San Lucas 20
20
Jesú ukuo u̧ju̧nä̧ri̧nü̧ wȩnȩ
(Mt 21.23-27; Mc 11.27-33)
1Ya'ute mo̧ro̧ Jesú-mä̧, Dio-rü ukuokuäkuäwodenä̧ jareü wȩnȩ wo̧juȩtü̧ ü̧ja̧'a̧ jakuänä̧, sacerdote wotü tturuwotü'i̧nä̧, weäwä wȩnȩ wo̧juȩkuä̧ isotü'i̧nä̧, judío-ttü a̧ci̧a̧nu̧ wotü'i̧nä̧ ichi'ü, 2Pättinä̧ku̧: —¿Pi̧yȩmä̧, dí weäwänä̧ jȩ'kua̧'a̧jä̧ttü̧? ¿Ja̧'wa̧nü̧ jü̧ juiyüttü'i̧nä̧, kukuomä̧ dí iyinä̧ku̧ttü̧? 3Pättiyäku, Jesú-mä̧ ädätinä̧u̧:
—Ja̧'wa̧ta̧nü̧ ttü'i̧nä̧ ukuturu ji̧yȩtȩ jä'epüsä: 4¿Dí ji̧na̧'a̧jä̧ttü̧ Ju̧a̧-rü̧ bautizo jȩa̧ pä'ü we'inü̧mä̧, Dio ji̧na̧'a̧ ja̧'wa̧nü̧ jü̧ juiyüttü'i̧nä̧ ttü̧ja̧ ji̧na̧'a̧? 5Pä'ü jäepomȩnä̧, pä'äkuäwinä̧tü̧: «Dio weinä̧ku̧ pätüttümä̧ ¿Tta̧'a̧nü̧ pä'ü kuesetätukuokoku ji̧nä̧ttü̧? pä̧kuä̧u̧jä̧.» 6Ja̧'wa̧ta̧nü̧ ttü̧ja̧ wettinä̧ku̧ päta pä'üdä̧jä̧, o'katoi'ünä̧ inä̧dunä̧ kuä'äu tti̧kuä̧kuä̧u̧jä̧, Ju̧a̧-rü̧mä̧ profeta wa̧ pä'ü ttesetina̧'a̧ttü̧. 7Ja̧'wa̧nü̧ ja̧'a̧ttü̧, Jesú-rumä̧ ädätinä̧tü̧, Ju̧a̧-rü̧ bautizo jȩa̧ pä'ü we'inü̧rü̧mä̧ jerupätüjä̧, jü̧nä̧. 8Ja̧'wa̧nü̧ ttädätäku Jesú'i̧nä̧ päinä̧u̧:
—Jua̧u̧nu̧mä̧ ttü'i̧nä̧, ttürü jidäwa pä'ü we'inü̧rü̧mä̧ ji'äwoküsä.
Adikuä ttü̧ja̧ suronä̧ jȩtti̧na̧'a̧ wȩnȩtü̧ ji'äwinü̧
(Mt 21.33-44; Mc 12.1-11)
9Jua̧u̧nü̧ o'ka'a Jesú-mä̧ ttü̧ja̧rü̧ ukuoku, pa̧'a̧nü̧ kkä̧mä̧dü̧ wȩnȩtü̧ ji'äwinü̧: Ya̧tȩ uwa pätta aditü kku̧ni̧pü̧, mikuänä̧ kkorotürü ttadita pä'ü we'ipütä kkara'a i̧wi̧nü̧. 10I̧wi̧nü̧'ka̧, u̧wä̧ju̧ wȩjü̧ pä̧nä̧ päi'omȩnä̧, u̧mü̧wä̧ya̧rü̧ we'inü̧, juätürü ttimitarü pä'inü̧ u̧wä̧ju̧ jäepäjiyarü pä'ü; ja̧'wa̧nü̧ weäjäku u̧mü̧wä̧ya̧rü̧mä̧, ttiyoka'atä, kuäkuäpü we'ü ttikuinä̧ku̧. 11Ja̧'wa̧nü̧ jä̧ji̧yä̧ku̧, pätta u̧ru̧wa̧mä̧ kka̧ra̧ u̧mü̧wä̧ya̧rü̧ we'inü̧; jua̧u̧ru̧'i̧nä̧ ra̧wä̧rü̧, kuäkuäpü jui̧'a̧rü̧tä̧ we'ü ttikuinä̧ku̧. 12Ji̧nä̧ pä'äji jä̧ji̧ta̧'a̧nü̧, wäbodäkuä päi'ünä̧ kka̧ra̧ u̧mü̧wä̧ya̧rü̧ we'inü̧; ja̧'wa̧ta̧nü̧ piderü'i̧nä̧, adikuä ttü̧ja̧mä̧, kuäkuäpäjä'kotü u̧mi̧ rä'epü ikuinä̧tü̧. 13Ja̧'wa̧nü̧ jȩttä̧'chi̧yä̧ku̧mä̧, pätta u̧ru̧wa̧mä̧ pä'inü̧: ¿Däjetä jȩchü̧'a̧nü̧ttü̧? Jua̧u̧nu̧mä̧, chi̧tti̧ rȩni̧'a̧rü̧tä̧ weda; jua̧u̧ru̧mä̧ ttukuotäkuotü 'kua̧'ra̧'a̧. 14Ja̧'wa̧nü̧ ja̧'a̧nä̧ adikuä isotümä̧, jua̧u̧ru̧ topü pä'inä̧tü̧: Pide jä̧kua̧'a̧ pätta u̧ru̧wa̧ päi'ä̧kua̧mä̧, kuä'ü tikuarü ujututä pätta uruwotü päti'äkua'anü̧. 15Ja̧'wa̧nü̧ pä'ü, uwa pättattü rä'epächü, kuä'ü ttikuinä̧ku̧. ¿Ja̧'wa̧nü̧ ji̧na̧'a̧mä̧, uwa pätta u̧ru̧wa̧mä̧, däjé jȩä̧kuä̧u̧jä̧ttü̧ juätürümä̧? 16Däjé pättoka'anü̧, ichi'ü kuä'äu iku, kkorotürütä i̧yä̧kua̧ uwa pättamä̧.
Jesú pi̧yȩ jiäwa'a ä̧ju̧ku̧ pä'inä̧tü̧:
—¡Jua̧u̧mä̧ 'kuäopoka'a jä̧kua̧'a̧!
17Ja̧'wa̧nü̧ ja̧'a̧nä̧ Jesú juätürü topünü̧ päinä̧u̧:
—Ja̧'wa̧nü̧ jü̧ttü̧mä̧ ¿Pi̧yȩ wȩyu̧kuä̧ wȩnȩmä̧ toku pä'ü pä'ajä̧ttü̧?
Ido'ki, isode adikuä isotü ttüjü'koko'ki ji̧no̧'kimä̧
pärowächina̧'a̧, ukuo iso'ki jü̧nä̧tä̧.
18O'katoi'ünä̧ juo'kinä̧ ma̧'ä̧tü̧mä̧ ttü'toräwächäkuotü; ja̧'wa̧ta̧nü̧ juo'ki, ya̧tȩrü̧ ma̧ü̧ttü̧mä̧, i̧sa̧ppȩtä̧ pä̧i̧'ä̧kua̧.
19Sacerdote wotü tturuwotü'i̧nä̧, weäwä wȩnȩ wo̧juȩkuä̧ isotü'i̧nä̧, ji̧yȩja̧mä̧ ujuturutä pätetü pä'a pä'ü, jua̧u̧tä̧ hora-nä̧ Jesú-ru 'chuttäda pätta'anä̧ ttü̧ja̧rü̧ ye'ekuinä̧tü̧.
Roma-ra̧'a̧ iyäwä pärätä tü'kü jä'epü ä̧ju̧kui̧nä̧tü̧
(Mt 22.15-22; Mc 12.13-17)
20Ja̧'wa̧ta̧nü̧ Jesú-ru 'chuttäda pä'ümä̧, ukuotätü 'kua̧rü̧nä̧ jȩpä̧tü̧rü̧ yä̧wȩi̧nä̧ we'inä̧tü̧; Chutä ukuoku ji̧yȩnä̧tä̧ wȩnȩtü̧ 'chu'ädü, Roma wȩ'ä̧wa̧ ru̧wa̧ gobernado-rü iyü ttikuarü pä'ü. 21Juätü wȩttä̧jä̧u̧mä̧ Jesú-ru pä'inä̧tü̧:
—Chu̧ru̧wa̧, ukurumä̧ wo̧juä̧tü̧jä̧, isopäi'ünä̧ jueü wȩnȩtä̧ ukuoku wo̧juȩtü̧ pä'ümä̧. Ja̧'wa̧ta̧nü̧ ttü̧ja̧rü̧ pä̧wä̧rü̧jü̧ ku̧wo̧juȩto̧ka̧'a̧, Dio u̧mä̧nä̧mä̧ jueünä̧tä̧ ku̧wo̧juȩta̧'a̧ttü̧. 22Jua̧u̧nu̧mä̧ ¿Ru̧wa̧ Césa-rü timi̧tä'ijü impuestomä̧ adiwa'a tä̧jí̧, suroja'a tä̧jí̧? 23Jesú-mä̧ suronä̧ ttamükuäda'a u̧wo̧jua̧'a̧ttü̧ juätürü pä'inü̧: ¿tta̧'a̧nü̧ pä'ü kka̧kuä̧mȩ'ü̧ to'kuätukuäkusättü̧? 24—Poku iyätukuittü pä̧rä̧tä̧bi̧. ¿Pi̧bi̧nä̧mä̧ dí a̧'kua̧juä̧ pa̧'a̧kuä̧ttü̧, dí i̧mi̧jä̧ttü̧? päomȩnä̧, ttädätinä̧ku̧:
—Ru̧wa̧ Césa, 25pättiyäku, Jesú-mä̧ päinä̧u̧:
—Jua̧u̧nu̧mä̧, Césa-rümä̧ Césa jäwätä iyätukui ja̧'wa̧ta̧nü̧ Dio-rümä̧, Dio jäwätä iyätukui. 26Päomȩnä̧, i̧wȩnȩnä̧mä̧ wȩnȩtü̧ 'chuttädü juiyünä̧ jä̧u̧, to̧o̧ jü̧nä̧tä̧ kka̧kui̧pi̧nä̧tü̧, wo̧juȩku̧nä̧ ädätäu̧ ttü̧ja̧ ttä'kattü.
Ttoächäkuäwä tü'kü jä'epü ä̧ju̧kui̧nä̧tü̧
(Mt 22.23-33; Mc 12.18-27)
27Ja̧'wa̧ta̧nü̧ saduceo wotümä̧, wa'ü ikuipü'kotümä̧ ttoächäkuäwokü pä'ü esetätü ja̧'a̧ Jesú-ru topü 'chä̧jä̧'kotü, jä'epü ttä̧ju̧kui̧nä̧ku̧: 28—Chu̧ru̧wa̧, Moisé-mä̧ wȩyu̧tu̧ üti'inä̧u̧jä̧: Ya̧tȩ irekuarü kkä̧nü̧, kkä̧nü̧ i̧tti̧mü̧ toa'anä̧ 'korujuoächomȩnä̧mä̧, i̧jä̧wa̧mä̧ juäju rekuarü irekua päi'ünä̧ ȩma̧ pä'ü, ubüo o̧'ka̧ i̧tti̧mü̧rü̧ yoepäkua'anü̧. 29Ja̧'wa̧nü̧ ja̧'a̧mä̧ yotüte i̧jä̧wa̧tu̧ku̧mä̧ kko̧ro̧mü̧ttü̧nü̧ ta̧ju̧ winä̧tü̧. Ä̧kuo̧mȩnä̧ i̧sa̧mä̧ irekuarü ȩmä̧ja̧'a̧nä̧ i̧tti̧mü̧ toa'anä̧ 'korujuo'ächinü̧. 30Juȩnȩ o'komȩnä̧ i̧sa̧'i̧nä̧, juäjuru ȩmä̧ja̧'a̧nä̧ i̧tti̧mü̧ to̧'a̧tä̧ 'korujuo'ächinü̧. 31Ja̧'wa̧ta̧nü̧tä̧ 'kuäopina̧'a̧ yabonä̧ i̧sa̧rü̧'i̧nä̧, kkorotü awaruwärü'i̧nä̧ o'katoi'ünä̧rü̧tä̧. Ja̧'wa̧nü̧ ja̧'a̧ttü̧ ya̧tȩ'i̧nä̧, tti̧tti̧mü̧mä̧ toünä̧tä̧ wa'ü ikuinä̧tü̧. 32Jua̧u̧nü̧ o'ka'a, rüjinä̧mä̧, isaju'i̧nä̧ 'korujuo'ächinä̧ju̧. 33Ja̧'wa̧nü̧ ji̧na̧'a̧ ja̧'a̧, ttottächomȩnä̧mä̧, ¿Juätü sietenü̧ winä̧tü̧ttü̧mä̧, dí irekua jä̧kua̧ju̧ttü̧, o'katoi'ünä̧ ttirekua ji̧na̧'a̧mä̧? 34Pättiyäku Jesú-mä̧ ädätinä̧u̧:
—Pi̧jä̧nä̧ ttü̧ja̧mä̧ ttirekuarü ȩmü̧ ü'käu kka̧kuä̧wä̧tü̧. 35Ja̧'wa̧nü̧ ja̧'a̧nä̧, jitü wa'arettü ttoächäkuäwänä̧'i̧nä̧, ji̧yȩnü̧ mo̧ro̧ kkä̧kuä̧wä̧kuȩ'i̧nä̧ po̧kui̧pä̧tü̧mä̧, ubo ja̧ pä'ü'i̧nä̧, isaju ja̧ pä'ü'i̧nä̧, täkü ttirekuarümä̧ ȩmä̧wo̧ko̧tü̧ ttäkuotü. 36Pä'ejita'a̧nü̧mä̧ wa'ü ttiku juiyünä̧ ja̧'a̧ttü̧. Á̧gȩrȩ jü̧'a̧nü̧tä̧ ttäkuotü. Wa'arettü kki̧'i̧kuä̧ i̧tti̧mü̧ tta'attü̧, Dio i̧tti̧mü̧tä̧ ttäkuotü, ttottächü o'ka'amä̧. 37Ja̧'wa̧ta̧nü̧ wa'arettü ttoächäkuäwä tü'kümä̧, Moisé'i̧nä̧ u̧wo̧juȩti̧nü̧, zarza dau kuoinomȩ jä̧'i̧jo̧mȩ. Tu̧ru̧wa̧ Dio-rü, Abraha̧ ü̧ä̧nä̧wa̧, Isaac ü̧ä̧nä̧wa̧, Jaco ü̧ä̧nä̧wa̧ päino̧mȩ jä̧'i̧jo̧mȩ. 38Isopäi'ünä̧ tü̧ä̧nä̧wa̧ Dio-mä̧, wa'inä̧tü̧ ttü̧ä̧nä̧wa̧ Dio-mä̧kü̧, a̧'kua̧rä̧tü̧ ttü̧ä̧nä̧wa̧ Dio ja̧'a̧. Isopäi'ünä̧ jua̧u̧ru̧mä̧ o'katoi'ünä̧tä̧ a̧'kua̧rä̧tü̧ ja̧'a̧. 39Pä̧i̧yä̧u̧ weäwä wȩnȩ wo̧juȩkuä̧ isotüttü yotütemä̧ pättinä̧ku̧:
—Chu̧ru̧wa̧, jueünä̧tä̧ pä'üjä̧. 40Ja̧'wa̧nü̧ jä̧ji̧ o'ka'amä̧, yabonü̧mä̧ jä̧ttȩpä̧ra̧rü̧ pä'okotü pinä̧tü̧.
¿Crito-mä̧ díttü ichinü̧jä̧ttü̧? Pä'ü jä'epü ä̧ju̧kui̧nä̧u̧
(Mt 22.41-46; Mc 12.35-37)
41Jesú-mä̧ jä'epü ä̧ju̧kui̧nä̧u̧:
—¿Tta̧'a̧nü̧ pä'ü Crito-rümä̧, Dawi isotü i̧sa̧ pätta'ajä̧ttü̧? 42Chutä Dawi'i̧nä̧, Salmos kuyäru'tänä̧mä̧:
«Ji̧nä̧so ru̧wa̧mä̧, Chu̧ru̧wa̧rü̧ pä'inü̧:
Chu̧wo̧jua̧'a̧ku̧nä̧ pä̧mä̧di̧, jü̧nä̧.
43Kuaboiyotürü ku̧jä̧pü̧ dȩa̧'a̧
kutomebü päi'ünä̧.»
44¿Jua̧u̧nu̧mä̧, toku pä'ü Crito-mä̧ Dawi-ttü ichinü̧ pä'attü, chutä Dawi'i̧nä̧, Chu̧ru̧wa̧ päinä̧ku̧ ja̧'a̧mä̧?
Jesú-mä̧ suronä̧ jȩtti̧yä̧ku̧ ro̧'ȩpi̧nü̧
(Mt 23.1-36; Mc 12.38-40; Lc 11.37-54)
45O'katoi'ünä̧ ttä̧ju̧kuä̧ro̧mȩttü̧, Jesú-mä̧ u̧wo̧juȩtä̧u̧rü pä'inü̧: 46«Weäwä wȩnȩ wo̧juȩkuä̧ isotürü ttu̧'ȩpä̧rä̧kuäu̧nu̧ kka̧kuä̧tu̧kui̧, ttü̧'ka̧tä̧wa̧ta̧ o̧to̧ä̧ta̧ 'ka̧tä̧wä̧tü̧rü̧, ttu̧kuȩ ȩmä̧wo̧mȩttü̧ ttü̧ja̧mä̧ ukuotünü̧ tettäwatü pä'ätürü. Ttu̧kuȩ ttukuomȩ'i̧nä̧ adiwomȩtä̧ ttü̧'ȩja̧ pä'ätürü. Ja̧'wa̧ta̧nü̧ sinagoga odewiyättü'i̧nä̧ ukuo dȩä̧kä̧nä̧ ttü̧'ä̧mä̧da̧ pä'ätürü. 47Ja̧'wa̧ta̧nü̧ rȩkua̧mü̧rü̧ ttoju odewiyä 'choipä'chü, adiu jȩpä̧tü̧jä̧ pä'ü, rekuo Dio-rü ukuokuätürü. Juätümä̧ kkorotüttü'i̧nä̧ abonä̧nü̧ usurä ttȩmä̧wä̧kuo̧tü̧.»
Currently Selected:
San Lucas 20: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
San Lucas 20
20
Jesú ukuo u̧ju̧nä̧ri̧nü̧ wȩnȩ
(Mt 21.23-27; Mc 11.27-33)
1Ya'ute mo̧ro̧ Jesú-mä̧, Dio-rü ukuokuäkuäwodenä̧ jareü wȩnȩ wo̧juȩtü̧ ü̧ja̧'a̧ jakuänä̧, sacerdote wotü tturuwotü'i̧nä̧, weäwä wȩnȩ wo̧juȩkuä̧ isotü'i̧nä̧, judío-ttü a̧ci̧a̧nu̧ wotü'i̧nä̧ ichi'ü, 2Pättinä̧ku̧: —¿Pi̧yȩmä̧, dí weäwänä̧ jȩ'kua̧'a̧jä̧ttü̧? ¿Ja̧'wa̧nü̧ jü̧ juiyüttü'i̧nä̧, kukuomä̧ dí iyinä̧ku̧ttü̧? 3Pättiyäku, Jesú-mä̧ ädätinä̧u̧:
—Ja̧'wa̧ta̧nü̧ ttü'i̧nä̧ ukuturu ji̧yȩtȩ jä'epüsä: 4¿Dí ji̧na̧'a̧jä̧ttü̧ Ju̧a̧-rü̧ bautizo jȩa̧ pä'ü we'inü̧mä̧, Dio ji̧na̧'a̧ ja̧'wa̧nü̧ jü̧ juiyüttü'i̧nä̧ ttü̧ja̧ ji̧na̧'a̧? 5Pä'ü jäepomȩnä̧, pä'äkuäwinä̧tü̧: «Dio weinä̧ku̧ pätüttümä̧ ¿Tta̧'a̧nü̧ pä'ü kuesetätukuokoku ji̧nä̧ttü̧? pä̧kuä̧u̧jä̧.» 6Ja̧'wa̧ta̧nü̧ ttü̧ja̧ wettinä̧ku̧ päta pä'üdä̧jä̧, o'katoi'ünä̧ inä̧dunä̧ kuä'äu tti̧kuä̧kuä̧u̧jä̧, Ju̧a̧-rü̧mä̧ profeta wa̧ pä'ü ttesetina̧'a̧ttü̧. 7Ja̧'wa̧nü̧ ja̧'a̧ttü̧, Jesú-rumä̧ ädätinä̧tü̧, Ju̧a̧-rü̧ bautizo jȩa̧ pä'ü we'inü̧rü̧mä̧ jerupätüjä̧, jü̧nä̧. 8Ja̧'wa̧nü̧ ttädätäku Jesú'i̧nä̧ päinä̧u̧:
—Jua̧u̧nu̧mä̧ ttü'i̧nä̧, ttürü jidäwa pä'ü we'inü̧rü̧mä̧ ji'äwoküsä.
Adikuä ttü̧ja̧ suronä̧ jȩtti̧na̧'a̧ wȩnȩtü̧ ji'äwinü̧
(Mt 21.33-44; Mc 12.1-11)
9Jua̧u̧nü̧ o'ka'a Jesú-mä̧ ttü̧ja̧rü̧ ukuoku, pa̧'a̧nü̧ kkä̧mä̧dü̧ wȩnȩtü̧ ji'äwinü̧: Ya̧tȩ uwa pätta aditü kku̧ni̧pü̧, mikuänä̧ kkorotürü ttadita pä'ü we'ipütä kkara'a i̧wi̧nü̧. 10I̧wi̧nü̧'ka̧, u̧wä̧ju̧ wȩjü̧ pä̧nä̧ päi'omȩnä̧, u̧mü̧wä̧ya̧rü̧ we'inü̧, juätürü ttimitarü pä'inü̧ u̧wä̧ju̧ jäepäjiyarü pä'ü; ja̧'wa̧nü̧ weäjäku u̧mü̧wä̧ya̧rü̧mä̧, ttiyoka'atä, kuäkuäpü we'ü ttikuinä̧ku̧. 11Ja̧'wa̧nü̧ jä̧ji̧yä̧ku̧, pätta u̧ru̧wa̧mä̧ kka̧ra̧ u̧mü̧wä̧ya̧rü̧ we'inü̧; jua̧u̧ru̧'i̧nä̧ ra̧wä̧rü̧, kuäkuäpü jui̧'a̧rü̧tä̧ we'ü ttikuinä̧ku̧. 12Ji̧nä̧ pä'äji jä̧ji̧ta̧'a̧nü̧, wäbodäkuä päi'ünä̧ kka̧ra̧ u̧mü̧wä̧ya̧rü̧ we'inü̧; ja̧'wa̧ta̧nü̧ piderü'i̧nä̧, adikuä ttü̧ja̧mä̧, kuäkuäpäjä'kotü u̧mi̧ rä'epü ikuinä̧tü̧. 13Ja̧'wa̧nü̧ jȩttä̧'chi̧yä̧ku̧mä̧, pätta u̧ru̧wa̧mä̧ pä'inü̧: ¿Däjetä jȩchü̧'a̧nü̧ttü̧? Jua̧u̧nu̧mä̧, chi̧tti̧ rȩni̧'a̧rü̧tä̧ weda; jua̧u̧ru̧mä̧ ttukuotäkuotü 'kua̧'ra̧'a̧. 14Ja̧'wa̧nü̧ ja̧'a̧nä̧ adikuä isotümä̧, jua̧u̧ru̧ topü pä'inä̧tü̧: Pide jä̧kua̧'a̧ pätta u̧ru̧wa̧ päi'ä̧kua̧mä̧, kuä'ü tikuarü ujututä pätta uruwotü päti'äkua'anü̧. 15Ja̧'wa̧nü̧ pä'ü, uwa pättattü rä'epächü, kuä'ü ttikuinä̧ku̧. ¿Ja̧'wa̧nü̧ ji̧na̧'a̧mä̧, uwa pätta u̧ru̧wa̧mä̧, däjé jȩä̧kuä̧u̧jä̧ttü̧ juätürümä̧? 16Däjé pättoka'anü̧, ichi'ü kuä'äu iku, kkorotürütä i̧yä̧kua̧ uwa pättamä̧.
Jesú pi̧yȩ jiäwa'a ä̧ju̧ku̧ pä'inä̧tü̧:
—¡Jua̧u̧mä̧ 'kuäopoka'a jä̧kua̧'a̧!
17Ja̧'wa̧nü̧ ja̧'a̧nä̧ Jesú juätürü topünü̧ päinä̧u̧:
—Ja̧'wa̧nü̧ jü̧ttü̧mä̧ ¿Pi̧yȩ wȩyu̧kuä̧ wȩnȩmä̧ toku pä'ü pä'ajä̧ttü̧?
Ido'ki, isode adikuä isotü ttüjü'koko'ki ji̧no̧'kimä̧
pärowächina̧'a̧, ukuo iso'ki jü̧nä̧tä̧.
18O'katoi'ünä̧ juo'kinä̧ ma̧'ä̧tü̧mä̧ ttü'toräwächäkuotü; ja̧'wa̧ta̧nü̧ juo'ki, ya̧tȩrü̧ ma̧ü̧ttü̧mä̧, i̧sa̧ppȩtä̧ pä̧i̧'ä̧kua̧.
19Sacerdote wotü tturuwotü'i̧nä̧, weäwä wȩnȩ wo̧juȩkuä̧ isotü'i̧nä̧, ji̧yȩja̧mä̧ ujuturutä pätetü pä'a pä'ü, jua̧u̧tä̧ hora-nä̧ Jesú-ru 'chuttäda pätta'anä̧ ttü̧ja̧rü̧ ye'ekuinä̧tü̧.
Roma-ra̧'a̧ iyäwä pärätä tü'kü jä'epü ä̧ju̧kui̧nä̧tü̧
(Mt 22.15-22; Mc 12.13-17)
20Ja̧'wa̧ta̧nü̧ Jesú-ru 'chuttäda pä'ümä̧, ukuotätü 'kua̧rü̧nä̧ jȩpä̧tü̧rü̧ yä̧wȩi̧nä̧ we'inä̧tü̧; Chutä ukuoku ji̧yȩnä̧tä̧ wȩnȩtü̧ 'chu'ädü, Roma wȩ'ä̧wa̧ ru̧wa̧ gobernado-rü iyü ttikuarü pä'ü. 21Juätü wȩttä̧jä̧u̧mä̧ Jesú-ru pä'inä̧tü̧:
—Chu̧ru̧wa̧, ukurumä̧ wo̧juä̧tü̧jä̧, isopäi'ünä̧ jueü wȩnȩtä̧ ukuoku wo̧juȩtü̧ pä'ümä̧. Ja̧'wa̧ta̧nü̧ ttü̧ja̧rü̧ pä̧wä̧rü̧jü̧ ku̧wo̧juȩto̧ka̧'a̧, Dio u̧mä̧nä̧mä̧ jueünä̧tä̧ ku̧wo̧juȩta̧'a̧ttü̧. 22Jua̧u̧nu̧mä̧ ¿Ru̧wa̧ Césa-rü timi̧tä'ijü impuestomä̧ adiwa'a tä̧jí̧, suroja'a tä̧jí̧? 23Jesú-mä̧ suronä̧ ttamükuäda'a u̧wo̧jua̧'a̧ttü̧ juätürü pä'inü̧: ¿tta̧'a̧nü̧ pä'ü kka̧kuä̧mȩ'ü̧ to'kuätukuäkusättü̧? 24—Poku iyätukuittü pä̧rä̧tä̧bi̧. ¿Pi̧bi̧nä̧mä̧ dí a̧'kua̧juä̧ pa̧'a̧kuä̧ttü̧, dí i̧mi̧jä̧ttü̧? päomȩnä̧, ttädätinä̧ku̧:
—Ru̧wa̧ Césa, 25pättiyäku, Jesú-mä̧ päinä̧u̧:
—Jua̧u̧nu̧mä̧, Césa-rümä̧ Césa jäwätä iyätukui ja̧'wa̧ta̧nü̧ Dio-rümä̧, Dio jäwätä iyätukui. 26Päomȩnä̧, i̧wȩnȩnä̧mä̧ wȩnȩtü̧ 'chuttädü juiyünä̧ jä̧u̧, to̧o̧ jü̧nä̧tä̧ kka̧kui̧pi̧nä̧tü̧, wo̧juȩku̧nä̧ ädätäu̧ ttü̧ja̧ ttä'kattü.
Ttoächäkuäwä tü'kü jä'epü ä̧ju̧kui̧nä̧tü̧
(Mt 22.23-33; Mc 12.18-27)
27Ja̧'wa̧ta̧nü̧ saduceo wotümä̧, wa'ü ikuipü'kotümä̧ ttoächäkuäwokü pä'ü esetätü ja̧'a̧ Jesú-ru topü 'chä̧jä̧'kotü, jä'epü ttä̧ju̧kui̧nä̧ku̧: 28—Chu̧ru̧wa̧, Moisé-mä̧ wȩyu̧tu̧ üti'inä̧u̧jä̧: Ya̧tȩ irekuarü kkä̧nü̧, kkä̧nü̧ i̧tti̧mü̧ toa'anä̧ 'korujuoächomȩnä̧mä̧, i̧jä̧wa̧mä̧ juäju rekuarü irekua päi'ünä̧ ȩma̧ pä'ü, ubüo o̧'ka̧ i̧tti̧mü̧rü̧ yoepäkua'anü̧. 29Ja̧'wa̧nü̧ ja̧'a̧mä̧ yotüte i̧jä̧wa̧tu̧ku̧mä̧ kko̧ro̧mü̧ttü̧nü̧ ta̧ju̧ winä̧tü̧. Ä̧kuo̧mȩnä̧ i̧sa̧mä̧ irekuarü ȩmä̧ja̧'a̧nä̧ i̧tti̧mü̧ toa'anä̧ 'korujuo'ächinü̧. 30Juȩnȩ o'komȩnä̧ i̧sa̧'i̧nä̧, juäjuru ȩmä̧ja̧'a̧nä̧ i̧tti̧mü̧ to̧'a̧tä̧ 'korujuo'ächinü̧. 31Ja̧'wa̧ta̧nü̧tä̧ 'kuäopina̧'a̧ yabonä̧ i̧sa̧rü̧'i̧nä̧, kkorotü awaruwärü'i̧nä̧ o'katoi'ünä̧rü̧tä̧. Ja̧'wa̧nü̧ ja̧'a̧ttü̧ ya̧tȩ'i̧nä̧, tti̧tti̧mü̧mä̧ toünä̧tä̧ wa'ü ikuinä̧tü̧. 32Jua̧u̧nü̧ o'ka'a, rüjinä̧mä̧, isaju'i̧nä̧ 'korujuo'ächinä̧ju̧. 33Ja̧'wa̧nü̧ ji̧na̧'a̧ ja̧'a̧, ttottächomȩnä̧mä̧, ¿Juätü sietenü̧ winä̧tü̧ttü̧mä̧, dí irekua jä̧kua̧ju̧ttü̧, o'katoi'ünä̧ ttirekua ji̧na̧'a̧mä̧? 34Pättiyäku Jesú-mä̧ ädätinä̧u̧:
—Pi̧jä̧nä̧ ttü̧ja̧mä̧ ttirekuarü ȩmü̧ ü'käu kka̧kuä̧wä̧tü̧. 35Ja̧'wa̧nü̧ ja̧'a̧nä̧, jitü wa'arettü ttoächäkuäwänä̧'i̧nä̧, ji̧yȩnü̧ mo̧ro̧ kkä̧kuä̧wä̧kuȩ'i̧nä̧ po̧kui̧pä̧tü̧mä̧, ubo ja̧ pä'ü'i̧nä̧, isaju ja̧ pä'ü'i̧nä̧, täkü ttirekuarümä̧ ȩmä̧wo̧ko̧tü̧ ttäkuotü. 36Pä'ejita'a̧nü̧mä̧ wa'ü ttiku juiyünä̧ ja̧'a̧ttü̧. Á̧gȩrȩ jü̧'a̧nü̧tä̧ ttäkuotü. Wa'arettü kki̧'i̧kuä̧ i̧tti̧mü̧ tta'attü̧, Dio i̧tti̧mü̧tä̧ ttäkuotü, ttottächü o'ka'amä̧. 37Ja̧'wa̧ta̧nü̧ wa'arettü ttoächäkuäwä tü'kümä̧, Moisé'i̧nä̧ u̧wo̧juȩti̧nü̧, zarza dau kuoinomȩ jä̧'i̧jo̧mȩ. Tu̧ru̧wa̧ Dio-rü, Abraha̧ ü̧ä̧nä̧wa̧, Isaac ü̧ä̧nä̧wa̧, Jaco ü̧ä̧nä̧wa̧ päino̧mȩ jä̧'i̧jo̧mȩ. 38Isopäi'ünä̧ tü̧ä̧nä̧wa̧ Dio-mä̧, wa'inä̧tü̧ ttü̧ä̧nä̧wa̧ Dio-mä̧kü̧, a̧'kua̧rä̧tü̧ ttü̧ä̧nä̧wa̧ Dio ja̧'a̧. Isopäi'ünä̧ jua̧u̧ru̧mä̧ o'katoi'ünä̧tä̧ a̧'kua̧rä̧tü̧ ja̧'a̧. 39Pä̧i̧yä̧u̧ weäwä wȩnȩ wo̧juȩkuä̧ isotüttü yotütemä̧ pättinä̧ku̧:
—Chu̧ru̧wa̧, jueünä̧tä̧ pä'üjä̧. 40Ja̧'wa̧nü̧ jä̧ji̧ o'ka'amä̧, yabonü̧mä̧ jä̧ttȩpä̧ra̧rü̧ pä'okotü pinä̧tü̧.
¿Crito-mä̧ díttü ichinü̧jä̧ttü̧? Pä'ü jä'epü ä̧ju̧kui̧nä̧u̧
(Mt 22.41-46; Mc 12.35-37)
41Jesú-mä̧ jä'epü ä̧ju̧kui̧nä̧u̧:
—¿Tta̧'a̧nü̧ pä'ü Crito-rümä̧, Dawi isotü i̧sa̧ pätta'ajä̧ttü̧? 42Chutä Dawi'i̧nä̧, Salmos kuyäru'tänä̧mä̧:
«Ji̧nä̧so ru̧wa̧mä̧, Chu̧ru̧wa̧rü̧ pä'inü̧:
Chu̧wo̧jua̧'a̧ku̧nä̧ pä̧mä̧di̧, jü̧nä̧.
43Kuaboiyotürü ku̧jä̧pü̧ dȩa̧'a̧
kutomebü päi'ünä̧.»
44¿Jua̧u̧nu̧mä̧, toku pä'ü Crito-mä̧ Dawi-ttü ichinü̧ pä'attü, chutä Dawi'i̧nä̧, Chu̧ru̧wa̧ päinä̧ku̧ ja̧'a̧mä̧?
Jesú-mä̧ suronä̧ jȩtti̧yä̧ku̧ ro̧'ȩpi̧nü̧
(Mt 23.1-36; Mc 12.38-40; Lc 11.37-54)
45O'katoi'ünä̧ ttä̧ju̧kuä̧ro̧mȩttü̧, Jesú-mä̧ u̧wo̧juȩtä̧u̧rü pä'inü̧: 46«Weäwä wȩnȩ wo̧juȩkuä̧ isotürü ttu̧'ȩpä̧rä̧kuäu̧nu̧ kka̧kuä̧tu̧kui̧, ttü̧'ka̧tä̧wa̧ta̧ o̧to̧ä̧ta̧ 'ka̧tä̧wä̧tü̧rü̧, ttu̧kuȩ ȩmä̧wo̧mȩttü̧ ttü̧ja̧mä̧ ukuotünü̧ tettäwatü pä'ätürü. Ttu̧kuȩ ttukuomȩ'i̧nä̧ adiwomȩtä̧ ttü̧'ȩja̧ pä'ätürü. Ja̧'wa̧ta̧nü̧ sinagoga odewiyättü'i̧nä̧ ukuo dȩä̧kä̧nä̧ ttü̧'ä̧mä̧da̧ pä'ätürü. 47Ja̧'wa̧ta̧nü̧ rȩkua̧mü̧rü̧ ttoju odewiyä 'choipä'chü, adiu jȩpä̧tü̧jä̧ pä'ü, rekuo Dio-rü ukuokuätürü. Juätümä̧ kkorotüttü'i̧nä̧ abonä̧nü̧ usurä ttȩmä̧wä̧kuo̧tü̧.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela