Hechos 4
4
Peduru-ku, Ju̧a̧-ku̧ ruwotü ttä'kattü ukuokuinä̧tü̧
1Ja̧'wa̧nü̧ Peduru-mä̧, Ju̧a̧-ku̧ ttü̧ja̧rü̧ ukuoku ttü̧ja̧kua̧'a̧ 'kä̧tȩnä̧, ichi'inä̧tü̧ sacerdote-tü̧mä̧, Dio-rü ukuokuäkuäwode su̧ro̧do̧u̧ tturuwotüku, saduceo wotüku, jü̧nä̧. 2Rü̧ȩnä̧ tta̧mi̧surinä̧u̧, Jesú wa'arettü ttoächäja'a ttü̧ja̧rü̧ jittäwiyä̧u̧. 3Ja̧'wa̧nü̧ ja̧'a̧, 'chu'ädü, kärenä̧ ttütinä̧u̧, ni̧pä̧ro̧mȩ ji̧yä̧u̧, kkoro mo̧ro̧tä̧ tottatü pä'ü. 4Ja̧'wa̧nü̧ ja̧'a̧nä̧, jittäwa'a ä̧ju̧kuä̧jä̧tü̧mä̧, rekuätü esetinä̧tü̧; suro u̧mä̧tü̧tä̧mä̧ cinco mil jo̧mȩnä̧ ji̧na̧'a̧. 5Ja̧'wa̧nü̧ ja̧'a̧ kkoro mo̧ro̧ ka̧ka̧kui̧nä̧tü̧ Jerusarȩ́-nä̧, Judío tturuwotü'i̧nä̧, judío-ttü a̧ci̧a̧nu̧ wotü'i̧nä̧, weäwä wȩnȩ wo̧juȩkuä̧ isotü'i̧nä̧, 6ja̧'wa̧ta̧nü̧ sacerdote ttu̧ru̧wa̧ Aná'i̧nä̧, Caifái̧nä̧ ja̧'wa̧ta̧nü̧ Ju̧a̧'i̧nä̧, Alejandro'i̧nä̧ ja̧'wa̧ta̧nü̧ sacerdote-tü̧ ttawaruwämä̧ o'katoi'ünä̧ jo̧mȩnä̧; 7ja̧'wa̧nü̧ ttü̧'ȩjo̧mȩ kkä'ko päte'ü, Peduru-rü'i̧nä̧, Ju̧a̧-rü̧'i̧nä̧ kku̧nä̧jä̧'kotü jä̧ttȩpä̧ri̧nä̧u̧:
—¿Ukutumä̧, dí weäwänä̧ ja̧'wa̧ta̧nü̧ dí i̧mi̧nä̧ jȩ'kuä̧tu̧kua̧'a̧jä̧ttü̧ pi̧yȩmä̧?
8Pättiyäku, Peduru-mä̧ Epíritu jäwä jo̧mȩnü̧ kkä̧ku̧ ädätinä̧u̧:
—Ukutu ttü̧ja̧ tturuwotürü ja̧'wa̧ta̧nü̧ Iraettü ukuo isotürü pä'üsä: 9Isopäi'ünä̧, jitä pi̧yȩ mo̧ro̧, ya̧tȩ umäricheittü ü̧'i̧pä̧jä̧mȩnä̧, toku ü̧'i̧pä̧ja̧ ja̧ pä'ü, ujuturu jä'epü ä̧ju̧kuä̧tü̧jä̧. 10Pi̧yȩmä̧ o'katoi'ünä̧ kuä̧ju̧kuä̧tu̧kua̧ pä'ü ja̧'a̧ ukuturumä̧ ja̧'wa̧ta̧nü̧ Irae ttü̧ja̧'i̧nä̧, pide kuä'katuku jo̧mȩnü̧ adiwächäji̧'ka̧ ü̧ja̧'a̧mä̧, ukutu ü̧jo̧kä̧ jäinä̧ kuä'ü kuikuinä̧tu̧kuä̧ku̧, wa'arettü Dio ttoädinä̧ku̧ Jesucrito i̧mi̧nä̧ adiwächäji. 11Pide Jesú-mä̧, ukutu isode adikuä isotü, ido'ki surojo'ki pä'ü kuju'kätukuoko'ki ji̧no̧'ki ja̧'a̧nä̧, ji̧nä̧so yo'kitä kkada'ka iso'ki päi'ünä̧ pärowächino'ki ja̧'a̧. 12Ya̧tȩtä̧ Jesú-tä ja̧'a̧ surojüttü kki̧'ä̧kuä̧wä̧ ujuru kku̧nä̧rü̧mä̧; pi̧jä̧ra̧'a̧ mo̧ro̧jä̧ra̧'a̧ttü̧ weinä̧ku̧ kka̧ra̧mä̧ toa'a; Jua̧u̧tä̧tä̧ ja̧'a̧ i̧mi̧nä̧ ra̧wä̧pi̧jü̧ttü̧ ttü̧ja̧ kki̧'ä̧kuä̧wa̧mä̧.
13Ja̧'wa̧nü̧ ja̧'a̧, Peduru'i̧nä̧, Ju̧a̧'i̧nä̧ kuyärumä̧ ttu̧wo̧jui̧'o̧ka̧'a̧ ji̧na̧'a̧nä̧, wo̧juȩku̧nä̧ yeäwä juiyünä̧ ttu̧kuo̧kui̧yä̧u̧, to̧o̧ to̧pä̧rü̧ kkä̧nü̧ isopäi'ünä̧ pitümä̧ Jesú-ku kue'ächinä̧tü̧ ja̧'a̧ pä'ü ttu̧wo̧jui̧nä̧u̧. 14Ja̧'wa̧ta̧nü̧ umäricheittü pi̧'ä̧ji̧'i̧nä̧ juȩnȩtä̧, juätütäku ü̧ja̧'a̧ topü, to'ija̧'a̧ku̧mä̧ pättü juiyünä̧ ji̧nä̧u̧. 15Ja̧'wa̧nü̧ ja̧'a̧, juätürü u̧mi̧ku̧ rätto'ünä̧ we'opo'ü iku, jitütä ukuokuäkuäwinä̧tü̧: 16—¿Däjé jȩta̧'a̧jä̧ttü̧ pitürümä̧? Isopäi'ünä̧ Jerusarȩ́ ttü̧ja̧mä̧ o'katoi'ünä̧ ä̧ju̧kuä̧jä̧tü̧, pitü jȩtto̧kü̧ juei jȩttä̧ja̧'a̧mä̧, jua̧u̧ to'ija̧'a̧ku̧ päta pä'ümä̧ juiya'a. 17Ja̧'wa̧nü̧ ja̧'a̧ttü̧, pi̧yȩ jua'a yabonü̧ yoäwi'ü juiyäkua'anü̧, porü yabokumä̧ ya̧tȩrü̧'i̧nä̧ Jesú iminämä̧ ttukuoku juiyünä̧tä̧ ye'epe'ünü̧ wetatü. 18Ja̧'wa̧nü̧ ja̧'a̧ttü̧ wopo'ü, ya'utekutä Jesú i̧mi̧nä̧mä̧ ukuoku'i̧nä̧, wo̧juȩtü̧'i̧nä̧ jȩttü̧ juiyünä̧tä̧ pä'ü ttu̧ju̧ni̧nä̧u̧. 19Ja̧'wa̧nü̧ pä̧ttä̧u̧ Peduru-mä̧, Ju̧a̧-ku̧ ttädätinä̧u̧:
—Ukututä amükuädü topätukui, Dio ä'ka jo̧mȩttü̧mä̧, ¿ä̧kuo̧mȩnä̧mä̧ ukuturu tukuota pä'ü adiwa'a tä̧jí̧, Dio-ttü'i̧nä̧ abonä̧nü̧? 20Isopäi'ünä̧ ujutu totinü̧mä̧ ja̧'wa̧ta̧nü̧ tä̧ju̧kui̧nü̧mä̧ tä̧ppü̧ti̧'a̧ pä'ümä̧ juiya'a. 21Ja̧'wa̧nü̧ pä̧tti̧yä̧u̧ ye'epe'ipütä rä'epü tti̧kui̧nä̧u̧. Ro̧'ȩpü̧ suronä̧ jȩtta̧tü̧ pättäja'anä̧ suronä̧ jȩttä̧ji̧ jui̧yi̧yä̧u̧ ja̧'wa̧ta̧nü̧ ttü̧ja̧rü̧'i̧nä̧ ye'eku. Ttü̧ja̧mä̧ Dio-rü rü̧ȩnä̧ o'katoi'ünä̧ esewinä̧tü̧ ja̧'wa̧nü̧ 'kuäopäjämȩnä̧. 22Jua̧u̧ umäricheittü pi̧'ä̧ji̧mä̧, cuarenta años yabonä̧nü̧ kku̧nä̧ri̧nü̧.
Jesucrito-rü esetätümä̧ Dio-rü ukuokuinä̧tü̧
23Ja̧'wa̧nü̧ ja̧'a̧ jua'attü rä'epü tti̧kuä̧jä̧u̧mä̧ jitütäku esetä'ijätü ttü̧ja̧kua̧'a̧ku̧ ichi'opo'ü ji'äwinä̧tü̧ sacerdote tturuwotü pättäji'i̧nä̧, ukuo isotü pättäji'i̧nä̧, jü̧nä̧. 24Ja̧'wa̧nü̧ ja̧'a̧ jua̧u̧ ä̧ju̧kuo̧po̧'ü̧mä̧ o'katoi'ünä̧ yo̧mȩtȩnä̧ Dio-rü ukuokuinä̧tü̧, pa̧'a̧nü̧: Tü̧ä̧nä̧wa̧ Dio u̧wä̧mȩnä̧ wa̧jä̧, mo̧ro̧jä̧'i̧nä̧ pi̧jä̧'i̧nä̧, rü̧ä̧ dubora'i̧nä̧ jua̧u̧nä̧ kka̧ku̧'i̧nä̧ o'kajuiyünä̧ aditinü̧jä̧; 25Ukumä̧ Dawi änä̧, Epíritu Sa̧tu̧ a̧'kua̧ iweyenä̧ pä'inü̧jä̧:
¿Tta̧'a̧nü̧ pä'ü ttü̧ja̧mä̧ ra̧wä̧rü̧,
surojütä amükuädätüjä̧ttü̧?
26Pi̧jä̧ttü̧ ruwotümä̧
ja̧'wa̧ta̧nü̧ ttippeyänä̧ we'ätü'i̧nä̧ Ttu̧ru̧wa̧rü̧,
Crito-rü ka̧ka̧ku̧ suronä̧ jȩtta̧ pä'ü amükuädinä̧tü̧.
27«Isopäi'ünä̧ ukú kui̧tti̧ surojü jui̧'a̧rü̧ suronä̧ jȩtta̧ pä'ü ka̧ka̧kui̧nä̧tü̧, Herodes'i̧nä̧, Poncio Pilato'i̧nä̧, Irae ttü̧ja̧ wokotü'i̧nä̧, Irae ttü̧ja̧'i̧nä̧, jü̧nä̧. 28Ja̧'wa̧nü̧ ja̧'a̧nä̧, juätü jȩttü̧mä̧ suro uku ku̧wo̧juo̧mȩnä̧ amükuädü ku̧ju̧ni̧nü̧tä̧ 'kuäopa'a. 29Ja̧'wa̧nü̧ ja̧'a̧ttü̧, Chu̧ru̧wa̧ jua̧u̧ yettepe'ü topi ja̧'wa̧ta̧nü̧ ku̧wo̧juȩtä̧u̧rü kui̧wȩnȩ ttujuruku jitäunä̧ iyitü. 30Ku̧mü̧ te'ädü ppä'äditü na̧nȩpä̧tü̧ ttü̧'ȩji̧'ü̧nä̧, jȩtto̧kü̧ juei, kui̧tti̧ Jesú i̧mi̧nä̧ jȩtü̧nä̧.» 31Ja̧'wa̧nü̧ pä'ü Dio-rü ukuoku kättädomȩnä̧, juȩnȩ ttü̧'ȩjo̧mȩmä̧ tti̧ȩ́'i̧na̧'a̧; ja̧'wa̧nü̧ päi'omȩnä̧ juȩnȩ kka̧kuä̧tü̧ o'katoi'ünä̧ Epíritu Sa̧tu̧ jäwä jo̧mȩnü̧ pätti'omȩnä̧, Dio i̧wȩnȩ ttujuruku ji'äwinä̧tü̧.
Ji̧nä̧ ji̧yȩtȩnä̧ ppä'ädäkuäu ttü̧ji̧nü̧ wȩnȩ
32Jesucrito-rü esetätü rekuätü o'katoi'ünä̧ ji̧yȩtȩnä̧tä̧ amükuädinä̧tü̧ ja̧'wa̧ta̧nü̧ ji̧yȩtȩnä̧tä̧ a̧'kua̧ri̧nä̧tü̧. Yotüte ttu̧ju̧nä̧rü̧, ttütä chiäre pättümä̧ juiyina̧'a̧, o'katoi'ünä̧ ttiäre jü̧nä̧tä̧ ji̧na̧'a̧. 33Apótore-mä̧, rü̧ȩnä̧ ujuru kkü̧nä̧ ji'äwinä̧tü̧ Jesú wa'arettü ttoächinü̧ wȩnȩmä̧. Ja̧'wa̧nü̧ jo̧mȩnä̧ o'katoi'ünä̧ tteseäkuäu kki̧na̧'a̧. 34Ja̧'wa̧nü̧ ja̧'a̧ttü̧ ya̧tȩ'i̧nä̧ rekuä rü̧jä̧ku̧mä̧ toina̧'a̧; jua'amä̧ tti'ättiyu kku̧nä̧rä̧tü̧ ja̧ pä'ü'i̧nä̧, ttojusode kku̧nä̧rä̧tü̧ ja̧ pä'ü'i̧nä̧, iyü ikuipü mikuämä̧ i'kächü iyinä̧tü̧, 35Apótore ttiyä'cha pä'ü. Ja̧'wa̧nü̧ ja̧'a̧ rekuä rü̧ja̧'a̧ttü̧ topü yotukunä̧rü̧ 'kȩchä̧u̧ iyinä̧tü̧. 36Ja̧'wa̧nü̧ jȩpi̧nü̧, ya̧tȩ Rewi isotü i̧sa̧, José pä'ü mi̧kua̧, Chipre i̧sä̧sa̧ kkä'kosä̧sa̧ i̧sa̧, Apótore-mä̧ Bernawé pä'ü ottinä̧ku̧ (Jua̧u̧ pä'ümä̧: A̧'u̧ ro̧ȩkuä̧ i̧tti̧ pä'ü päwä ji̧nü̧). 37Pidemä̧ i'ätta kku̧nä̧rü̧ ja̧'a̧, juätta iyü ikuäji̧'ka̧ mikuämä̧ apótore-rü i'kächü iyinü̧, ttiyä'cha pä'ü.
Currently Selected:
Hechos 4: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
