San Mateo 6

Adihuä juäi jȩä̧cuä̧huä̧ huȩnȩ huo̧juȩti̧nö̧do

1Jesús pa̧'a̧nö̧ huo̧juȩti̧nö̧do:

—Ja̧'a̧tä̧mä̧ “Diosrö esetösä” päcuhuätucuä' ttö̧ja̧ adiu ttamöcuäda pä'ö ucuturu topö. Ja̧'hua̧nö̧ jȩcu̧'ä̧tu̧cu̧ttu̧mä̧, Cuä'o mo̧ro̧jä̧ra̧'a̧ kö̧mä̧ yoröiso adihuä juäi iyocö ucuturu. 2Ja̧'hua̧nö̧ ja̧'a̧ttö̧ korotö jui'ätörö ppäcuhuädomenä, o'ca toi'önärö jicuhuähuä', korotömä judíos ttu̧huo̧jui̧'i̧nodehuiyättö'inä, ötahuiyättö'inä amönä jȩttö̧'a̧nö̧. Jahuätömä ja̧'hua̧nö̧ jȩpä̧tö̧do pi̧jä̧ ttö̧ja̧ adiu ttucuocuatö pä'ö. Iso päi'önä pä'ösä ucuturu, täcö ȩmä̧tö̧do jȩttö̧ micuä. 3Iso päi'önä jui'ätörö ppäcuhuädomenä, cua̧hua̧ru̧hua̧'i̧nä̧ ieruhuomenä jȩpi̧ 'corunätä. 4Ja̧'hua̧nö̧ jȩcu̧'u̧ttu̧mä̧, Cuä'omä o'ca juiyönä jȩcu̧'u̧ topömä, adihuä juäi i̧yä̧cua̧jä̧.

Diosrö ucuocuäcuähuä huȩnȩ huo̧juȩti̧nö̧do

5“Ja̧'hua̧ta̧nö̧ Diosrö cucuocuätucuomenä, korotö amönä judíos ttu̧huo̧jui̧'i̧nodettö'inä, ötahuiyättö'inä ttö̧ja̧ jahuätörö tottatö pä'ö jȩttö̧'a̧nö̧, jȩcu̧'ä̧tu̧cuä̧'. Iso päi'önä pä'ösä ucuturu, ja̧'hua̧nö̧ jȩtto̧mȩnä̧, ttö̧ja̧ jahuätörö tottomenä, ja̧u̧nu̧tä̧ ȩmä̧tö̧ ttucuocuäji micuä. 6Ja̧'hua̧nö̧ ja̧'a̧ttö̧ ucutu cucuocuätucuomenä, cuojusodenä do'ächö äpate mö̧'ȩpä̧tu̧cui̧. Cuä'o Diosrötä ucutucu kö̧rö̧ ucuocuätucui. Ja̧'hua̧nö̧ ja̧'a̧ttö̧ Cuä'omä, o'ca juiyönä jȩcu̧'u̧ topömä, adihuä juäi i̧yä̧cua̧jä̧.

7“Ja̧'hua̧ta̧nö̧ Diosrö cucuocuätucuomenä, ja̧'a̧tä̧ amönämä cucuocuätucuä' korotömä Diosrö jerupätö ttucuocu'a̧nö̧. Jahuätö amöcuädätö: Rö̧ȩnä̧ tucuocuomenä, Dios ujuturu ä̧ju̧cuä̧cua̧ pä'ö. 8Jahuätö jȩttö̧'a̧nö̧mä̧, jȩcu̧'ä̧tu̧cuä̧'. Cuä'o Dios cucuocuätucu, ä'canä huo̧jua̧ ucuturu pä̧huä̧ rö̧jö̧ cucuocuätucumä. 9Ja̧'hua̧nö̧ ja̧'a̧ttö̧ pa̧'a̧nö̧ ucuocuätucui:

Tä'o Dios, mo̧ro̧jä̧ra̧'a̧ kö̧jä̧.

Ucu cui̧mi̧mä̧ adihuä cui̧mi̧ pä'ö ttucuotaja.

10Ucu o'ca toi'önä ttu̧ru̧hua̧ pä'ö cu̧ja̧ja̧.

Pi̧jä̧nä̧ ucurutä pä̧huä̧ rö̧jö̧mä̧ jȩtta̧ja̧, mo̧ro̧jä̧nä̧ jȩttö̧'a̧nö̧.

11Iyitö cuäcuähuä mo̧ro̧ji̧nö̧ a̧'u̧cuä̧ kö̧nä̧.

12Ja̧'hua̧ta̧nö̧ ujutu suronä jȩtö̧mä̧ jȩpö̧ icu unichi'i,

korotömä ujuturu suronä jȩpä̧tö̧rö̧ jȩttö̧ tunichi'ö'a̧nö̧.

13Ja̧'a̧tä̧mä̧ tocu'ätö ähuettä suronä jȩa̧'a̧nä̧mä̧. Yabocutä surojöttö ejädö icuitö.

Iso päi'önä ucu o'ca juiyönä hue'öjä. Ja̧'hua̧ta̧nö̧ o'ca juiyönä ju̧ru̧hua̧jä̧. Ja̧'hua̧ta̧nö̧ 'cuäopönä o'ca toi'önä ucuru tteseäcuähuäcuotö. Amén.

14“Iso päi'önä korotö ucuturu suronä jȩtto̧mȩnä̧ cunichi'ätucuttumä, Cuä'o Dios mo̧ro̧jä̧nä̧ kö̧ ucutu suronä jȩcu̧'ä̧tu̧cu̧'i̧nä̧ u̧ni̧chi̧'ä̧cua̧. 15Ja̧'hua̧nö̧ ja̧'a̧nä̧ korotö suronä jȩttö̧ cunichi'ätucuoca'a jö̧ttö̧mä̧, Cuä'o Dios unichi'ocö ucutu suronä jȩcu̧'ä̧tu̧cu̧, —pä'ö huo̧juȩti̧nö̧do Jesús.

Ttu̧cuȩ ttucuoca'a a̧do̧chö̧ jȩä̧cuä̧huä̧ huȩnȩ huo̧juȩti̧nö̧do

16Juhua'a yabonö huo̧juȩti̧nö̧do Jesús:

—Ucutumä cu̧cuȩ cucuätucuoca'a a̧do̧chö̧ jȩcu̧'ä̧tu̧cuo̧mȩnä̧, korotömä tta̧'cua̧ tta̧'ȩcu̧ amönä jȩttö̧'a̧nö̧ jȩcu̧'ä̧tu̧cuä̧'. Jahuätömä amönä jȩpä̧tö̧do korotö totta pä'ö ttu̧cuȩ ttucuoca'a tta̧do̧cha̧'a̧. Iso päi'önä pä'ösä ucuturu, ja̧'hua̧nö̧ jȩpö̧ ttö̧ja̧ jahuätörö tottomenä, täcö tta̧do̧chö̧ micuä ȩmä̧tö̧do. 17-18Ja̧'hua̧ ja̧'a̧ ucutu cu̧cuȩ cucuätucuoca'a a̧do̧chö̧ jȩcu̧'ä̧tu̧cuo̧mȩnä̧, cuhuo'che sa̧'ȩcu̧, cu'ä töcäu icuätucui, korotömä ttieruhua pä'ö a̧do̧chö̧ cu̧ja̧cuä̧tu̧cua̧'a̧. Cuä'o Diostä ucutucu kö̧mä̧ to̧ä̧cua̧ a̧do̧chö̧ cucuocuätucuomenä. Ja̧'hua̧ta̧nö̧ ja̧u̧tä̧ adihuä juäi i̧yä̧cua̧jä̧.

Tö̧ä̧nä̧hua̧'a̧tä̧ cua̧'cua̧ huȩnä̧rä̧tu̧cui̧

19“Pi̧jä̧ jähuätä cua̧'cua̧ cu̧huȩnä̧rä̧tu̧cuä̧' isotö ttucui'ömä, tȩmö̧chä̧chö̧ pparuhuächömä, nä̧u̧cuä̧rä̧tö̧ ttö̧nä̧u̧cuä̧rö̧mä̧. 20Tö̧ä̧nä̧hua̧'a̧ jähuätä cua̧'cua̧ huȩnä̧rä̧tu̧cui̧ isotö ttucui'ocötä, tȩmö̧chä̧cho̧cö̧ pparuhuächocötä, nä̧u̧cuä̧rä̧tö̧ ttö̧nä̧u̧cuo̧cö̧tä̧. 21Cua̧'cua̧ cu̧huȩnä̧rä̧tu̧cuo̧mȩtä̧ cuamöcuädäcuotöjä.

Ttö'ärenä uhuähua'a ttidepämä

22“Cu'äremä cuidepä jähuä lámpara jä̧'i̧nö̧'a̧nö̧ ja̧'a̧. Iso päi'önä cu'ärenä adiu uhuäuttumä, cuidepänä o'ca juiyönä tȩa̧hua̧'a̧. 23Juhuorö'inä cu'ärenä adiunä uhuähuoca'a jö̧ttö̧mä̧, cuidepänä o'ca juiyönä yo̧a̧'a̧do. Ja̧'hua̧nö̧ ja̧'a̧ttö̧ cuami iso'quinä tȩa̧huo̧ca̧'a̧ jö̧ttö̧mä̧, iso päi'önä yo̧ö̧nä̧ kö̧jä̧.

Pärätä huȩnȩ huo̧juȩti̧nö̧do

24“Ya̧tȩ uruhuotö ta̧ju̧ huettömä, yoröiso jȩpo̧cö̧. Ta̧ju̧ru̧mä̧ eseunu repe'ocö. Ya̧tȩrö̧tä̧ eseunu rȩpȩä̧cua̧, ka̧ra̧rö̧ repeoca'anä. Ja̧'hua̧ta̧nö̧ ya̧tȩ hueömä eseunu jȩa̧'a̧nä̧, ka̧ra̧ hueömä ra̧huä̧rö̧nö̧tä̧ jȩä̧cua̧. Ja̧'hua̧ta̧nö̧ Diosrö'inä, pärätä'inä ji̧nä̧ yo̧mȩtȩnä̧ amöcuädäcuähuocödo, —pä'ö huo̧juȩti̧nö̧do Jesús.

Dios i̧tti̧mö̧rö̧ tta̧huä̧rä̧cuä̧huä̧ huȩnȩ huo̧juȩti̧nö̧do

25Juhua'a yabonö huo̧juȩti̧nö̧do Jesús:

—Ja̧'hua̧ta̧nö̧ ucuturu pä'ösä, “Däje chahuäcua'ajo, däje chucuäcua'ajo” pä'ömä cua̧mö̧cuä̧rä̧tu̧cuä̧'. Ja̧'hua̧ta̧nö̧ cu̧'ca̧tä̧huä̧ti̧yu̧'i̧nä̧ cua̧mö̧cuä̧rä̧tu̧cuä̧'. Iso päi'önä, ¿cu̧ja̧cuä̧tu̧cu̧mä̧ cu̧cuȩttö̧'i̧nä̧ abonänö micuähuoca'a tä̧ji̧? ¿Cuidepämä cu̧'ca̧tä̧huä̧ti̧yu̧ttu̧'i̧nä̧ abonänö micuähuoca'a tä̧ji̧? 26Ppi̧yu̧ru̧ ju'tojunä co̧'ä̧rä̧tö̧rö̧ topätucui. Jahuätömä ku̧nu̧'i̧nä̧ ku̧no̧co̧tö̧, se'ö'inä se'ocotö, isodenä hua'adö'inä ku̧no̧co̧tö̧. Ja̧'hua̧nö̧ ja̧'a̧nä̧ Cuä'o Dios mo̧ro̧jä̧nä̧ kö̧ jahuätörö ttu̧cuȩ iyö. Ucutumä ppi̧yu̧ttu̧'i̧nä̧ abonänö micuähuotöjä. 27Ja̧'hua̧ta̧nö̧ ucututtu ya̧tȩ rö̧ȩnä̧ a̧mö̧cuä̧rö̧ttö̧mä̧, ¿ucututtu'inä abonänö böo pä'i'ö tä̧ji̧?

28“¿Dä̧bö̧ cua̧mö̧cuä̧rä̧tu̧cuä̧ttö̧, cu̧'ca̧tä̧huä̧ti̧yu̧mä̧? De'a jähuä ȩ'u̧ bahua'a topö amöcuädätucui. Yoröiso aditö'inä aditocö, ö̧'ca̧tä̧huä̧ta̧'i̧nä̧ aditocö ja̧u̧ ȩ'u̧mä̧. 29Ja̧'hua̧nö̧ ja̧'a̧nä̧'i̧nä̧ pä'ösä ucuturu, ru̧hua̧ Salomón, järe ru̧hua̧ ö̧ja̧'a̧nä̧, ö̧'ca̧tä̧huä̧ti̧yu̧ adihuä juäi 'ca̧tä̧hui̧nö̧'i̧nä̧, ȩ'u̧ttu̧'i̧nä̧ abonänö adiumä 'ca̧tä̧huo̧cö̧ pi̧nö̧do. 30Ja̧'hua̧nö̧ ja̧'a̧ttö̧, ja̧u̧ ȩ'u̧mä̧ jitä mo̧ro̧ de'a ka̧cu̧, yo̧ȩi̧ mo̧ro̧ ocuränä cuo'ö icuä̧cuȩ. Ja̧'hua̧ta̧nö̧ ja̧'a̧nä̧ Dios adiu tta̧'ä̧rö̧ ja̧u̧ ȩ'u̧mä̧. ¡Ucutumä adiunämä esetocotöjä! Ucuturu ja̧u̧ ȩ'u̧ttu̧'i̧nä̧ abonänö adiunä tta̧'ä̧rö̧ Diosmä. 31Ja̧'hua̧nö̧ ja̧'a̧ttö̧ ¿Däje tucuäcua'ajä̧ttö̧? ¿Däje tahuäcua'ajä̧ttö̧? ¿Däje tö̧'ca̧tä̧huä̧cua̧'a̧jä̧ttö̧? pä'ö a̧mö̧cuä̧rö̧ päcuhuätucuä'. 32Pi̧jä̧ ttö̧ja̧ korotö Diosrö esetocotömä, ja̧u̧ o'ca juiyönä a̧mö̧cuä̧rö̧ ka̧cuä̧tö̧. Ja̧'hua̧nö̧ ja̧'a̧nä̧, ucutu Cuä'orö mo̧ro̧jä̧nä̧ kö̧rö̧ ku̧nä̧rä̧tö̧jä̧. Ja̧u̧ täcö huo̧jua̧ ucuturu recuä rö̧jö̧mä̧. 33Ja̧'hua̧nö̧ ja̧'a̧ttö̧ Dios Cu̧ru̧hua̧ päi'önä ö̧jä̧cuȩtä̧ usätucui. Churutä pä̧huä̧ rö̧jo̧mȩnä̧ adiunä ka̧cuä̧tu̧cui̧. Ja̧'hua̧nö̧ jȩcu̧'ä̧tu̧cuo̧mȩnä̧, ja̧u̧ o'ca juiyönä cu̧ju̧nä̧rä̧cuo̧tö̧jä̧. 34Ja̧'hua̧nö̧ ja̧'a̧ttö̧ yo̧ȩi̧ mo̧ro̧ 'cuäopä̧cuȩmä̧ cua̧mö̧cuä̧rä̧tu̧cuä̧'. Ja̧u̧nu̧tä̧ yo̧ȩi̧ mo̧ro̧tä̧ 'cuäopä̧cuȩmä̧ kä̧cua̧'a̧. Koro mo̧ro̧'i̧nä̧, koro mo̧ro̧'i̧nä̧ rö̧ȩnä̧ 'cuäopä̧cuȩmä̧ ka̧'a̧, —pä'ö huo̧juȩti̧nö̧do Jesúsmä.

Currently Selected:

San Mateo 6: PIDNT86

Highlight

Copy