Markus 4
4
ONTOPORUA 4.
Omeere gamue.
1H’okua shimbike itshee okuronga aantu pefuta. Ongundu onene ohi igongere po. Ano ta rondo mosikepa. Manka a kaatumba muka mefuta, aantu oja kaatumba komunkunkuro guefuta.
2H’ote ja rongo ojindji momeere, nde te ja rombuere, merongo rje:
3Puakeneni! Omukuni okua hi a ka kune eembuto.
4Mokukuna dimue adi guire mondjira, nd’eedira do pombanda tadi ja, do tadi di tshomona po.
5Dimue adi guire puukutu, mpa kapu nevi orindji, do tadi piti ngaa nzija ndere kadi nevi ere.
6Etango sho rja pita, odu uva omutenja, na shoka kadi neemudi, oda ganj’ike.
7Dimue adi guire momano, nd’omano taga koko, go ge di ceteka, otsho itadi vara.
8Dimue adi guire mevi euanaua, tadi piti, tadi mene, do tadi vara iihimati, dimue peemurongo ndatu, dimue peemurongo kanekamue, dimue pecere.
9H’ota ti: Ngu e nomakutsi gokuuva, nu uve ko.
10Sho a ri po ohike, aarongua mba ja ri na he na mbeja omurongo na jaari oje mu pura ejere ndika.
11H’ote ja jamukura: Ne omua peua okutshiua ejere rjotshirongo tsha Karunga, ndere mbejaka je ri pondje, otaa rombuerua ajishe momeere ike.
12Opo je tshi tare oura nomesho, ndere kaa tshu uete, jo ju uve nomakutsi, ndere kaa tshu uvite, opo kaa hitedurure, jo kaa mone ediminopo ando.
13Nde ta ti ku jo: Nge kamu uvite ko ejere ndika, mua ara ngiini, mu uve ko omeere ageshe.
14Omukuni ta kunu ohapu.
15Do dija mondjira, odo ajeshe, mba taa huvu ngaa ohapu, nge tahi kunua, ndere satana ote ja nzija, nde ta kuca ohapu ndji ha kuninue meemutima dauo.
16Tsh’otsho uo di da kunua puukukutu oombeja mba taa huvu ohapu, jo otaa hi tuumba nzija nenjanju.
17Ndere kaa neemudi mu jojene, jo je neharo enenguni: nge taa adikua kuudigu netidagano moru ohapu, otaa rimbirirua.
18Dija di da kunua momano, odo ajeshe, mba taa huvu ngaa ohapu.
19Ndere iisho juujuni niiherere juujamba neharu miinima iikuauo otaji ke ja mo, jo otaji ceteke ohapu; otsho tapu kara ouara kapu niihimati.
20Ndere di da kunua mevi euanaua, odo ajeshe, mba taa huvu ohapu, je hu uvite uo, jo otaji imica iihimati, gumue peemurongo ndatu, gumue peemurongo kanekamue, gumue pecere.
21H’ota ti itshee: Omuntu ote eta ando onjeka, opo hi turue mesinguriro nenge koshi hokariri? Ndi tshi, opo hi turue kombanda hongudi, hi minikire.
22Kakuna tsha, shi tsho orekua, nd’itatshi ko oroka uo. Kakuna tsha, shi tashi ningua mofuci, nd’itatshi monikua uo.
23Ngu e nomakutsi gokuuva, nu uve ko.
24H’ota ti ku jo: Diginineni shi tamu uvu. Oshoka notsheerekico, shi tamu ereke na tsho, na ne uo otsho tamu erekerua, eno, kombanda ha tsho tamu guederua ko, nge tamu puakene ko.
25Oshoka ngu e na, ota peua, ndere ngu ke na, ota kucua uo shi e na.
26H’ota ti uo: Otshirongo tsha Karunga otsha f’omuntu, ngu ta kunu eembuto mevi.
27Nand’a koca nenge ta rangere uusiku nomutenja, ndere ombuto tahi mene ho tahi koko, nd’ita mono shi tatshi ningua po.
28Oshoka evi orjojene tari eta iirja, tango omuno, konima otshunga, shugunina eemuma.
29Eemuma diirja nge da kora, he ota kuca ombere, oshoka etejo orja cika.
30Ta ti: Otshirongo tsha Karunga natu tshe ereke na tshee, nenge nejere ri ini natu tshi faturure?
31Tsho otsha f’omuma hotshinjapi, ho ontshuutshu mokati keemuma adishe muujuni, nge tahi kunua mevi.
32Ndere nge ha kunua, tahi mene, tahi koko, tahi pitirire iiganga ajishe, nde tahi zi iitaji iire, needira do mombanda di tshiue okurumba momudire gajo.
33No momeere ogendji ga tja ngaaka okue ja ronga ohapu, opandunge dauo dokupuakena.
34Ndere meehapu, di kadi shi omeere, ine ja ronga. Ndere okue ga fatururira aarongua uuna ji ikarera.
Iikunguru taji muenicua.
35Esiku ndija, onguroshi, okue ja rombuere: Tu taagurukeni haandijaka.
36Jo otaa rareke aantu, nde taa zi ko na he, sho a hi mosikepa. Uusikepa uu iri oue ja randura.
37Otshinkunguru otshinene otsha tukuka, tsho tatshu umbire omakucikuci mosikepa, nde tahu uda omeja.
38Ndere he okua ri monima hosikepa, a kocera potshiguirico. Jo otaa mu pendura, nde taa higida: Muene, ku na na sse, sho tatu ningine mo?
39H’ota penduka, ta ganda ombepo, nde ta ti kefuta: Muena, nguee rota. Ombepo oha rota, nde tahi muena.
40Nde ta ti ku jo: Otshee mua mbandara? Natango kamu nehiteero nani? 41Ndere oja tira unene, nde taa kundacana: Omuntu nguka okua ti ngiini, sho ngaa eembepo tadi muena nefuta tuu?
Currently Selected:
Markus 4: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
