San Juan 15

Jesú ja̧'a̧ ji̧nä̧so uwa daumä̧

1Ji̧nä̧so, jitä uwa daumä̧, ttütäsä ja̧'wa̧nü̧ ja̧'a̧nä̧, Chä'omä̧ kku̧nä̧wä̧ i̧sa̧ ja̧'a̧. 2O'kajuiyünä̧, ä̧na̧jui̧yä̧, ttünä̧ u̧wä̧ju̧ wȩjo̧kü̧mä̧, ȩmü̧ i̧kuä̧kuȩ; ja̧'wa̧nü̧ ja̧'a̧nä̧, o'kajuiyünä̧ ji̧yȩ u̧wä̧ju̧ wȩjü̧mä̧, surojü juiyünä̧ aditü u̧ju̧nä̧kuȩ, yabonü̧ u̧wä̧ju̧ wȩja̧ pä'ü. 3Täkü, ukutumä̧ surojü juiyünä̧ aditü kku̧nä̧wo̧tü̧jä̧, ttü jidäwä'ijü ji̧yȩnä̧tä̧. 4Ttünä̧tä̧ todeunä̧ kka̧kuä̧tu̧kui̧, ttü'i̧nä̧ ukutunä̧ kkü̧sä̧. Ä̧na̧jui̧yä̧, uwa daunä̧ todewokomȩnä̧, a̧mü̧nä̧ pa̧ja̧tü̧ u̧wä̧ju̧ wȩjo̧ka̧'a̧ jä̧'i̧nü̧ta̧'a̧nü̧, ukuturu'i̧nä̧ ja̧'wa̧nü̧ jä̧kua̧'a̧ ttünä̧ ku̧jä̧tu̧kuo̧ko̧mȩnä̧mä̧.

5Ttütäsä, uwa daumä̧, ukutumä̧ ä̧na̧jui̧yä̧jä̧. Ttünä̧ kkü̧mä̧ ja̧'wa̧ta̧nü̧ ttü chü̧jä̧ku̧mä̧, jua̧u̧tä̧ ja̧'a̧ u̧wä̧ju̧ rü̧ȩnä̧ wȩjä̧ku̧mä̧; ja̧'wa̧nü̧ ja̧'a̧ttü̧ ttü toünä̧mä̧, yoriso jȩa̧ pä'ümä̧ juiya'a. 6Ttünä̧ kko̧kü̧rü̧mä̧, ä̧na̧jui̧yä̧ u̧mi̧ do'opü ttikuomȩnä̧, joipächa'a; ka̧ka̧tü̧ okuränä̧ kku ttikua'a jä̧'i̧nü̧'a̧nü̧ jä̧kua̧'a̧.

7Ukutu ttünä̧ ku̧ja̧kuä̧tu̧ku̧ttü̧mä̧ ja̧'wa̧ta̧nü̧ ttü chi̧wȩnȩ ukutunä̧ kka̧ku̧ttü̧mä̧, pä̧wä̧rü̧jü̧mä̧ o'kajuiyünä̧ jä'epätukui, jäkuepätukuomȩnä̧ iyäwäkua'a. 8Pi̧yȩnä̧ i̧jȩkuä̧cha̧'a̧, Chä'o ukuo jäwämä̧: u̧wä̧ju̧ rü̧ȩnä̧ kku̧nä̧rü̧ kkä̧nü̧, ttü cho'ka'anä̧ kuichätukuomȩnä̧. 9Ttürü, Chä'o eseu repeüta'anü̧, ukuturu'i̧nä̧ eseu repe'üsä; ttü eseu repedünä̧ kka̧kuä̧tu̧kui̧. 10Ttü wedü wȩnȩ kukuotätukuttümä̧, ttü eseu repedünä̧ kka̧kuä̧tü̧jä̧, ttü'i̧nä̧ chä'o weü wȩnȩ ukuotü chü̧jo̧mȩnä̧, Chä'o eseu repeünä̧ chü̧jü̧ta̧'a̧nü̧.

11Pa̧'a̧nü̧ chukuokuä̧u̧jä̧, ttü cheseu ukutunä̧ kka̧ pä'ü, jua̧u̧ kuesewätuku jo̧mȩnü̧ päi'ätukuaku pä'ü. 12Pi̧yȩ ja̧'a̧, ttü wedü wȩnȩmä̧: Ttü ukuturu eseu repedüta'anü̧, ukutu'i̧nä̧ yotukunä̧ eseu repe'äkuäwätukui. 13Awaruwä jäwänä̧ a̧'kua̧rü̧ iyäwomȩnä̧tä̧ ja̧'a̧, ji̧nä̧so ji̧yȩtä̧ eseu repeäkuäwä u̧ju̧nä̧ra̧'a̧mä̧. 14Ukutumä̧ ttü chawaruwä kuäkuotüjä̧, ttü wedü wȩnȩ jȩ'kuä̧tu̧ku̧ttü̧tä̧. 15Täkü, chumüwäyotü pä'ümä̧ pä̧do̧ko̧u̧jä̧, ttu̧mü̧wä̧ya̧mä̧ u̧ru̧wa̧ jȩü̧ jȩru̧pa̧ ja̧'a̧ttü̧; jitämä̧ chawaruwäjä̧, jua'amä̧ Chä'ottü chä̧ju̧kui̧nü̧mä̧, o'kajuiyünä̧tä̧ chu̧wo̧juȩti̧nä̧u̧ kuätukua'attü. 16Ukutumä̧ ttürümä̧ pojopü ȩmo̧ko̧tü̧ pinä̧tü̧jä̧, ttütätä ji̧na̧'a̧ ukuturu pojopü ȩmi̧nü̧mä̧ ja̧'wa̧nü̧ jȩpü̧ wedinä̧u̧jä̧ u̧wä̧ju̧ rü̧ȩnä̧ ȩpü̧ kuiyätukua pä'ü, jua̧u̧ u̧wä̧ju̧ toe'ächoka'a kka̧ pä'ü. Ja̧'wa̧nü̧ ja̧'a̧, o'kajuiyünä̧ ttü chi̧mi̧nä̧ Chä'orü jäkuepätukumä̧, iyäkua'anü̧. 17Pi̧yȩ ukuturu we'üsä: Yotukunä̧, eseu repe'äkuäu kka̧kuä̧tu̧kui̧.

Pi̧jä̧ ttü̧ja̧mä̧ ttü̧jü̧'ko̧ko̧u̧ kuäkuotüjä̧

18Pi̧jä̧ ttü̧ja̧, ukuturu ttüjü'kü juiyüttümä̧, ä̧kuo̧mȩnä̧mä̧, Jua̧u̧ru̧'i̧nä̧ kkü'kokotü pinä̧tü̧ pä'ümä̧ wo̧juä̧tü̧jä̧. 19Ukutu pi̧jä̧ ttü̧ja̧ kuätukuttümä̧, pi̧jä̧ ttü̧ja̧mä̧ eseu repe'ajatü; ja̧'wa̧nü̧ ja̧'a̧nä̧ ukutumä̧ pi̧jä̧ ttü̧ja̧ kuätukuoka'attü̧, pi̧jä̧ttü̧ pojopü chȩmi̧nä̧u̧ kuätukua'attü pi̧jä̧ ttü̧ja̧mä̧ ttüjü'koko̧u̧jä̧. 20Pi̧yȩ pädinü̧ amükuädätukui: Ya̧tȩ ttu̧mü̧wä̧ya̧mä̧, u̧ru̧wa̧ttü̧'i̧nä̧ u̧wä̧mȩnä̧mä̧ wokü ja̧'a̧. Ttürü suronä̧ pä'ü ttusinü̧ta'anü̧, ukuturu'i̧nä̧, suronä̧ pä'ü ttusäkuotü; ttü chi̧wȩnȩ ma̧i̧pü̧ juiyünä̧ ukuoku jȩttä̧'i̧jü̧mä̧, ukuturu'i̧nä̧ ja̧'wa̧ta̧nü̧ jȩttä̧kuo̧tü̧. 21Ja̧'wa̧nü̧ ja̧'a̧ttü̧, pi̧yȩ o'kajuiyünä̧ jȩttä̧kuo̧tü̧jä̧, ttü chi̧mi̧ jäwänä̧, jua'amä̧ ttürü we'inü̧rü̧ ttieruwa'attü̧.

22Ttü ji'äu chichü juiyinü̧ttü̧mä̧, surojü jȩttü̧mä̧ wȩjo̧ko̧u̧ pa̧ja̧tü̧. Ja̧'wa̧nü̧ ja̧'a̧nä̧, jitä suronä̧ jȩttä̧'i̧jü̧ jȩpo̧ko̧tü̧jä̧ pätta pä'ümä̧ jui'ätü. 23Ttürü kkü'kokümä̧, Chä'orü'i̧nä̧ kkü'kokü. 24Surojü jȩttü̧mä̧ jui'ajatü, ttü̧'kä̧tȩttü̧ ya̧tȩ'i̧nä̧ jȩo̧kü̧ ja̧jü̧ juei jȩcho̧ka̧'a̧ jä̧'i̧jü̧ttü̧mä̧; ja̧'wa̧nü̧ ja̧'a̧nä̧, jitämä̧ topä'ijätü ja̧'wa̧nü̧ topü ttürü'i̧nä̧ ttüjü'koka'amä̧, chä'orü'i̧nä̧ kkü'kokotü. 25Ja̧'wa̧nü̧ ja̧'a̧nä̧, pi̧yȩmä̧, jitütä jäwä weäwä wȩnȩnä̧ wȩyu̧kua̧'a̧, pä'ijüta'a̧nü̧ 'kuäopa'a: «kkorojueimä̧ jȩcho̧ka̧'a̧nä̧, tta̧mi̧ suru tottinä̧ku̧sä̧» pä'ijomȩ.

26Ja̧'wa̧nü̧ ja̧'a̧nä̧, ppädäkuäwä i̧sa̧, Chä'ottü wedäku, isopäi'ünä̧ jueünä̧ i̧sa̧ Epíritu, Chä'ottü ichomȩnä̧tä̧, jä̧kua̧'a̧ ttü chütü'kü jiäwäkua'amä̧. 27Ja̧'wa̧ta̧nü̧ ukutu'i̧nä̧ ttü chütü'kü jikuäwäkuotüjä̧, ä̧kuo̧mȩnä̧tä̧ päi'ünä̧ ttüku ku̧ja̧kuä̧'i̧tu̧kua̧'a̧ttü̧.

Currently Selected:

San Juan 15: PNT13

Highlight

Copy