Markus 5
5
ONTOPORUA 5.
Jesus mu Gerasa.
1Sho je ja haandija hefuta motshirongo tshaagerasani, okua zi mo mosikepa.
2Nde tara, omuntu ta zi mo meembira do momamanja geendundu, a kuatua kombepo ombuineji, a tsakaneke Jesus.
3H’okua ri e nomuraro komakuena ngaka. Kapen’omuntu, ngu ta vuru okumumanga, nerjenge uo nandokuri.
4Orundji, nge a ri a mangua neemunja keempadi nenge nerjenge, ota tokora ouara omarjenge neemunja, kakuna ngu ta vuru okumusinda.
5Uunarushe, uusiku nomutenja oha kara momakuena no meendundu, ta jogerere, ti idenge nomamanja.
6Ndere sho e uete Jesus e ri natango kokure, ote enderere e je ku he, ti ishata po pu he.
7Nde ti igida neui enene: ondi na tshike na nguee, Mumua Karunga gomombandambanda? Otii ku rombuere ku Karunga: Ino epica ndje!
8Oshoka okua ri e mu rombuera: Za mo momuntu nguka, mbepo ombuineji.
9H’ote mu pura: Edina rjohe oriini? H’ota jamukura: Edina rjandje Legio, oshoka sse ojendji.
10Nde te mu indire unene, ke mu tide mo motshirongo shika.
11Nde mpoka pondundu pua ri pu notshinkoti tshiinguru muusita.
12Eembepo do otadi mu indire: Iteera nduno tu he miinguru.
13Jesus okue tshi pitikire mpono, nde eembepo eembuineji tadi zi mo, do tadi hi miinguru. Otshinkoti tsho tatshi mborokota po, tshi ihumbire mefuta. Oja ri ji cike pomajovi gaari. Nde taji ningine mefuta.
14Aasita jo otaa hi ondapo, taj’epurura ajishe momukunda no motshirongo. Naantu oje ja okutara shi tsha ningua.
15Sho je ja ku Jesus, otaa mono omuntu, ngu a ri te epekua kongundu heembepo, a kaatumba, a zara eenguuo, e neendunge, ndere oja tira.
16Mba ja ri po ja mono ajishe, taj’epurura ngashi ajishe ja ningua, nomuntu ngu niinguru.
17Mpoka taa shimbike okumuindira a ze mo motshirongo tshauo.
18Sho ta ara okuronda mosikepa, omuntu ngu, ngu a ri a hepekua kombepo ombuineji, okue mu indire e tshi pitike a kare pu he.
19Ndere ine tshi iteera, nde ta ti ku he: Inda maandjohe kaakueni, ngueje u ke epurure iikumici, mbi Muene e ku ningire, nesiroshenda ndi e ku pere.
20H’ota hi, nde ta shimbike okuokorora meemukunda omurongo iikumici, mbi Jesus e mu ningire. Ajeshe nde taa rurirua.
Jairus ti indirire omona.
21Jesus sho a hi itshee mosikepa haandija hefuta, aantu ojendji oji igongere pu he. He muene oku ri pomukunkuro guefuta.
22Omukuruntu gumue guosinagoga, edina rje Jairus, h’okue ja. Sho a mono Jesus, okui isizimike keempadi da Jesus.
23Nde te mu indire, ta ti: Omumuandje omukadona okua rara ta ara okusa. Ira nduno u ke mu tenteke eke rjohe, opo a heruke, h’a kare e nomuenjo.
24H’ota hi na he. Aantu ojendji taa mu randura ko, jo taa mu undura.
25Ndere omukurukadi, ngu a harukua, a ninga eevura omurongo na mbaari, etiko rjombinzi.
26H’a hepicua nokuri keenganga odindji, a manena po iimarirua je ajishe, ndere ina mona nande ekuaco, aaue, eenkondo de otadi pu po ouara nesiku.
27Sho a huvu Jesus! ote ja ko konima he mokati kaantu, nde ta njenge onguuo he.
28Oshoka okua ti ipopire: Ng’otandi njenge ngaa onguuo he, otandi ke eruka.
29Nopo mpo etiko rjombinzi orja tsheka, oku uvite morutu rue, kutja okue eruka kuuvu ue.
30Nzija Jesus ta piruka, oshoka okua dimburura mu he muene, nokutja eenkondo tadi zi mo mu he, ta tara aantu, nde ta pura: Ore a njenga eenguuo dandje?
31Aarongua je taa ti: Ku uete nani, aantu sho taa ku undura, nde to pura, ore a njenga ndje?
32H’ota regarega a tare omuntu ngu e tshi ninga.
33Nd’omukurukadi te engene ko, nuumbanda, ta kekama, oshoka okua ri e tshi naua, shi tshe mu ningirua, h’oti ihumbire keempadi de, te epurura ajishe notshiri.
34Nde ta ti ku he: Mumuandje, ehiteero rjohe rje ku kuaca, inda nombiri, ngueje u kare ue eruka kuuvu uohe.
35Manka ta popi, aantu jomukuruntu guosinagoga oje ja, taa ti: Omumuohe a sa. Otshike to epica natango omuongi?
36Ndere Jesus sho a huvu eehapu dika, ota rombuere omukuruntu guosinagoga: ino tira, iteer’ike.
37H’ina hara, omuntu e mu randure, oPetrus tuu ike na Jakobus na Johannes, omumuahina gua Jakobus.
38Jo je ja megumbo rjomukuruntu guosinagoga. Moka oku uvite mo, mua jogerera aantu, mba taa riri eenkari, ja jemata unene.
39H’ota hi mo, nde ta ti ku jo: Otshike nduno tamu jogerere, ne tamu riri eenkari? Okakadona inaka sa, oka koc’ ike.
40Jo otaa mu joro. He te ja tida mo ajeshe, nde ta kar’ike na she na hina hokakadona na mbeja, mba ja ri na he. Ta hi mondunda, mu mua rara okakadona.
41H’ota kuata okakadona keke, nde ta ti: Kakadona, otii ku rombuere, penduka po!
42Naanzija okakadona oka jambuka, nde take ende; oka ri ke neevura omurongo na mbaari. Ajeshe okua ja mbandara, ja rurirua.
43H’ota kumagida ajeshe nokuri, aantu kaa huve tsha, nde ta ti: Ka peni okurja!
Currently Selected:
Markus 5: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
