.
41Jaari onaa tsu motshiini: gumue ota jakurua, mukuauo ta cigua po.
42Ano rungameni, oshoka esiku rjokuja kua Muene kamu ri tshi.
43Ndere tshiueni shika: Muene guegumbo ngeno kua a ri e tshi ecimbo, mu hamu ja omufuci, ando a kara a taatara, egumbo rje kari ruue po.
44Ano kareni, mui irongikida, oshoka Omuna guOmuntu one ja pecimbo kamu ri tshi.
45Omukareri omudiginini homunandunge oguni, ngu a turua po ku muene a pangere aantu jomegumbo rje, e ja p’iikurja pecimbo euanaua?
46Omukareri ngu e nerago, muene nge te mu ada, ta rongo ngii pokuja kue.
47Tshiri, andi mu rombuere, ote mu pe a pangere iinima je ajishe.
48Ndere omukareri nguno nge omuineji, nde ti ipopire momuenjo gue: muene guandje ite ja nena,
49He ta shimbike uo okudenga aakareri aakuauo, nde ta ri, he ta nu neenkorui,
50Nena ano muene guomukareri ngu, nge te ja mesiku ndi, ine mu tega, no pecimbo ke ri tshi.
51Tshiri, te mu shashara, e mu pe tshimue naafudime meshara, mo mu na eriragano nehikokoto rjomeego.
Currently Selected:
Mateus 24: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
