Hechos 7
7
Esteba̧-rü̧ kuä'ü ikuinä̧tü̧
1Sacerdote-tü̧ ttu̧ru̧wa̧mä̧ Esteba̧-rü̧ pä'inü̧: ¿Isopäi'ünä̧ ja̧'a̧ pättümä̧? 2Päku ädätinä̧u̧: Chü̧tä̧mü̧ttü̧ chawaruwä ja̧'wa̧ta̧nü̧ judío-ttü a̧ci̧a̧nu̧ wotü ä̧ju̧kuä̧tu̧kui̧ttü̧: Tü̧ä̧nä̧wa̧ ju̧ru̧wa̧ Dio-mä̧, Abraha̧-rü̧ i̧jȩkui̧nü̧, Harán-nä̧ ü̧jä̧kua̧'a̧ ä'koji, ji̧nä̧ Mesopotamia-nä̧ ü̧jä̧i̧, 3ja̧'wa̧nü̧ i̧jȩku̧ päinä̧ku̧: «Kui̧rȩjä̧ttü̧mä̧ ja̧'wa̧ta̧nü̧ kuawaruwättümä̧ rä'opächi, ttü chi̧jȩpä̧jä̧ rȩjȩra̧'a̧ kui'chä̧kua̧'a̧nü̧.»
4Ja̧'wa̧nü̧ päjäku Abraha̧-mä̧ Cadeo tti̧rȩjä̧ rȩjȩttü̧ rä'opächü, Harán ütawiyära̧'a̧ i̧wi̧nü̧'ka̧ kki̧nü̧. Ja̧'wa̧nü̧ ja̧'a̧ juorü jä'o 'koru juoächäji o'ka'a, Dio-mä̧ Abraha̧-rü̧mä̧ pi̧jä̧ rȩjȩra̧'a̧ku̧ i'kächinä̧ku̧, jitä ukutu ku̧jä̧tu̧kuä̧jä̧mä̧. 5Ja̧'wa̧nü̧ ja̧'a̧ Abraha̧-mä̧ pȩnȩ́ ü̧ji̧na̧'a̧nä̧, Dio-mä̧ yo̧mȩtȩ rȩjȩ'i̧nä̧ u̧ru̧wa̧ jü̧nä̧mä̧ iyokoku pinü̧. Ja̧'wa̧nü̧ ja̧'a̧nä̧, chutä 'koru juoächü o'ka'a, kui̧tti̧mü̧ o'kotürü rȩjȩmä̧ chi̧yä̧kua̧sä̧ päinä̧ku̧, ji̧nä̧ jua̧u̧nu̧mä̧ i̧tti̧'i̧nä̧ toa'anä̧. 6Ja̧'wa̧ta̧nü̧ Dio-mä̧ päinä̧ku̧: Kui̧tti̧mü̧ o'kotümä̧ kkorotü tti̧rȩjä̧nä̧ ttü̧ja̧kuä̧kuo̧tü̧ ja̧'wa̧nü̧ jo̧mȩnä̧ ttu̧wo̧juȩtä̧u̧ jü̧nä̧ ttü̧ja̧'a̧, wewepü, kuäkuäpü jȩttä̧kuä̧u̧, cuatrocientos año jo̧mȩnä̧. 7Jua̧u̧ pä'ü kkä̧nü̧'i̧nä̧, pä'inü̧ Dio-mä̧: «Ttüsä ro̧dȩpä̧kua̧mä̧» juä̧jä̧ ttü̧ja̧rü̧, juätü usurä ttȩmä̧u̧nä̧ jȩpä̧tü̧rü̧mä̧; ja̧'wa̧nü̧ jü̧ o'ka'a, jua'attü rättopäkuotü, porümä̧ ttü chumüwäyotü jü̧nä̧ ttü̧ja̧ pä'ü. 8Ja̧'wa̧nü̧ esekumä̧, Dio-mä̧ Abraha̧-rü̧ we'inü̧ circuncisión pättü jȩa̧ pä'ü. Ja̧'wa̧nü̧ ja̧'a̧ttü̧, Abraha̧ i̧tti̧ Isaac uwäpächäji o'ka'amä̧, kko̧ro̧mü̧ttü̧nü̧ wäbodäkuä mo̧ro̧ päi'omȩnä̧, circuncisión pättü jȩtti̧ya̧rü̧ pä'ü we'inü̧; ja̧'wa̧ta̧nü̧ jȩpi̧nü̧ Isaa-mä̧, i̧tti̧ Jaco-rümä̧, jua'a yabo Jaco'inä̧ ja̧'wa̧nü̧tä̧ jȩpi̧nü̧ i̧tti̧mü̧rü̧'i̧nä̧, doce-nü̧ winä̧tü̧ Iraettü ttä̧'o̧tü̧ pinä̧tü̧rü̧mä̧. 9Pitü ttä̧'o̧tü̧ ttäkuotü pinä̧tü̧mä̧, tti̧jä̧wa̧ José-rü kkü'kü jui'ü, mikuä pä'ü iyü ikuinä̧tü̧ Egito-ra̧'a̧. Ja̧'wa̧nü̧ ja̧'a̧nä̧, Dio-mä̧ José-rü tta̧'ä̧ri̧nü̧, 10usurä ȩmä̧u̧ttü̧ rä'epü iku, tteseunä̧ jü̧'i̧nä̧ iyü kkä̧nü̧, wo̧juä̧wä̧'i̧nä̧ iyinä̧ku̧ ja̧'wa̧nü̧ ja̧'a̧ttü̧ Egito ru̧wa̧ rey Faraó̧-mä̧ ru̧wa̧ gobernador jü̧nä̧ jȩpü̧ kku̧nu̧, ruwo isode weünä̧ jȩpü̧ u̧ju̧ni̧nä̧ku̧. 11Ja̧'wa̧nü̧ ja̧'a̧, Egito-nä̧'i̧nä̧, Canaá̧-nä̧'i̧nä̧, o'kajuiyünä̧ usurä ȩmä̧wi̧nä̧tü̧ ja̧'wa̧nü̧ jo̧mȩnä̧ tä̧'o̧tü̧ mi̧nä̧mä̧ ppäi ttu'inä̧tü̧. 12Ja̧'wa̧nü̧ ja̧'a̧nä̧ Jaco-mä̧, Egito-nä̧ kuäkuäwä kka̧'a̧do pätta'a ä̧ju̧ku̧, tä̧'o̧tü̧ mi̧nä̧rü̧ we'inü̧ jua'a tti̧'cha̧ pä'ü, ä̧kuo̧mȩnä̧mä̧. 13Juȩnȩ o'komȩnä̧ tti̧'chä̧ja̧'a̧, José-mä̧ awaruwä ttu̧wo̧jui̧pü̧nä̧ i̧jȩkui̧nü̧, Faraó̧'i̧nä̧ wo̧jui̧'i̧nü̧ José awaruwä ttütü'kümä̧. 14Ja̧'wa̧nü̧ jä̧jí̧ o'ka'a José-mä̧, jä'o Jaco-rü i̧tti̧mü̧ku̧, ü̧nä̧mu̧ku̧, o'katoi'ünä̧mä̧ setenta y cinco-nü̧ jo̧mȩnä̧ wotürü, Egito-ra̧'a̧ku̧ ottäjiyarü pä'ü we'inü̧. 15Ja̧'wa̧nü̧ ji̧no̧mȩttü̧, Jaco-mä̧ Egito-ra̧'a̧ kkä̧nü̧ 'chi̧nü̧; jua'attütä 'koru juo'ächinü̧ ja̧'wa̧ta̧nü̧ tä̧'o̧tü̧ mi̧nä̧'i̧nä̧ jua'attütä 'koru juo'ächinä̧tü̧. 16Jaco mi̧nä̧ iwe'kiyu o'komä̧ siquem-ra̧'a̧ ȩpi̧nä̧tü̧, Hamor i̧tti̧mü̧ttü̧ Abraha̧ mitäu ȩmi̧nä̧ju̧ wa'are rejunä̧ ttütarü pä'ü. 17Ja̧'wa̧nü̧ ja̧'a̧nä̧ Dio-mä̧, Abraha̧-rü̧ päinü̧'a̧kuä̧ mo̧ro̧ rȩbȩa̧kua̧wo̧mȩnä̧ Egito-ttü, Irae ttü̧ja̧mä̧ rü̧ȩnä̧ rekuächinä̧tü̧. 18Ja̧'wa̧nü̧ ja̧'a̧ ji̧yȩnü̧ pä̧nä̧ Egito-nä̧ José-rü jȩru̧pa̧ ru̧wa̧ rey, pä̧mä̧dü̧ we'inü̧. 19Jua̧u̧ ru̧wa̧ rey-mä̧ tä̧'o̧tü̧ mi̧nä̧rü̧ yaparetä'chü usurä ttȩmä̧u̧nä̧ jȩpi̧nü̧; tti̧tti̧mü̧ uwäpächätürü'i̧nä̧ kuä'ü ttikunä̧ we'inü̧, ttirekuächü juiya pä'ü. 20Ja̧'wa̧nü̧ jü̧ mo̧ro̧ uwäpächinü̧ Moisé-mä̧. Jua̧u̧ ji̧'ki̧cha̧wa̧rü̧ Dio juiyo repe'inü̧; jä'o ojusodettü, ttieruwuönä̧tä̧ kkä̧wa̧tü̧ wä̧mȩtukuä jo̧mȩtä̧ ttu'uttädinä̧ku̧. 21Ja̧'wa̧nü̧ ja̧'a̧nä̧, do'opü ttikuäjäkuru, Faraó̧ ittiju ȩmä̧jä̧'kaju kki̧tti̧ jü̧nä̧tä̧ kku'uttädinä̧kü̧. 22Ja̧'wa̧nü̧ ja̧'a̧ Moisé-mä̧ Egito ttü̧ja̧ ttu̧wo̧jui̧'ü̧nä̧tä̧ wo̧jui̧pi̧nü̧ ja̧'wa̧ta̧nü̧ i̧wȩnȩttü̧'i̧nä̧, aditäwättü'i̧nä̧ ukuo kkü̧nä̧tä̧. 23Ja̧'wa̧nü̧ ja̧'a̧ Moisé-mä̧ cuarenta año u̧ju̧nä̧ro̧mȩnä̧ awaruwä irae ttü̧ja̧rü̧ toa pä'ü amükuädinü̧. 24Ja̧'wa̧nü̧ ja̧'a̧, Egito ttü̧ja̧sa̧, jitütä i̧sa̧rü̧ kuäkuäiyäku ppä'ädü jȩo̧mȩnä̧ Egito ttü̧ja̧sa̧mä̧ 'korupä'i'inü̧. 25Ja̧'wa̧nü̧ ja̧'a̧ Moisé-mä̧, awaruwä Irae ttü̧ja̧mä̧, chunä̧tä̧ Dio-mä̧ juorü rä'epü i̧kuä̧kuä̧u̧jä̧ pä'ü ttu̧wo̧jui̧pä̧kuo̧tü̧kü̧ pä'ü amükuädinü̧; ja̧'wa̧nü̧ ja̧'a̧nä̧ juätümä̧ yoriso wo̧jui̧'o̧ko̧tü̧ pinä̧tü̧. 26Ja̧'wa̧nü̧ jä̧ja̧'a̧ kkoro mo̧ro̧ topinü̧, Irae ttü̧ja̧ ta̧ju̧ ttürowäwa'a. Ja̧'wa̧nü̧ jȩtti̧yä̧ku̧ Moisé-mä̧, eseku ttikunä̧ ppäda pä'ü pä'inü̧: «Ukutumä̧ ji̧nä̧ yotüte isotüjä̧ ¿tta̧'a̧nü̧ pä'ü kurowäwätukua'ajä̧ttü̧?» 27Päku, a̧wa̧ru̧wa̧rü̧ suronä̧ jȩpü̧mä̧ Moisé-rü kki'opü pä'inü̧: ¿Díjä̧ttü̧ ukuru ujuturu tu̧ru̧wa̧ kua pä'ü, ro̧ȩkuä̧ i̧sa̧ jü̧nä̧ rütinü̧mä̧? 28¿Ttürü'i̧nä̧ ni̧po̧, Egito ttü̧ja̧sa̧rü̧ kuä'ü kuikuäjita'anü̧, kuä'ü kuikua päkua'a tä̧jí̧? 29Pä'a ä̧ju̧kuo̧'ü̧mä̧, Moisé-mä̧ Madián rȩjȩra̧'a̧ tü'ipächü i̧wi̧'i̧nü̧'ka̧, kko̧ro̧jä̧ ttü̧ja̧sa̧ jü̧nä̧ kki̧nü̧. Jua'attümä̧ i̧tti̧mü̧ ta̧ju̧ru̧ kku̧nä̧ri̧nü̧. 30Cuarenta año, 'kuäopinü̧ o'ka'a, Sinaí mü̧ä̧'ka tü'kü, dȩ'a̧ra̧'a̧ttü̧, zarza dau kuoünä̧, ya̧tȩ á̧gȩ i̧jȩkui̧nä̧ku̧. 31Ja̧'wa̧nü̧ juäi kuoa'a topü, Moisé-mä̧ isoó pä'ünä̧nü̧, tü'küku adiu toa pä'ü i̧'chi̧'o̧mȩnä̧; u̧ru̧wa̧ Dio i̧wȩnȩ rȩmi̧pa̧'a̧ ä̧ju̧kui̧nü̧: 32«Ttümä̧ kuä'otuku mi̧nä̧ ttü̧ä̧nä̧wa̧sä̧, Abraha̧'i̧nä̧, Isaa'i̧nä̧, Jaco'inä̧, jü̧nä̧. Ja̧'wa̧nü̧ ukuokuomȩnä̧, Moisé-mä̧ ye'ü tti̧'ä̧u̧ toa pä'okü pinü̧. 33Ja̧'wa̧nü̧ pä'ünü̧ u̧ru̧wa̧ Dio-mä̧ päinä̧ku̧: ku̧jä̧pü̧ isäya kko̧'ä̧dä̧kuä̧u̧ ikui, ku̧jo̧mȩmä̧ ku̧ru̧wa̧ Dio ü̧jo̧mȩ ja̧'a̧. 34Isopäi'ünä̧ chi̧tti̧mü̧ Egito-ttü usurä ttȩmä̧wa̧'a̧mä̧ topüsä. Ja̧'wa̧nü̧ usurä ȩmä̧u̧ ttajuäkuäwa'a topü, jua̧u̧ttü̧ rä'epü chikuatü pä'ü mȩyȩwä̧ji̧sä̧. Ja̧'wa̧nü̧ ja̧'a̧ttü̧, Egito-ra̧'a̧ kui̧'cha̧ wedaku täi. 35Jua̧u̧, Moisé-rü kkü'kü jui'ü, ¿Ukumä̧ tu̧ru̧wa̧ juez jü̧nä̧mä̧, dí ütinä̧ku̧ttü̧? pättinä̧ku̧ru̧,» Dio-mä̧ ttu̧ru̧wa̧, juorü rä'epü i̧kuä̧kua̧ jü̧nä̧tä̧, weinä̧ku̧, á̧gȩ-mä̧ zarza#7.35 Zarza Ja̧'wa̧nü̧ mikuäimä̧ dau ji̧na̧'a̧ (Mc 12.26; Lc 6.44; 20.37). daunä̧ i̧jȩku̧. 36Ja̧'wa̧ta̧nü̧, jua̧u̧tä̧ Moisé ji̧na̧'a̧ tü̧tä̧mü̧ mi̧nä̧rü̧ Egito-ttü, jȩtto̧kü̧ juei jȩpü̧, Mar Rojottü'i̧nä̧ ja̧'wa̧ta̧nü̧ rȩbi̧yu̧ dȩ'a̧ra̧'a̧ttü̧'i̧nä̧ cuarenta años jo̧mȩnä̧ rä'epü ikuinü̧mä̧. 37Ja̧'wa̧ta̧nü̧, jua̧u̧ Moisé-tä ji̧na̧'a̧ Irae ttü̧ja̧rü̧ pä'inü̧mä̧: Dio-mä̧ ttü ta̧'a̧nü̧ profeta-rü ukututtü ya̧tȩrü̧ rä̧ȩpä̧kua̧, jua̧u̧ru̧ kuä̧ju̧kuä̧tu̧kua̧jä̧, jü̧nä̧. 38Ja̧'wa̧ta̧nü̧, jua̧u̧ Moisé-tä ji̧na̧'a̧, irae ttü̧ja̧ ka̧ka̧kui̧nä̧tü̧ tü̧tä̧mü̧ mi̧nä̧rü̧, kkä̧kuä̧wä̧ wȩnȩ jua'a yabo 'kuä'epäjipü iku ji'äwinü̧mä̧, Sinaí mü̧ä̧'kattü á̧gȩ ukuoku wȩnȩ. 39«Ja̧'wa̧nü̧ ji̧na̧'a̧nä̧'i̧nä̧, tü̧tä̧mü̧ mi̧nä̧mä̧ jua̧u̧ru̧ kkü'kü jui'ü ttukuotoka'attü̧ Egito-ra̧'a̧ tti̧wa̧ pä'ü amükuädinä̧tü̧. 40Ja̧'wa̧nü̧ pä'ü Aaro̧-rü̧ pä'inä̧tü̧: ujutu tä'kanä̧ 'chä̧tü̧, tü̧ä̧nä̧wo̧tü̧rü̧ aditiyitü; ujuturu Egito-ttü rä'epü ikuinü̧ päji Moisé-mä̧, tieruwünä̧tä̧ toepa'attü̧.» 41Ja̧'wa̧nü̧ pä'ü, päkäyä i̧tti̧ a̧'kua̧juä̧ isä'ka aditü kku̧nu̧, äjikuäkuäwotürü kuä'ü iku jȩpü̧, ttu̧mü̧nä̧ adikuätä eseäkuäu pä'käri jȩpi̧nä̧tü̧. 42Ja̧'wa̧nü̧ jȩtti̧yä̧ku̧, Dio-mä̧ juätürü kä'ädi'ü mo̧ro̧jä̧ si̧ri̧'kü̧rü̧tä̧ eseu ttukuotünä̧ jȩi̧nä̧u̧. Ja̧'wa̧nü̧ jo̧mȩttü̧, profeta-tü̧ tti̧wȩyu̧ti̧nü̧ pa̧'a̧nü̧ pä'a:
«Irae ttü̧ja̧, ukutumä̧, cuarenta años jo̧mȩnä̧ desierto-nä̧ kuekuächätukuäimä̧ ttürü ofrenda iyü,
sacrificio jȩpü̧ kuiyätukuattü pä'okotü pinä̧tü̧jä̧.
43Ja̧'wa̧nü̧ jȩtta̧jü̧ jueimä̧, ku̧ä̧nä̧wa̧ Moloc-rütä
ja̧'wa̧ta̧nü̧ ku̧ä̧nä̧wa̧tu̧ku̧ siri'ko Refán-rütä kue'ädinä̧tü̧jä̧,
a̧'kua̧juä̧ ku̧mü̧tu̧ku̧nä̧ adikuätä, kuesewätukua pä'ü.
Ja̧'wa̧nü̧ ja̧'a̧ttü̧ ukuturumä̧ Babironia yabo do'opü chi̧kuä̧kuä̧u̧jä̧.»
44Tü̧tä̧mü̧ mi̧nä̧mä̧ rȩbi̧yu̧ dȩ'a̧ra̧'a̧ kuettächomȩnä̧ Dio esekuinü̧ kko̧de tabenákuro#7.44 Tabenákuro isode pättodenä̧mä̧ kki̧na̧'a̧ juätürü Dio weinü̧ (to̧mü̧rȩ jäwä wȩnȩ), ja̧'wa̧ta̧nü̧ juodettütä Dio-rü'i̧nä̧ ukuokuinä̧tü̧ (2Co 5.1; Heb 8.2; Ap 15.5). pättode kku̧nä̧ri̧nä̧tü̧, Moisé-rü toinü̧'a̧kuä̧ adita pä'ü weino̧de. 45Ja̧'wa̧nü̧ ja̧'a̧ juode tabenákuro-mä̧, tü̧tä̧mü̧ mi̧nä̧mä̧ jua'a yabo ttä̧'o̧tü̧ ttiyipi̧no̧de ji̧na̧'a̧ ja̧'wa̧nü̧ ja̧'a̧ttü̧ Josué-ku judío wokotü ttidepiyu rȩjȩnä̧ rȩbȩä̧kuä̧u̧'i̧nä̧ tti'kächinode, juätü kko̧ro̧jä̧ ttü̧ja̧rü̧mä̧ Dio si'epü ikuinü̧ juätü ttä'kattü, Dawi ru̧wa̧ ü̧ji̧nü̧ mo̧ro̧bü päi'ünä̧. 46Jua̧u̧ Dawi-mä̧ Dio esewinä̧ku̧ ja̧'wa̧nü̧ ja̧'a̧ttü̧ Dio-rü jä'epinü̧ Jaco isotü ttü̧ä̧nä̧wa̧ ü̧jä̧kuo̧mȩ tabenákuro pättode aditü iya pä'ü; 47Ja̧'wa̧nü̧ ji̧na̧'a̧nä̧, Salomón-tä̧ ji̧na̧'a̧ Dio-rü ukuokuäkuäwode aditinü̧mä̧.
48Jua'akumä̧, Dio mo̧ro̧jä̧ ru̧wa̧mä̧ ttü̧ja̧ ttu̧mü̧nä̧ adikuodenä̧mä̧ kko̧kü̧ ji̧yä̧ku̧. Profeta-mä̧ pä'inü̧:
49Mo̧ro̧jä̧mä̧ churuwo wedomȩ
ja̧'wa̧ta̧nü̧ pi̧jä̧ rȩjȩmä̧ chü̧jä̧pü̧ chi̧jȩdä̧ro̧mȩ ja̧'a̧ pä'ü Dio-mä̧,
¿däje isodettü kuaditiyä̧kua̧sä̧ttü̧?
¿Tȩnȩ́ jä̧kua̧'a̧jä̧ttü̧ 'kuä'ächi'ü chü̧'ä̧mä̧dä̧kuo̧mȩmä̧?
50Pi̧yȩ o'kajuiyünä̧tä̧, ttü chaditäwä ja̧'a̧.
51Ja̧'wa̧nü̧ ja̧'a̧nä̧ —Esteba̧-mä̧ juayabonü̧ pä'inü̧ —ukutumä̧ ä̧tȩkuä̧nä̧tä̧ esetokotüjä̧ ja̧'wa̧ta̧nü̧ surojütä amükuädätüjä̧. Ja̧'wa̧nü̧ ja̧'a̧ttü̧ Epíritu Sa̧tu̧rü̧ esetokotüjä̧ ku̧tä̧mü̧tu̧ku̧ mi̧nä̧ ji̧nü̧ta'anü̧. 52Juätümä̧ profetas winä̧tü̧rü̧ kuä'ü ttikua pä'ütä jȩpi̧nä̧tü̧, Jesú, Dio wȩ'ä̧wa̧ ichü wȩnȩ ji'äwätürü kuä'ü ikuinä̧tü̧, ukutu'i̧nä̧ Jua̧u̧ru̧ iyü ikú kuä'ü ikuinä̧tü̧jä̧; 53Ukutumä̧ á̧gȩrȩ ppättäda'anä̧ weäwä wȩnȩ kuȩmi̧nä̧tu̧kua̧'a̧nä̧ ukuotokotü pinä̧tü̧jä̧.
Esteba̧-rü̧ kuä'ü ttikuinü̧ wȩnȩ
54Pi̧yȩ pä'a ä̧ju̧ku̧ ukuo isotümä̧, Esteba̧-rü̧ rü̧ȩnä̧ tta̧mi̧surächi'ina̧'a̧, ttaku'i̧nä̧ ttünorünä̧tä̧ päi'ünä̧. 55Ja̧'wa̧nü̧ ja̧'a̧nä̧, chutämä̧ Epíritu Sa̧tu̧ jäwä jo̧mȩnü̧ wa̧ ja̧'a̧, mo̧ro̧jä̧ra̧'a̧ku̧ toomȩnä̧ Dio ukuo jäwä topinü̧, Jesú-mä̧ Dio u̧wo̧jua̧'a̧ku̧nä̧ ü̧'ja̧'a̧. 56Ja̧'wa̧nü̧ topü pä'inü̧:
—Mo̧ro̧jä̧ bawekuächa'a topüsä ja̧'wa̧ta̧nü̧ ubo I̧tti̧rü̧'i̧nä̧ Dio u̧wo̧jua̧'a̧ku̧nä̧ ü̧ja̧'a̧. 57Pä'a ä̧ju̧ku̧ ttä̧ja̧ mü̧ȩ'kui̧'ü̧, wopünü̧ o'katoi'ünä̧ 'chä̧wi̧'ü̧ 'chuttädinä̧ku̧. 58Ja̧'wa̧nü̧ jȩpü̧ ütawiyättü rä'epächü, ido'kiyänä̧ ikuäu ttikuinä̧ku̧; ja̧'wa̧nü̧ ja̧'a̧ yapareu ji'äu jua̧u̧ru̧ iyü ikuäjätümä̧ tti̧ä̧rȩti̧yu̧ kko̧sä̧u̧ rütinä̧tü̧, mü̧ä̧ya̧ Sauro ü̧jä̧pi̧yä̧ kkada'ka. 59Ja̧'wa̧nü̧ ja̧'a̧, inä̧du ttikuäwa'anä̧ Esteba̧-mä̧ Dio-rü pa̧'a̧nü̧ ukuokuinü̧: «Chu̧ru̧wa̧ Jesú, cha̧'kua̧ ru̧wa̧rü̧ ȩmi̧ttü̧.» 60Ja̧'wa̧nü̧ ja̧'a̧ iwe'kiyunä̧ ma̧'ä̧mü̧, pä̧i̧ku̧nä̧ wopi'inü̧; ¡Chu̧ru̧wa̧, pi̧yȩ suronä̧ jȩttü̧mä̧ mikuämä̧ jȩ'kuä̧tü̧!, pi̧yȩ pä'ipütä 'koru pä'i'inü̧.
Currently Selected:
Hechos 7: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
