Mateus 25
25
ONTOPORUA 25.
Omeere gaari: aakadona 10
1Pecimbo ndija otshirongo tsheguru otathi f’aakadona omurongo, mba ja kuca iiminikiro jauo, nde taa hi ja tsakaneke omujareki nomukadona gue.
2Jatano po oja ri omaraji, jatano oja ri aanandunge.
3Mbeja omaraji oja ri ike niiminikiro jauo, jo inaa faarera uo omagadi.
4Ndere aanandunge oja kuca iiminikiro jauo mumue nomagadi miijuma jauo.
5Omujareki sho a kara ko, ajeshe oja s’eemposi, nde taa koca.
6Pokati kuusiku opui igidua: Tareni, omujareki ohe ngo te ja, ke mu tsakanekeni.
7Jo aakadona ajeshe ja penduka guanene, nde taa sameke iiminikiro jauo.
8Omaraji oga ti kaanandunge: Tu pii mo uo momagadi geni, oshoka iiminikiro jetu otaji dimi.
9Aanandunge jo otaa jamukura, taa ti: Itage tu guaneni sse na ne. Indeni shira ku mba taa randica, mu ki irandere geni.
10Manka taa hi ja ka rande, omujareki e ja. Nde mba ja adika ji irongikida, jo otaa mu cindikire kohango. Mpaka otsheero tsho otatshi patua po.
11Shugunina aakadona mbeja je ja, nde taa ti: Muene, muene, tu egurura.
12Nde he ta ti: Tshiri, andi mu rombuere, ngaje kandi mu tshi.
13Ano taatareni, oshoka kamu tshi esiku nerara.
Muene naapija je 3
14One tshi ningi a f’omurumentu, ta ara okuha kiirongo, a hicana aapija je, nde te ja pe iinima je.
15Gumue okue mu pe iitalenti iitano, mukuauo te mu pe iijari, nd’omutitatu te mu pe tshimue, keshe muntu te mu pe tshe ereka eenkondo de. H’ota hi nokuri.
16Ngu a perue iitalenti iitano, okui ire, ta ka ronga na jo, nde ta guedere po itshee iitano ji iri.
17Na nguija, ngu a perue iijari, okua ka guedera po itshee iijari.
18Ndere nguija, ngu a perue tshimuike, okui ire, nde ta fumbike tshe mevi, to oreke iimariua ja muene gue.
19Sho pua piti erara ere, muene guaapija mbeja a ka garuka, nde ta jarura na jo omujaru.
20Opue ja nguija, ngu a perue iitalenti iitano, te eta po iitano iikuauo, nde ta ti: Muene, ua pere ndje iitano, nda guedera po itshee iitano.
21Muene h’ota ti ku he: Otshaanaua, nguee mupija omuanaua ngu’omudiginini, morua shi ua diginina muunima uutshona, otii ku dike nduno mojindji. Inda mo menjanju rja muene guohe!
22Ko otaku randura ngu a perue iitalenti iijari, nde ta ti: Muene, iitalenti iijari ua pere ndje, tara, nda guedera po itshee iijari.
23No ku he muene ota ti: Otshaanaua, nguee mupija omuanaua ngu’omudiginini, morua shi ua diginina muunima uutshona, otii ku dike nduno mojindji. Inda mo menjanju rja muene guohe!
24Ko otaku ja uo nguija, ngu a perue tshimuike, nde ta ti: Muene, ondi tshi tshi, nokutja ngueje omuntu omukukutu. Oto teja, hu ino kuna, oto gongere, hu ino shanena.
25Otsho ano nda tira, nde tii hi, ndi ko oreke otshitalenti tshohe mevi. Tara, kuata shi tshohe, otsho shi.
26Nde muene ta jamukura, ta ti ku he: Nguee mupija omuineji ngu’omunjenge. Ue tshi mona, nokutja ote teja, hu ine kuna, ngaje te gongere, hu ine shanena.
27Ngeno kua ngaa ua fara otshitalenti tshandje kaarandakanici, ando onde ja ngaa mokugaruka kuandje, nde tii tshi peururua niiguederua jatsho.
28Mu kuceni otshitalenti sho, nde tamu tshi pe nguija, ngu e niitalenti omurongo.
29Oshoka keshe ngu e na tsha, ota peua itshee a kare nerooro. Ndere ngu ke na tsha, ota kucua uo shi a fa e na.
30Nd’omupija ngu ke na ruporo, mu umbireni ano meemurema dopondjerera, mu tamu kara eriragano nehikokoto rjomeego.
Epanguro rjuujuni
31Omuna guOmuntu, nge te ke ja e ri mehadimo rje, naajengeli je je mu ima po, ona kaatumba nduno kotshipundi tshepangero tsho mehadimo rje.
32Aantu ajeshe onaa gongerua pu he, nde he ta joorora ajeshe ong’omusita ta joorora mo eenzi miikombo.
33Eenzi one di gameke kokurjo kue, nd’iikombo te ji gameke kokumosho kue.
34H’omukuaniirua ota ti ku mba je ri kokurjo kue: Ireni, ne jajambekua ja Tate, mu cigurure uukuaniirua, mbu ua kara ua rongikidirua ne okuza ketshito rjuujuni.
35Oshoka onda ri nda s’ondjara, nde tamu pe ndje ndi rje, onda ri nda s’enota, nde tamu pe ndje ndi nue, onda ri ondjendi, nde tamu edirire ndje.
36Onda ri ouara korutu, nde tamu zareke ndje, onda ri nda arukua, nde tamu tarere ndje po, onda ri meemango, nde tamu ja ku ngaje.
37Mpaka ota jamukurua ku mba ju uka, taa ti: Muene, otue ku monene unake ua s’ondjara, nde tatu ku pe u rje? Otue ku pere unake u nue menota rjohe?
38Otue ku edirire unake ong’ondjendi, nenge oua ri ouara, nde tatu ku zareke?
39Otue ku monene unake muuvu nenge meemango, nde tatu ja ku nguee?
40H’omukuaniirua one ja jamukura: Tshiri, andi mu rombuere, shi mua ningirire gumue po paamuameme mba aanuunuka, ongaje mue tshi ningira.
41H’omukuaniirua ota rombuere nduno mbo je ri kokumosho kue: Zii po pu ngaje, oonakucingua ne, indeni momuriro guarushe, ngu gua rongikidirua satana naaranduri je.
42Oshoka onda ri nda s’ondjara, nd’inamu pa ndje ndi rje, onda ri nda s’enota, nd’inamu pa ndje ndi nue.
43Onda ri ondjendi, nd’inamu edirira ndje, onda ri ouara, nd’inamu zareka ndje, onda ri nda arukua, ngaje nda ri meemango, nd’inamu ja mu tarere ndje po.
44Mbaka otaa ke mu pura: Muene, otue ku monene unake ua s’ondjara nenge ua s’enota, ondjendi nenge u ri ouara, to arukua nenge u ri meemango, nd’inatu ku karera?
45Ndere he ta ka tja ku jo: Tshiri, andi mu rombuere, shi inamu ningira gumue po paanuunuka mba, inamu tshi ningira ndje uo.
46Jo otaa ka ha mehepeko rjarushe, ndere mba ju uka omomuenjo guarushe.
Currently Selected:
Mateus 25: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
