Mateus 27
27
ONTOPORUA 27.
Okusa kua Judas
1Ongura sho kua tshi, aapristeri aakuruntu naakuruntukuruntu jotshirongo oja ningi otshingongi, ju uvacane Jesus je mu gandje a se.
2Jo otaa mu eta mo, a mangua, nde taa mu gandjere Pontius Pilatus, omureri guotshirongo.
3Nde Judas omuoorori, sho a mono, Jesus a tokorua, h’oti ip’ombedi, ta tshuna ko iishilinge eemurongo ndatu kaapristeri aakuruntu no kaakuruntukuruntu.
4Nde ta ti: Nda jona, oshoka ondo orora ombinzi kahi na’ndjo. Jo otaa ti: Sse itatu purua ku ho, ongueje u tshi muene.
5H’ote ekere iishilinge montempeli, ta hi kondje, ta ki iponda nepando.
6Aapristeri aakuruntu oja kuca po iishilinge, taa ti: Itatshi pondoka, ji turue miimariua jontempeli, oshoka iikurira jombinzi.
7Ano oja kundacana, nde taa randa na jo epja rjomuhongi gueembiga, ri ninge omeendo gokufumbika aahendanandjira.
8Otsho ano epja ndi rja rukirue sigo onena Hakaldama, okutja epja rjombinzi.#27:8 … sigo onena … nokutja sigo okesiku ndija Mateus ta tshanga evangelium.
9Ohapu oha guanicua, ndji ha popiua komuprofeti Jeremias, ngu ta ti: Oja kuca iishilinge eemurongo ndatu, ojo ofuto homuntu, ngu a herekua, je mu erekere mojana ja Israel.
10Jo otaa ji gandja, ja rande epja rjomuhongi gueembiga, ngashi Muene a rombuera ndje.
Jesus pu Pilatus
11He Jesus ta cikama miipaci jomureri guotshirongo. Omureri guotshirongo he te mu pura: Ongueje omukuaniirua guaajuda? Jesus ta jamukura, ta ti: Ongashi to ti.
12Ndere sho a tamanekua kaapristeri aakuruntu no kaakuruntukuruntu, he ina jamukura nande.
13Nde Pilatus te mu pura: Nguee ku uvite ko nani, sho taa hokorora iinima iinene na nguee?
14Ndere ita jamukura nande ohapu, h’omureri ta fe ta kumua ko unene nokuri.
15Opua ri omukaro gu neue komureri guotshirongo, potshituci otshinene ha diturire mo aantu gumue meemango, ngu ja ara mo.
16Esiku ndiono okua ri mo na gumue meemango, omupjaganeki a simana, edina rje Barabas.
17Aantu sho ja gongara, Pilatus h’okue ja pura: Nandi mu mangururire mo guni po, omua ara Barabas nenge oJesus, ngu a rukua Kristus?
18Oshoka okuaj’e tshi naua, nokutja aajuda oje mu gandja morua shi je nondumbo na he.
19Manka a kaatumba motshipanguriro, omukiintu gue a tumu ku he, ta ti: Omuntu ngo oku uka, ino mu ninga tsha, oshoka nena mondjodi onde mu ehamena unene.
20Ndere aapristeri aakuruntu naakuruntukuruntu jo otaa popi naantu, ja tje: otua ara Barabas, nde Jesus na dipague.
21H’omureri guotshirongo ta pura ano, ta ti ku jo: Oguni po pu mbano jaari mua ara nduno, ndi mu mu mangururire mo? Jo otaa higida: oBarabas.
22Nde Pilatus ti i mo: Nduno Jesus, ngu ha tiua Kristus, otii mu ninge ngiini?
23Ajeshe jo otaa higida: Na ka arerue komutshigakano! Omureri guotshirongo ta ti ku jo: Okua ninga tshike otshiineji? Jo otaa higida pombanda unene: Na ka arerue komutshigakano!
24Pilatus sho a mono, nokutja ita pondora po tsha, edunguuko ike tari ningi enene, h’ota kuca omeja, ta kosho eenjara de miipaci jaantu, ta ti: Ngaje kandi notshikoro mombinzi homuntu ngu a huka ngu. Tareni po ne ojene.
25Aantu ajeshe jo otaa jamukura: Ombinzi he nahi tikire sse naana jetu.
26Mpa h’ote eca Barabas a mangururue mo, nde Jesus te mu dengica neengora, te mu gandja a arerue komutshigakano.
27Aakuiita jomureri guotshirongo oje eta Jesus mondjugo hokupangurira, nde taa gongere po aantu ojendji.
28Omo je mu shurire eenguuo, nde taa mu zareke onguuo onde ontirigane.
29Taa ningi po otshingongo tshomakegua, taa tshi cindire komutse gue, jo taa mu pe onenge meke rje rjokurjo. Jo otaa ningi nduno haa mu tsire eengoro, nde taa mu tsheke, taa ti: Kundua, mukuaniirua guaajuda!
30Jo otaa mu sijire omate, jo taa mu denge nonenge komutse.
31Sho ja dimbuka okumutsheka, oje mu shura onguuo ontirigane, taa mu zareke nonguuo he muene, nde taa mu kuca momukunda, je ke mu arere komutshigakano.
Jesus ta arerua
32Sho ja zi mo, taa mono omurumentu omukireni, edina rje Simon, nde taa mu ciminike a humbate omutshigakano.
33Nde taa ja keshara, rja rukua Golgata, atshi ti: Opo tsheenkue deemutse.
34Jo otaa mu pe omavinju, ga vundakanicua nonjango a nue. Ndere sho a makere mo, ina ara ue nokuri.
35Sho je mu arere komutshigakano, jo otaa hitoporere eenguuo de nokudiogororica, opo tshi guanicue, shi tsha popiua komuprofeti, a tja: Oji itoporera eenguuo dandje, jo taa hogororica onguuo onde handje.
36Nde taa kaatumba, jo taa mu rangere.
37Kombanda homutse gue jo otaa pangere ko otshireji, mu mua tshangua otshikoro tshe: Nguno oJesus omukuaniirua guaajuda.
38Aakorokoshi jaari oja arerua puamue na he, gumue kokurjo, mukuauo kokumosho.
39Nde mba taa hende po, taa mu tsheke, jo taa puku keemutse dauo.
40Nde taa ti: Hee, nguee, ngu to kumuna po ontempeli ha Karunga, u hi tungurure po momasiku gatatu, ikuaca muene, nguee ng’Omumua Karunga, za ko nduno komutshigakano.
41Otsho uo ngaa aapristeri aakuruntu naanongo jomambo naakuruntukuruntu je mu tsheke, taa ti:
42Okua kuacerere jakuauo, nde nena ita vuru okuikuaca muene. He ng’omukuaniirua guaajuda, na ze ko nduno komutshigakano, sse tu mu iteere.
43Okui inekere mu Karunga, ngashiingika ne mu upice nduno, ng’okue mu okua, oshoka okua tire: Ongaje Omumua Karunga.
44Tsh’otsho aakorokoshi je mu njanene ng’itshee, mba ja arerue puamue na he.
45Pouiri ontikanekamue kua ningi eemurema muujuni aushe, tadi kara sigo okouiri ontimugoji.
46Pouiri ndjika ontimugoji Jesus okui igida neui enene: Eli, Eli lama sabaktani atshi ti: Karunga kandje, Karunga kandje, otshike ue ekerashi ndje?
47Jamue mba ja ri taa cikama mpoka, nde taa tshu uvu, oja ti: Nguka oti icana Elias.
48Gumue gua mboka ote enderere, ta kuca otshinuameja, te tshu uda omeja omaruru, te tshi tura kotshenguti, nde te mu pe okunua.
49Jakuauo taa ti: Muena manka, otua ara tu tare, Elias ng’ote ja e mu upice.
50He Jesus ti igida itshee neui enene, nde ta si.
51Nde tara, erapi rjomutshigo, ndi tari edire ontempeli, orja tatuka pokati pombanda sigo oposhi, evi tari kekama, omamanja taga tendaguka.
52Eembira tade eguruka, nde eemudimba odindji d’oonakusa aajapuki tadi jumuka.
53Konima hejumuko oja ka za mo meembira, nde taa hi momukunda omujapuki, taa monikua kojendji.
54Erenga rjaakuiita na ajeshe, mba je ri na he, ja rangere Jesus, sho ja mono ekekamo rjevi najishe, mbi ja ningua po, oja tiririra, nde taa ti: Otsh’otshiri guanene, nguka okua ri Omumua Karunga.
55Ngahuija okua ri ku naakiintu ojendji, mba ja zi ku Galilea, ja randura Jesus, je mu jakure.
56Mu jo omua ri Maria Magdalena, Maria hina ha Jakobus, na hina haana ja Zebedeus.
Jesus ta turua mombira
57Rokonguroshi ku Pilatus okue ke ja omuntu omujamba, edina rje Josef guo ku Arimatea. Okua ri itshee omurongua gua Jesus.
58He ta hi ku Pilatus, h’oti indire omudimba gua Jesus. Pilatus ta rombuere omudimba e gu peue po.
59Josef h’ota kuca nduno omudimba, nde te gu dingire merapi rja jera.
60Te gu rangeke mombira he ompe, ndji a hokica memanja. Potsheero tshombira ta garangaticire po emanja enene, h’ota hi.
61Mpo opua ri pu na Maria Magdalena na Maria omukuauo, ja kaatumba haandija hombira.
62Esiku rja nofu, ndi rja randura esiku rjerongikido, aapristeri aakuruntu naafariseji oja ki igongera ku Pilatus.
63Nde taa ti: Muene, otua dimburukua, nokutja omupukici nguija, manka a ri e nomuenjo, okua tire: Nge pua piti omasiku gatatu, otandi ka jumuka.
64Rombuera ano, ombira hi ka rangerue sigo omesiku etitatu, aarongua kaa he ando, nde taa mu jaka mo, jo ja tje kaantu: okua jumuka kuusi, nde rjo ekotokero rja shugunina tari geje ri vure rjotango.
65Pilatus ta ti ku jo: Aarangeri ojo mbo, indeni mu ka rangere ombira ngashi mu uete tsho opara.
66Jo otaa hi, taa ka patekera ko emanja, nde taa tura po pombira aarangeri.
Currently Selected:
Mateus 27: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
