Hechos 3
3
Peduru-mä̧, i̧'chü̧ juiyünä̧ wa̧rü̧ aditü ikuinü̧
1Ya'utenä̧ Peduru-mä̧, Ju̧a̧-ku̧ ni̧pä̧ro̧mȩ las tres-nä̧ Dio-rü ukuokuäkuäwodera̧'a̧, Dio-rü ukuoku 'chi̧nä̧tü̧. Juätü judío-mä̧ ttukuokuä'ijü hora ji̧na̧'a̧. 2Ja̧'wa̧nü̧ ja̧'a̧, uwäpächina̧'a̧ttü̧tä̧ päi'ünä̧ i̧'chü̧ juiyünä̧ wä'ijü juȩnȩ pi̧nü̧. Jua̧u̧ru̧mä̧ 'kuäopünä̧ mo̧ro̧ ji̧nü̧'a̧kuä̧ ȩpü̧ ttütä'ijäku ji̧na̧'a̧, juode Dio-rü ukuokuäkuäwode Hermosa pä'ü mikuode äpate ä'ka, juodenä̧ dodepätü, usurä isotürü ppädäkuäwä ttiyarü pä'ü. 3Ja̧'wa̧nü̧ ja̧'a̧, jua̧u̧mä̧ Peduru-rü, Ju̧a̧-ku̧, Dio-rü ukuokuäkuäwodenä̧ dodetta'a topü jäepä̧ri̧nä̧u̧, pärätä ttiyarü pä'ü. 4Ja̧'wa̧nü̧ ja̧'a̧ Peduru-mä̧, Ju̧a̧-ku̧ topü päinä̧ku̧:
—Poku ujuturu topi. 5Pättäku, to̧pä̧ri̧nü̧, kkorojuei tti̧yä̧kua̧sä̧kü̧ pä'ü. 6Ja̧'wa̧nü̧ ja̧'a̧nä̧ Peduru-mä̧ päinä̧ku̧:
—Pärätä'i̧nä̧, oro'i̧nä̧ juida'anä̧, chu̧ju̧nä̧rü̧mä̧ chiyäkujä̧: Jesucrito Nazare i̧sa̧ i̧mi̧nä̧, ä̧rä̧mi̧'ü̧ kue'ächi. 7Ja̧'wa̧nü̧ pä'ü kkä̧nü̧, u̧wo̧jua̧'a̧ku̧ u̧mü̧nä̧ 'chu'ädü äräbe'omȩnä̧ utturuwä'kiyu'i̧nä̧, ü̧jä̧pi̧yä̧'i̧nä̧ 'kiyünä̧ juekuächinä̧ku̧. 8Ja̧'wa̧nü̧ ja̧'a̧ tü'ächü ä̧rä̧mi̧'ü̧ kue'ächü; juätütäku Dio-rü ukuokuäkuäwodenä̧ 'chä̧nü̧ tü'ükkä̧nü̧, Dio-rü esewä̧ya̧ do'ächinü̧. 9O'katoi'ünä̧, ttü̧ja̧mä̧ Dio-rü eseu kueächa'a tottinä̧ku̧. 10Dio-rü ukuokuäkuäwode, Hermosa pä'ü mikuode, äpate ä'ka usurä isotürü ppädäkuäwä jä̧'ȩpä̧rü̧ pä̧'ijü̧ pä'ümä̧ ttu̧wo̧jui̧nä̧ku̧; ja̧'wa̧nü̧ jä̧ji̧yä̧u̧ too to̧pä̧rü̧ kkä̧nü̧, rü̧ȩnä̧ ye'inä̧tü̧ jua̧u̧ru̧ 'kuäopäji topü.
Peduru, Dio-rü ukuokuäkuäwode ä'kattü ji'äwinü̧
11I̧'chü̧ juiyünä̧ wäjimä̧, Peduru-ttü'i̧nä̧, Ju̧a̧-ttü̧'i̧nä̧ yoriso 'kȩi̧'o̧ka̧'a̧ ja̧'a̧, ttü̧ja̧mä̧ to̧o̧ to̧pä̧rü̧kkä̧nü̧, Saromón pä'ü mikuate äpateku ru'i'ü ttü̧ka̧ka̧kui̧'i̧nä̧u̧. 12Peduru-mä̧, ja̧'wa̧nü̧ jȩtta̧'a̧ topü ttü̧ja̧rü̧ pä'inü̧: ¿Irae ttü̧ja̧, tta̧'a̧nü̧ pä'ü, to̧o̧ to̧'kuä̧rä̧tu̧kua̧'a̧jä̧ttü̧ pi̧yȩ tü'kümä̧? ¿tta̧'a̧nü̧ pä'ü, ujuturu to̧'kuä̧rä̧tu̧kua̧'a̧jä̧ttü̧, ujutu tujurunä̧, adiu jȩpä̧tü̧ jü̧nä̧ piderü kueächünä̧ jȩtä̧ja̧'a̧ 'kua̧rü̧nä̧? 13Abraha̧'i̧nä̧, Isaa'i̧nä̧ ja̧'wa̧ta̧nü̧ Jaco'inä̧, tü̧tä̧mü̧mi̧nä̧ pinä̧tü̧ ttü̧ä̧nä̧wa̧ Dio ja̧'a̧, i̧tti̧ Jesú-ru ukuo iyinü̧mä̧, ukutu kkü'kü jui'ü iyü kuikuinä̧tu̧kuä̧ku̧ru̧, Pilato-mä̧ rä'epü ikuarü pä'ü amükuädäja'anä̧. 14Ukutumä̧ surojü jui̧'a̧rü̧, adiwä wȩnȩnä̧ kkü̧rü̧ iyü iku, jä'epinätü̧jä̧ ttü̧ja̧rü̧ kuäwä i̧sa̧rü̧tä̧. 15Ja̧'wa̧nü̧ jȩpü̧, tta̧'kua̧rü̧ iyäwä i̧sa̧rü̧mä̧ kuä'ü ikuinä̧tü̧jä̧ ja̧'wa̧nü̧ ja̧'a̧nä̧ Dio-mä̧ wa'arettü ttoädinä̧ku̧ ja̧'wa̧nü̧ 'kuäopa'a topinä̧tü̧mä̧ ujutujä̧. 16Ja̧'wa̧nü̧ ja̧'a̧ttü̧, jua̧u̧ Jesú-ru ta̧'kua̧ tu̧wȩnä̧ro̧mȩnä̧, pide to'kuä'ijätukuäkumä̧ na̧wä̧chä̧'i̧jü̧ttü̧ a̧'kua̧ttü̧ juoächäji ja̧'a̧. 17Ja̧'wa̧nü̧ ja̧'a̧nä̧, chawaruwä chü̧jä̧wa̧tü̧, jerupü jȩpi̧nä̧tü̧ pä'ümä̧ wo̧jua̧sä̧, kuruwotuku'i̧nä̧ ja̧'wa̧ta̧nü̧ jerupü jȩpi̧nä̧tü̧ pä'ü. 18Ja̧'wa̧nü̧ ja̧'a̧nä̧, Dio umüwäyotü profeta-tü̧nä̧ ukuokuinü̧mä̧ 'kuäopina̧'a̧: Jua̧u̧ weäku Crito-mä̧ 'korujuoächä̧kua̧, pä'ü ukuokuinü̧ta'anü̧. 19Ja̧'wa̧nü̧ ja̧'a̧ttü̧, suronä̧ jȩ'kuä̧'i̧jä̧tu̧ku̧ kä'ädi'ü, Dio-ku ppa̧'ä̧chä̧tu̧kui̧, suronä̧ jȩ'kuä̧'i̧jä̧tu̧ku̧ jȩpü̧ ikuätukuaku pä'ümä̧; Dio-ttü unichä̧rü̧ eseu kkä̧kuä̧wä̧ ichäkua'anü̧. 20Ja̧'wa̧nü̧ jo̧mȩnä̧, Dio wea päinä̧ku̧, Crito-rü weäkua'anü̧. 21Jitämä̧ mo̧ro̧jä̧ra̧'a̧tä̧ ü̧ja̧ pä'ü ja̧'a̧ Jesú-mä̧, Dio aditü ikuomȩbü päi'ünä̧, täbokü kka̧kui̧nä̧tü̧ profeta-nä̧ ukuokuinü̧ ji̧nü̧ ta̧'a̧nü̧. 22Moisé-mä̧ tü̧tä̧mü̧ mi̧nä̧rü̧ pä'inü̧: Ku̧ä̧nä̧wa̧tu̧ku̧ Dio-mä̧, kui̧jä̧wa̧tü̧ttü̧ ya̧tȩ profeta wa̧rü̧ ä̧rä̧bȩ'ä̧kua̧, ttü jü̧ta̧'a̧nü̧. Jua̧u̧ru̧mä̧ o'kajuiyünä̧ päümä̧ kukuotätukuäkuotüjä̧. 23Ja̧'wa̧nü̧ ja̧'a̧ttü̧, o'katoi'ünä̧ jua̧u̧ profeta-rü ä̧ju̧kuo̧kü̧mä̧, juätü ttü̧ja̧ttü̧ rä'epü i̧kuä̧wä̧kua̧. 24Ja̧'wa̧ta̧nü̧ o'katoi'ünä̧ profeta-mä̧, Samue-ttü kkä̧mä̧dü̧ ukuokuinätü̧ pi̧yȩ jitä mo̧ro̧ 'kuäopümä̧. 25Ukutu'i̧nä̧ profeta-tü̧ pinä̧tü̧ tti̧tti̧mü̧jä̧ ja̧'wa̧ta̧nü̧ tü̧tä̧mü̧ mi̧nä̧rü̧ eseku Dio iyinü'i̧nä̧ kuȩmä̧kuo̧tü̧jä̧. Dio-mä̧ pä'inü̧ Abraha̧-rü̧: Uku kui̧tti̧mü̧nä̧, pi̧jä̧ ttü̧ja̧mä̧ o'katoi'ünä̧ adiwä juei ttȩmä̧kuo̧tü̧. 26Ä̧kuo̧mȩnä̧, Dio i̧tti̧rü̧ wa'arettü tto'ädäji̧'ka̧mä̧, adiwä juei kuȩmä̧tu̧kua̧ pä'ü weinä̧u̧jä̧, surojüttü räkuopächätukua pä'ü, ukuturu.
Currently Selected:
Hechos 3: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
