Mateus 26

ONTOPORUA 26.

Jesus ta guajekua

1Okua ningi, Jesus sho a mana eehapu di adishe, okua rombuere aarongua je, ta ti:

2Omu tshi tshi, nokutja konima homasiku gaari Opaska. Omuna guOmuntu nduno ta gandjua a ka arerue komutshigakano.#26:2 Jesus te tshi popi metijaari rjotshiuike tshomeepeko. Opaska‐opasha, pokutja epitiro rjo esiku rjokudimburukua ehupico rj’ aahisrael kiishuna. Nehamberero aajuda taa dipaga mesiku ndika onzigona kahi notshiponga, taa tiriganeke nombinzi haho eemueero deendjugo dauo, nde taa ri onjama, opo egeero rja Karunga ri ja pitirire.

3Petango ndiono opua gongarere aapristeri aakuruntu naakuruntukuruntu jaantu motshoto tshomupristeri omukuruntu, edina rje Kaifas.

4Oko kua taa huvacanene, nokutja Jesus otaa mu kuata ngiini nekoto, je mu dipage.

5Ndere taa ti: Inatshi ningua mesiku rjotshituci, kamu tukuke evundakano mokati kaantu.

6Nde Jesus a ri mu Betania, ta kaatumba kotshiriro megumbo rja Simon, ngu a ri nuuvu uotshirundu.

7Omukiintu gumue okue ja ku he, e notshijuma tsh’uurenga, tshu uda omagadi gokuguaja, ge nondiro, nde te ga tire komutse gue.

8Aarongua taa tshi mono, nde taa geje, taj’ipopire: Okuepica kua tshee huno?

9Ngeno kua ga randerue po iimariua ojindji, ji gandjerue eehepere!

10He Jesus e tshi tshi, nde ta ti ku jo: Otshike tamu geere omukiintu ngu? Okua ningira ndje otshironga otshaanaua.

11Oshoka aacigona oje ri pu ne arushe, ndere ngaje kamu na ndje uunaarushe.

12Nokutira omagadi ngaka korutu ruandje okue tshi ningirire efumbikiro rjandje.

13Tshiri, otii mu rombuere: Uunaarushe nakushe hu taku uvicirua evangelium, na ko uo otaku epururua shi a ningira ndje, otsho tshidimburukico tshe.

14Mesiku ndija gumue gua mboka omurongo na jaari, edina rje Judas Iskariot, okua hi kaapristeri aakuruntu.

15He ta ti ku jo: Otamu pe ndje tshee, nge tandi mu ororere ngu? Jo otaa kundacana je mu pe iishilinge eemurongo ndatu.

16Okuza mpoka ota kongo po ike ompito hokumugandja.

Uurarero uujapuki

17Mesiku rjotango rjiikurja iitoue aarongua oje ja ku Jesus, taa ti: Oua ara tu ka rongikidire peni onzigona ha Paska, tu hi rjeni?

18Jesus h’ota ti: Indeni momukunda komurumentu guontumba, mu tje: Muene ota ti: Erara rjandje orja cika, ndi ningire oPaska maandjohe naarongua jandje.

19Aarongua taa ningi, ngashi Jesus e ja rombuere; nde taa rongikida oPaska.

20Konguroshi h’ota kaatumba na jo kotshiriro.

21Manka taa ri, h’ote ja rombuere: Tshiri, andi mu rombuere, gumue mo mu ne oto orora ndje.

22Aarongua nde taa nik’uupongo uunene, taa shimbike okumupura ko ogumuegumue: Muene, ha ngaje ndi tshi?

23H’ota jamukura: Ohe ngu, ngu ta tura eke rje puamue na ngaje motshijasha, ohe ta ko orora ndje.

24Omuna guOmuntu ota hi ngaaka ngashi pua tshangua, ndere ojeeje komuntu ngo, ngu to orora Omuna guOmuntu. Oshuepo ngeno kuaj’omuntu ngoka ina varua.

25Nde Judas omuoorori gue te mu pura: Muene, ha ngaje nani? Nde Jesus ti i mo: Eno, ongueje.

26Manka taa ri, Jesus ta kuca omboroto, nde te hi jambeke, te hi pambura, he te hi pe aarongua je, ta ti: Kuateni, rjeni, shika orutu ruandje.

27He ta kuca ehoro, nde ta amberere, te ri ja pe, ta ti: Nueni mo amushe.

28Oshoka shika ombinzi handje, ho ombinzi heguaneno epe, ndji tahi tikire ojendji kediminopo rjeendjo.

29Otii mu rombuere: Okuza mpaka itandi ka nua ue iihimati mbi jomavinju sigo okesiku ndija, tii ga nu itshee puamue na ne motshirongo tsha Tate.

Jesus mepja rjeemono.

30Sho ja mana okuimba ehamberero, oja hi kondundu heemono.

31Nde Jesus ta ti ku jo: Uusiku mbu amushe otamu ka rimbirirua, ndere oku ngaje, oshoka otsho pua tshangua: Onda ara ndi denge omusita, nd’eenzi duusita tadi sharakana.

32Ndere ng’onda jumuka, andi ke mu tetekerera ku Galilea.

33Mpo Petrus ta jamukura, ta ti ku he: Ajeshe nge ja rimbirirua, ngaje itii rimbirirua.

34Nde Jesus ta ti ku he: Tshiri, andi ku rombuere: Uusiku ngaa mbuno, manka ekondomboro inari iga, otu idimbike ndje rutatu.

35Ndere Petrus ta gana: Nando one he mokusa na ngueje, itii ku idimbike. Tsh’otsho ngaa aarongua ajeshe taa popi.

36Jesus h’okue ja na jo mepja, edina rjarjo Getsemani, nde ta ti kaarongua je: Kaatumbeni mpa, manka andi hi huija, ndi ka garikane.

37Nde he ta zi po na Petrus naana ja Zebedeus, a shimbike okuponga nokumbandara.

38Nde ta ti ku jo: Omuenjo guandje ogua ponga sigo okokusa. Kareni mpa, ne mu taatare na ngaje.

39Sho a hengene katshona komesho, okua ts’otshipara pevi, nde ta garikana: Tate, nge tatshi vurikua, ehoro ndi nari pitirire ndje: Ndere ha ngashi ngaje nda ara, aaue ongashi tuu ua ara.

40H’ote ja kaarongua je, nde te ja ada ja koca. H’ota ti ku Petrus: Itamu vuru nani okukara mua taatara na ngaje okacimbo okatshona?

41Taatareni, ne tamu garikana, kamu guire memakero; ombepo ho komuenjo oha hara ngaa, ndere onjama oh’onkundi.

42H’ota tshuna ko itshee, nde ta garikana, ta ti: Tate, ng’itatshi vurikua, ehoro ndika ri pitirire ndje, ngaje otii ri nu, eharo rjohe nari ningue.

43H’ota hi itshee ku jo, nde te ja ada itshee ja koca, oshoka omesho gauo oga ri ga ninga omadigu.

44Te je eca, ta hi ike, nde ta garikana orutitatu, ta popi nga’tshikuauo.

45Te ja kaarongua je, ta ti: Koceni ano, ne mu vururukue: Tareni, erara orja cika, Omuna guOmuntu mu ta gandjerua miikasha jaarunde.

46Pendukeni ano, tu eni! Tara, omuoorori oku ri popepi.

Jesus ta kuatua

47Manka e ri po ta popi doka, tara, Judas h’oku uruka ko, gumue guo mu mboka omurongo na jaari, te ja nongundu onene haantu, je neemuere needimbo Aapristeri aakuruntu naakuruntukuruntu jotshirongo ojo kua je ja tuma.

48Ndere omuoorori okue ja pe otshidimburukico, a tja: Ngu tii ka amberere eemurungu, ohe ngo, mu kuateni.

49Naanzijanzija ta hi ku Jesus, ta ti: Muene, kundua! Nde te mu amberere eemurungu.

50Jesus no ta ti: Kuume, oui ire tshike? Jo otaa hengene ko, nde taa kuata Jesus, nde meemango.

51Nde tara, gumue gua mboka jo pu Jesus okua kuata omuere meke rje, ta denge omupija guomupristeri omukuruntu, nde te mu keke okutsi.

52He Jesus te mu rombuere: Tura omuere morumpangua, oshoka ajeshe, mba haa kuata omuere, otaa si komuere.

53Nenge ou tshi, itandi vuru okuindira Tate, a tumine ndje nzijanzija aajengeli, je vure eengundu omurongo na mbaari, ja karere ndje?

54Ndere nani otatshi guanicua ngiini, shi tsha tshangua, nokutja shi atshishe otsho tatshi ningua.

55Perara ndika Jesus okua rombuere uo eengundu d’ aantu: Omue ja po, mu kuate ndje, mua f’aantu taa hi ja ka kuate omukorokoshi, mu neemuere needimbo. Keshe siku onda ri pu ne, nda kaatumba montempeli, ndere inamu kuata ndje.

56Ndere ajishe mbi oja ningua, omutshangero guaaprofeti gu guanicue. Aarongua je ajeshe oje mu cigi po, nde taa h’onda po.

57Mbejaka, mba ja kuata Jesus, oje mu fara ku Kaifas omupristeri omukuruntu, mpa pua ri pua gongara aanonga jomambo naakuruntukuruntu.

58Petrus te mu randura ngaa ngahui kotshoto tshomupristeri omukuruntu. Nde ta hi mo, ta kaatumba paapija a tare shi tatshi ningua.

59Aapristeri aakuruntu notshingongi atshishe jo otaa kongere po Jesus iihokorora jiirombo, opo je mu tokore a se.

60Ndere inaa mona nande tshimue, jo nando aahokorori ojendji oja cikamene momarundiro. Shugunina aahokorori jaari ji iri oje ja nomarundiro gauo itshee gamue.

61Taa ti: Nguka okua tire: Ote vuru okukumuna po ontempeli ha Karunga, ngaje tii hi tungurura po momasiku gatatu.

62Omupristeri omukuruntu ta cikama, ta ti ku he: Ito jamukura mo tsha mu shi taa ku dogere?

63Nde Jesus okua muena ciru. Omupristeri omukuruntu h’ota ti ku he: Otii ku ganica ku Karunga omunamuenjo, u tu rombuere: Onguee Kristus Omumua Karunga?

64Jesus ta ti: Eno, ongaje ngashi ua ti. Otii ku rombuere: Kongashiingika otamu ka mona Omuna guOmuntu a kaatumba korurjo rueenkondo da Karunga, nde he one ja miikogo jeguru.

65Naanzija omupristeri omukuruntu h’ota fuagura eenguuo de, ta ti: A tsheka Karunga. Otua pumbua itshee aahokorori ji iri? Tareni, ne etsheko rja Karunga omue ri uva.

66Otamu ti ngiini? Jo otaa jamukura: Oku notshikoro tshokusa.

67Jo otaa mu sijire omate motshipara tshe, taa mu denge neengonjo, nde jamue taa mu denge eempi keempanda.

68Jo otaa ti: Tu ucira nduno, Kristus, ore e ku denga?

Petrus ti idimbike

69Nde Petrus ta kaatumba pondje potshoto. Omukareri omukiintu te engene ku he, ta ti: Na ngueje oua ri na Jesus omugalilea.

70H’oti ipatana momesho gaantu ajeshe, ta ti: Kandi tshi shi to popi.

71Sho a piti motsheero, omukareri omukiintu i iri h’ote mu mono, nde ta rombuere aantu, mba je ri mpo: Na nguka uo okua ri na Jesus omunazareta.

72Nde ti ipatana itshee, ta gana: Omuntu ngo ngaje kandi mu tshi nandekuri.

73Konima herara etshona ajeshe oje engene ko, mba ja cikama mpo, jo taa ti ku Petrus: Otshiri, na ngueje ogumue po gua mbeja, eraka rjohe ari ku orora ngaa.

74Naangashiingika ta tameke okucinga nokugana: omuntu ngo kandi mu tshi. Naanzija ekondomboro rjo tari igi.

75Mpoka Petrus h’okua dimburukua ohapu ha Jesus, sho a tire: Ekondomboro mank’inari iga, ngueje oto idimbike ndje rutatu. H’ota zi mo nokuri, a huka kondje, ta riririre.

Currently Selected:

Mateus 26: KWM

Highlight

Copy