San Lucas 13
13
Jȩpü̧ ttü̧jü̧ pärowächäkuäwä wȩnȩ
1Ji̧yȩnü̧ pä̧nä̧, yotäku ichi'ü Jesú-ru ji'äwinä̧tü̧, gobernador Pilato-mä̧ Galirea ttü̧ja̧rü̧ sacrificio jȩpü̧ Dio-rü ttukuokua'a jakuänä̧ kuä'äu ttikunä̧ we'äji, pä'ü. 2Jesú päinä̧u̧: «¿Toku kuamükuädätukuättü̧, juätü ttü̧ja̧rü̧ 'kuäopäjimä̧, jua'amä̧ Galirea ttü̧ja̧ kkorotüttü'i̧nä̧ abonä̧nü̧ suronä̧ jȩttä̧'i̧ja̧'a̧ 'kuä̧o̧pä̧jä̧u̧? 3Ja̧'wa̧nü̧mä̧ jo̧ka̧'a̧; ä'kanä̧ suronä̧ jȩ'kuä̧'i̧jü̧tu̧ku̧ttü̧ käkuädi'ätuku juiyüttümä̧, ukutu'i̧nä̧ o'katoi'ünä̧ tokue'ächäkuotüjä̧. 4¿Ja̧'wa̧ta̧nü̧ jitü dieciocho-nü̧ wotü Siroé pä'ü mi̧kuomȩttü̧, isode isä'ka ma̧ä̧u̧ to'e'ächinä̧tü̧mä̧, ukutu päkuätukumä̧ Jerusarȩ́ ütawiyättü kkorotüttü'i̧nä̧ abonä̧nü̧ suronä̧ jȩpä̧tü̧ ja̧'a̧ to'e'ächinä̧tü̧ päkuätukua'a tä̧jí̧? 5Ja̧'wa̧nü̧mä̧kü̧ ja̧'a̧; ukutu'i̧nä̧ surojü käkuädi'ätuku juiyüttümä̧, o'katoi'ünä̧tä̧ tokue'ächäkuotüjä̧.»
Higuera dau u̧wä̧ju̧ juiyäinä̧ wȩnȩtü̧ ji'äwinü̧
6Jesú pi̧yȩ wȩnȩtü̧ ji̧ä̧wi̧nä̧u̧: Ya̧tȩ uwa pättanä̧, higo dau kku̧ni̧nü̧'ka̧ u̧wä̧ju̧ wȩji̧ya̧rü̧ ja̧ pä'ü topü i̧'chä̧ja̧'a̧, yoriso higo otemä̧ wȩjo̧koi ji̧na̧'a̧. 7Ja̧'wa̧nü̧ ji̧yä̧ku̧ uwa pätta tta̧wä̧rä̧kuä̧wä̧ i̧sa̧rü̧ pä'inü̧: Topittü̧, wäbodäkuä año jo̧mȩnä̧, pi higuera dau u̧wä̧ju̧ wa̧ja̧ pä'ü topü ichä'ijüsä ja̧'wa̧nü̧ ja̧'a̧nä̧ yorisotä wȩjo̧koi jä̧'i̧jäi. Ja̧'wa̧nü̧ ja̧'a̧ttü̧ kku̧'u̧ ikuäikui; ¿tta̧'a̧nü̧ pä'ü, ji̧ya̧'a̧kuä̧ra̧'a̧ rȩjȩ toe'ächünä̧ ku̧ju̧nä̧rä̧ttü̧? 8Päku, pätta tta̧wä̧rä̧kuä̧wa̧ i̧sa̧mä̧ pä'inü̧: Chu̧ru̧wa̧, ji̧nä̧ pi̧yȩ año-bütä tta̧'ä̧ri̧pi̧; kkada'kai jäyänä̧ rȩjȩ sa'opo'ü ppürüwächi'ünä̧ chütä'cha'anä̧. 9Ja̧'wa̧nü̧ jȩcho̧mȩnä̧, u̧wä̧ju̧ iyüttümä̧ adiwäkua'a; wȩjü̧ juiyüttümä̧, 'kui'opü kuikuäikuajä̧.
Jesú-mä̧ na̧'ä̧chä̧ju̧ru̧ sawaru mo̧ro̧ aditü ikuinü̧
10Sawaru mo̧ro̧ Jesú sinagoga isodettü u̧wo̧juȩto̧mȩnä̧; 11Juȩnȩ yajute kki̧nä̧ju̧ dieciocho año-nü̧ jo̧mȩnä̧ na̧'ä̧chä̧'i̧jä̧ju̧. Epíritu su̧ro̧pa̧, surojuoepina̧'a̧ 'tu̧wa̧yu̧nü̧ kkü̧jü̧nä̧tä̧ juo'ächinä̧ju̧, jȩä̧kuä̧wä̧ juiyünä̧tä̧. 12Juäjuru topü, Jesú-mä̧ kkichi'a pä'ü wopo'äji̧'ka̧ päinä̧kua̧:
—Isaju, täkü kumä̧richeittümä̧ pi̧'ä̧ju̧jä̧. 13Pä'ükkä̧nü̧, kku̧wä̧mȩ mȩo̧mȩnä̧, yotäku, 'tu̧wa̧yu̧nü̧ kkäja'amä̧ jue'ächipü, Dio-rü rü̧ȩnä̧ esewinä̧ju̧. 14Ja̧'wa̧nü̧ Jesú-mä̧ Sawaru mo̧ro̧ aditü ikua'a topü, sinagoga isode u̧ru̧wa̧mä̧ ra̧wä̧ri̧pü̧ ttü̧ja̧rü̧ pä'inü̧:
—Kko̧ro̧mü̧ttü̧nü̧ ya'ute mo̧ro̧ jo̧mȩnä̧ kka̧'a̧ adikuä mo̧ro̧mä̧; jua̧u̧nü̧ mo̧ro̧tä̧ ichätukui, ja̧'wa̧nü̧ ja̧'a̧nä̧ Sawaru mo̧ro̧mä̧ aditü ttikuätukuaku pä'ümä̧ kuichätukuä. 15Päiyäku, Jesú-mä̧ ädätinä̧ku̧:
—Ä'koyättütä esetätüjä̧, ¿ukutu'i̧nä̧ kuä̧ji̧mu̧tu̧ku̧ buey-rü'i̧nä̧, Buro-rü'i̧nä̧ ajiya ttawa pä'ümä̧, Sawaru mo̧ro̧ ȩpo̧ko̧tü̧ pä'ijä̧tü̧jä̧ tä̧jí̧? 16Paju Abraha̧ isotü isaju ja̧'a̧, Satanás dieciocho año jo̧mȩnä̧, nü̧'kü u̧ju̧ni̧nä̧kua̧rü̧mä̧ ¿Sawaru mo̧ro̧ ja̧'a̧nä̧ jua̧u̧ usurä kkȩmä̧u̧ttü̧ ejädü ttikuaju pä'ümä̧ rekuä rü̧jo̧ko̧kua̧ tä̧jí̧? 17Pi̧yȩ, Jesú pä'a ä̧ju̧ku̧, aboiyotümä̧ o'katoi'ünä̧tä̧ dä'ä ttu'inä̧tü̧; ja̧'wa̧nü̧ ja̧'a̧nä̧ ttü̧ja̧mä̧ o'katoi'ünä̧ Jesú jȩü̧ topü eseäkuäwinä̧tü̧.
Mostaza pättü u̧wä̧ju̧nä̧ wȩnȩtü̧ ji'äwinü̧
(Mt 13.31-32; Mc 4.30-32)
18Ja̧'wa̧ta̧nü̧ Jesú-mä̧ wȩnȩtü̧ pä'inü̧: ¿Däjé 'kua̧rü̧nä̧ ja̧'a̧jä̧ttü̧, Ru̧wa̧ Dio weümä̧ ja̧'wa̧ta̧nü̧ däjenä̧ wȩnȩtü̧ jidäwa'ajä̧ttü̧? 19Jua̧u̧mä̧ mostaza u̧wä̧ju̧, pättanä̧ ya̧tȩ u̧ju̧no̧mȩnä̧. Büó juoächü o'ko'i, täkü rü̧ä̧i jo̧mȩnä̧, ä̧na̧jui̧yä̧nä̧ ppi̧yu̧ ttä̧'ti̧yu̧ ttu̧wȩna̧'a̧ jä̧'i̧nü̧'a̧nü̧ ja̧'a̧.
Levadura pättünä̧ wȩnȩtü̧ ji'äwinü̧
(Mt 13.33)
20Ja̧'wa̧ta̧nü̧ Jesú-mä̧ pä'inü̧: «¿Ru̧wa̧ Dio weümä̧ däjenä̧ wȩnȩtü̧ päda'ajä̧ttü̧? 21Yajute isaju wäbodäkuänä̧ pa̧ja̧tü̧ trigo isäwanä̧ levadura kkȩno̧mȩnä̧, o'kajuiyünä̧tä̧ a̧'ti̧'a̧'a̧ jä̧'i̧nü̧'a̧nü̧ jü̧.»
Äpate 'ko̧a̧te wȩnȩ
(Mt 7.13-14,21-23)
22Jesú-mä̧ Jerusarȩ́ ütawiyära̧'a̧ku̧ 'chä̧nü̧ kkä̧nü̧, ütawiyä ppo̧ü̧nä̧'i̧nä̧, rü̧o̧mȩ pünä̧'i̧nä̧ wo̧juȩti̧nü̧. 23Ja̧'wa̧nü̧ ja̧'a̧ ya̧tȩ jä'epü ä̧ju̧kui̧nä̧ku̧:
—Chu̧ru̧wa̧, ¿a̧'u̧ku̧nä̧ wotütä ja̧'a̧, ra̧wä̧pi̧jü̧ttü̧ ttü̧ja̧kui̧'ä̧kuo̧tü̧mä̧? Päomȩnä̧, Jesú-mä̧ ädätinü̧: 24Kujuruku amükuädätukui äpate a̧'u̧kuatenä̧ dode'kuätukua; isopäi'ünä̧ rekuätü dodetta pä'ü jȩtta̧'a̧nä̧, dodepokotü ttäkuotü. 25Isode u̧ru̧wa̧ ä̧rä̧mi̧'ü̧ äpate mü̧'ȩpü̧ iku o'ka'a jü̧ttü̧mä̧, u̧mi̧ kka̧kuä̧tü̧mä̧ wottäkuotü: Chu̧ru̧wa̧ ba'epitü. Ja̧'wa̧nü̧ ja̧'a̧nä̧ ä̧dä̧tä̧kuä̧u̧jä̧: Ukuturumä̧ yoriso jȩru̧pa̧sä̧, jü̧nä̧tä̧. 26Päomȩnä̧, ukutumä̧ wo'kuäkuäwi'äkuotüjä̧: Uku kuä'ka jo̧mȩttü̧ tu̧kuȩmä̧ kuinä̧tü̧jä̧, au'i̧nä̧ awinä̧tü̧jä̧, ja̧'wa̧ta̧nü̧ tidepiyu mä̧ni̧yä̧ttü̧ wo̧juȩti̧nü̧jä̧. 27Päkuiyätukuäku, pä̧kuä̧u̧jä̧: yoriso ukuturumä̧ jȩru̧pa̧sä̧; ttüttümä̧ 'kȩ'i̧pä̧chä̧tu̧kui̧ o'katoi'ünä̧tä̧ suronä̧ jȩä̧kuä̧wä̧ isotüjä̧. 28Ja̧'wa̧nü̧ ya'oku ikuomȩnä̧, jua'attümä̧ tta̧'kua̧ tta̧'ȩku̧, usurä ȩmä̧u̧ ajuäkuäu tottäkuotü, Abraha̧-rü̧'i̧nä̧, Isaa-rü'i̧nä̧, Jaco-rü'i̧nä̧, o'katoi'ünä̧ profetas winä̧tü̧rü̧'i̧nä̧, Ru̧wa̧ Dio weomȩ ttü̧ja̧kua̧'a̧. Ja̧'wa̧nü̧ ja̧'a̧nä̧ ukutumä̧, yorisotä u̧mi̧ku̧ rä'epü ikuäwäkuotüjä̧. 29Ja̧'wa̧ta̧nü̧ ttü̧ja̧mä̧ kkä̧wa̧ räopa'akuttü'i̧nä̧, ma̧ä̧cha̧'a̧ku̧ttü̧'i̧nä̧, Norte pätta'akuttu'i̧nä̧, Sur pätta'akuttu'i̧nä̧ ichü ttü'ȩmä̧kuo̧tü̧ Ru̧wa̧ Dio weomȩ, ttu̧kuȩ kuä̧nü̧. 30Ja̧'wa̧nü̧ ja̧'a̧ttü̧ juorümä̧ yotukunä̧, rüjinä̧ wotümä̧, ä̧kuo̧mȩnä̧ pätti'äkuotü ja̧'wa̧ta̧nü̧ ä̧kuo̧mȩnä̧ wotütä, rüjinä̧ pätti'äkuotü.
Jerusarȩ́ amükuädü ukuoku, Jesú-mä̧ ajuäwinü̧
(Mt 23.37-39)
31Ja̧'wa̧ta̧nü̧ ji̧yȩnü̧ mo̧ro̧, fariseo wotü ichi'ü Jesú-ru pä'inä̧tü̧:
—Porümä̧ tü'ipächi, ru̧wa̧ Herode-mä̧ kuä'ü ikua pä'ü usäkujä̧. 32Pättäku Jesú-mä̧ ädätinä̧u̧: Jua̧u̧ awarirümä̧ ji'äwäjätukui:
—Jitä mo̧ro̧'i̧nä̧, yo̧i̧mo̧ro̧'i̧nä̧ epíritu-tu̧ suropätürü rä'epe'ü iku kkä̧nü̧, na̧nȩpä̧tü̧rü̧'i̧nä̧ aditü ikusä, ja̧'wa̧nü̧ ja̧'a̧nä̧ wäbodäkuä mo̧ro̧ päi'omȩnä̧ kädädäkua̧sä̧. 33Ja̧'wa̧nü̧ ja̧'a̧nä̧, chi̧'cha̧ pädäja'amä̧ jitä mo̧ro̧'i̧nä̧, yo̧i̧mo̧ro̧'i̧nä̧, yo̧i̧mo̧ro̧ o'komȩ'i̧nä̧ 'chü̧sä̧; isopäi'ünä̧ ya̧tȩ profeta wa̧mä̧ Jerusarȩ́ ütawiyä u̧mi̧ttü̧ 'korujuoächa pä'ümä̧ juiya'a. 34¡Jerusarȩ́ ttü̧ja̧we, Jerusarȩ́ ttü̧ja̧we, profetas wotürü kuä'äu iku, Dio wȩä̧u̧ru̧'i̧nä̧ inä̧dunä̧ ikuäu kuä'äu ikuätüjä̧! ¡kko̧ro̧nü̧ jü̧ta̧'a̧nü̧, kui̧tti̧mü̧tu̧ku̧ru̧mä̧, äkärä isaju kki̧tti̧mü̧rü̧ kkujuabiyä dȩa̧'a̧ kkü̧tä̧ra̧'a̧ jä̧'i̧jü̧'a̧nü̧ chü̧ka̧ka̧ta̧ pädomȩnä̧, kkü'kokotü pä'ijätüjä̧! 35Ja̧'wa̧nü̧ ja̧'a̧ttü̧ topätukui, kuojusodetukumä̧ toünä̧ kki̧'ä̧kuode ja̧'wa̧ta̧nü̧ pädäu̧jä̧ pä'äji jä̧ji̧'a̧nü̧mä̧ to'kuätukuokoku chä̧kua̧sä̧, ukutu pa̧'a̧nü̧ päkuätuku mo̧ro̧bü päi'ünä̧: «Tu̧ru̧wa̧ i̧mi̧nä̧ ichürümä̧ adiunä̧tä̧ jä̧kua̧,» jü̧nä̧.
Currently Selected:
San Lucas 13: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
