San Juan 16

1Pi̧yȩ wȩnȩmä̧ chukuokuä̧u̧jä̧, ttü jäwänä̧ kuijuiyuwächi'ätuku juiya pä'ü. 2Sinagogas odewiyättü rä'epe'ü ttikuäkuä̧u̧jä̧ ja̧'wa̧ta̧nü̧ ji̧yȩtȩ mo̧ro̧ ichäkua'a, ukuturu kuä'ü ikumä̧, Dio-rü eseu jȩpü̧sä̧ pättü mo̧ro̧. 3Pi̧yȩmä̧ jȩttä̧kuo̧tü̧, Chä'orü'i̧nä̧, Ttürü'i̧nä̧ ttu̧wo̧jui̧po̧ka̧'a̧ttü̧. 4Pi̧yȩmä̧ ji̧dä̧wä̧u̧jä̧, jua̧u̧nü̧ mo̧ro̧ rȩbȩä̧kuä̧wo̧mȩnä̧, täkü jiäwinä̧u̧jä̧ pä'ü kuamükuädätukuäkua'anü̧,

Epíritu Sa̧tu̧ aditü wȩnȩ

Ä̧kuo̧mȩnä̧mä̧, pi̧yȩmä̧ jidäwo̧ko̧u̧ pinä̧tü̧jä̧, ji̧nä̧ ukututäku chü̧ja̧'a̧ttü̧. 5Ja̧'wa̧nü̧ ja̧'a̧nä̧ jitämä̧ ttürü we'inü̧ ü̧ja̧'a̧ 'chü̧sä̧; ja̧'wa̧nü̧ ja̧'a̧nä̧, ya̧tȩ'i̧nä̧, ¿Too kui̧'cha̧'a̧jä̧ttü̧? Pä'ümä̧ jäkuepätukuokokusä. 6Jua'amä̧, pa̧'a̧nü̧ pädomȩnä̧, kua̧'kua̧ tta̧kuȩkuä̧tu̧kua̧'a̧ttü̧. 7Ja̧'wa̧nü̧ ja̧'a̧nä̧, isopäi'ünä̧ pädäu̧jä̧: Ttü chi̧'cha̧ pä'ümä̧ rekuä rü̧ja̧'a̧; chi̧'chü̧juiyüttümä̧ ppädäkuäwä i̧sa̧mä̧ ichü juiyü'anü̧ ja̧'a̧; chi̧'cha̧'a̧ttü̧ ukuturu wȩdä̧kua̧. 8Ja̧'wa̧nü̧ ja̧'a̧, Jua̧u̧ ichomȩnä̧mä̧, pi̧jä̧ ttü̧ja̧rü̧ surojü jȩttü̧ttü̧'i̧nä̧, Dio jueünä̧ jȩü̧ttü̧'i̧nä̧, ro̧ȩpä̧kuȩttü̧'i̧nä̧ ttu̧wo̧jui̧pü̧nä̧ ppä̧dä̧kua̧. 9Surojü jȩttü̧ttü̧'i̧nä̧, päda'amä̧, ttürü ttesetoka'attü̧ pä'üsä; 10Jueünä̧ jȩttü̧ttü̧'i̧nä̧, pädümä̧, Chä'o ü̧ja̧'a̧ chi̧'cha̧'a̧ttü̧ pä'üsä, täkü ttürümä̧ yabonü̧mä̧ to'kuätukuokoku chäkua'attü̧, 11Ja̧'wa̧ta̧nü̧ Dio ro̧ȩpä̧kuȩttü̧'i̧nä̧, pädümä̧, täkü pi̧jä̧nä̧ we'ä'ijürü ro̧ȩkui̧'ä̧kuȩ, päwi'a'a päda'attü.

12Jidäwa pädümä̧, yabonü̧ chu̧ju̧nä̧ra̧'a̧nä̧, jitätämä̧ kua̧mi̧ 'ki'ächi'okotüjä̧. 13Ja̧'wa̧nü̧ ja̧'a̧nä̧, Epíritu Sa̧tu̧ ichomȩnä̧mä̧, o'kajuiyünä̧ jueünä̧ ku̧wo̧juä̧tu̧ku̧nä̧ juȩpä̧rä̧kuä̧u̧jä̧; ja̧'wa̧nü̧ ja̧'a̧ttü̧ pä̧wä̧rü̧jü̧mä̧ ukuokuokotü kuäkuotüjä̧, pä'a kuä̧ju̧kua̧'a̧ku̧tä̧ kukuokuäkuotüjä̧ ja̧'wa̧ta̧nü̧ 'kuäopä̧kuȩ wȩnȩ'i̧nä̧ ku̧wo̧juä̧tu̧ku̧nä̧ ji̧ä̧wä̧kuä̧u̧jä̧. 14Jua̧u̧mä̧ chukuo jäwä i̧jȩpä̧kua̧, jua'amä̧ ttü chiärettü ȩmü̧, ukuturu i̧jȩpä̧kua̧ ku̧wo̧jui̧pä̧tu̧ku̧nä̧. 15Chä'o u̧ju̧nä̧rü̧mä̧ o'kajuiyünä̧, ttü'i̧nä̧ chiäre; ja̧'wa̧nü̧ ja̧'a̧ttü̧, pä'äjisä, Epíritumä̧ ttü chiärettü ȩmä̧kua̧, ukuturu i̧jȩpa̧ pä'ümä̧, pädäjimä̧.

16A̧'u̧kua̧'a̧tä̧ jü̧ o'ka'a, ttürümä̧ topokotü kuäkuotüjä̧; ja̧'wa̧nü̧ a̧'u̧kua̧'a̧tä̧ jü̧ o'ka'a pä'äjita'anü̧ to'kuätukuä̧kua̧sä̧. Jua'amä̧ Chä'o ü̧ja̧'a̧ chi̧'cha̧'a̧ttü̧.

Tta̧'kua̧ tta̧ttȩku̧mä̧ eseäkuäwänä̧tä̧ pärowächäkua'a

17Ja̧'wa̧nü̧ pä̧i̧yä̧u̧, u̧wo̧juȩtä̧u̧mä̧ pä'äwinä̧tü̧:

—Tta̧'a̧nü̧ pä'ü ¿A̧'u̧kua̧'a̧tä̧ jü̧ o'ka'a, to'kuätukuokä̧kua̧sä̧; ja̧'wa̧ta̧nü̧ a̧'u̧kua̧'a̧tä̧ jü̧ o'ka'a, pä'äjita'anü̧ to'kuätukuä̧kua̧sä̧, pä'ü kkä̧nü̧'i̧nä̧, Chä'o ü̧ja̧'a̧ 'chü̧sä̧ pä'ajä̧ttü̧? 18Ja̧'wa̧ta̧nü̧ ¿Toku pä'ü a̧'u̧kua̧'a̧tä̧ jü̧ o'ka'a, pä'ajä̧ttü̧? Yoriso tu̧wo̧jui̧pü̧ juiyünä̧ jä̧u̧jä̧, ukuokumä̧.

19Pä'ü ukuoku, jä'epü ttä̧ju̧kua̧ pätta'a, Jesú-mä̧ wo̧jui̧'ü̧ päinä̧u̧:

—¿A̧'u̧kua̧'a̧tä̧ jü̧ o'ka'a to'kuätukuokä̧kua̧sä̧ ja̧'wa̧ta̧nü̧ a̧'u̧kua̧'a̧tä̧ jü̧ o'ka'a, pä'äjita'anü̧ to'kuätukuä̧kua̧sä̧, pädäji jä̧ji̧, jä̧kuȩpä̧rä̧kuä̧wä̧tu̧kua̧'a̧ tä̧jí̧?

20Isopäi'ünä̧ pädäu̧jä̧: Ukutumä̧ kua̧'kua̧ tta̧'ȩku̧ kuajuäkuäwäkuotüjä̧, pi̧jä̧ ttü̧ja̧mä̧ tteseäkuäwa'anä̧. Ja̧'wa̧nü̧ ja̧'a̧nä̧, kua̧'kua̧ tta̧kuȩkuä̧tu̧ku̧mä̧, eseäkuäwänä̧tä̧ kui'ärowächäkuotüjä̧. 21Isaju kki̧tti̧rü̧ kkuwäbekuä̧kuȩ mo̧ro̧ päi'ä̧kua̧mä̧, kka̧'kua̧ tta̧'ȩkuä̧ju̧; ja̧'wa̧nü̧ ja̧'a̧nä̧ ji̧'chi̧cha̧wa̧ uwäpächü o'ka'amä̧, kkeseunä̧tä̧ pärowächäkua, usurä kkȩmä̧wä̧ji̧'i̧nä̧ kka̧mü̧kuädü juiyünä̧tä̧, pi̧jä̧ra̧'a̧ jua̧u̧ru̧ i'chächäjä'kaju. 22Ja̧'wa̧nü̧ jä̧'i̧jü̧ta̧'a̧nü̧, jitämä̧ kua̧'kua̧ tta̧'ȩkuä̧tü̧jä̧; ja̧'wa̧nü̧ ja̧'a̧nä̧, pä'äjita'anü̧ tochäkuä̧u̧jä̧ ja̧'wa̧nü̧ jo̧mȩnä̧ kua̧mi̧'iso'kitükumä̧ rü̧ȩnä̧ esewäkua'a ja̧'wa̧nü̧ kuesewätukumä̧ ya̧tȩ'i̧nä̧ 'choipokü jä̧kuȩ.

23Ji̧yȩnü̧ mo̧ro̧mä̧, täkü jä̧kuȩpä̧rä̧tu̧kuo̧ko̧ku̧ chä̧kua̧sä̧. Isopäi'ünä̧ pä'üsä ukuturu: Chä'orü ttü chi̧mi̧nä̧, jäkuepätukumä̧, o'kajuiyünä̧ i̧yä̧kuä̧u̧jä̧. 24Jitä pȩnȩbü, Ttü chi̧mi̧nä̧mä̧ yorisotä jä'epokotü pä'ijätüjä̧; jä'epätukui, kuȩmä̧tu̧kua̧; kueseäkuäwätuku jo̧mȩnü̧ päkui'ätukua.

Jesucrito-mä̧ pi̧jä̧ jäwä kkȩdü̧ ikuinü̧

25Pi̧yȩ wȩnȩmä̧ wȩnȩtä̧rü̧tä̧ jidäwä'ijä̧u̧jä̧; ja̧'wa̧nü̧ ja̧'a̧nä̧, täkü wȩnȩtä̧rü̧ jidäwokü jä̧kuȩ mo̧ro̧ rȩbȩwa̧'a̧, suro jueünä̧tä̧ Chä'o ütü'kümä̧ chukuokuä̧kuȩ mo̧ro̧. 26Ji̧yȩnü̧ mo̧ro̧ täkü jueünä̧ chi̧mi̧nä̧ jäkuepäkuotüjä̧ Chä'orü; ttü jädepiyätukuaku pä'ümä̧ rekuä rü̧jo̧ka̧'a̧ jä̧kua̧'a̧. 27Jua'amä̧, chutä Chä'o ukuturu repe'ü esewa'attü, ttürü repe'ü kuesewiyätukuäku. Ja̧'wa̧ta̧nü̧ jua̧u̧ttü̧tä̧ chichina̧'a̧'i̧nä̧ kuesetätukua'attü. 28Pi̧jä̧ra̧'a̧ ichümä̧, Chä'o ü̧jo̧mȩttü̧ rä'opinü̧sä̧; pä'äjita'anü̧ pi̧jä̧ jaropi'ü, Chä'o ü̧ja̧'a̧ 'chü̧sä̧.

29Pä'ü jiäwiyä̧u̧ u̧wo̧juȩtä̧u̧mä̧ pä'inä̧tü̧:

—Jitämä̧, juäjunä̧ ukuoku, wȩnȩtä̧rü̧ ukuokuoka'a. 30Jitämä̧, wo̧jui̧'ä̧tü̧jä̧ o'kajuiyünä̧tä̧ wo̧jua̧ pä'ü, ujututtü ya̧tȩ jä̧ȩpä̧ra̧ku̧ pä'ü'i̧nä̧ rekuä rü̧jo̧ko̧ku̧jä̧; ja̧'wa̧nü̧ jo̧mȩttü̧ Dio-ttü ichinü̧ pä'ü esetätüjä̧.

31Pättäku, Jesú-mä̧ ädätinä̧u̧:

—¿Jua̧u̧nu̧mä̧, jitämä̧ esetätüjä̧? 32Jitämä̧ yotukunä̧ kuipperekuächätukuä̧kuȩ rȩbȩä̧kuä̧wa̧'a̧, jua̧u̧mä̧ jitätä ja̧'a̧, ttü kkatärütä kku̧ni̧pü̧ ji̧kuȩ'ä̧kuo̧tü̧jä̧; ja̧'wa̧nü̧ ja̧'a̧nä̧ kkatämä̧ woküsä, Chä'o'i̧nä̧ ttüku ü̧ja̧'a̧ttü̧. 33Pi̧yȩmä̧ ukuokusä, ttünä̧ wȩnȩ juiyünä̧ eseu ku̧jä̧tu̧kua̧ pä'ü. Pi̧jä̧ttü̧mä̧ usurä ȩmä̧u̧ 'kuäkuopäkuotüjä̧; ja̧'wa̧nü̧ ja̧'a̧nä̧ kua̧'kua̧ wȩnä̧rä̧tu̧kui̧, ttü ja̧'a̧ pi̧jä̧ jäwä abo 'kuä'o'inü̧mä̧.

Currently Selected:

San Juan 16: PNT13

Highlight

Copy