San Lucas 12

Jesú-mä̧ ä'koyättü esetäkuäwokü wo̧juȩti̧nü̧

(Mt 10.26-27)

1Ja̧'wa̧nü̧ ja̧'a̧ jakuänä̧, ttü̧ja̧ rekuätü ka̧ka̧kui̧nä̧tü̧, rü̧ȩnä̧ ppi̧ttä̧chä̧rü̧nä̧ päi'ünä̧. Ä̧kuo̧mȩnä̧mä̧, u̧wo̧juȩtä̧u̧rü kkä̧mä̧dü̧ ji'äwinü̧: Fariseo wotü ttu̧ju̧nä̧rü̧ levadura-nä̧mä̧ ppäkuächi'ätukuä, jua̧u̧mä̧ ä'koyättü esetü jȩä̧kuä̧wä̧tä̧ ja̧'a̧ pä'ü. 2Isopäi'ünä̧ yä̧wä̧i̧nä̧tä̧, da̧jä̧rä̧kuä̧wä̧mä̧ juiya'a; ja̧'wa̧ta̧nü̧ ttu̧ttȩpä̧ri̧'ü̧ juiyünä̧ ä̧ppü̧tä̧rä̧kuä̧wä̧'i̧nä̧ juiya'a. 3Ja̧'wa̧nü̧ ja̧'a̧ yo̧mȩttü̧ päkuätukumä̧, tȩya̧wo̧mȩttü̧ kuä̧ju̧kuä̧kuo̧tü̧jä̧; ja̧'wa̧ta̧nü̧ kuoduttü kukuokuäjätukumä̧, isode wä̧mȩttü̧ jittäwa'a kuä̧ju̧kuä̧kuo̧tü̧jä̧.

¿Ji̧nä̧somä̧ dirü yekuäkuäwa'ajättü̧?

(Mt 10.28-31)

4Ja̧'wa̧nü̧ ja̧'a̧ttü̧ ukuturu pä'üsä chawaruwä: Kuidepätukutä toe'ächünä̧ kuä'ü ikuätürümä̧ yekuekuätukuä, juätümä̧ jua'a yabonü̧mä̧ jȩttü̧ juiyünä̧ wotü. 5Ja̧'wa̧nü̧ ja̧'a̧nä̧, ji̧nä̧so yettekuajakuru ji'äusä: Ji̧nä̧somä̧ ye'ekuätukui tta̧'kua̧rü̧ kuä'ü ikuipü'ka̧'i̧nä̧, okurära̧'a̧ do'opü ikuru. Isopäi'ünä̧ a̧, jua̧u̧tä̧ ja̧'a̧ ye'ekuäkuäwa̧mä̧.

6¿Ppi̧yu̧ ji̧mü̧tȩ ruwärü, to̧bi̧rȩnä̧tä̧ pä'ü iyäwa'akü̧ pädä'ijä'ä? Ja̧'wa̧nü̧ ja̧'a̧nä̧, Dio-mä̧ juätüttümä̧, ya̧tȩrü̧'i̧nä̧ yoriso u̧ni̧chi'okü. 7Jua̧u̧ jü̧ta̧'a̧nü̧, kuwo'chetuku'i̧nä̧ o'kajuiyütä pa̧ja̧tü̧ kku̧nä̧wa̧'a̧. Ja̧'wa̧nü̧ ja̧'a̧ttü̧ yekuekuätukuä; ukutumä̧ ppi̧yu̧ttü̧'i̧nä̧ abonä̧nü̧ mikuäwätüjä̧.

Jesú-ru ä̧ppü̧tä̧rä̧kuä̧wo̧kü̧ wȩnȩ

(Mt 10.32-33; 12.32; 10.19-20)

8Ukuturu pä'üsä, ya̧tȩ ttü̧ja̧ ttä'ka jo̧mȩttü̧, ttüku icha'a ji'äurumä̧ ja̧'wa̧ta̧nü̧ ubo I̧tti̧'i̧nä̧ chutäku icha'a jiäwäkua̧, Dio umüwäyotü á̧gȩrȩ ttä'ka jo̧mȩttü̧; 9Ja̧'wa̧nü̧ ja̧'a̧nä̧, ttüku ichoka'a ttü̧ja̧ ttä'ka jo̧mȩttü̧ ji'äwokürümä̧ ja̧'wa̧ta̧nü̧ Dio umüwäyotü á̧gȩrȩ ttä'kattü'i̧nä̧ ttüku ichoka'a ji̧dä̧wä̧kua̧sä̧.

10O'katoi'ünä̧ ubo I̧tti̧rü̧, kkorojuei suronä̧ pä'ätürümä̧, mikuämä̧ pä'äwokotü ttäkuotü.

11Ukuturu sinagoga odewiyära̧'a̧ ttȩpü̧ttü̧'i̧nä̧, Juez jü̧nä̧ wotü ttü̧'ȩjo̧mȩ ttȩpü̧ttü̧'i̧nä̧ ja̧'wa̧ta̧nü̧ ukuo isotü ttü̧'ȩjo̧mȩ ttȩpü̧ttü̧'i̧nä̧, tta̧'a̧nü̧ tädätäkua'ajó, toku jitäwäkua'ajó pä'ümä̧ kua̧'kua̧ tta̧kuȩkuä̧tu̧kuä̧. 12Ja̧'wa̧nü̧ jo̧mȩnä̧mä̧, Epíritu Sa̧tu̧ u̧wo̧juȩtä̧kuä̧u̧jä̧ kukuokuätukua pä'ümä̧.

Pärätä ru̧wa̧ u̧wo̧jui̧'i̧'o̧kü̧ wȩnȩ

13Ttü̧ja̧ ttü̧'kä̧tȩ jo̧mȩ kkä̧nü̧, ya̧tȩ Jesú-ru pä'inü̧:

—Wo̧juȩkuä̧ i̧sa̧, Chubuorü ji'äwiyittü, tä'o iyipinü̧ 'kȩ'ȩpü̧ iyattü.

14Ja̧'wa̧nü̧ päiyäku Jesú-mä̧ ädätinä̧ku̧:

—Cha̧wa̧ru̧wa̧, ¿Ukuturu Juez jü̧nä̧ 'kȩ'ȩpä̧'chü̧ chiya pä'ümä̧, dí ütinä̧ttü̧ttü̧?

15Ja̧'wa̧ta̧nü̧ päinä̧u̧:

—Tta̧'a̧rä̧kuä̧u̧ kka̧kuä̧tu̧kui̧, pi̧jä̧ttü̧ kku̧nä̧rä̧kuä̧wä̧ kkü'kekunä̧ usäwänä̧ ma̧kuä̧mä̧tu̧ku̧ juiyäkua'anü̧; isopäi'ünä̧ ttiäre rü̧ȩnä̧ ttu̧ju̧nä̧ra̧ja̧ pä'üdä̧jä̧, tta̧'kua̧rü̧mä̧ kku̧nä̧rä̧kuä̧wo̧kü̧ ja̧'a̧.

16Ja̧'wa̧nü̧ ja̧'a̧, Jesú-mä̧ pi̧yȩnä̧ wȩnȩtü̧ jiäwinä̧u̧: Ru̧wa̧ ya̧tȩ kki̧nü̧, ü'ättiyunä̧ kuäwä rü̧ȩnä̧ wȩji̧yä̧ku̧. 17Ja̧'wa̧nü̧ ji̧yä̧ku̧ amükuädinü̧: ¿Kuäwä wa'adü chu̧ju̧no̧mȩ juiya'amä̧, toku jȩchä̧kua̧'a̧jä̧ttü̧? 18Pä'äji̧'ka̧ pä'inü̧: Täkü wo̧jui̧'ü̧sä̧ jȩchä̧kuȩmä̧. Kuäwä chütä'ijü o̧ka̧ pparopü iku, pärokuä bäreu o̧ka̧ chaditajä̧, juȩnȩ chu̧kuȩ kuäwä'i̧nä̧ ja̧'wa̧ta̧nü̧ kkoro'i̧nä̧ wa'adü chu̧ju̧nä̧kua̧'a̧nü̧. 19Ja̧'wa̧nü̧ jȩpü̧ kä̧'ä̧di̧'ü̧'ka̧, cha̧mü̧nä̧ pä̧dä̧wä̧kua̧sä̧: Juiyo rekuo mo̧ro̧ kkä̧kuä̧wo̧mȩ kku̧nä̧rü̧jä̧ cha̧'kua̧rü̧wa̧: Jitämä̧, 'kuä'ächi'ü au, kuä̧nü̧, esewi. 20Ja̧'wa̧nü̧ ja̧'a̧nä̧, Dio-mä̧ pä̧kua̧: «Kuamükuädü jui̧'a̧jä̧, pi̧yȩtä̧ yodó 'korupäkui'ä'kua'anä̧, uku wa'adü ku̧ju̧nä̧'i̧jü̧mä̧ ¿dí iare jä̧kua̧'a̧jä̧ttü̧? 21Ja̧'wa̧nü̧ 'kuäopäku, a̧mü̧nä̧ pa̧ja̧tü̧ pärätä ka̧ka̧tü̧rü̧mä̧; ja̧'wa̧ta̧nü̧ Dio-ttümä̧ usurä i̧sa̧tä̧ wa̧.»

Dio-mä̧ i̧tti̧mü̧rü̧ tta̧'ä̧rü̧

(Mt 6.25-34)

22Jua̧u̧nü̧ o'ka'a Jesú-mä̧ u̧wo̧juȩtä̧u̧rü pä'inü̧: Pi̧yȩ ukuturu pä'üsä: Kua̧'kua̧rä̧tu̧ku̧ jäwämä̧, kua̧'kua̧ rokuekuätukuä, däjé chukuäkua'ajó pä'ümä̧; ja̧'wa̧ta̧nü̧ kuidepätuku jäwä'i̧nä̧, däjé chü̧'ka̧tä̧wä̧kua̧'a̧jó pä'ümä̧. 23Isopäi'ünä̧ tta̧'kua̧rü̧mä̧ ttu̧kuȩttü̧'i̧nä̧ abonä̧nü̧ mikuäu ja̧'a̧ ja̧'wa̧ta̧nü̧ ttidepä jättäjimä̧, ttü̧'ka̧tä̧wä̧ti̧yu̧ttü̧'i̧nä̧ abonä̧nü̧ mikuäu ja̧'a̧. 24Ppi̧yu̧ru̧ amükuädü topätukui: Kuäwämä̧ kku̧ni̧pü'kotümä̧, ka̧ka̧tü̧ i̧so̧ka̧nä̧ kku̧no̧ko̧tü̧ ja̧'a̧nä̧, Dio-mä̧ u̧kuä̧jȩ'ä̧u̧. ¿Ukutumä̧, juätüttü'i̧nä̧ abonä̧nü̧mä̧ mikuäwokotüjä̧ tä̧jí̧? 25¿Ja̧'wa̧ta̧nü̧ ukututtü ya̧tȩ, a̧'kua̧ ro'eku, ya'ute ttü̧yü̧'ka̧ri̧ jo̧mȩnä̧ üotodäkuäwa päüttümä̧, üotodäkuäu'anü̧ ja̧'a̧ tä̧jí̧? 26Jua̧u̧ ji̧'ki̧cha̧jü'i̧nä̧, kuiweyekuätukua'anä̧ ¿Tta̧'a̧nü̧ pä'ü kkorojueinä̧mä̧ kua̧'kua̧ rokuekuätukua'ajä̧ttü̧?

27Topätukui ä̧'u̧ oimä̧; aditü'i̧nä̧ aditokü ja̧'a̧nä̧, ü̧'ka̧tä̧wä̧ti̧yu̧'i̧nä̧ 'tü̧'o̧kü̧ ja̧'a̧nä̧ büó juoü. Ru̧wa̧ Salomón'i̧nä̧, rü̧ȩnä̧ uruwo kku̧nä̧rü̧ ja̧'a̧nä̧, jua̧u̧ jü̧'a̧nü̧mä̧ 'ka̧tä̧wo̧kü̧ pinü̧. 28Ja̧'wa̧nü̧ jo̧ka̧'a̧'i̧nä̧, isä'kua jitä mo̧ro̧mä̧ de'a kkä̧'kua ja̧'a̧nä̧, yo̧i̧mo̧ro̧mä̧ kku ikuäwäkuä'kua'i̧nä̧, Dio-mä̧ ü̧'ka̧ta̧'a̧mä̧, ¿jua'a abonä̧nü̧, ukuturumä̧, ü̧'ka̧to̧ka̧'a̧ jä̧kua̧'a̧ tä̧jí̧? 29Ja̧'wa̧nü̧ ja̧'a̧ttü̧, kua̧'kua̧ tta̧kuȩkuä̧tu̧kuä̧, däjé tukuäkua'ajó ja̧'wa̧ta̧nü̧ däjé tawäkua'ajó pä'ü, kua̧'kua̧ ro'ekumä̧. 30Isopäi'ünä̧ pi̧yȩ o'kajuiyünä̧ amükuädü tta̧'kua̧ ro'ekuätümä̧, pi̧jä̧ ttü̧ja̧tä̧ ja̧'a̧ ja̧'wa̧nü̧ ja̧'a̧nä̧ ukutu Kuä'otukumä̧, pi̧yȩ rekuä rü̧ja̧'a̧mä̧, täkü u̧wo̧juö̧tä̧ ja̧'a̧. 31Ja̧'wa̧nü̧ ja̧'a̧ttü̧ ä̧kuo̧mȩnä̧mä̧, Ru̧wa̧ Dio weütä usätukui, kusätukuomȩnä̧, pi̧yȩ rekuä rü̧jü̧ o'kajuiyünä̧mä̧ kuȩmä̧kuo̧tü̧jä̧.

Mo̧ro̧jä̧nä̧ttü̧ rü̧ȩnä̧ mikuäu

(Mt 6.19-21)

32Yekuekuätukuä, chä̧ji̧mü̧ oweja-tü̧; ukutumä̧ a̧'u̧ku̧nä̧tä̧ wotü kuätukua'anä̧, Kuä'otukuru adiwomȩnä̧ uruwo weü iyinä̧u̧jä̧ 33Ku̧ju̧nä̧rä̧tu̧ku̧mä̧ mikuä pä'ü iyä'chü ikuätukui, usurä isotürü ppäkuädätukua; kusakuyutuku kerächokoyutä, mo̧ro̧jä̧ra̧'a̧ pärätä beipokomȩtä̧ aditätukui, nä̧u̧kuä̧rü̧'i̧nä̧ doächokomȩtä̧ ja̧'wa̧ta̧nü̧ isotü'i̧nä̧ surojuottepokomȩtä̧. 34Ja̧'wa̧nü̧ ja̧'a̧ttü̧, kuiäre mikuäu kko̧mȩtä̧, kkä̧kua̧'a̧ kua̧mi̧'iso'kimä̧.

Jo̧mȩnü̧ tta̧'ä̧rü̧ kkä̧kuä̧wä̧ wȩnȩ

35Jo̧mȩnü̧ jȩpä̧kuä̧wi̧'ü̧ ja̧'wa̧ta̧nü̧ jo̧mȩnü̧ ra̧pa̧ra̧ rȩdȩti̧'ü̧ kka̧kuä̧tu̧kui̧; 36Ja̧'wa̧ta̧nü̧ ukutumä̧, yotüte ttu̧ru̧wa̧ pä'kärira̧'a̧ttü̧ icha'a ja̧'a̧, ichi'ü woomȩnä̧ jo̧mȩnü̧ battepa pä'ü, tta̧ttä̧ra̧jü̧'a̧nü̧ tta̧'a̧rä̧tu̧kui̧. 37Rü̧ȩnä̧ eseäkuäwä kka̧'a̧, ttu̧ru̧wa̧ ichomȩnä̧ ttä'i'oka'a to̧pä̧rä̧tü̧rü̧mä̧. Isopäi'ünä̧tä̧ ttu̧ru̧wa̧mä̧ chutätä ü̧'ka̧tä̧wä̧ta̧ ti̧'ä̧dä̧kuä̧wo̧po̧'ü̧, mesa isodänä̧ ttü̧'ä̧mä̧da̧ pä'ü we'ü, ttu̧kuȩ i̧yä̧'chä̧kuä̧u̧. 38Eseäkuäwä rü̧ȩnä̧ kka̧'a̧, yodó kkä'ko ichaja pä'üdä̧jä̧ ja̧'wa̧ta̧nü̧ mo̧ro̧ juoa'aku ichaja pä'üdä̧jä̧, ttä'i'oka'a to̧ttä̧ro̧mȩnä̧mä̧. 39Pi̧yȩ adiu ä̧ju̧kuä̧tu̧kui̧, ya̧tȩ isode u̧ru̧wa̧, nä̧u̧kuä̧rä̧kuä̧wä̧ i̧sa̧ ichäkuomȩ u̧wo̧juö̧ttü̧mä̧, ojusode jäwä ü̧nä̧u̧kua̧'a̧nä̧mä̧ ja̧'a̧tä̧ topokü pajü. 40Ja̧'wa̧nü̧ jü̧ta̧'a̧nü̧ ukutu'i̧nä̧ jo̧mȩnü̧ tta̧'ä̧rü̧ kka̧kuä̧tu̧kui̧; isopäi'ünä̧ ubo I̧tti̧mä̧ tta̧kuä̧rä̧tu̧kuo̧ko̧mȩnä̧ i̧chä̧kua̧.

Umüwäyotüttü ukuotinü̧'i̧nä̧, ukuotoküpinü̧'i̧nä̧ jü̧nä̧

(Mt 24.45-51)

41Ja̧'wa̧nü̧ ja̧'a̧ Peduru-mä̧ päinä̧ku̧:

—Chu̧ru̧wa̧, ¿pi̧yȩ wȩnȩtü̧ päkuäjimä̧, ujuturutä päkua'a, kkorotü o'katoi'ünä̧rü̧'i̧nä̧ päkua'a?

42Päiyäku Jesú-mä̧ ädätinä̧ku̧: ¿Dí ja̧'a̧jä̧ttü̧ ukututtü u̧ru̧wa̧ iäre adiu wo̧juȩku̧nä̧ tta̧wä̧ra̧ pä'ü u̧ju̧nä̧kua̧mä̧, jua̧u̧ ichomȩnä̧ aditäwä jä̧jí̧ i̧mi̧tarü pä'ü? 43U̧ru̧wa̧ ppa̧wä̧cho̧mȩnä̧ ja̧'wa̧nü̧tä̧ jȩpü̧ ü̧jü̧ttü̧mä̧, jua̧u̧ru̧ rü̧ȩnä̧ eseäkuäwä kka̧'a̧, 44Isopäi'ünä̧ pä'üsä ukuturu, jua̧u̧ u̧ru̧wa̧mä̧ üäre o'kajuiyünä̧ tta̧wä̧rä̧kuä̧wä̧ i̧sa̧ päi'ünä̧tä̧ u̧ju̧nä̧kua̧. 45Ja̧'wa̧nü̧ ja̧'a̧nä̧, jua̧u̧ u̧mü̧wä̧ya̧mä̧, chu̧ru̧wa̧mä̧ jurunä̧nü̧mä̧ ichoküto pä'ü amükuädü, kkorotü chutäku adikuä isotürü, u̧mä̧tü̧rü̧'i̧nä̧, nä̧tü̧rü̧'i̧nä̧ kuäkuäpü jȩpü̧, u̧kuȩ kuä̧nü̧, a̧wä̧rü̧, tä̧'ä̧mä̧'chü̧ jȩü̧ttü̧mä̧, 46Jua̧u̧ päjimä̧ tta̧wä̧ro̧kü̧ mo̧ro̧ ja̧'wa̧ta̧nü̧ tta̧wä̧ro̧kü̧ hora-nä̧ u̧ru̧wa̧mä̧ ichi'ü, usurä ȩmä̧u̧nä̧ ro̧ttȩpa̧rü̧ pä'ü, ukuotokotükutä ppä'ädü i̧kuä̧kua̧.

47Jua̧u̧ u̧mü̧wä̧ya̧mä̧ u̧ru̧wa̧ weinü̧mä̧ u̧wo̧jua̧'a̧nä̧, jo̧mȩnü̧ adikuäkuäwa'i̧nä̧ päoka'attü̧, ukuotadä̧jä̧ päoka'attü̧, rü̧ȩnä̧ kuäkuäpäkuäwä̧kua̧. 48Ja̧'wa̧nü̧ ja̧'a̧nä̧ jua̧u̧ u̧mü̧wä̧ya̧mä̧, ieruwäkuäwa'a jakuänä̧ ro̧ȩkuä̧kuä̧wä̧ jȩü̧ttü̧mä̧, a̧'u̧ku̧nä̧tä̧ kuäkuäpü ro̧ȩkuä̧kua̧; isopäi'ünä̧ o'katoi'ünä̧ rü̧ȩnä̧ iyäwi'ä̧u̧ru̧mä̧, rü̧ȩnä̧ jäekuäkua'a; ja̧'wa̧ta̧nü̧ rü̧ȩnä̧ iyü tta̧'kua̧ ttu̧wȩnä̧ri̧nä̧u̧ru̧mä̧, yaboku jäekuäkuotü.

Jesú jäwänä̧ 'kä̧ttȩkuä̧chü̧ wȩnȩ

(Mt 10.34-36)

49Pi̧jä̧ra̧'a̧ okurä rȩdȩtü̧ ichinü̧sä̧; ja̧'wa̧nü̧ ja̧'a̧ttü̧ ¡täkü kuoa'a tocha pä'üsä! 50Ji̧yȩtȩ usurä ȩmä̧kuä̧wä̧nä̧ 'kuädopa pä'ü rekuä rü̧ja̧'a̧. ¡Jua̧u̧ 'kuäopomȩbü päi'ünä̧ cha̧ja̧wä̧rü̧nä̧ jä̧ku̧sä̧! 51¿Pi̧jä̧ra̧'a̧mä̧ wȩnȩ juiyünä̧ kkä̧kuä̧wä̧ i'kächinü̧kü̧ päkuätukua'a? Ja̧'wa̧nü̧mä̧kü̧ ja̧'wa̧nü̧ ja̧jü̧ jueimä̧ pä'ä'chäkuäu tti̧'kȩ'chä̧wä̧chü̧nä̧ i'kächinü̧sä̧. 52Porü yabokumä̧, yotüte tti̧tti̧mü̧mä̧, ji̧mü̧tȩ ruwä tta'anä̧, wä̧mȩtukuä wotümä̧, ta̧ju̧ wotüku pä'äkuäu 'kȩttȩkuä̧chä̧kuo̧tü̧. 53Jä'omä̧, i̧tti̧rü̧ to'ija̧'a̧ku̧ pä̧kua̧ ja̧'wa̧ta̧nü̧ i̧tti̧mä̧, jä'orü to'ija̧'a̧ku̧ pä̧kua̧. Kka̧ju̧mä̧, kkittijuru to'ija̧'a̧ku̧ päjäkuaju ja̧'wa̧ta̧nü̧ kkittijumä̧, kka̧ju̧ru̧ to'ija̧'a̧ku̧ päjäkuaju; kki̧mi̧yajumä̧, kkü̧jo̧ri̧ju̧ru̧ to'ija̧'a̧ku̧ päjäkuaju ja̧'wa̧ta̧nü̧ kkü̧jo̧ri̧ju̧mä̧, kkimiyajuru to'ija̧'a̧ku̧ päjäkuaju.

'Kuäopümä̧ ttu̧wo̧jua̧'a̧nä̧ wo̧jui̧'o̧ko̧tü̧

(Mt 16.1-4; Mc 8.11-13)

54Ja̧'wa̧ta̧nü̧ Jesú-mä̧ ttü̧ja̧rü̧ pä'inü̧: kkä̧wa̧ ma̧ä̧cha̧'a̧ku̧ttü̧, ajiya isoppa rä̧mä̧da̧'a̧ to'kuätukuomȩnä̧ pä'ätüjä̧: Ajiya icha'a; päkuätukua'amä̧, ja̧'wa̧nü̧tä̧ icha'a. 55Ja̧'wa̧ta̧nü̧, sur pätta'akuttu kkä̧rü̧'koppa düomȩnä̧, pä'ätüjä̧: Rü̧ȩnä̧ du'äkua'a. Jua̧u̧ ja̧jü̧ jueimä̧ päkuätukuta'anü̧, du'a'a. 56¡Ä'koyättütä jȩpä̧tü̧jä̧! Adiu wo̧juȩku̧nä̧ pi̧jä̧ jäwä'i̧nä̧, mo̧ro̧jä̧nä̧ jäwä'i̧nä̧ to'kuätukua'anä̧; ¿tta̧'a̧nü̧ pä'ü, pi̧yȩ mo̧ro̧ 'kuäopümä̧ wo̧juo̧ko̧tü̧jä̧ttü̧?

Tta̧bo̧i̧ya̧ku̧ eseku ikuäwä wȩnȩ

(Mt 5.25-26)

57¿Tta̧'a̧nü̧ pä'ü, adiwomȩnä̧ jü̧mä̧ kua̧mü̧nä̧ pa̧ja̧tü̧ amükuädäkuäu to'kuäkuäwätukuoka'a jä̧u̧ jä̧ttü̧? 58Ya̧tȩ ukuru kärenä̧ ttüta pä'ü we'äjiku, ukuo isotü ttä'ka jo̧mȩ kui̧'chü̧ttü̧mä̧, ji̧nä̧ kui̧'chi̧'ä̧kua̧'a̧ ä'kanä̧ mä̧nä̧ttü̧tä̧ eseku ikuirü ja̧'wa̧nü̧ jȩ'ku̧ juiyüttü̧mä̧, juez ä'ka jo̧mȩtä̧ ttȩpä̧kua̧jä̧, jua'a yabomä̧ su̧ro̧do̧u̧ i̧sa̧rü̧ iyü iku o'ka'a, jua'a yabo jua̧u̧mä̧ kärenä̧ra̧'a̧ rütü ikuaku pä'ütä ja̧'a̧. 59Ja̧'wa̧nü̧ ja̧'a̧ttü̧ ukuru pä'üsä, jua'attümä̧ yoriso, rä'opokü kuä̧kua̧jä̧, rüjí kui̧mi̧ppo̧tä̧bi̧ kuimitäwomȩbü päi'ünä̧.

Currently Selected:

San Lucas 12: PNT13

Highlight

Copy