Hechos 6

Kko̧ro̧mü̧ttü̧nü̧ ta̧ju̧ diákunu̧tu̧rü̧ ȩmi̧nä̧tü̧

1Ji̧yȩnü̧ pä̧nä̧ Jesucrito-rü esetätü ttirekuächomȩnä̧, judío ja̧'a̧nä̧ Grecia ttü̧ja̧ tti̧wȩnȩ ukuokuätuku, ja̧'wa̧ta̧nü̧ judío ja̧'a̧nä̧ arameo ukuokuätürü, wopäkuäwinä̧tü̧ rȩkua̧mü̧rü̧ adiu ttu̧kuȩ iyokotü pä'ü. 2Ja̧'wa̧nü̧ ji̧yä̧u̧, ttü̧jä̧pü̧ttü̧ ta̧ju̧nü̧ wotü apótore-mä̧ Jesucrito-rü esetätü o'katoi'ünä̧rü̧ wopäjä'kotü pä'inä̧tü̧:

—Ujutu Dio i̧wȩnȩ jitäwä'ija'a kä'ädi'ü ttu̧kuȩtä̧ iyä'chü taditüttümä̧ adiwoka'a. 3Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, ukututtütä usätukui, ttü̧jä̧pü̧ttü̧ ta̧ju̧nü̧ wotürü, ukututä ku̧wo̧juä̧tu̧kuä̧u̧ru̧, adiu wo̧juȩku̧nä̧ amükuädätürü, Epíritu Sa̧tu̧ jäwä jo̧mȩnü̧ wotürü, pi̧yȩ ttadita we'ü tu̧ju̧na̧tü̧. 4Ujutumä̧ Dio-rü yabonü̧ ukuokuätüjä̧ ja̧'wa̧ta̧nü̧ Dio i̧wȩnȩ ji'äwätüjä̧. 5Ja̧'wa̧nü̧ pättomȩnä̧ o'katoi'ünä̧ tteseunä̧ ji̧na̧'a̧; ja̧'wa̧nü̧ ja̧'a̧ Esteba̧-rü̧ ȩmi̧nä̧tü̧, Dio-rü a̧'kua̧ wȩnä̧rü̧rü̧ ja̧'wa̧ta̧nü̧ Epíritu Sa̧tu̧ jäwä jo̧mȩnü̧ wa̧rü̧, Felipe-rü'i̧nä̧, Prócoro-rü'i̧nä̧, Nicano-rü'inä̧, Timón-rü'i̧nä̧, Pármena-rü'i̧nä̧, Nicorá Antioquía-ra̧'a̧ttü̧ ichinü̧rü̧'i̧nä̧, jü̧nä̧. 6Ja̧'wa̧nü̧ ttȩmä̧jä̧u̧ru̧mä̧, apótore ttü̧ja̧kua̧'a̧ku̧ ttȩpä̧ja̧'a̧ ttu̧mü̧ mȩ'ü̧ Dio-rü ttukuokuinä̧u̧. 7Ja̧'wa̧nü̧ ja̧'a̧mä̧, yabokutä Dio i̧wȩnȩmä̧ rü̧ä̧chi̧na̧'a̧, Jerusarȩ́-nä̧mä̧ Jesucrito-rü esetätümä̧ rekuächinä̧tü̧; ja̧'wa̧ta̧nü̧ rekuätü sacerdote'i̧nä̧ esetächinä̧tü̧, jua̧u̧ tta̧'kua̧ wȩnä̧rä̧kuä̧wä̧mä̧.

Esteba̧-rü̧ 'chuttädinü̧ wȩnȩ

8Ja̧'wa̧nü̧ ja̧'a̧ Esteba̧-mä̧, Dio ujuru'i̧nä̧, Dio jäwä'i̧nä̧ jo̧mȩnü̧ kkä̧ku̧, ttü̧ja̧ jȩtto̧kü̧ jue'i jȩpi̧nü̧. 9Ja̧'wa̧nü̧ ja̧'a̧ libertos ttü̧ka̧ka̧kuode sinagoga-ttü, Cirene ttü̧ja̧'i̧nä̧, Alejandría ttü̧ja̧'i̧nä̧, Ciricia ttü̧ja̧'i̧nä̧ ja̧'wa̧ta̧nü̧ Asia rȩjȩ ttü̧ja̧'i̧nä̧ Esteba̧-ku̧ pä'ä'winätü̧; 10Ja̧'wa̧nü̧ ja̧'a̧nä̧, pättü juiyünä̧ ji̧nä̧u̧, wo̧juȩku̧nä̧ ukuokuomȩttü̧ ja̧'wa̧ta̧nü̧ Epíritu Sa̧tu̧ u̧wo̧juetä̧ra̧'a̧nä̧ ukuokuomȩttü̧. 11Ja̧'wa̧nü̧ weyekumä̧, kkorotürü mitinä̧tü̧, Moisé-rü'i̧nä̧, Dio-rü'i̧nä̧ suronä̧ pä'a tä̧ju̧kuä̧jä̧ku̧, pättiyatü pä'ü. 12Ja̧'wa̧nü̧ jȩpü̧ ttü̧ja̧rü̧'i̧nä̧, judío-ttü a̧ci̧a̧nu̧ wotü'i̧nä̧, weäwä wȩnȩ wo̧juȩkuä̧ isottürü'i̧nä̧ ttü̧ra̧wä̧ri̧pü̧nä̧ jȩpi̧nä̧tü̧; ja̧'wa̧nü̧ jo̧mȩnä̧ Esteba̧-rü̧ 'chu'ädü ruwotü ukuo isotü ttä'ka jo̧mȩ ȩpü̧ kku̧ni̧nä̧tü̧. 13Ja̧'wa̧nü̧ jȩpü̧ yapareu jittäwa pä'ü ttu̧ju̧nä̧jä̧u̧mä̧ pä'inä̧tü̧: —Pide ttü̧ja̧sa̧mä̧ pode Dio-rü ukuokuäkuäwode tü'kü'i̧nä̧, weäwä wȩnȩ tü'kü'i̧nä̧ to'ija̧'a̧ku̧ suronä̧tä̧ ukuoku, 14pä'inä̧tü̧; pa̧'a̧nü̧ pä'a tä̧ju̧kuä̧jä̧ku̧: Jua̧u̧, Jesú nazare i̧sa̧mä̧, pode Dio-rü ukuokuäkuäwode'i̧nä̧ si'epü iku, weäwä wȩnȩ Moisé weinü̧'i̧nä̧ pärotü ikuäkua̧ pä'inü̧, pä'inä̧tü̧. 15Ja̧'wa̧nü̧ pä̧tti̧yä̧u̧, juȩnȩ ruwonä̧ pȩjä̧tü̧mä̧, Esteba̧ ü'änä̧ tottomȩnä̧, á̧gȩ ü'ä 'kua̧rü̧nä̧ tottinä̧ku̧.

Currently Selected:

Hechos 6: PNT13

Highlight

Copy