San Juan 13

Jesú-mä̧ u̧wo̧juȩtä̧u̧rü ttü̧jä̧pi̧yä̧ tükinü̧

1Pacua pä'käri ä'kanä̧ ja̧'a̧, Jesú-mä̧ pi̧jä̧nä̧ttü̧mä̧ täkü rä'opü Chä'oku ji̧nä̧ yo̧mȩtȩ pädi'ä̧kuȩ mo̧ro̧ rȩbȩä̧kuä̧wä̧ku̧sä̧ pä'ü wo̧juä̧u̧. Pi̧jä̧nä̧ kka̧kuä̧tü̧ u̧mü̧wä̧yotürü 'kuäopünä̧tä̧ eseu repeä'ija'amä̧, rüjibü päi'ünä̧ eseu repeinä̧u̧.

2Ttu̧kuȩ ttukuomȩttü̧, äwettämä̧, täkü Juda Icariote, Simón i̧tti̧ a̧mi̧so'kinä̧, Jesú-ru iyü ikua pä'ü jȩpü̧ ü̧jü̧nä̧ ja̧'a̧ ji̧na̧'a̧. 3Jesú-mä̧ u̧mü̧nä̧, Jä'o Dio o'kajuiyünä̧ iyina̧'a̧'i̧nä̧ ja̧'wa̧ta̧nü̧ Dio-ttü ichina̧'a̧'i̧nä̧ wo̧juä̧u̧ kkä̧nü̧ pä'äjita'anü̧ jua'atä ppa̧wä̧cha̧'a̧'i̧nä̧ wo̧juä̧u̧, 4ttu̧kuȩ ttukuomȩttü̧ ä̧rä̧mi̧'ü̧, wä̧mȩnä̧ ü̧'ka̧tä̧wä̧ta̧ kko̧'ä̧dä̧kuä̧wo̧po̧'ü̧, pa̧yu̧'chȩnä̧ äkänä̧ ti̧'ä̧dä̧kuä̧wo̧po̧'ä̧ji̧'ka̧. 5Juȩnȩ o'komȩnä̧ uri'ta̧nä̧ ajiya to'äji̧'ka̧, u̧wo̧juȩtä̧u̧ ttü̧jä̧pi̧yä̧ tükü kkä̧nü̧, äkänä̧ ti̧ä̧dä̧kuä̧wä̧jä'chȩnä̧ 'ka̧'i̧nü̧. 6Ja̧'wa̧nü̧ ja̧'a̧, jitä Peduru ukú, päku, Peduru-mä̧ pä'inü̧:

—Chu̧ru̧wa̧, ¿Ukú kutuka'a tä̧jí̧, ttü chi̧jä̧pi̧yä̧mä̧?

7Päiyäku, Jesú-mä̧ päinä̧ku̧:

—Ttü, jitä jȩchü̧mä̧ ku̧wo̧jui̧'po̧ka̧'a̧nä̧, jua̧u̧nü̧ o'ka'atä ku̧wo̧jui̧pä̧kua̧jä̧.

8Peduru pä'inü̧:

—Yorisotä, chü̧jä̧pi̧yä̧ kutukattü pä'ümä̧, ukurumä̧ we'äwokü chä̧kua̧sä̧,

Päku, Jesú-mä̧, ädätinü̧:

—Ukuru chütükü juiyüttümä̧, ttüttümä̧ i̧mi̧ku̧ kuä̧kua̧jä̧. 9Päopo'äku, Simón Peduru-mä̧, pä'inü̧:

—Chu̧ru̧wa̧, chi̧jä̧pi̧yä̧tä̧mä̧kü̧, jua̧u̧nu̧mä̧ chu̧mü̧'i̧nä̧, chu'i̧nä̧ tükittü.

10Päiyäku, Jesú-mä̧ ädätinü̧:

—Täkü, tükäkuäwomȩmä̧, rekuä rü̧jo̧ka̧'a̧ ttütüka pä'ümä̧, kkara'amä̧ jo̧mȩnü̧ o'kajuiyünä̧ tea'attü̧. Ja̧'wa̧nü̧ ja̧'a̧ttü̧ ukutumä̧ tükäwotüjä̧, jua'akumä̧ o'katoi'ünä̧mä̧ jo̧ka̧'a̧nä̧.

11Iyü ikuäkua̧rü̧ u̧wo̧jua̧'a̧ttü̧, pä'inü̧: O'katoi'ünä̧mä̧ tükümä̧ ikuäwokotüjä̧.

12Ja̧'wa̧nü̧ ja̧'a̧ttü̧, tti̧jä̧pi̧yä̧ tükü kä'ädäji̧'ka̧, Jesú-mä̧ wä̧mȩnä̧ ü̧'ka̧tä̧wä̧ta̧ 'ka̧tä̧wo̧'ü̧, pä'äjita'anü̧ mesa-nä̧ pä̧mä̧dü̧, pä'inü̧:

—¿Ukuturu jȩchä̧ji̧mä̧ wo̧jui̧'ä̧tü̧jä̧? 13Ukutumä̧, ttürümä̧, pä'ä'ijä̧tü̧jä̧, «Chu̧ru̧wa̧,» «Wo̧juȩkuä̧ i̧sa̧,» jü̧nä̧; jua'amä̧ adiu pä'ätüjä̧, iweye jua̧u̧tä̧ cha'attü. 14Ttü, isopäi'ünä̧ wo̧juȩkuä̧ i̧sa̧'i̧nä̧ cha'anä̧, ku̧ru̧wa̧tu̧'i̧nä̧ cha'anä̧ ku̧jä̧pi̧yä̧tu̧ku̧ chutükä̧jä̧u̧jä̧ ja̧'wa̧ta̧nü̧ ukutu'i̧nä̧ ku̧jä̧pi̧yä̧tu̧ku̧ kka̧ra̧ kka̧ra̧nü̧ tükäkuäwü ku̧jä̧tu̧kua̧jä̧. 15Isopäi'ünä̧ jȩchä̧ji̧yä̧ujä̧, ttü jȩchä̧ji̧mä̧ ukutu'i̧nä̧ jȩ'kuä̧tu̧kua̧ pä'ü. 16Isopäi'ünä̧tä̧ pädäu̧jä̧: Ttu̧mü̧wä̧ya̧mä̧, u̧ru̧wa̧ttü̧'i̧nä̧ u̧wä̧mȩnä̧mä̧ wokü ja̧'wa̧ta̧nü̧ wȩ'ä̧wa̧mä̧, we'äji u̧wä̧mȩnä̧mä̧ wokü. 17Pi̧yȩ wȩnȩ wo̧jui̧'ü̧, jȩ'kuä̧tu̧ku̧ttü̧mä̧, rü̧ȩnä̧ eseäkuäwä ku̧'o̧kui̧'ä̧kuo̧tü̧jä̧.

18Ukutu o'katoi'ünä̧ kutü'kütukumä̧ pädoka'anä̧; pojopü chȩmi̧nä̧u̧ru̧mä̧ wo̧jua̧sä̧. Ja̧'wa̧nü̧ ja̧'a̧nä̧ wȩyu̧kuä̧ wȩnȩ päümä̧ jo̧mȩnü̧ 'kuäopa pä'ü ja̧'a̧: Ttüku u̧kuȩ kumä̧, chaboi̧ya̧ jü̧nä̧ pä'i'äji. 19Pi̧yȩ pädü 'kuäopäkua'a ä'kanä̧ ji'äusä, jua̧u̧ 'kuäopomȩnä̧, «Ttütäsä» pädümä̧ kuesetätukuäkua'anü̧. 20Isopäi'ünä̧ pädäu̧jä̧: Ttü wedäkuru do'ädümä̧, Ttürü do'ädü; ja̧'wa̧ta̧nü̧ Ttürü do'ädümä̧, Ttürü we'inü̧rü̧ do'ädü.

Jesú-mä̧ ji'äwinü̧ Juda iyü i̧kuä̧kua̧sä̧ pä'ü

(Mt 26.20-25; Mc 14.17-21; Lc 22.21-23)

21Pi̧yȩ pä'ü kä'ädü, Jesú-mä̧ rü̧ȩnä̧ a̧'kua̧nä̧ a̧'u̧ru̧jä̧chi̧'ä̧ku̧, o'kajuiyünä̧ wäjuönä̧tä̧ pä'inü̧:

—Isopäi'ünä̧tä̧ pädäu̧jä̧: ukututtü ya̧tȩ ja̧'a̧ ttürü iyü i̧kuä̧kua̧mä̧.

22Ja̧'wa̧nü̧ pä̧i̧yä̧u̧, u̧wo̧juȩtä̧u̧mä̧ topäkuäwinä̧tü̧, dirü pä'ajó pä'ü. 23Ja̧'wa̧nü̧ ja̧'a̧, u̧wo̧juȩtä̧u̧ttü̧ ya̧tȩ Jesú rü̧ȩnä̧ repeä'ijäku, ippeyä jo̧mȩ kuä'ipäji̧'ka̧ pi̧nü̧, 24Ja̧'wa̧nü̧ ü̧'a̧'a̧, Simón Peduru-mä̧, tiderü päaja pä'ü jä'epü ä̧ju̧kui̧ya̧rü̧ pä'ü u̧mü̧nä̧tä̧ jȩi̧nä̧ku̧. 25Ja̧'wa̧nü̧ jȩi̧yä̧ku̧, Jesú a̧mü̧ka tü'kükunä̧nü̧ pä'i'ü, päinä̧ku̧:

—Chu̧ru̧wa̧, ¿Jua̧u̧mä̧ díjä̧ttü̧?

26Päku, Jesú ädätinü̧:

—Jua̧u̧mä̧, chu trigo i̧ri̧si̧ 'ti̧'ü̧ chiyäku ja̧'a̧.

Pä'ü kä'ädü, 'ti̧'o̧po̧'ü̧ Juda Icariote, Simón i̧tti̧rü̧ iyinü̧. 27Juä̧si̧ kuä̧nü̧ kädüta'anü̧, yotäku Juda Icariote-rü Satanás-mä̧, a̧mi̧so'kinä̧ do'ächi'inü̧.

—Ja̧'wa̧nü̧ ji̧yä̧ku̧ Jesú-mä̧ päinä̧ku̧: Jȩ'kua̧ päkuäjimä̧, jitätä jȩpi̧.

28Ja̧'wa̧nü̧ pä'anä̧, mesa-nä̧ kuä̧nü̧ pȩjä̧tü̧mä̧, ya̧tȩ'i̧nä̧ tta̧'a̧nü̧ pä'ü pä'ajó pä'ü jerupinä̧tü̧. 29Ja̧'wa̧nü̧ ja̧'a̧nä̧ kkorotümä̧, Juda-mä̧ pärätä ȩkä̧yü 'chu̧ä̧ra̧'a̧ ja̧'a̧, pä'käri jäwä ȩma̧ pä'ü päkukü̧ ja̧'wa̧nü̧ jü̧ juiyüttü'i̧nä̧, usurä isotürü ppäda pä'ü päkukü̧ pä'ütä amükuädinä̧tü̧.

30Ja̧'wa̧nü̧ ja̧'a̧ Juda-mä̧, trigo i̧ri̧si̧ kui'ipütä rä'opächinü̧. Jua̧u̧nu̧mä̧, täkü yodó ji̧na̧'a̧.

Jareünä̧ weäwä wȩnȩ

31Ja̧'wa̧nü̧ ja̧'a̧, Juda-mä̧ räopächäji o'ka'a, Jesú-mä̧ pä'inü̧:

—Jitämä̧, Ubo I̧tti̧ ukuo jäwä i̧jȩpü̧ kku̧na̧'a̧ ja̧'wa̧ta̧nü̧ Dio ukuo jäwä'i̧nä̧ jua̧u̧nä̧tä̧ i̧jȩkuä̧cha̧'a̧. 32Ja̧'wa̧ta̧nü̧ Dio ukuo jäwä, jua̧u̧nä̧ i̧jȩpü̧ttü̧mä̧ ja̧'wa̧ta̧nü̧ Dio'i̧nä̧, jua̧u̧ i̧tti̧ ukuo jäwä i̧jȩpä̧kua̧; jua'amä̧ jitätä ja̧'a̧ku̧. 33Chi̧tti̧mü̧, ukutukumä̧ a̧'u̧kua̧'a̧tä̧ chü̧jä̧kua̧sä̧. Ttürümä̧ kusätukua'anä̧, judío-rü pädinü̧ta̧'a̧nü̧ pädäu̧jä̧: Ttü chi̧'cha̧'a̧mä̧ ichokotü kuäkuotüjä̧. 34Ji̧yȩtȩ jareünä̧ weäwä wȩnȩ we'üsä, ukuturu: Yotukunä̧ eseu repe'äkuäwätukui; ttü ukuturu eseu repedä'ijüta̧'a̧nü̧ ja̧'wa̧ta̧nü̧ ukutu'i̧nä̧ eseu repe'äkuäwätukui. 35Isopäi'ünä̧ ja̧'wa̧nü̧ yotukunä̧ eseu repekuäwätukua'a topü, o'katoi'ünä̧ ttu̧wo̧juä̧kuo̧tü̧, jua̧u̧tä̧ u̧wo̧juȩtä̧u̧ pä'ümä̧.

Jesú-mä̧, Peduru ä̧ppü̧tä̧rä̧kua̧'a̧ ji'äwinü̧

(Mt 26.31-35; Mc 14.27-31; Lc 22.31-34)

36Simón Peduru-mä̧, Jesú-ru pä'inü̧:

—Chu̧ru̧wa̧ ¿To kui̧'cha̧'a̧jä̧ttü̧?

—Päku, Jesú-mä̧ ädätinä̧ku̧: Jitätämä̧, chi̧'cha̧'a̧mä̧ ichoküjä̧; ja̧'wa̧nü̧ ja̧'a̧nä̧, o'komȩnä̧ kui̧chä̧kua̧jä̧.

37Päku, Peduru-mä̧ pä'inü̧:

—Chu̧ru̧wa̧ ¿Tta̧'a̧nü̧ pä'ü, jitätämä̧ ukukumä̧ chichü juiyünä̧ ja̧'a̧jä̧ttü̧? ¡Uku jäwänä̧, cha̧'kua̧rü̧mä̧ chi̧yä̧kua̧sä̧!

38Jesú-mä̧ ädätinä̧ku̧:

—¿Isopäi'ünä̧, kua̧'kua̧rü̧mä̧ ttü jäwänä̧ kuiyäwä̧kua̧jä̧? Isopäi'ünä̧tä̧ pädäkujä̧: Äkärä woäkua'a ä'kanä̧, wäbodäkuä jo̧mȩnä̧ ttürü kuä̧ppü̧tä̧rü̧ o'ka'a jä̧kua̧'a̧.

Currently Selected:

San Juan 13: PNT13

Highlight

Copy