San Mateo 7
7
Korotörö suronä päcuhuätucuä'
1Juhua'a yabonö huo̧juȩti̧nö̧do Jesús:
—Korotörö suronä päcuhuätucuä', Dios ucuturu'inä suronä päö juiya pä'ö. 2Korotörö päcuhuätucu ta'anö, ucuturu'inä pä̧cua̧. Iso päi'önä korotörö päcuhuätucu ta'anö, pä̧cua̧ ucuturu'inä. 3¿Tta̧'a̧nö̧ pä'ö tocu'ättö cu̧jä̧hua̧ ö'ärenä i̧so̧'quȩ ji̧'qui̧cha̧jo̧'quȩ ȩca̧'a̧nä̧, ucu'inä cu'ärenä isodä ȩcä̧cu̧jä̧? 4Ja̧'hua̧ta̧nö̧ ¿tta̧'a̧nö̧ pä'ö päcuhuättö cu̧jä̧hua̧rö̧? “Cu'ärenä ȩcö̧ ȩmö̧ chicuacu”, ucutä cu'ärenä'inä isodä ȩcä̧cu̧jä̧. 5¡Yapareu ttö̧ja̧ i̧sa̧jä̧! Äcuomenä ucutä cu'ärettö isodä ȩmä̧u̧ icui. Ja̧u̧nu̧ o'ca'a adiu to̧cu̧'ä̧cua̧jä̧ cu̧jä̧hua̧ ö'ärettö i̧so̧'quȩ ji̧'qui̧cha̧jo̧'quȩ ȩmö̧ cuicua pä'ö.
6“Ja̧'hua̧ta̧nö̧ adihuä juäi Diosrö iyähuä juäi cuiyätucuä' ä̧hui̧ri̧tö̧rö̧. Jahuätömä koronö ucuturutä yö̧'ö̧ tticu'a̧nö̧ ja̧'a̧. Ja̧'hua̧ta̧nö̧ adihuä juäi cu̧rä̧u̧du̧ cu̧chi̧tö̧rö̧ cuiyätucuä'. Jahuätömä ja̧'a̧tä̧ 'cuȩ'cu̧ tticu'a̧nö̧ ja̧'a̧.
Adiu jäecuänä iyö Diosmä
7“Jä'epätucui. Jacuhue'ätucumä, cuȩmä̧cuo̧tö̧jä̧. Usätucui. Cusätucumä, cu̧'o̧cui̧'ä̧cuo̧tö̧jä̧. Äpate ä'ca 'ta'tapätucui. 'Ta'tacuätucuttumä, bahuecuächäcua'a. 8Ya̧tȩ jäepöttömä, ȩmä̧cua̧. Ja̧'hua̧ta̧nö̧ ya̧tȩ usuttumä, ö̧'o̧cui̧'ä̧cua̧. Ja̧'hua̧ta̧nö̧ ya̧tȩ äpate ä'ca 'ta'taöttömä, äpate bahuecuächäcua'a.
9“¿Ucututtu ya̧tȩ i̧tti̧mä̧ jä'orö i̧ri̧si̧ jäepomenä, ido'qui iyaji tä̧ji̧? 10Ja̧'hua̧ta̧nö̧ po̧i̧ jäepomenä, ¿ä̧ca̧rö̧ iyaji tä̧ji̧? 11Ucutu suronä jȩä̧cuä̧huä̧ ttö̧ja̧'i̧nä̧ cui̧tti̧mö̧tu̧cu̧ru̧mä̧ adiutä iyähuänä huo̧juä̧tö̧jä̧. Ju̧huȩnȩ abonänö Cuä'o Dios mo̧ro̧jä̧ra̧'a̧ kö̧mä̧, adihuä juäi i̧yä̧cua̧ churutä jä'epätörömä.
12“Ja̧'hua̧nö̧ ja̧'a̧ttö̧ korotö ucuturu jȩtta̧ päcuhuätucumä, jahuätörötä ä'canä adiu jȩpä̧tu̧cui̧, ucutu jȩcu̧'ä̧tu̧cu̧ ta'anö jȩtta̧ pä'ö ucuturu. Iso päi'önä Moisés hueähuä huȩnȩ'i̧nä̧, Dios i̧huȩnȩ jiäcuähuä isotö pättinö huȩnȩ'i̧nä̧ ja̧'hua̧nö̧ päa'a, —pä'ö huo̧juȩti̧nö̧do Jesús.
Äpate ji̧'qui̧cha̧jate huȩnȩ
13Juhua'a yabonö huo̧juȩti̧nö̧do Jesús:
—Äpate ji̧'qui̧cha̧jatenä do'ächätucui. Suronä jȩpä̧tö̧ totte'äcuämä mä̧nä̧'i̧nä̧, äpate'inä cähuea'ado. Ju̧huä̧mä̧nä̧ recuätö 'chä̧tö̧. 14Pärocua'anä kä̧cuä̧huä̧ i'co rȩbȩä̧cuä̧huä̧mä̧ mä̧nä̧'i̧nä̧, äpate'inä ji̧'qui̧cha̧ja̧'a̧do. Ju̧huä̧mä̧ a̧'u̧cu̧nä̧tä̧ po̧cui̧pä̧tö̧do.
Koro dau u̧huä̧ju̧ topö ttu̧huo̧ju̧'a̧nö̧
15“Korotömä “Dios i̧huȩnȩ ji'ähuätöjä” pätta'anä, yapareu jittähuomenä cuesetätucuä'. Jahuätömä ucuturu ichö o̧vȩja̧stö̧ jȩttö̧'a̧nö̧ jȩpä̧tö̧ yapareu. Ji̧nä̧ isocu ä̧hui̧ri̧tö̧ ra̧huä̧rä̧tö̧ jä̧'i̧nö̧'a̧nö̧ huotö. 16Ucutumä jahuätö jȩttö̧ topö cu̧huo̧juä̧cuo̧tö̧jä̧. Iso päi'önä uva sa̧dö̧ juäi huȩjo̧cö̧do so̧i̧nä̧mä̧. Ja̧'hua̧ta̧nö̧ soadenämä huȩjo̧cö̧do araramä. 17Ja̧'hua̧nö̧ ja̧'a̧ttö̧ o'ca juiyönä adihuä juäi daumä, u̧huä̧ju̧ adihuä juäitä huȩjö̧do. Ja̧'hua̧ta̧nö̧ o'ca juiyönä suräjuäi dau, u̧huä̧ju̧ suräjuäitä huȩjö̧do. 18Iso päi'önä adihuä juäi dau, u̧huä̧ju̧ suräjuäimä huȩjo̧cö̧. Ja̧'hua̧ta̧nö̧ suräjuäi dau, u̧huä̧ju̧ adihuä juäimä huȩjo̧cö̧. 19O'ca juiyönä dauhuiyä adihuä juäi huȩjo̧cö̧mä̧, ku̧'u̧ icu, ku tticu'a̧nö̧ ja̧'a̧ ocuränä. 20Ja̧'hua̧nö̧ ja̧'a̧ttö̧ ja̧'hua̧nö̧ jȩpä̧tö̧ topö cu̧huo̧juä̧cuo̧tö̧jä̧ jahuätörö. —pä'ö huo̧juȩti̧nö̧do Jesús.
O'ca toi'önä mo̧ro̧jä̧ra̧'a̧ 'cho̧co̧tö̧
21Ja̧'hua̧ta̧nö̧ Jesús pä'inödo:
—Yotöcunä ttörö pä'ätömä “Chu̧ru̧hua̧, Chu̧ru̧hua̧” do'ächocotö mo̧ro̧jä̧ra̧'a̧. Chä'o mo̧ro̧jä̧ra̧'a̧ kö̧rö̧ pä̧huä̧ rö̧jo̧mȩnä̧ jȩpä̧tö̧tä̧ dottächäcuotö. 22Ja̧u̧nu̧ mo̧ro̧ päi'omenä, recuätömä ttörö pättäcuotö: “Chu̧ru̧hua̧, Chu̧ru̧hua̧, ucu cui̧mi̧nä̧ ucuocuinätöjä. Espíritus suropätörö'inä jȩpö̧ icuinätöjä ucu cui̧mi̧nä̧. Ja̧'hua̧ta̧nö̧ rö̧ȩnä̧ ttö̧ja̧ ttieru juäi jȩpi̧nä̧tö̧jä̧ cui̧mi̧nä̧.” 23Ja̧'hua̧nö̧ pättomenä, chä̧dä̧tä̧cua̧sä̧: “Yoröiso jȩru̧pa̧sä̧ ucuturu. Ucutumä suronä jȩpä̧tö̧mä̧ ttöttö'inä i̧mi̧cu̧nä̧ 'quȩ'i̧pä̧chä̧tu̧cui̧.”
Isode ttaditinö huȩnȩ huo̧juȩti̧nö̧do
24“Ja̧'hua̧nö̧ ja̧'a̧ttö̧ ya̧tȩ ttö pädömä ä̧ju̧cu̧ jȩo̧mȩnä̧, ka̧ra̧ rö̧ȩnä̧ huo̧jua̧ ojusode inähuä huäme aditinö jä̧'i̧nö̧'a̧nö̧ hua̧. 25Aditinö o'ca'a ajiya rö̧ȩnä̧ ichina'ado. Ajehuiyä'inä suhuädi'ina'ado. Kä̧ru̧'coppa'inä rö̧ȩnä̧ kä̧ru̧'co̧hui̧na̧'a̧do. Ja̧'hua̧nö̧ ja̧'a̧nä̧ juhuode, inähuä huäme adicuodemä yoröiso ma̧ä̧cho̧ca̧'a̧ ji̧na̧'a̧do. 26Ja̧'hua̧ta̧nö̧ ya̧tȩ ttö pädömä ä̧ju̧cu̧ jȩpo̧cö̧mä̧, ka̧ra̧ yoröiso jȩru̧pa̧mä̧ ojusode rȩba̧nä̧ aditinö jä̧'i̧nö̧'a̧nö̧ hua̧. 27Aditinö o'ca'a ajiya rö̧ȩnä̧ ichina'ado. Ajehuiyä'inä suhuädi'ina'ado. Kä̧ru̧'coppa'inä rö̧ȩnä̧ kä̧ru̧'co̧hui̧na̧'a̧do. Ja̧'hua̧nö̧ ja̧'a̧nä̧ juhuode rȩba̧nä̧ adicuodemä, päcua'acutä ma̧ä̧chi̧na̧'a̧do, —pä'ö huo̧juȩti̧nö̧do Jesús.
28Jesús ja̧'hua̧nö̧ huo̧juȩtö̧ cädomenä, ä̧ju̧cui̧nä̧tö̧mä̧ to̧pä̧rö̧ ka̧cui̧nä̧tö̧do u̧huo̧juȩtä̧ji̧mä̧ amöcuädö. 29Ja̧u̧mä̧ hueähuä huȩnȩ huo̧juȩtä̧tö̧ ttu̧huo̧juȩtö̧'a̧nö̧ huo̧juȩto̧cö̧ pi̧nö̧do. Ja̧u̧mä̧ rö̧ȩnä̧ huo̧juȩcu̧nä̧ huo̧juȩti̧nö̧do.
Currently Selected:
San Mateo 7: PIDNT86
Highlight
Share
Copy
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
